Ngond wa 4

Chid nchik piur petu? Ov, tutongining mudi Yehova anch mudi antu a mangand? Mulong tudi in Kristu, tukat kusal usu wawonsu wa kwikal nich kashinsh anch yom yawonsu tusadina yimusangaresh Yehova. Pakwez chidi nchik piur pa mutapu tutongining? Ov, tusadin usu wa kutong mudi Yehova, charumburik anch kuman yom mudi muyimenay? Kusal mwamu kwitin usu nakash. Pakwez, chiswapel nakash kutong mudi antu a mangand. Chidi mwamu mulong spiritu wa mangand utunyingumukin etu awonsu. (Efes 2:2) Chikwau kand, yisu yivud antu mu mangand akat kushinshikin pa ayinau ni tukutwish kwikal apakinau chakwel tutonga mudi awiy. Mwaning, chikasiken kutong mudi Yehova pakwez chiziyin nakash kutong mudi antu a mu mangand. Anch twalik mangand mikal ni usu pa mutapu wetu wa kutong, tukwikal kamu in choy ni kukat kukwat mupak ayinetu piur pa yom yidia yiwamp ni yiyimp. (Mar. 7:21, 22) Chawiy chidi cha usey nakash kwilej kutong ‘yitongijok ya Nzamb’ kulik ‘yitongijok ya antu.’ w18.11 21 par. 1; 22 par. 3-4

Tupamp tusatu, Yehova walonda kamu kudiokal mwiur ni chinech chasala Mwanend ijika anch Tatukwend umukatin. Chinech chafanyina kumukasikesh Yesu nakash! Kupwa kamu kwa kumubatish Yesu mu Wit wa Yordan, Yehova walonda mazu madia kwiur oku. Chimeken anch Yohan Mubatish ndiy kusu muntu umwing watesha mazu minam. Kupwa, piswimp muvu umwing kurutu kwa Yesu kufa, atwimbuy end asatu atesha palonday Yehova piur pa Yesu anch: “Winou udi mwanam unikatila, nikat kusanger mwi ndiy, muteshany.” (Mat. 17:5) Kapamp ka nsudiel, machuku makemp kurutu kwa Yesu kufa, Yehova walonda kand kudi Mwanend kudiokal mwiur. (Yoh. 12:28) Yesu wading wij anch antu akumutazuk anch mwin masaal ni anch wafanyina kufa rufu ra usany nakash. Pakwez, walembila anch rusot ra Nzamb risadika, ridiap rendendiy. (Mat. 26:39, 42) ‘Wajijamena mutond wa mar, wapipeja usany,’ mulong wakata anch amwijik kudi Tatukwend, kadiap kudi antu.​—Heb. 12:2. w18.07 7-8 par. 15-16

Kupwa kwa Yesu kusha chilakej cha Yakudia ya Urel ya Mwant, wamekesha kutakaman kupandakena. Mutapu ik wasalay mwamu? Yesu witiya anch rusot ra Tatukwend mulong wendendiy risadik ap anch wading wij anch kusal mwamu kukusal anch amujipa mulong wa diyingishin dia usany anch udi mwin kumusaal Nzamb masaal. (Mat. 26:65, 66) Yesu wadandamena kumekesh kushinshaman kuwanyidina, chawiy watumbisha dijin dia Yehova, wakwasha ukaleng wend ni kufungul njil ya mwom wa chikupu mulong wa antu akarumukina. Pa chisu chawiy chimwing, Yesu wayitenchika in kwilejend piur pa yom yafanyinau kurish nich. Yesu wamekesha kand kutakaman kusutin kulik kushinshikin pa yakamish yafanyinay kwikal nich ni kusutin kushinshikin pa maswir ma atwimbuy end ashinshamena. Yakudia yikemp yasadinay kupwa kwa Yudas kubudik, yafanyina kuyivurish antu afanyina kwikal in kwilejend azizidilau many kutaninamu kudiokila ku mash michilay Yesu ni kwandam mu mansuk masu.​—1 Kor. 10:16, 17. w19.01 22-23 par. 7-8

Tatukwend a Yesu walonda kudiokal mwiur anch: ‘Naditumbish kal, nikez kuditumbish kand.’ Yesu wiyakamisha mulong wa chisend chijim chadingay nich cha kushal ushinshamena kudi Yehova. Yesu wading wij nawamp anch akumubul nfimbu nakash ni akumujip rufu ra chisum. (Mat. 26:38) Chikalap nchik yom yiney yawonsu, Yesu wading ukatin kutumbish dijin dia Tatukwend. Yesu amufisha nich mudi mwin kumusaal Nzamb masaal, ni wading wiyakamishin anch kangal rufu rend rasaadikish dijin dia Nzamb. Mudi Yesu, niyetu tukutwish kwiyakamish piur pa kusaadikish dijin dia Yehova. Pamwing ap niyetu atusadidin nich kuburen kutentam mudi mwamusadinau Yesu. Ap tukutwish kwikal ni kampuw mulong wa jinsangu ja makasu jikatau kupalangesh akankuny netu piur petu. Tukutwish kutong piur pa mutapu ukutwisha jinsangu jinej kujondish dijin dia Yehova. Pa yisu mudi yiney, mazu ma Yehova makat kutwongoj chipandikena.​—Kus. 94:22, 23; Isay 65:17. w19.03 11-13 par. 14-16

In kwilej a Yesu iyova nayimp! Atonga anch Yesu wafanyina kuchirish want wa Isarel, pakwez Yesu walonda anch mu machuku makemp ukuman mar ni ukufa. Kambuy Pita wamuleja anch: “Nsalejam, [iyanakena amwiney]! Yom yiney kangal yashik kudi [ey]!” Yesu wamwakula anch: ‘Sut kwinyim kwam, Satan, ey udi chom cha kwimpwakesh am, mulong yitongijok yey kiyidiokilap kwa Nzamb, yidiokil kudi antu.’ (Mat. 16:22, 23; Mid. 1:6) Kusutin kulond mazu minam, Yesu wamekesha patok anch yitongijok ya Yehova yishalijadin ni yitongijok ya mangand matakedilau kudi Satan. (1 Yoh. 5:19) Pita wamukasikesha Yesu kwikal ni chitongijok cha choy chikwetau antu avud mu mangand. Chakul cha patok cha Yesu chamekesha anch wading witiyin yitongijok ya Yehova ni kulik kamu yitongijok ya mangand. w18.11 21-22 par. 1-2

Tongin pa yom yikatay Yehova kuman chisu chikata kukumangan mamiliyon ma antu pa mangand mawonsu mulong wa Yakudia ya Urel ya Mwant. Ukat kuman yom yivud nakash kulik kwau ching uvud wa antu; ukat kuman muntu ni muntu wakumanganang. Chilakej, ukat kuman antu akata kukumangan nich kushinshaman muvu ni muvu. Pakach pau pakutwish kwikal antu akata kukumangan chikalap nchik kuzengol kukash kurishinau nich. Akwau kakwezangap chisu ni chisu ku yikumangan yetu, pakwez amening anch kukumangan ku Chivurikish chidi chom chimwing cha usey nakash. Yehova uyimen kand antu akumangena ku Chivurikish kapamp kau ka kusambish, pamwing ap mulong wa kuman kwau yom yikata kusadik. Chakin kamu, Yehova ukat kusangar nakash pakatay kuman antu avud akumangan lel mulong wa Chivurikish. (Luka 22:19) Pakwez ukat kwimen nakash pa diyingishin diamubachikang muntu chakwel akumangana; diyingishin dined diding dia usey nakash kudi Yehova. Ov, tukwet musangar wa kwikal afundishinau kudi Yehova ni kudi dirijek diend disadidinay?​—Isay 30:20; Yoh. 6:45. w19.01 26-27 par. 1-3

Yesu kadingap kwend ching kusu tayad mulong wa kufa mulong wa in kwilejend pakwez dichuku ni dichuku wading ushich mu mutapu umekeshina anch wading utekin maswir mau pa ndond ya kusambish. Chilakej, wakumanganang nau in kwilejend ap anch wading waziyang kal ap ukwet yakamish. (Luka 22:39-46) Washinshikinang pa yom yikutwishay ndiy kusal mulong wa antu akwau pa ndond pa kushinshikin pa yom yikutwishau antu akwau kusal mulong wendendiy. (Mat. 20:28) Etu awonsu tudi mu dijuku dia pa mangand mawonsu dia akadivar in Kristu akin, ni tukat kusanger kusutish chisu mu kuyitazuk antu chakwel abombakan netu. Pakwez, tukat kubangin nakash antu adia “anamakwetu mu ritiy” alikinap kal kulejan ap kukumangan. (Gal. 6:10) Tukat kumekesh rukat retu kusutin kuyikasikesh chakwel akumangan ku yikumangan ni pakampwil ku Chivurikish. Mudi Yehova ni Yesu, niyetu tukweting kamu musangar chisu tukata kuman muntu wading walikina kal kulejan ap kukumangan wamuchirikin Yehova.​—Mat. 18:14. w19.01 29 par. 12, 14; 30 par. 15

Pasambishay Yesu Chivurikish cha rufu rend, wasadina dibot diakad kutek chivish ni nviny ya Pasak, yom yadingau nich. Yesu wayileja atwimbuy end anch yom yiney yaad yimekeshin mujimbu wend uwanyidina ni mash mend, yom yading yifanyidinay kupan mulong wa awiy. Atwimbuy kafanyinap kushimok mulong wa mutapu uswapela wa kusal chikumangan chinech chisu. Mulong wak? Kwinsambishin kwa muvu wa kasatu wa mudimu wa Yesu, chisu chadingay ku chikumbu cha arund nend a piswimp​—Lazar, Mart, ni Mariy, Yesu wasambisha kuyifundish. Mart wading pinipa, pakwez wading ni kampuw mulong wa kwisuk yakudia yivud mulong wa ngendj wau wading ulimishinau nakash. Pamanay mwamu, Yesu wamukanda Mart nich rukat mulong wa kumukwash kwijik anch yakudia yivud yikwetingap kwau usey chisu chawonsu. (Luka 10:40-42) Kupwa, asaa akemp kurutu kwa rufu rend, Yesu wasadina chiyul chend amwinend. Wasadina yakudia yikemp mulong wa Chivurikish cha rufu rend. w19.01 20-21 par. 3-4

Yehova wamutumbisha Yesu mu mutapu wakadiay ndiy kuchingejin. Yehova pamuvumbulay Yesu, wamuteka pa ‘ndond ya piur’ mwiur. Wamwinkisha kand Yesu spiritu wakad kufang, chom chading chakad kal kutambulangap kudi muntu mukwau! (Fil. 2:9; 1 Tim. 6:16) Winou wading mutapu ushimwokishena mud ik wamufutau Yesu kudi Yehova mulong wa mudimu wend ushinshamena! Chom ik chikutukwasha kukimb dilau dia Yehova kulik dia mangand? Tufanyidin kushinshikin pa kwijik anch Yehova uyijing chisu chawonsu atushalapol end ashinshamena ni anch ukat kuyifut mu mitapu yakad kuchingejin. Tukutwish kusal usu wa kutongin mutapu ukutuyukishay Yehova mu machuku ma kurutu! Pakwez pa chisu chinech, pitudandamedina kujijamen milong ni yakamish mu mangand minam mayimp, tufanyidin kuvurik anch mangand minam makat kusut. Chawiy kwijikan mu mangand minam ni kwawiy kukusut. (1 Yoh. 2:17) Pakwez Tatukwetu wa rukat, Yehova, kakuvuramenap ap pakemp mudimu ni rukat retu tumumekeshidina mulong wa dijin diend, mulong ndiy “utentamin.”​—Heb. 6:10. w18.07 8 par. 17-18

Yesu wading wiyakamishin piur pa uumwing mu chisu chadiay yakudia ya nsudiel nau atwimbuy end. Chisu chalembilay pamwing ni awiy, walonda anch ukatin in kwilejend ikala umwing, charumburik anch mu uumwing, mudi mudiay ndiy ni Tatukwend mu uumwing. Anch in kwilej a Yesu ading mu uumwing, chinech chakimba kumekesh kudi antu akwau anch Yehova wamutuma Yesu pa mangand. Antu afanyina kuyijingunin in kwilej akin a Yesu kusutin kukatijan umwing ni mukwau ni rukat riner rafanyina kusal anch ikala mu uumwing nakash. (Yoh. 13:34, 35) Tukutwish kutesh mulong wak Yesu walonda nakash piur pa uumwing uchuku winawa. Wamana anch atwimbuy end kadingap kamu mu uumwing. Chilakej, atwimbuy atadikijana piur pa kwijik “nany wa pakach pau . . . upandakenamu kujimb,” mudi mwasalau kand pakur. (Luka 22:24-27; Mar. 9:33, 34) Chisu chikwau, Jakobu ni Yohan amwita Yesu chakwel ayinkisha jindond ja usey mu Want wa mwiur kupwa kwa Yesu.​—Mar. 10:35-40. w18.06 9-10 par. 1-2

Yehova ukatining anch ambay a uruw akudisha rukat rikash ni ra rawonsu. (Mat. 19:3-6) Kusochik ap kusotan chidi chisal chiyimp nakash cha kuburen rukat chikutwishay muntu kusal. Chawiy, chijidik cha sambwad cha Yijidik Dikum chajidika kwimik dis. (Kuv. 5:18) Anch mbay wa uruw wasal mwamu warumbuk kal nakash ni wasal kal chitil “kurutu kwa Nzamb.” (Dis. 39:7-9) Mbay wa uruw warumbukinangau ukutwish kunenganan nakash mu mivu yivud. Yehova ukatin anch an ikala ni musangar ni mu diking. Yehova kayitap anvaj ching kwau kuwanyish maswir ma ku mujimbu ma anau pakwez, wayita kand awanyisha maswir mau ma mu spiritu. Anvaj afanyina kusal usu wau wawonsu mulong wa kuyikwash anau chakwel ileja Chijil cha Yehova ni ileja kand kumukat. (Kuv. 6:6-9; 7:13) Anvaj kafanyinap kuyiman anau mudi chom chakad usey chikutwishau kwau kupipej ap kuchisadin mu mutapu uyimp, pakwez afanyina kuyiman mudi adi uswan, chipan chidiokila kudiay Yehova chifanyidinau anvaj kusanger.​—Kus. 127:3. w19.02 21 par. 5, 7

Job walama kushinshaman kwend kusutil kushinshikin pa ruchingej rend ra kumufut kudi Nzamb. Wading witiyijin anch Nzamb ubangidin kushinshaman kwend. Chikalap nchik yoziu yarishay nich, Job wading ni kashinsh anch Yehova ukumufut mulong wa kushinshaman kwend. Kashinsh kinak kamukwasha kulam kushinshaman kwend. Yehova wasangara nakash mulong wa kushinshaman kwa Job ni Ndiy wamufuta chipandakena ap anch wading muntu wakad kuwanyin! (Job 42:12-17; Jak. 5:11) Ni mu machuku ma kurutu akez kamufut kand Job difut dipandikena kujimb. Nzamb kakuswimpangap. (Mal. 3:6) Anch twavurik anch ukwatin nich usey kushinshaman kwetu, tukutwish kulam ruchingej retu mu muchim piur pa machuku ma kurutu mapandikena kuwap. (1 Tes. 5:8, 9) Yisu yimwing, ukutwish kutong anch kwikil muntu mukwau ulamina kushinshaman, pakwez ijik anch udiany avud. Ukwikal pakach pa mamiliyon ma antu adia pa mangand mawonsu alamina kushinshamena kwau. Ukwikal kand mu chisak cha amakundj nau amband akweta ritiy alama kushinshaman kwau pasak, ap chisu chafilau kuyijip.​—Heb. 11:36-38; 12:1. w19.02 7 par. 15-16

Mulong chisu cha Chivurikish chasut kal, tufanyidin kwiyipul anch: ‘Mutapu ik nikutwisha kumwimburij Yesu mu kumekesh rukat? Ov, nikat kubangin maswir ma ambay nam akaritiy kusutamu maswir ma amwinam? Ov, nikat kuchingej anch akadivar nau anambaz nam asal yom yisutina pa usu wau, anch nikat kushinshikin mimbu yau?’ El tudandamenany kumwimburij Yesu chisu chawonsu ni ‘kwitek pa ndond ya antu akwau.’ Mbil ya kusal Chivurikish cha rufu ra Kristu yikudandamenap kwikalaku. Chisu ‘chikwezay’ Yesu pa chisu cha mar makash, ukuyikumangej ‘antu atondau kal’ mulong wa kuya mwiur ni Chivurikish chikudandamenap kand kusadik. (1 Kor. 11:26; Mat. 24:31) Ap chisu chikulika kand kusadik Chivurikish, tukutwish kwikal nich kashinsh anch atushalapol a Yehova akuvurik mu manangu yakudia yiney yikemp mudi chijingidij cha kwikepish kujim, kutakaman ni rukat ripandakena rakadingawap kal antu kumekesh. w19.01 25 par. 17-19

Shinshikin mutapu umekeshina ukash wetu wa mujimbu usey wa mutapu tudia kamu mukach. Chakusambish, chakwel anch tulam mujimbu wetu nawamp, tufanyidin kutond yakudia yiwamp ni kwijidish mujimbu. Chilik chimwing, mulong wa kulam nawamp ukash wa muchim wetu wa chifanakesh, tufanyidin kutang Bibil chisu chin chawonsu ni mikand yimedina pa Bibil, ni kumekesh chisu chawonsu anch tukwet ritiy mudiay Yehova. Kwiyijidish mudi kwinoku kwitining kusadin yom twilejina ni kulond piur pa ritiy retu. (Rom 10:8-10; Jak. 2:26) Cha kaad, anch twimen nakash pa mutapu tumekena pol, tukutwish kutong anch tukwet ukash wa mujimbu uwamp pakwez twayedin kal mukach. Chilik chimwing, anch twimen pa yaku yetu piur pa yom ya chiteokras, tukutwish kutong anch tukwet ritiy rikash, pakwez maku mayimp makutwish kupam mukach mwetu. (1 Kor. 10:12; Jak. 1:14, 15) Tufanyidin kuvurik anch Satan ukatin kutuyipish nich yitongijok yend. w19.01 15 par. 4-5

Tukutwish kwiyipul anch: Ov, nikat kusalang yom mudi yiney? Nisadining yom yasalay mutej mwin Samariy? (Luka 10:30-35) Anch antu akwau akat kuman mar, ov, nikutwish kusal chom kanang mulong wa kuyikwash? Chilakej, ov, nikutwish kuyikwash antu apamina kal, adiaafu, ap an akemp adia mu chikumangen akweta anvaj akad kumusadin Yehova? Ov, nikutwish ‘kulond mu mutapu wa kuyongoj antu aziyina’ mulong wa kuyikasikesh?’ (1 Tes. 5:14; Jak. 1:27) Anch twayovil antu akwau riy, tupanin, ni Yesu walonda anch kupan kukat kutuletin musangar. Diyingishin dikwau didi anch tumusangareshin Yehova. (Mid. 20:35; Heb. 13:16) Mwant David walonda piur pa muntu ukata kumekesh riy anch: “[Yehova] ukamulam, ukamwikadish mwom, chad ukez kayuk pansh panap.” (Kus. 41:2, 3) Anch twamekesh riy ni ranaken kudi antu akwau, Yehova niyend ukutwovil riy ni tukwikal ni musangar chikupu.​—Jak. 2:13. w18.09 18 par. 11-12

Yoshiko nambaz mwin Kristu ushinshamena amuleja rusangu riyimp nakash. Dokiter wend wamuleja anch kwashal kal angond akemp chakwel afa. Mutapu ik wakulay? Yoshiko wavurika verse wend wa Bibil wading ukatinay nakash, mufund wa nlel. Wamwakula dokiter wend nich kwitudish anch kwovilap wom, mulong Yehova wading umukwatin ku chikas chend. Mazu makasikeshina tutanina mu verse winou mamukwasha nambaz netu kumuchingejin kamu Yehova. Verse winou ukutwish kutukwash niyetu chakwel tulika kuzazat piturishina ni yakamish kushalijan. Chakusambish, Yehova wamupepila Isay kufund mazu minam mulong wa in Yuda afanyinau kukwat mu winkwal mu Babilon. Pakwez, Yehova kasalap anch mazu minam amafunda mulong wa kutaninamu kwau ching kudi in Yuda ading mu winkwal pakwez mading kand ma usey kudi antu end awonsu adinga pa chisu chinacha djat ni nlel unou. (Isay 40:8; Rom 15:4) Nlel unou tushich mu ‘machuku makash ma mar nakash,’ chawiy tuswirikedina nakash mazu makasikeshina madia mu mukand wa Isay.​—2 Tim. 3:1. w19.01 2 par. 1-2

Anch ambay a uruw akweta milong aurik, akudandamen kwikal atijadina ni akutwish kudandamen kurish ni milong. Kambuy Paul wapana kand diyingishin dineddisadina anch ambay a uruw ashakam pamwing pafunday anch: “Mulong ikundj wakad kwitiyij wishitwidil kal kudi mukajend, ni mband wakad kwitiyij wishitwidil kal kudi nfumwend; chamwamu anend kakwikalap atumbila, pakwez katat atumbil.” (1 Kor. 7:14, TMK) In Kristu avud akwata mupak wa kushakam ni ambay nau a uruw akad kumusadin Yehova ap anch milong yading yikash nakash. Ading ni musangar nakash wa kwipan kusal mwamu mulong mu kusut kwa machuku ambay nau ikala Atuman a Yehova. (1 Kor. 7:16; 1 Pita 3:1, 2) Nlel pa mangand mawonsu, pizwil too ma uruw matwishina mu Chikumangen cha win Kristu. Ukutwish pamwing ap kuman ambay a uruw avud akweta musangar mu chikumangen chen, amakundj ashinshamena ayikatina akajau ni amband akweta rukat ayilimishina anfumwau. Ambay a uruw inay awonsu akat kumekesh anch uruw afanyidin kuulimish.​—Heb. 13:4. w18.12 14 par. 18-19

Dizu “Eden” dirumburikin anch “Musangar,” ni chir chinech chading kamu ndond yisangareshina. Chading chipandiken kuwap nakash, mwading mwizwil too yakudia ni mwading chisambu pakach pa antu nau annam. (Dis. 1:29-31) Dizu dia Hebereu “chir” adikarumwin mu Grek anch pa·raʹdei·sos. McClintock ni Strong alondin mu Encyclopédie umwing anch muntu mwin Grek anch watesh dizu pa·raʹdei·sos, ukutwish kutong piur pa chir chijim chiwamp nakash, chichidijinau ku ubaj ukutwisha kuchiyipish, mudia mitond yiwamp yisongina mabuj ma mitapu kushalijan, ni jinjil jiwamp, mudia masuku mawamp makutwishau kudia ambud nau amikoku. (Ilakej ni Disambishil 2:15, 16.) Yehova wamuteka Adam ni Ev mu chir chinech chiwamp, mu paradis. Pakwez mulong amubwambwila Yehova, ashadisha chisend cha kushakam mu Paradis ni chading kand mwamu piur pa anau. (Dis. 3:23, 24) Ap anch kwadingap kand antu ading ashicha mu Paradis winiwa, chimeken anch Paradis winou wadandamena kwikalaku kushik ni pa Mabeb ma pa chirung cha Nowa. w18.12 4 par. 3-5

Anvaj akat kusal usu wa kuyifundish anau yom yiwamp. Anch an atond kushakam kukwatijan nich yom yiwamp yayifundishau kudi anvajau, pinipa akwat kal chakin kamu mipak yiwamp ni kwipuk milong yivud, yakamish ni minan. Mudi nvaj muwamp, Yehova ukatin anend ikal ni mwom uwamp. (Isay 48: 18) Chawiy ukat kutufundish mbil ja pa dishin piur pa mwikadil uwamp ni mutapu tufanyidina kuyisadin antu akwau. Utwitin kwilej kuman yom mutapu uyimenay ndiy ni kushakam kukwatijan ni yom yitufundishinay. Yom yiney yidiap chikangesh. Pakwez, yikat kutusal twikal in manangu ni kukwat mipak yiwamp. (Kus. 92:5; Jnsw. 2:1-5; Isay 55:9) Tukutwish kwetu kudandamen kusanger yom tukatina, pakwez tufanyidin kutond yom yikutuletina musangar. (Kus. 1:2, 3) Anch twikal ni yitongijok ya Yehova, tukat kutaninamu mu mitapu yivud! w18.11 23 par. 7-8

Mulong wa kwendil mu uyakin, tufanyidinap kulikidil antu akad kumusadin Yehova ikala ni yibachikin padi etu. Pitwileja uyakin, urund wetu nau arund ni antu a mu dijiku akad kwikal Atuman waswimpa. Pamwing ap antu amwing alimisha yitiyij yetu yisu, pakwez akwau ading akisin. Antu a mu dijuku, ambay a mudimu, ni arund a ku shikol akutwish kutubachik chakwel tubombakan nau mu misambu yau. Yom ik yikutwisha kutukwash kujijamen chibachikin cha kwiyandjik mu yishankur ni mu machuku ma misambu makad kumusangaresh Yehova? Tufanyidin kwijik nawamp mayingishin masadina anch Yehova alika kwitiyij machuku minam ma misambu. Tufanyidin kukimbijol mu yichap yetu ni kuvurik mutapu wasambisha machuku mamwing ma misambu. Anch twatongijokin pa mayingishin makwatijadina ni Mifund masadina anch tulik kusal nau misambu yiney, tukat kwikal nich kashinsh anch twendididin mwi njil yikata “kumusangaresh Nsalejetu.” (Efes 5:10) Anch twachingejin mudiay Yehova ni Dizu diend, tukwovap wom piur pa yom yikutwishau kutong antu.​—Jnsw. 29:25. w18.11 12-13 par. 10, 12

Anch mashakamin maswimp kwa chikashimwish, tukutwish kwikal ni yakamish ni kusambish kutongijokin pa milong yetu. Yawiy yom yafanyina kumushiken Josef. Pakwez, watonda kusal yom yawonsu yikutwishay kusal kukwatijan ni yom yamushikena. Mudi mwasalay kand mudimu ukash mulong wa Potifar, wasala mudimu nakash mu rukan mu chisend chawonsu chamwinkishangau kudi mwin kulam rukan. (Dis. 39:21, 22) Mudi Josef, tukutwish kwikal mu milong yikutwisha kutukasiken kuyipwish. Pakwez anch tudi in kushimpish muchim ni kwikasikesh kusal yom yiwamp, Yehova ukutuyukish. (Kus. 37:5) Ap anch tudi ni yakamish, tufanyidinap ‘kushadish ruchingej.’ (2 Kor. 4:8) Yehova ukwikal niyetwetu, pakampwil anch twadandamen kushinshikin pa mudimu wa kulejan. w18.10 24 par. 11; 25 par. 13

Ukwiyov nchik anch muntu wija ni ulimishina wavuramen dijin diey, ap kand chiyimp nakash, kakuvurikinap? Chinech chikutwish kukuziyish nakash. Mulong wak? Mulong etu awonsu tukweting maswir ma chivadik ma kwikal witiyinau kudi antu akwau. Pakwez tukatin anch asala yom yivud kusutamu kwau kutwijik chitudia. Tukatin ijika anch tudi antu a mutapu ik ni yom twasala. (Kuch. 11:16; Job 31:6) Pakwez anch tubabelap, maswir minam ma chivadik ma kusot kwijikan makutwish kwikal mayimp. Mangand ma Satan makutwish kutubachik kwikal ni ntumb ap kwikal muntu wa usey nakash. Anch yom mudi yiney yashiken, tusadinap anch Tatukwetu wa mwiur, Yehova Nzamb, atambula kwijikan ni difukwil yimufanyidina.​—Kuj. 4:11. w18.07 3 par. 1-2

Chawiy, tufanyidinap kushimok anch Satan nau ayilembil end akwet chibachikin chikash kudi anyikel “akata kulond makasu.” (1 Tim. 4:1, 2) Chiding chiyimp nakash anch antakel a marelijon alond makasu. Mulong wak? Mulong anch muntu kanang witiyij mafundish mau ma makasu ni wasal yom yikisinay Nzamb, muntu winou ukutwish kushadish ruchingej ra kushakam chikupu. (Ozey 4:9) Yesu wading wij anch antakel a marelijon a pa chirung chend ading ayidimbin antu. Wayileja pakad wom anch: “Riyind kudi en alej a yijil ni Afaris! En udiany in rubabek! Ukat kwendanganany mu mangand mawonsu ni kwawok aturung, mulong wa kumukarumun muntu umwing kwikal mwin chisak chen. Chad anch wakarumuk en ukat kumuyipishany nakash kupandakanamu en ayinen, chakwel ndiy ufanyidin kwandam mu [Gehen],” charumburik anch kusheshik kwa chikupu. (Mat. 23:15) Yesu walonda anch antakel a marelijon inay ading mudi tatukwau Djabul, udia “mwin kujipan.”​—Yoh. 8:44. w18.10 4-5 par. 5-6

Yom ik yafilay Yesu kurumburil? Wawejinaku anch: “Sangarany kwen ni kuzangijal, mulong akulamidinany difut dijim mwiur. Wawiy kand mutapu wayizengolau [aprofet] a Nzamb pakur.” (Mat. 5:12) Chisu chayibulau atwimbuy ni kuyikangesh kusal mudimu wa kulejan, ‘padiokalau ku dirumburish dijim, asangara nakash.’ Chakin kamu, kasangarap mulong wa yibul yayichintau. Pakwez asangar “mulong Nzamb witiya awiy kuman mar mulong wa kumwambat Yesu.” (Mid. 5:41) Nlel unou, antu a Yehova niyawiy akat kujijaman nich musangar chisu chiyizengodinau mulong wa dijin dia Yesu. (Jak. 1:2-4) Mudi atwimbuy, tukatap kusangar mulong wa mar ap mulong wa kutuzengol. Pakwez anch twashal ashinshamena kudi Yehova, ndiy ukutwinkish kutakaman tuswiridina mulong wa kujijaman. Anch Yehova, ‘Nzamb wa musangar,’ ukwet musangar mulong wetwetu, tukutwish kwikal ni musangar ap anch atuzengodin ap atupompat kudi dijuku dietu.​—1 Tim. 1:11. w18.09 20 par. 18-20

Tushich pa yisu ya “mar nakash,” ni mwom wizwil nich mar ni ushon, antu avud amen mar nakash ni mar mayikumin kal. (2 Tim. 3:1-5) Antu 800000 ni kusut, charumburik anch muvu ni muvu muntu umwing ukat kwijip kupwa kwa masekond 40. Cha ushon, ap akadivar netu ikala ni yovil yiney ni ijipa ayinau. Nlel, akadivar nau anambaz netu avud arishin ni milong yikash ni aswirikedin rukat retu. Amwing akat kuyiswingish ap kuyizengol. Akwau akat kujijaman chikalap nchik kuyovish wom ap kuyisaal masaal ku jindond kusadidinau mudimu. Ap kand aziyin nakash mulong asadin asaa avud ku mudimu ap akwet midimu yiziyishena. Akwau kand akwet milong yikash mu majuku. Pamwing ap atijana ni antu akad kumusadin Yehova ni akat kuyilond chisu chawonsu nayimp kudi ambay nau a uruw. Mulong wa milong yiney ni yikwau kand, antu avud akat kwiyov anch kakwetap kand usu ni akutwish chad kusambish kwidjidjek mulong wa yitiyij yau. w18.09 9 par. 3, 5

Anvaj in Kristu akutwish kusal mudimu pamwing ni Yehova kusutin kuyikwash anau kwitekin yom ya kusal mu mudimu wa Yehova. Anvaj avud asadin kal mwamu. Mudi chibudikin, anau amakundj ap amband akwata mupak wa kumusadin Yehova chisu chawonsu, ap kwi ndond kulemp ni kwol kwau. Amwing adi amishoner, akwau adi ayibol ayila kulejan kwi ndond kudia maswir ma in kulejan ni akwau kand asadin ku Betel. Chakin kamu, chisu chidiau anau kulemp, anvaj kakutwishap kand kusutish nau chisu pamwing mudi mwading kusalau. Pakwez akat kuyikasikesh anau pakad choy kudandamen kumusadin Yehova kwi ndond kwawonsu kudiau. Mulong wak? Mulong akwet musangar nakash anch anau amutekin Yehova pa ndond ya kusambish mu mwom wau. Anvaj avud akat kwiyov mudi Ana, walonda anch ‘wamupana’ mwanend Samwel kudi Yehova. Anvaj akat kwiyov anch yidi ntumb yijim nakash kusal mudimu pamwing ni Yehova mu mutapu winou.​—1 Sam. 1:28. w18.08 22 par. 4

Pakwez Yesu kalondap anch chom chinech chikutwishap kusadik. Walonda kand anch: “Wayukany kwen en udianya atuzwendj, mulong Want wa Nzamb udi wenen.” (Luka 6:20) Pakwez chinech chirumburikinap anch antu awonsu adia atuzwendj akumutesh Yesu ni kutambul yiyukish ya pakampwil. Kwadinga atuzwendj avud nakash alika kumulondul Yesu. Uyakin udi anch, tukutwishap kurumburish urund ukwetay muntu ni Yehova kusutin yom ya ku mujimbu yikwetay. Pakach pa antu a Yehova, padi akadivar nau anambaz adia ampich ni akwau adia atuzwendj. Pakwez awonsu amukatin Yehova ni amusadidin nich muchim umwing. Mifund yiyilejin antu adia ampich anch “kangal . . . kuchingej mu mapit mau, pakwez amuchingej Nzamb.” (1 Tim. 6:17-19) Dizu dia Nzamb diyibabeshin kand atushalapol awonsu a Yehova, ampich ap atuzwendj anch chidi cha ubaj kukat nfalang. (1 Tim. 6:9, 10) Anch twayiman akadivar netu mudi muyimenay Yehova, tukuyirumburishap kusutin yom yikwetau ap yiburedinau. w18.08 12-13 par. 11-12

Tukatin kumekesh kudi Yehova anch tumujikitishin nakash mulong tudi antu end. Twij anch chisu twapana mwom wetu kudi ndiy, wading mupak wa manangu nakash twakwata. Chawiy tukwatin mupak wa kwipuk kusal yom yin yawonsu yikisinay Yehova. Ni tuyikatin ni tuyilimishin akadivar nau anambaz netu mulong niyawiy kand adi a Yehova. (Rom 12:10) Bibil ushidinamu anch: “[Yehova] kakuyidjibulap antwend.” (Kus. 94:14) Chinech chidi chizu. Chikalap nchik chikushikena, Yehova ukwikal niyetwetu. Ap anch twafa, kakutwishap kutuvuramen. (Rom 8:38, 39) Chawiy anch twapandap nchik, ap anch twafap nchik, tudi ayen a [Yehova].” (Rom 14:8) Tuchingedin chisu chikuyivumbulay Yehova arund nend awonsu ashinshamena afila kal. (Mat. 22:32) Ap katat tusangaredin yipan yivud yiwamp yidiokila kudiay Tatukwetu. Mudi mulondinay Bibil, “wayuk muchid umutekina [Yehova] kwikal Nzamb wend, ayuk antu atonday [kwikal] uswan wend amwinend.”​—Kus. 33:12. w18.07 25 par. 18-19

Antu amwing akutwish kutong anch mipak yimwing yifanyidinau kukwat mu mwom, mudi shikol yikwilejau ap mudimu ufanyidinau kusal yiyitadin ayinau, afanyidin kwikal ni want ipau wa kutond yom yikatinau, anch kom kau kayifishinap nich. Akutwish kutong mudi mudia mazu ma Paul malondina anch: ‘Mulong wak want ipau wam afanyidin kuurumburish kudi kom ka muntu mukwau?’ (1 Kor. 10:29) Ap anch tukwet want ipetu wa kukwat mipak yiney, tufanyidin kuvurik anch want ipau wetu ukwet mimbu ni anch mipak yawonsu tukwatina yikwet yibudikin. Chawiy chalonday Paul mazu madia mu mufund wa nlel. Chawiy ap anch tukwet want ipetu wa kukwat mipak piur pa milong yetu, yom tukatina yidingap kamu yom ya usey nakash. w18.04 12 par. 10

Mwin Kristu nlel ukutwish kulond anch umwifukwidin Yehova pakwez ukat kusal kand yom yikisinay Yehova. (Jud 11) Ukutwish kusal mudimu wa kulejan nich mushiku ni kukumangan chisu chawonsu. Pakwez mu chisu chawiy chimwing, ukutwish kwizwish manangu mend nich yitongijok ya masandj, ya chibud ap ya rukis. (1 Yoh. 2:15-17; 3:15) Yitongijok mudi yiney yikutwish kumushikij ku yisal ya yitil. Antu akwau kakutwishap kwijik yom tutongina ap tusadina, pakwez Yehova wij. Wij anch tudi chakin kamu ku mutambu wend. (Jer. 17:9, 10) Ap anch twarumbuk, Yehova kakatap kutulik kapamp kamwing. Anch twaya ku mutambu uyimp, Yehova ukat kututazuk anch: ‘Chirikany kudi am.’ Yehova wij anch tukat kurish ni kuziy kwetu. Pakwez ukatin anch tulamata dang ku mutambu wend ni tukisa yom yiyimp. (Isay 55:7) Anch twasal mwamu, utukanin anch ukutukwash ni kutwinkish usu tuswiridina mulong wa kupandakan maku mayimp.​—Dis. 4:7. w18.07 16 par. 5-6