Ngond wa 2

Yesu wading ni ranaken mulong wa antu akwau. Antu amana rukat radingay nich piur pau ni itiya uruu wa Want. Anch niyetu twakudish ranaken rijim mulong wa antu, tukutwish kuyikwash chisu tudia mu mudimu wa kulejan. Yom ik yikutwisha kutukwash chakwel tuyimekeshina antu ranaken mu mudimu wa kulejan? Tufanyidin kwitek pa ndond ya antu tutanina mu mudimu wa kulejan ni kuyisadin mu mutapu tukatina anch niyetu atusadina. (Mat. 7:12) Tufanyidin kushinshikin maswir ma muntu ni muntu. Kangal wasadin mambamb ma mutapu umwing kudi muntu mwawonsu tutanina mu mudimu wa kulejan. Tufanyidin kusal usu wa kwijik mashakamin ni yitongijok ya muntu ni muntu. Ufanyidin kumwipul yipul nich nkeu mulong wa kwijik chom kanang piur pa muntu winou ni yom yitiyijinay. (Jnsw. 20:5) Anch twipul yipul, tuyinkishin antu mutapu wa kutulej mulong wak akwet kuswir kwa kutesh rusangu ruwamp. Anch twijik yom yiney, tukutwish kumekesh ranaken mulong wa maswir mau ma pakampwil ni kuyikwash mudi mwasalay Yesu.​—Ilakej ni 1 Korint 9:19-23. w19.03 20 par. 2; 22 par. 8-9

Adam ni Ev amekesha anch kadingap kasangaredina yom yawonsu yasalay Yehova mulong wa awiy. Umwing ni umwing wetu ukwet mutapu wa kumekesh anch kadiap mudi awiy. Tukat kujikitish mulong wa chom chawonsu chasalay Yehova mulong wetwetu. Kusutil kutambul dibatish, tukat kumulej Yehova anch twitiyijin anch ndiy ukweta ulabu wa kututekin mbil piur pa yom yidia yiwamp ni yidia yiyimp. Tukat kumekesh anch tumukatin ni tumuchingejidin Tatukwetu. Yakamish tukata kurish nich kupwa kwa kutambul dibatish, yidi anch tufanyidin kushakam dichuku diawonsu kukwatijan ni mbil ja Yehova, kadiap jetwetu ayinetu. Mamiliyon ma atushalapol a Nzamb makwet mashakamin ma mutapu winou. Niyey ukutwish kwikal mudi awiy anch wadandamen kukudish mutapu wey wa kutesh Dizu dia Nzamb, Bibil; kukumangan chisu chawonsu pamwing nau akadivar ni anambaz ney; ni kulejan nich mushiku yom yiwilejina piur pa Tatukwey mwin rukat. (Heb. 10:24, 25) Chisu ukwatina mipak, tesh yiyul yikwinkishinay Yehova kusutil Dizu diend ni dirijek diend. (Isay 30:21) Chawiy, anch wasal mwamu ukutwish mu mwom wey.​—Jnsw. 16:20. w19.03 7 par. 17-18

Yehova ukat kutwinkish yakudia yivud ya mu spiritu. Chilakej, tutambwiling mafundish mawamp kusutil yikumangan yetu, magazet metu, ni tupend twetu twa web. Ov, wateshinap kal diskur, ap watanginap kal mutu wa mulong kanang, ap kutal télédiffusion ni walond anch: ‘Yawiy yom nading kamu niswirikedina’? Mutapu ik tukata kumekesh kujikitish kudi Yehova? (Kol. 3:15) Mutapu umwing wa kumujikitish chisu chawonsu mulong wa yipan yiney yiwamp udi kusutil malembil. Tukutwish kand kumekesh kujikitish kudi Yehova chisu tudandamedina kulam ndond yetu ya difukwil yinangina. Tukat kwipan chisu chawonsu mulong wa kunangish ni kulam nawamp Yot yetu ya Want, ni akadivar akata kusadin yom ya kujimbish nich mazu ni yom yikwau yikatau kusadin mu chikumangen afanyidin kuyilam nawamp. Anch twalam nawamp Yot yetu ya Want, yikutwish kusal mivu yivud ni yikwitap midimu yivud mulong wa kuyirijek. Anch twasal mwamu, tukutwish kulam nfalang jikutwisha kukwash kutung nich ni kurijek kand Yot ya Want ya pa mangand mawonsu. w19.02 18-19 par. 17-18

Job wasutisha chisu chivud mulong wa kushinshikin yitang yipandikena kuwap ya Yehova. (Job 26:7, 8) Wova wom nakash patongijokinay piur pa divu, diur, madj ni chidjimin cha nzaj, chawiy wajingunina anch wading wij yom yikemp piur pa yom yivud yatangay Yehova. Wakwata kand nich usey mazu malonday Yehova. Job walonda piur pa mazu ma Nzamb anch: “Nikat kulimish mu muchim wam mazu mend.” (Job 23:12) Job washimoka nakash piur pa Yehova ni wamulimisha chipandikena. Wamukata nakash Tatukwend Yehova ni wakata kumusangaresh. Mudi chibudikin, Job wakwata mupak wa kulam kushinshaman kwend. Tufanyidin kusal mudi mwasalay Job. Etu twij yom yivud nakash piur pa yitang kusutamu antu a pa chirung cha Job. Ni tukwet Bibil wakabuj mulong wa kutukwash kumwijik kamu Yehova nawamp. Yom yawonsu twilejina mu Bibil yikutwish kusal anch twova wom mu muchim wetu. Wom ni kalimish ketu mulong wa Yehova, yikutwish kutubachik kumukat, kumuziyin ni kukudish impu yikash ya kulam kushinshaman kwetu.​—Job 28:28. w19.02 5-6 par. 12

Kudiosh pakur, antakel a mangand akat kuyizengol atushalapol a Yehova. Akutwish kutufish nich anch tusadin ‘yom yiyimp,’ pakwez diyingishin diakin disadina anch atukis didi mulong tukat “kumuziyil Nzamb kupandikan kuyiziyil antu.” (Mid. 5:29) Akutwish kutuzengol, kututek mu rukan ap kand Kutubul. Pakwez nich ukwash wa Yehova, tukutwish kudandamen kwikal itudishina chikalap nchik yoziu yikutwisha kutushiken. Tushinshikinany chilakej chatushilau kudi in Hebereu asatu ading mu winkwal​—Hanania, Mishayel, ni Azaria. Amuleja mwant nich kwidutish mulong wak kafanyinap kwifukwil mukish wasalay. Awiy itiya yom yawonsu yafanyinay Yehova kulikidil anch yiyishikena. (Dan. 3:1, 8-28) Anch kushinshaman kwetu mulong wa Nzamb akupak, mutapu ik tukutwisha kwimburij chilakej cha in Hebereu inay asatu? Tufanyidin kumuchingejin Yehova nich kwikepish anch ndiy ukutwish kutulam. (Kus. 118:7) Tufanyidin kuyakul antu atufishina nich anch tusadin yom yiyimp nich kwitudish ni kalimish. (1 Pita 3:15) Ni tufanyidinap ap pakemp kusal yom yikutwisha kuyipish urund wetu wa piswimp ni Tatukwetu wa rukat. w19.02 10-11 par. 11-13

Tukutwish kukasikesh kutakaman kwetu kusutil kutongin pa ruchingej tukweta mulong wa yakupesh ya difut yapanay Kristu mulong wetwetu. (Yoh. 3:16; Efes 1:7) Pa chisu cha Chivurikish, tufanyidin kumekesh kujikitish nakash mulong wa difut. Pa chisu chinech, sal usu wa kutang Bibil piur pa Chivurikish ni tongijokin nakash piur pa yom yasadika piswimp ni Yesu kufa. Kupwa pitukukumangana mulong wa Chivurikish, tukutesh nawamp chirumburikina yijingidij yikatau kusadin ku Chivurikish ni mutapu umekeshina yom yiney kujimb kwa difut. Anch twatesh nawamp yom yasalay Yehova ni Yesu mulong wetwetu ni kuman mutapu yitukwashina etu ni antu tukatina, ruchingej retu mulong wa machuku ma kurutu rikwikal rikash, ni tukwikal ni kutakaman kwa kujijaman djat ni kwinsudien chikalap nchik yakamish turishina nich. (Heb. 12:3) Tujikitishin nakash mulong Yesu udandamedin kumekesh mikadil yiney mudi Mwin Kupesh Mujim udia mwiur, ukata kutulondil! (Heb. 7:24, 25) Mulong wa kumekesh kujikitish kwetu kupandakena, tufanyidin kusal nich kushinshaman Chivurikish cha rufu ra Yesu mudi mwalejanay kusal.​—Luka 22:19, 20. w19.01 22-24 par. 8, 10-11

Yehova watwinkishin kal etu awonsu mutapu wa kumushiman. Yakul yetu tupanining ku yikumangan yidi pakach pa “yakupesh ya kushiman,” ni kwikil muntu ukutwisha kupan yakupesh yiney pa ndond yetu. (Heb. 13:15) Ov, Yehova witining yakupesh ap yakul ya mutapu umwing kudi umwing ni umwing wa pakach petu? Bwat, kakusalangap mwamu! Ufanyidin kuman yikumangan mudi yakudia udila pamwing ni arund awamp. Tong bil mudi anch arund amwing a mu chikumangen atenchik mulong wa kusal kamusambu kanang ni akulej anch ey ukwisuk yakudia yimwing. Mutapu ik ukwiyova? Ukwiyakamishaku pakemp, pakwez ukusal usu wa kwisuk kamu yom yikutwishau kusanger antu awonsu. Yehova ukat kututazuk ku tebur wizwila too nich yakudia yiwamp ku yikumangan yetu. (Kus. 23:5; Mat. 24:45) Ni ukat kusangar nakash anch twapan kachipan kakemp kukwatijan ni usu wetu. Chawiy rijek nawamp yikumangan ni akul tupamp tuvud anch chitwishikin. Kupwa ukutwishap kwey kudia ching ku tebur wa Yehova pakwez niyey ukwangan chipan chey pamwing ni chikumangen. w19.01 8-9 par. 3; 13 par. 20

Pasak, masandj mading mapalangen nakash mu difukwil dia makasu. (Ozey 4:13, 14) Antu avud ading akatin difukwil dia makasu mulong ading akatin kusanger mwikadil uyimp. Ov, difukwil dia mutapu winou diayiletinang musangar? Bwat kamu! David walonda anch antu akata kwifukwilang anzamb a makasu akat “kuvudish mar mau.” Antu inay apeshang ap anau kudi anzamb a makasu! (Isay 57:5) Yehova wading ukisin nakash chisum chau. (Jer. 7:31) Nlel unou, marelijon mavud ma makasu mitiyijin anch masandj mawapin, kuwejinaku utun. Mwom wijondila ukutwish kuyibachik antu atonga anch akwet want ipau wa kusal yom yikatinau, pakwez mu uyakin akat “kuvudish mar mau.” (1 Kor. 6:18, 19) Ov, niyey umen anch yom yiney yidi yakin? Chawiy, en ansand muteshany Tatukwen udia mwiur. Ikal nich kashinsh anch chidi chiwamp kumuziyin Nzamb. Tongijok nawamp piur pa yibudikin yiyimp yidiokila ku mikadil yiyimp. Ukuman anch yibudikin yiyimp yipandiken kusutamu tumisangar twa ka chisu kakemp.​—Gal. 6:8. w18.12 25-26 par. 16-18

Anch mbay wa uruw mwin Kristu wasal masandj, mbay mwin Kristu wakad mulong ufanyidin kukwat mupak. Yesu walonda anch mbay wakad mulong ukwet diyingishin diakin dia kujip uruw ni kwatan ap kwachik kand. (Mat. 19:9) Pakwez, chiyipinap kwau anch mbay wakad mulong wakwat mupak wa kumulikishin mbay nend wa uruw. Ozey wamuchirisha Gomer. Pachirikay Gomer kudi Ozey, Ozey wamuleja anch kafanyidinap kand kulalijan ni ikundj mukwau. Ozey ‘kalalijanap’ ni Gomer mu chisu kanang. (Ozey 3:3) Pakwez mu kusut kwa chisu, Ozey wafanyina chad kulalijan kand ni mukajend. Chinech chimekeshin mutapu wayitiyau kand in Isarel kudi Nzamb ni kudandamen kand urund wau ni ndiy. (Ozey 1:11; 3:4, 5) Nlel, yom yiney yitufundishin ik piur pa uruw? Anch mbay wa uruw wakad mulong wasambish kand kulalijan ni mbay wasalang chitil, chinech chikumekesh anch wamulikishin kal mbay warumbukang. (1 Kor. 7:3, 5) Kupwa kukwikalap kand diyingishin diakin dia kujip uruw. Kupwa kwa kusal mwamu, ikundj ni mband afanyidin kushakam pamwing ni kukwashijan kuman uruw mudi muumenay Nzamb. w18.12 12-13 par. 13

Chisu twilejina, tufanyidin kutong piur pa mutapu umenay Yehova yom mulong kusal mwamu kukutukwash kukwat mipak ya manangu. Kupwa, anch twikal mu chishiken chitina kukwat mupak pakad kulab, tukutwishap kukashimuk. Pasalay mband wa Potifar usu wa kumwoz Josef, Josef walika kapamp kamwing. Chakin kamu, Josef wading watongijokidin kal pa mutapu umeningay Yehova uruw. (Dis. 39:8, 9) Josef wamuleja mband a Potifar anch: “Nikutwish nchik lel kusal kuyip mudi kwinoku, ni kusal kand chitil kurutu kwa Nzamb?” Yiney yimekeshin anch wading ni yitongijok ya Nzamb. Chidi nchik piur petu? Yom ik ukusala anch mbay ney wa mudimu wasambish kwizez ney? Ap chidi nchik anch muntu wakutumin mesaj makweta yom ya masandj ap chipich cha winzikis mu telefon wey? Chiswapel kushal ashinshamena kudi Yehova anch twilejin kal ni kwikal ni chitongijok chend piur pa milong kanang ni anch twasambedin kal kukwat mupak wa yom tukusala. w18.11 30 par. 13-14

In kwilej amwing itiyijin anch mazu minam marumburikin anch: “Nikumatok mulong wa musangar mwi Nsalej; nikuja maj mu kusanger Dizu dia Nzamb.” Dilejan diwamp mudi ik kudi etu! Yehova katwinkishinap kusu ching kushilamu kuwamp mulong wa machuku ma kurutu, pakwez utukasikeshin kand anch piswimp ap ukuwanyish kushilamu kwinoku. Dilejan dijim ditwilejidina mu mukand wa Abakuk didi dia kumuchingejin Yehova. (Aba. 2:4) Mulong wa kudandamen kumuchingejin Yehova, tufanyidin kukasikesh urund wetu ni ndiy. Chawiy, yom tufanyidina kusal yawiy ey. (1) Kudandamen kumulembil, kumulej Yehova piur pa milong ni yakamish yetu yawonsu. (2) Kutesh nawamp yom yitulejinay kusutin Dizu diend, ni kulondul wintakel upaninay kusutin dirijek diend. (3) Ikal ushinshamena ni ushimpishina muchim piuchingedina anch Yehova awanyish kushilamu kwend. Yiney yawiy yasalay Abakuk. Ap anch wading wiyakamishin nakash chisu chasambishay kwambamb ni Yehova, pakwez kwinsudien wikala ukasikeshinau ni wikala ni musangar! Anch twamwimburij Abakuk, niyetu tukwikal akasikeshinau kusutin kutubwikat kwa rukat kudi Tatukwetu wa mwiur Yehova. Kukasikesh ik kujim tukutwisha kutambul mu mangand minam mayimp? w18.11 20 par. 18-19

Dined diawiy diyingishin dimekeshina anch Yehova utukatin: “Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.” (Yoh. 3:16) Yakupesh ya Yesu yimekeshin anch niyend utukatin ni rukat riner ritukasikeshin. Bibil ulondin anch ap “mar, ap runeng” yikutwishap “kutwauril ku rukat [ra Kristu].” (Rom 8:35, 38, 39) Yisu yimwing tukweting milong yituziyishina ku mujimbu ap mu manangu ni yitukangeshina kwikal ni musangar mu kumusadin Yehova. Pakwez kuvurik mutapu utukatinay Kristu kukutwish kutwinkish usu wa kujijaman. (2 Kor. 5:14) Rukat ra Yesu rikat kutwinkish impu ya kudandamen kwikal aom ni kumusadin Yehova. Rikutwish kutukwash kulik kuziy, ap anch tumen mar mulong wa yinship kanang, kuzengol, kuturumbukin ap yakamish. w18.09 10 par. 8-9

Mulong wa kudandamen kwendil mu uyakin, tufanyidin kwitiy ni kuziyin chom chin chawonsu chilondinay Yehova. Tufanyidin kusal uyakin wikal chom cha usey nakash mu mwom wetu ni kulondul mbil ja Bibil mu chom chin chawonsu tusadina. Mudi David, niyetu tufanyidin kusal mwamu. Anch tusadinap mwamu, tukutwish kusambish kutong piur pa yom twasha mulong wa uyakin ni tukutwish ap kuchirikin kand yom yimwing. Pakwez tufanyidinap kutond uyakin wa mu Bibil tufanyidina kwitiy ni tufanyidina kulik. Tufanyidin kwendil mu “uyakin wawonsu.” (Yoh. 16:13) Mulong wa kwikal nich kashinsh anch tukupwepukap ku uyakin, tufanyidin kusadin nich manangu chisu chetu. Anch tubabelap, tukutwish kusutish chisu chivud mu kwipuwangej, mu kusengan, mu kwandam pa Internet, ap kutal televizion. Ap anch yom yiney yidiap kamu yiyimp, tukutwish kusambish kusadin chisu twafanyinang kwilej ni kusal mudimu wa kulejan. w18.11 11-12 par. 7-8

Yisu yawonsu, kukutwish kwikal kuswimp kanang kutwakad kuchingejin mu mashakamin metu, ni chinech chikusal anch twikala nich yakamish yivud. (Jnsw. 12:25) Anch chitukasikedin kwitiy ni kwijidin kuswimp, yom ik tukutwisha kusal chakwel tulika kuzazat? (Kus. 131:1-3) Ap anch mashakamin metu madi makash, tukutwish kwikal ni “chisambu cha Nzamb” chichidijina “yitongijok” yetu ni kusal anch tulik kuzazat. (Fil. 4:6, 7) Anch twikal ni yakamish, “chisambu cha Nzamb” chikutukasikesh kudandamen kumusadin Yehova ni kulik kuziy. Spiritu wa Nzamb ukutwish kusal anch tulik kuzazat ni ukutwish kand kututwal ku maverse mamwing ma Bibil makutwisha kutukwash kwijik chom chidia cha usey nakash mu mwom.​—Yoh. 14:26, 27. w18.10 22-24 par. 2, 5, 8

Chom ik chayisadina kal antu nayimp nakash? Madi makasu! Kulond makasu kudi kulond chom chakad kwikal chakin mulong wa kumudimb muntu ap kumwiy. Nany walonda makasu ma kusambish? Udi Djabul! Yesu Kristu wamutazuka anch “tatuku wa makasu.” (Yoh. 8:44) Chisu ik chalonday makasu ma kusambish? Wadimbana kwasut kal tunan twa mivu mu chir cha Eden. Adam ni Ev ading akat kusanger mwom mu Paradis muwamp wayitanginau kudi Yehova. Nzamb wayileja anch ang adia “dibuj dia mutond . . . wa ronganyin ra kuwap ni kuyip,” akufa. Ap anch Satan wading wij yom yiney, wasadina nnak mulong wa kumulej Ev anch: “Kiukufanyap kwen, bwat.” Minam mawiy mading makasu makusambish. Satan walonda kand anch: “Nzamb wij anch dichuku diukudianya mabuj minima, mes men makuburik, niyen ukwikalany mudi Nzamb, in kwijik kuwap ni kuyip.”​—Dis. 2:15-17; 3:1-5. w18.10 3-4 par. 1-2

Mulong wa kwikal zwang mu muchim, tufanyidin kulam yitongijok ni maku metu yishitwila. Chinech chidi cha usey nakash anch tusotin anch Yehova itiya difukwil dietu. (2 Kor. 4:2; 1 Tim. 1:5) Yehova walonda anch: “Kwikil muntu ukutwisha kwiman washal kand mwom.” (Kub. 33:20) Chad mutapu ik ukutwishau antu adia zwang mu muchim “kumuman Nzamb”? Dizu dia Grek dikarumwinau anch “kuman” dikutwish kand kurumburik kutongijok, kutesh ap kwijik. Chawiy “kumuman Nzamb” kurumburikin kwijik anch udi Muntu wa mutapu ik ni kukat mikadil yend. (Efes 1:18) Chikwau kand, tukat “kumuman Nzamb” chisu tukata kuman mutapu ukatay kutukwash mu mwom wetu. (Job 42:5) Tukutwish kand “kuman” ap kushinshikin pa yom yipandakena kuwap yikaninay Yehova kusal mulong wa antu adia zwang ni amusadidina nich kushinshaman. w18.09 18-19 par. 13, 15-16

Anch twasal yom twija anch yidi yiwamp, tukwikal in manangu ni Yehova ukutuyukish. Ap anch manangu mimedin pa ronganyin, marumburikin yom yivud kusutamu kwau kwijik uman kampand. Manangu mitin kand anch tukwata mipak yiwamp. Ap atupwapu akat kumekesh manangu ma kukumangej yakudia ya machuku ma kurutu. (Jnsw. 30:24, 25) Kristu, utazukinau anch “manangu ma Nzamb,” ukat kusalang chisu chawonsu yom yimusangareshina Tatukwend. (1 Kor. 1:24; Yoh. 8:29) Nzamb ukutufut anch niyetu twamekesh manangu kusutil kutond kusal yom twija anch yiwapin ni kushal ikepishina. (Mat. 7:21-23) Chawiy dandamen kusal usu chakwel chikumangen chikala ndond yikutwishau antu awonsu kumusadin Yehova nich kwikepish. Chitin chisu ni kushimpish muchim mulong wa kusal yom twija anch yidi yiwamp. Pakwez kusal mwamu kumekeshin kwikepish, ni kwikepish kukutuletin musangar katat ni chikupu. w18.09 7 par. 18

Yehova payitangay antu, wakata anch awiy ikala ambay nend a mudimu. Ap anch nlel antu adi akad kuwanyin, antu ashinshamena akutwish kudandamen kusal mudimu pamwing ni Yehova dichuku diawonsu. Chilakej, tudi ‘ambay a mudimu pamwing ni Nzamb’ chisu tulejena rusangu ruwamp ra Want wend ni kwikadish in kwilej. (1 Kor. 3:5-9) Didi dilau dijim nakash mud ik mulong Sakatang wetu Mwin Dikand Diawonsu watutonda kusal mudimu udia wa usey nakash! Pakwez, mudimu wa kulejan udiap kusu mutapu umwing tukata kusal mudimu pamwing ni Yehova. Mitapu yikwau tukutwisha kusal mwamu yidi kukwash dijuku dietu ni antu a mu chikumangen, kwikal in kwakan, chisu tukwashina ku midimu yisadikina mu dirijek pa mangand mawonsu ni chisu tutandurila mudimu wetu mulong wa Yehova. (Kol. 3:23) Mivu tukweta, ukash wa mujimbu, yishiken ni ukaliweny tukweta yidiap ya mutapu umwing. Chawiy kangal wafanikesh yom usadina mulong wa Yehova ni yikutwishau antu akwau kusal. w18.08 21-22 par. 1-2

Yehova wamwongoja muprofet ni wamukasikesha nich rukat anch ukwakul ku yipul yend. Abakuk wafanyina kwikal ni ruchingej anch yakamish yend yikupwa piswimp ap. Chidi mudi Yehova wading umulejin muprofet anch: “Ey shimpish kwey muchim ni nchingejina. Nikwakul ku malembil mey, ap anch chamekan mudi yilabin.” Yehova wamuvurisha Abakuk anch Wading wakwatin kal mupak mulong wa chisu Chikuwanyishay kushilamu Kwend. Chawiy wamukasikesha Abakuk kudandamen kuchingel. Kupwa, muprofet kafanyinap kwikal nich yovil ya kuziy. Niyetu tufanyidin kumuchingel Yehova chakwel asal. Tufanyidin kand kutesh kamu nawamp yom yitulejinay. Kupwa tukwikal ni kashinsh ni chisambu cha mu manangu chikalap nchik yakamish tukweta. Yesu watukasikesha kulik kushinshikin pa “yisu ap pa yirung” yakadiau kutulej kudi Nzamb. (Mid. 1:7) Chawiy lel, tufanyidinap kuziy, pakwez tufanyidin kwikal ikepishina, ashimpishina muchim ni akweta ritiy mudiay Nzamb. Ni pituchingedina, tufanyidin kusadin chisu chetu nich manangu ni kumusadin Yehova nich usu wetu wawonsu.​—Mar. 13:35-37; Gal. 6:9. w18.11 18-19 par. 13-14

Pita wapama ni chitongijok cha kwel anch akamichid ading ijondin. Pakwez kwashikena yom yimwing yaswimpa mutapu wend wa kutong. Chilakej, Pita wamana chishimushimu chishimokishena. (Mid. 10:9-16) Mudi Pita, tufanyidin kwishinshikin ayinetu ni kwitiy ukwash chakwel tutwisha kujingunin yovil yawonsu ya kasolikany tudandamedina kwikal nich. Yom ik yikwau tukutwisha kusal? Anch “michim yetu [yidi] yanzurikina nakash,” pa ndond pa kasolikany tukutwish kutekap rukat. (2 Kor. 6:11-13) Ov, ukatining kusutish chisu ching nau antu akweta ulomb wa chikit chey, a ngand yey, a kabil key ap a dizu diey? Anch chidi mwamu, sal usu wa kusutish chisu nau antu akwau. Ukutwish kuyitazuk akadivar nau anambaz adiokila ku jindond kushalijan mulong wa kuya nau mu kulejan pamwing. Ap ukutwish kuyitazuk kwol kwey mulong wa kudia nau ap kwipuwangej nau. (Mid. 16:14, 15) Mu kusut kwa chisu, muchim wey ukwizul sens nich rukat ni mukwikalap ndond ya kasolikany. w18.08 10 par. 3; 11 par. 6-7

Yom yikau yisadin anch Atuman amwing alika kushalijan nakash ni mangand. Chilakej, ku misambu, Atuman amwing akat kuja maj ni kumekesh mwikadil wakad kuwanyin kudi in Kristu. Akwau akat kutek yipich ya ayinau pa yom ya kupalangesh nich jinsangu ni kufundap mazu kanang yimekeshina yitongijok yau ya chiuntu. Chawiy akutwish kwikal nich yibachikin yiyimp padi akadivar nau anambaz asadina usu wa kwikal ashalijadina ni mangand. (1 Pita 2:11, 12) Chom chin chawonsu chidia mu mangand achibudishin mulong tushinshikina pa “maku ma mujimbu wa mbij, maku ma mes ni kwibaz kwa yom.” (1 Yoh. 2:16, TMK) Etu tudi a Yehova, chawiy tushalijadina. Tukat “kulik mwom uyimp ni maku mayimp ma yom ya mangand, chakwel twikal nich mwom wa kwilam ayinetu, utentamina, ufanakena nend Nzamb mu chirung chinech.” (Tit. 2:12) Mwom wetu wawonsu, kuwejaku mutapu tulondina, tudila, tunila, tudjadila ni tusadina mudimu yifanyidin kumekan kudi muntu win mwawonsu anch tudi a Yehova. w18.07 24 par. 13-14

Anch twadandamen kumutal Yehova, tukuyipishap urund wetu ni ndiy ap kujiman mulong wa yom yisadinau antu akwau. Chinech chidi pakampwil cha usey nakash anch tukwet yisend kampand mu dirijek dia Yehova, mudi mwadingay Moses. Chakin kamu, etu awonsu tukwet kuswir kwa kusal usu nakash ni kumuziyin Yehova chakwel tupanda. (Fil. 2:12) Chawiy, anch tukwet yisend yivud, Yehova utuchingejidin kand nakash. (Luka 12:48) Pakwez anch tumukatin chakin kamu Yehova, kwikil chom chikutupwakesha ap kutwauril ku rukat rend. (Kus. 119:165; Rom 8:37-39) Tushich pa chirung chikash ni cha milong nakash. Chawiy chidia cha usey nakash kudandamen kumutal Yehova, “ushiching mu maur,” chakwel twijika yom yikatinay anch tusala. (Kus. 123:1) Tufanyidinap kwitiy yisal ya antu akwau kuyipish urund wetu ni Yehova. w18.07 14 par. 19-20

Tukweting musangar nakash pa kutesh mutapu umunyikinau atushalapol a Nzamb chitokish chau! Muvu wa 2017, antu a Yehova atakedin malejan ma Bibil 10000000 ni kusut. Ni mamiliyon ma antu asangaredin kwez ku Chivurikish ni kwilej piur pa difut, chipan cha rukat cha Yehova. (1 Yoh. 4:9) Pa mangand mawonsu, Atuman a Yehova alondin mazu mavud kushalijan. Pakwez chinech chitukangeshinap kumutumbish Yehova mudi dijuku didia mu uumwing. (Kuj. 7:9) Chikalap nchik dizu tulondina ap ndond tudia, tukutwish kumunyik ‘mudi chimunyik mu mangand.’ (Fil. 2:15) Mudimu wetu, uumwing wetu wa win Kristu ni impu yetu ya kuswapej mudimu yikat kumutumbish Yehova. w18.06 21 par. 1-3

Yesu wasangera nakash kwambamb ni mband winou ni chamekesha anch yakudia yadingap ni usey kudi ndiy. Nzamb wakata anch ndiy alejana rusangu ruwamp ni kusal yom yading yikatinay Tatukwend, mudi kumulej mband mwin Samaria, yading mudi yakudia kudi ndiy. (Yoh. 4:31-34) Jakobu ni Yohan kateshap dilejan dined dia usey. Chisu chasutinau in kwilej pamwing ni Yesu mu Samaria pading payilau mu weny, akimba ndond ya kulal uchuku mu ul wa Samaria. Pakwez in Samaria kakatap awiy kulal mu ul wau. Jakobu ni Yohan ajimana nakash chad amwita Yesu anch ukatishin chakwel atuma kasu ka mwiur mulong wa kushesh ul wa kabuj. Nich kutakaman, Yesu wayikanda. (Luka 9:51-56) Pamwing ap Jakobu ni Yohan kafanyinap kujiman mwamu anch yom yiney yashikena mwi ngand yau ya Galalia. Ajimana pamwing ap mulong ading ni kasolikany. Kupwa, chisu chalejanay Yohan kudi in Samaria ni antu avud amutesha, wafanyina kwov nayimp mulong wa mwikadil wamekeshay pakur.​—Mid. 8:14, 25. w18.06 12 par. 12-13

Mulong uyakin udia mu Dizu dia Nzamb udi wa usey kudi etu, tukat kuziyin yom yilondinay Bibil ni tukat kulond uyakin chisu chawonsu. Makasu udi ut ukash nakash pakach pa mat masadidinay Satan. Makasu makat kuyisal nayimp antu amalondina ni antu amitiyijina. (Yoh. 8:44) Chawiy ap anch tudi antu akad kuwanyin, tusadin usu nakash wa kulik kudimban. (Efes 4:25) Chinech chikutwish kutukasiken. Abigail, ukweta mivu 18 ulondin anch: “Kulond uyakin kukutwish yisu yivud kumekan mudi kukwetap usey, pakampwil anch kudimban kukutwish kutukamunin ku mulong kampand ukash.” Victoria, ukweta mivu 23 ulondin anch: “Anch walond uyakin ni kulond piur pa yitiyij yey, akutwish kukwovish wom. Pakwez ukutaninamu yiyukish yivud: Antu akukuchingejin, ukwiyov anch udi piswimp ni Yehova ni akukulimish kudi antu akukatina.” Ov, umen mulong wak chidi cha usey kudjal ‘nshipu ya uyakin’ chisu chawonsu? w18.05 22 par. 3, 5

Tufanyidin kudandamen kucha ku mes nakash kusutamu pakur. Yom ya mangand yidandamedin kupandakan kuyip. Pakwez twij anch disudiel dikwez kamu pa chisu chatenchikay kal Yehova. (Mat. 24:42-44) Pituchingedina, tufanyidin kwikal ashimpishina muchim ni kutal mes pa yom ya kurutu. Tang Bibil dichuku diawonsu ni kangal kwimik kumulembil Yehova. (1 Pita 4:7) Ilejina kusutin akadivar nau anambaz amusadina kal Yehova mu mivu yivud. Shal ukwatikena mu kumusadin Yehova. Yisadina antu akwau yom yiwamp ni sutish chisu pamwing ni akadivar nau anambaz ney. Mwamu ukwikal ni musangar ni ukuman anch chisu chikat kusut mau mau. (Efes 5:16) Ap anch tukat kurumbok nakash, Yehova utwitiyijin kumusadin. Mulong wa kutukwash, utwinkishin ‘yipan mudi antu,’ adia amakurump a chikumangen. (Efes 4:8, 11, 12) Chawiy chisu chikwendidinau kudi amakurump, sal usu wa kutaninamu mu chisu ukusutisha nau pamwing mulong wa kutambul manangu ni yiyul yau. w18.06 24-25 par. 15-16; 26 par. 17-18

Yesu wayileja in kwilejend anch afanyidin ‘kushal mu rukat rend.’ Mulong wak Yesu walonda mwamu? Mulong wading wij anch in kwilejend akwet kuswir kwa kujijaman mulong wa kushakam mudi in Kristu akin. Chakin kamu, mu Yohan 15:4-10, tumen anch Yesu wasadina dizu “kushal” tupamp tuvud mulong wa kuyikwash in kwilejend kwijik anch akwikal ni kuswir kwa kujijaman. Mutapu ik tumekeshina anch tukatin kushal mu rukat ra Kristu ni kwikal ni dilau diend? Mu kumuziyin ndiy. Yesu ndiy utwitina kusal yom yasalay amwinend. Walonda anch: “Am [naziyila ku yijil ya] Tatukwam, niyend wadandamena kwinkat am.” Yesu watushila chilakej. (Yoh. 13:15) Yijil ya Yesu yading yidiokil kudiay Tatukwend, chawiy anch twaziyin ku chijil cha Yesu cha kulejan, tumekeshin kand anch tumukatin Yehova. (Mat. 17:5; Yoh. 8:28) Ni anch twamekesh anch tumukatin Yehova ni Yesu, niyau akat kudandamen kutukat. w18.05 10-11 par. 5-7

Mulong udi nsand, ukwet mipak yivud ya kukwat. Ufanyidin kukwat mipak mulong wa kwijik shikol ik ukwileja ni mudimu ik ukusala, ni yom yikwau yivud. Anch wij mipak yey, chikukuswapel kukwat mipak ya manangu. Anch wasambel kwitekin mipak, ukutwish kand kuyiwanyish swa swa. Yitot ya ansand adia pa mangand mawonsu asadin nawamp nakash ni chifanyidin kuyijikitish. Urund wau ni Yehova ni mipak yau ya mu spiritu yidi ya usey nakash mu mwom yau. Ansand inay asangaredin nakash mwom ni chisu chawiy chimwing, akat kwilej kulondul umutakel wa Yehova mu yom yawonsu. Mu yom yiney mudi kand mashakamin ma dijuku. Salomon walonda anch: “Mukungamena [Yehova] ni muchim wey wawonsu.” Walonda kand anch: “Mu jinjil jey jawonsu itiyij kudi Ndiy, ni Ndiy ukez katenchik jinjil jey.” (Jnsw. 3:5, 6) En ansand, Yehova ukukatinany nakash! Udiany antu a usey kudi ndiy, ukukuchidijany, ukukutakelany ni ukukuyukishany. w18.04 28-29 par. 7, 9

Kambuy Yohan wading pakach pa antu atakela chikumangen cha win Kristu cha kusambish. Wafunda Evanjil muwamp piur pa mudimu wa Yesu. Mukand winou wa Bibil wayikasikesha in Kristu mu yitot ya mivu ni udandamedin kutukasikesh niyetu nlel unou. Chilakej, ching kwau mu mukand wa Yohan mwawiy tutangina piur pa mbil ya Yesu yilejena anch rukat udi mwikadil uyimekeshina in kwilejend akin. (Yoh. 13:35) Mikand yisatu yafunday kand Yohan yikwet uyakin wa usey nakash. Anch twaziy mulong wa kurumbuk kwetu, tukat kwikal akasikeshinau kutang anch yakupesh ya difut ya Yesu “[yatutokisha] ku yitil yetu yawonsu.” (1 Yoh. 1:7) Ni anch tukat kudandamen kwikal ni yovil ya kwifish nich, tukwikal ongojinau anch twatang anch “Nzamb udi mujim kupandakanamu michim yetu.” (1 Yoh. 3:20) Yohan ndiy kusu mwin kufund umwing wa Bibil wafunda anch “Nzamb udi rukat.” (1 Yoh. 4:8, 16) Mukand wend wa kaad ni wa kasatu uyilejin in Kristu kudandamen “kwendil mu uyakin.”​—2 Yoh. 4; 3 Yoh. 3, 4, TMK. w18.04 18-19 par. 14-15