Shapitre Wa Chinan
‘Kurish ni Aspiritu Ayimp’
1. Ov mulong wak tufanyidina kamu kubangin cha pakampwil mujikit wa aspiritu ayimp?
ANTU avud akat kudiulang chitongijok cha kwel anch kuding aspiritu ayimp. Pakwez winou udiap mulong wa kuswimbul. Antu itiyina ap bwat, aspiritu ayimp adiaku, ni akat kupakish kusadish ulabu pa muntu mwin mwawonsu. In kumwifukwil Yehova kiyepinap ku mulong winou. Awiy adi kamu chakin diloz diau dia kusambish. Mupostol Paul utubabeshin piur pa mulong winou palondilay anch: “Mulong etu kiturishinap nau antu a mijimbu ya mbij, pakwez tukat kurish nau in kutakel, nau in ulabu [akad kumekan ku mes], [maulabu mayimp ma muspiritu, NW] ayikedila pa mangand minam mu chirung chinech cha mididim, ni yizwepwepu yikweta ukash mwiur.” (Efes 6:12) Pa chirung chetu usu wa aspiritu ayimp washiken kal kamu ndond yimwing ya piur nakash mulong Satan amopatin kal mwiur ni ukwet ujim nakash, chijay anch kwamushadil kal kachisu kakemp.— Kujingunik 12:12.
2. Ov mutapu ik chitwishikina kuyipandakan aspiritu ayimp ayipandakenamu antu?
2 Ov chitwishikin chakin kuyipandakan aspiritu akweta usu upandakena wa antu? Mwawiy, pakwez chitwishikin ching kusu anch twengamin nich muchim wetu wawonsu padi Yehova. Tufanyidin kumutesh ndiy ni kuziyil ku Dizu diend. Anch twasal mwamu, tukutwish kwipuk yibudikin yivud yiyimp ya ku mujimbu, ya mu yitongijok, ya mu yovil ni ya mu manangu yikwetau antu adia mwishin mwa usu wa Satan.—Jakobu 4:7.
In Kuyikel Mangand Adia Mwiur
3. Ov anany apompatinay kamu Satan nich kuswej, ni mutapu ik uyipompatinay?
3 Yehova ukat kutushimunin nawamp kamu mwikadil wa mangand mud mutapu umamenay kudiokal mwi ndond yizambukina nakash mwiur. Wamwinkisha mupostol Yohan chishimushimu mumumekeshinau Satan mud “nnak mujim nakash usuz.” Nnak winou wadinga tayad mulong wa kuzanon, anch chitwishikin, Want wa Nzamb wa Umesia kapamp kamwing piwavadikina mwiur mu 1914. Chakanganyay, Satan wasarumuna kuzengol kumwing kwa chisum pantaliken nau antimesh amekena a Want winou. (Kujingunik 12:3, 4, 13, 17) Ov mutapu ik welay Satan kurish njit jinej? Chidi kusutil antimesh end a chimuntu.
4. Ov nany udia musul wa dikand dia winyikel wa antu, ni mutapu ik twija chinech?
4 Chad amuleja kand Yohan nnam umwing wa mwisuku ukweta mitu sambwad ni misengu dikum, nnam umwing ukweta ulabu wa kuyikel “michid yawonsu, ni majuku mawonsu, ni jindim jawonsu.” Nnam winou ufanakeshin ditenchik dia chipolitik diakabuj dia mangand mawonsu. Amwijikisha Yohan anch “nnak mujim [Satan Djabul] winou wamwinkisha nnam winou ukash wend, ni ditand diend ni ulabu ujim.” (Kujingunik 13:1, 2, 7) Mwawiy, Satan ndiy musul wa ukash ni ulabu wa winyikel wa antu. Chawiy lel, mud mwafunday mupostol Paul, ‘in kuyikel akin a mangand’ adi “aspiritu ayimp adia mwiur,” awiy atakedila winyikel wa antu. Antu awonsu asotina kumwifukwil Yehova afanyidin kwijik kurumburik kwawonsu kwa chom chinech.—Luka 4:5, 6.
5. Ov yom ik yiyikumangejidinau in kutakel a chipolitik katat?
5 Ap anch in kutakel avud afil mu kan anch adi antu a Nzamb, kwikil muchid ap kusu umwing uziyidila winyikel wa Yehova ap winyikel wa Mwant wend utondinay, Yesu Kristu. Awonsu akat kurishin ulabu wau ayinau nich usu wau wawonsu. Nlel, mud muchilejena rusangu ridia mu Kujingunik, ‘mazu mapepidilau kud ayilembil’ makat kuyikumangej ant a mangand mulong wa “kurish njit pa dichuku dijim dia Nzamb wa Dikand diawonsu” ku Harmagedon. —Kujingunik 16:13, 14, 16; 19:17-19.
6. Ov mulong wak tufanyidina kubabal chakwel kwipuk kwikal asadidilau mulong wa kukwatikesh ditenchik dia Satan?
6 Dichuku ni dichuku, mwom wa antu udi wasidinau nich ukankuny wa chipolitik, wa mashakamin, wa wingend- a- mushing, ni wa milong ya difukwil yikata kwauril dijuku dia ukamuntu. Mu ukankuny winou, chiswapel kud antu kumekesh katond—mu kulond ap mu milad yikwau—pantaliken nich muchid, kabil, rudim, ap mashakamin ma chisak mudiau. Ap anch antu kadiap kapamp kamwing mu ukankuny kanang, chisu chivud chikat kumekan anch adi ku mutambu umwing ap ukwau. Chawiy lel wikalap nchik mulong ufidilau, ikalap nchik muntu ap mulong wikadidilau atubwebu, ov nany ukwatikeshinau chakin? Baibel ulondil kamu patok anch: ‘Ngand yakabuj yidi mu chikas cha Satan.’ (1 Yohan 5:19) Ov, mutapu ik lel, tukutwisha kwipuk kwikal arumbwilau pamwing nau antu akwau? Ching kamu anch twakwatikesh sens Want wa Nzamb ni kushal kamu akad kwipachik mu ukankuny wa mangand.—Yohan 17:15, 16.
Mipit Yijingamina ya Satan
7. Ov mutapu ik umekena manangu ma Satan mu kusadil kwend relijon wa makasu?
7 Mu yirung yin yawonsu ya chishimu, Satan wasadila kuzengol kwa mu mazu ni kwa ku mujimbu mulong wa kuyirumbul antu kudiokal ku difukwil diakin. Wasadila kand mitapu yikwau ya mipit yijingamina—yisalijok ni mipit yimwing yijingamina. Wakwatin kal nich manangu antu avud mu mididim kusutil ku relijon wa makasu, ni kuyitongish anch akat kumusadil Nzamb. Antu aburedina ronganyin rakin ra Nzamb ni rukat mulong wa uyakin, akutwish kwikal apwichikina nich yifuk yimwing ya relijon ya mayikiyik ni ya mu yovil ap kusambish kushimokin midimu ya yishimushimu. (2 Tesalonik 2:9, 10) Pakwez atubabeshin anch ap bil pakach pa antu adia mu difukwil diakin, “amwing akez kulik ritiy rau . . . , akez kuziyil ku miku ya kudimban ni kubangaku malejan ma ayilembil.” (1 Timote 4:1) Ov mutapu ik chikutwisha kushiken?
8. Ov mutapu ik ukutwishay kutushadishin Satan mu relijon wa makasu ap anch twadinga ni kumwifukwil Yehova pasak?
8 Nich kubabal nakash, Djabul ukat kusadil kuziok kwetu. Ov tuchikwet wom wa muntu? Ang mwawiy, tukutwish kwikal ni yipwichik yidiokila kud anamakwetu ap amutej netu chakwel twibomba nau mu yisalijok yidiokila ku relijon wa makasu. Ov tukweting chibud? Ang mwawiy, tukutwish kujiman patwinkinau yiyul ap anch antu akwau alik kwitiy yitongijok yetu. (Jinswir 15:10; 29:25; 1 Timote 6:3, 4) Pa ndond pa kurijek yitongijok yetu chakwel kulondul chilikej cha Kristu, tukutwish kusot kutesh muntu ‘usangareshina matu metu’ nich kulond anch chifanyidin kusu kutang Baibel ni kwikal ni mwom umwing wishitwila. (2 Timote 4:3) Anch tumwifukwidilap Yehova mud mwitinay ndiy kusutil ku Dizu diend ni dirijek diend, twinungina mu chisak chikwau cha difukwil ap kusu kulond anch tudi kwetu yid ya relijon wetu, chinech chidiap cha usey kud Satan.
9. Ov mutapu ik ukatay Satan kusadil maku ma kusotan chakwel kushiken rusot rend?
9 Nich kubabal, Satan ukat kuyibachikang kand antu kusangarish nayimp maku ma chivadik. Ukat kusadil maku ma kusotan. Antu avud mu mangand chidiburilau kwishitul kulondidilay Baibel, amening kusotijan kwa antu akad kwatijan mud kwisangarish kumwing kufanyidina ap mud mutapu wa kumekesh anch adi amakurump. Ing chidi mutapu ik kud antu atijadina? Avud akat kwend masandj. Ap anch mwikil makaj mu uruu wau, antu avud akimbining kujip uruu ap kwaurik chakwel amana mutapu wa kwachik ni muntu mukwau. Rutong ra pansh pansh ra Satan ridi ra kuyibachik antu kushakam mulong wa kwisangarish kamu katat, kuyisal adiulang yibudikin yiyimp ya machuku malemp pikil kusu piur pau ayinau ni antu akwau pakwez nakash kamu piur pa urund wau nend Yehova ni Mwanend. —1 Korint 6:9, 10; Galatia 6:7, 8.
10. Ov mitapu ik yikatay kupakish Satan kusadil chakwel kurumbul yitongijok yetu pantaliken ni masandj ni ubaj?
10 Maku makwau ma chitangil madi maku ma kwipuwangesh. Kwipuwangesh kuwamp kukutwish kwikal kwiswedish kwa mujimbu, mu manangu ni yovil. Pakwez mutapu ik tukata kwakul anch Satan wasadil nich kubabal yisu ya kwipwish usweral chakwel kupakish kudiosh yitongijok yetu kuyitwal kulemp ni ya Nzamb? Chilikej, twij anch Yehova ukisin masandj ni ubaj. Anch masinema, maprogram ma televizion, ap masengan ma teyatre makat kulejan yom yiney, ov tukat kushakamang kamu butwaa ni kudandamen kuyital? Tuvurikany kand, anch Satan ukez kusal yawonsu yikutwishay chakwel yom mud yiney yikala yirumbukina ni kurumbul nakash chisu cha kusheshik kwend pichikala kal piswimp, mulong “antu ayimp nau in akwau in kufa mu kan akez kuya kurutu nakash mu kuyip, akez kuyidimb antu avud, chad niyau akez kuyidimb kand.” (2 Timote 3:13) Chawiy lel tufanyidin kubabel yitongijok ya Satan chisu chawonsu. —Disambishil 6:13; Kuseng 11:5; Rom 1:24-32.
11. Ov mutapu ik ukutwishay muntu wija uyakin piur pa ritiyin aspiritu kuwil mu mupit ang kababelap?
11 Twij kand anch awonsu akata kusadil mutapu win wawonsu wa ritiyin aspiritu—kupong, kusadil ulaj, ap kupakish kwisamb nau afu—adi atakanena kud Yehova. (Kuvurik Yijil 18:10-12) Nich yitongijok yiney mu manangu, tukez kutongap ja kuya kud in kupong, ni tufanyidinap chakin kuyak antu inay mu chikumbu chetu chakwel asala yip yau ya udemon. Ov tukuyitesh ang amekan ku televizion wetu ap ku Internet? Ap anch tukwitiyap ap pakemp anch atwoka kud mbuk, ov tukutwish kumukas mwanetu uchivadikina tupud mwi mbund ap ku chikas, nich chitongijok cha kwel anch yikumulam mwan ku uyimp? Chitwija anch Baibel ukandin kukayan, ov tuwapidil kumushil muntu usadila pamwing nau ayilembil ayikela manangu metu mu chisu kanang?—Galatia 5:19-21.
12. (a) Ov mutapu ik usadidinau mizik mulong wa kukudish mudi etu yitongijok yitwija anch yidi yiyimp? (b) Ov mutapu ik ukutwisha maswin ma muntu, mutapu wend wa kukil, ap mutapu wend wa kulond kumekesh kubaz antu ashicha mutapu umwing ukisinay Yehova? (c) Ov chom ik tufanyidina kusal anch tusotin kwipuk kuwil mu mipit yijingamina ya Satan?
12 Baibel ulondil anch kusotan ni kwijond kwa mitapu yin yawonsu ni (yitongijok yijondila) yifanyidinap ap pakemp kwikal pakach petu. (Efes 5:3-5) Pakwez mutapu ik tukutwisha kusal ang yom ya mutapu winou yidi mu mizik yimwing yisangarishina kamu nakash, mu muminy umwing ukatishena kamu nakash, ap mutapu umwing wa kuwang uvuvurishina ubaj? Ov tukusambish kuchirikin mazu makasikeshina kusotan kwa pol pa uruu? Ap kand chitwija anch tufanyidinap kwilikej mutapu wa kushakam wa antu akata kwipan mu yom mud yiney, ov tukwet chibachikin cha kwimekesh mud awiy nich kwilikej mutapu wau wa kudjal, mutapu wau wa kukil, ap mutapu wau wa kulond? Satan ukwet mipit yijingamina yikatay kusadil chakwel kuyipwitin antu ku mutapu wend wa kutong wijondila! (2 Korint 4:3, 4) Chakwel kwipuk kwikal pakach pa antu awidila mu mipit yend yijingamina, tufanyidin kwiyep kulondul mangand. Tufanyidin kwijik anany adia “anyikel a mangand adia mu mididim” ni kujijaman kurish nich usu wau. —1 Pita 5:8.
Awanyishinau Mulong wa Kwikal in Kupandakan
13. Ov mutapu ik chitwishikina kud etu awonsu, nich kuburen kwetu kuwanyin, kupandakan mangand mayikedilay Satan?
13 Kurutu kwa rufu rend, Yesu wayileja apostol end anch: “Jamishany! Am napandakan kal kuyip kwa mangand.” (Yohan 16:33) Ni yawiy ela kwikal in kupandakan. Kupwa kwa mivu piswimp 60, mupostol Yohan wafunda anch: “Ov, nany ukutwisha kupandakan yom ya mangand? Ching kusu muntu witiyina anch, Yesu udi Mwan a Nzamb.” (1 Yohan 5:5) Tukat kumekesh ritiy ra mutapu winou anch twaziyil kwi mbil ja Yesu ni kwengamin pa Dizu dia Nzamb, mud kamu mwasalay Yesu. Ov chom ik kand chikwau chitufanyidina kusal? Tufanyidin kushal kamu piswimp ni chikumangen Chitakedilay. Anch twasal chitil, tufanyidin kamu kukarumuk nich muchim umwing ni kulik kusal yom yiyimp ni kukimb dilikishin dia Nzamb pa dishin dia yakupesh ya Yesu. Mu mutapu winou, yikalap nchik kuburen kuwanyin kwetu ni yilim yetu, niyetu tukutwish kwikal in kupandakan. —Kuseng 130:3, 4.
14. Tang Efes 6:13-17, ni sadil yipul ni mifund yiletinau mu paragraf winou mud dishin dia kwisambin yiyukish ya chikunku ni chikunku cha yom yiney ya njit ja muspiritu.
14 Chakwel kupandakan mangand, tufanyidin kudjal “yom yawonsu yikat kupanay Nzamb ya kurish nich njit,” wakad kudiwul chikunku ap kusu chimwing cha yom yiney. Buril amboku Baibel wey pa Efes 6:13-17, ni kutang kurumburil kwa yom yiney ya kurish nich njit. Chad, pa kwakul ku yipul yidia kwishin ey, shinshikin mutapu ukutwisha kutambul ukwash wa dichidij didiokila ku chikunku chimwing ni chimwing cha yom yiney ya njit.
“Ikasany uyakin mwi mbund kwikal mud nshipu”
Ap anch twij kal uyakin, ov mutapu ik utukingina dilejan diakad kujing, kutongijokin uyakin wa Baibel, ni kwikal ku yikumangan? (1 Korint 10:12, 13; 2 Korint 13:5; Filip 4:8, 9)
“Kutentam kwikal mud rukibu rikasinau pa ntul.”
Ov nany upanina chilikej cha kutentam kwinoku? (Kujingunik 15:3)
Lejan nich chilikej mutapu ukutwishay muntu ulikina kuziyil yijil ya Yehova mulong wa kulik kukudish rukat ra jinjil jend kwiletin yikokujol yivud ya muspiritu. (Kuvurik Yijil 7:3, 4; 1 Samwel 15:22, 23, NW)
“Mushiku wa kurumburil rusangu ruwamp ra chisambu ku mend yen kwikal mud yisapat”
Ov mutapu ik chidia dichidij kud etu anch mend metu makat kututwal ni kwisamb nau antu piur pa yitenchik ya Nzamb mulong wa chisambu? (Kuseng 73:2, 3; Rom 10:15; 1 Timote 5:13)
“Ritiy kwikal mud rukibu ra ku chikas”
Anch tukwet ritiy rijijamena kamu nawamp, ov mutapu ik tukusala anch antu amwing akat kusal usu wa kutek chinshilend mudi etu ap kutukwatish wom? (2 Ant 6:15-17, NW; 2 Timote 1:12)
“Dipandish kwikal mud chiful”
Ov ruchingej ra dipandish rimukwashining nchik muntu kwipuk mupit wa kuwil mu kutongamin nakash mapit ma mujimbu? (1 Timote 6:7-10, 19)
“Mpak ya musamun ya muspiritu”
Ov pisu tufanyidina kudandamen kwengamin piturishina nich yoziu yasidina mwom wetu wa muspiritu ap wa antu akwau? (Kuseng 119:98; Jinswir 3:5, 6; Mateu 4:3, 4)
Ov chom ik chikwau chidia cha usey chakwel kupandakan mwi njit jinej ja muspiritu? Ov mu chilik ik tukutwisha kuchisadil chisu ni chisu? Mulong wa nany? (Efes 6:18, 19)
15. Ov mutapu ik tukutwisha kwikal asambishina njit jinej ja muspiritu?
15 Mud amasalay a Kristu, tudi mu chisak chipandakena kujimb cha amasalay arishina njit ja muspiritu. Ang twadandamen kushal ababela ni kusadil kamu mutapu uwamp yom yawonsu ya kurish nich njit yiletinay Nzamb, tukez kuwin mwi njit jinej. Pakwez, tukez kwikal ukwash umwing ukasikeshina kud ambayetu atushalapol a Nzamb. Tukez kwikal kamu tayad ni akweta impu ya kusarumun njit, nich kupalangesh rusangu ruwamp ra Want wa Umesia, winyikel wa mwiur upompatinau kamu nakash nich chisum kud Satan.
Misamb ya Kuchirikin
• Ov mulong wak ulikiningau in kwifukwil a Yehova kwiyandjik mu milong ya mangand?
• Ov mipit ik yijingamina yikatay kusadil Satan chakwel kuyiwish in Kristu muspiritu?
• Ov mutapu ik utulamina yom ya kurish nich njit ja muspiritu yipaninay Nzamb mwi njit jetu ja muspiritu?
[Chipich chidia pa paj wa 76]
Michid ayikumangejin mulong wa Harmagedon