Ngond wa 6

Kushilamu kwa Yesu kwafanyina kamu kuyikasikesh atwimbuy! Atwimbuy kijikap kamu nawamp anch Yesu udi piswimp ni kufa. Pakwez rufu rend rafanyinap kumekesh anch akushal pakad ukwash. Yehova wading kwaku mulong wa kwakul malembil mau ni kuyikwash mu mudimu wa kulejan. Ni mwawiy kamu mwasalay. Chisu chikemp kupwa kwa Yesu kufa, atwimbuy amwita Yehova chakwel ayinkisha kutakaman ni Yehova wakula malembil mau. (Mid. 4:29, 31) Yom yiney yidi kand mutapu umwing nlel unou. Anch twadandamen mu mudimu wa kulejan, tudandamedin kwikal arund a Yesu. Ni tukutwish kwikal nich kashinsh anch Yehova udi kwaku mulong wa kwakul malembil metu ma kwit ukwash anch twaman anch chitukasikedin kulejan. (Fil. 4:13) Tujikitishin nakash mulong Yehova ukat kwakul malembil metu ni tumukwet Yesu mudi murund netu. Yipan yiney yidiokila kudi Yehova yitukasikeshin kudandamen kusong mabuj.​—Jak. 1:17. w18.05 14 par. 17-18

Akadivar afanyina kwiyipul mulong wak Paul wayileja kupandakesh kukasikeshijan umwing ni mukwau. Kupwa kwa mivu piswimp yitan, diyingishin dimwing diamekana patok. Pa chisu chinicha, amana anch dichuku dia dirumburish dia Yehova piur pa Yerusalem diading piswimp. Ajingunina anch ading afanyidin kuchin mu musumb mudi mwayilejau kusal kudi Yesu. (Mid. 2:19, 20; Luka 21:20-22) Dichuku dia Yehova diashika mu muvu wa 70 C.C., chisu chasheshau in Rom musumb wa Yerusalem. Nlel unou, tudi niyetu mu mashakamin ma mutapu umwing. Dichuku ‘dijim ni dikwatishena wom’ dia Yehova didi piswimp. (Jow. 2:11) Mazu ma muprofet Sofoniy matadin kand chisu chetu: “Dichuku dijim dia [Yehova] didi piswimp, didi kamu piswimp, dezil mau!” (Sof. 1:14) Mulong wa diyingishin dined, tufanyidin “[kutalijan] muntu ni mukwau chakwel tukwashijanany kumekesh rukat ni kusal yisalijok yiwamp.” (Heb. 10:24) Tufanyidin kuyibangin nakash akadivar netu, chakwel tutwisha kuyikasikesh chisu chikwetau kuswir. w18.04 21-22 par. 1-2

Kukasikesh mudi ik kwamwinkishau Joshua kudi Yehova kurutu kwa kuyandjik antu End mwi Ngand ya Kushilamu! Yehova wayikasikesha kand antu end mudi chisak. Chilakej, Yehova wading wij anch in Yuda afanyina kwikal ni kuswir kwa kuyikasikesh chisu chikwikalau asuk mu Babilon, ni wayinkisha uprofet ukasikeshina ulondina anch: “Kangal wovany wom, mulong nidi nen. Kangal wazalany, mulong nidi Nzamb wen. Nikukukasikeshany, ni kukukwashany kand. Nikukuchidijany ni kukupandishany.” (Isay 41:10) Kupwa Yehova wayikasikesha in Kristu a kusambish ni utukasikeshin kand niyetu mutapu wawiy umwing. (2 Kor. 1:3, 4) Yehova wamukasikesha kand Mwanend. Kupwa kwa Yesu kumubatish, watesha dizu mwiur dikat kulond anch: “Ey udi Mwanam unikatila nakash. Am nikat kusangar mulong weyey.” (Mat. 3:17) Ukutwish kutongin mutapu mazu minam mamukasikesha Yesu chisu chasalay mudimu wend panap pansh? w18.04 16 par. 3-5

Antu amwing akutwish kutong anch Yehova kamwinkishap Adam want ipau wa kusal yom yikatinay. Pakwez kijap kwau anch mbil ya kusal yom yikatinay muntu kusal yishalijadin ni kwikal ni mbil ya kukwat mipak piur pa yom yidia yiwamp ni yiyimp. Adam ni Ev ading ni want ipau wa kutond anch akumuziyil Nzamb ap bwat. Pakwez ching Yehova ndiy wading ni mbil ya kukwat mipak piur pa yom yidia yiwamp ni yiyimp. “Mutond... wa ronganyin ra kuwap ni kuyip” wading uman kudi Adam ni Ev mulong wa chom chinech. (Dis. 2:9) Pamwinkishau Adam ni Ev mbil ya kulik kudia dibuj, Yehova wayifundisha anch afanyidin kumuziyin ndiy mulong wa kwikal ni want ipau wakin. Adam ni Ev atonda kumubwambwil Yehova. Ov, Adam ni Ev atonda njil yitwadina ku kwikal ni want ipau nakash, mudi mwalonday Satan? Bwat, yasadikap mwamu. Chinyim ni chinech, ashadisha want ipau wakin wayinkishau kudi Yehova. w18.04 5-7 par. 9-12

Yehova ukat kusal yom yivud kusutamu kwau ching kuyanaken atushalapol end. Ukat kusal chom kanang mulong wa kuyikwash. Chilakej, pading pamenau in Isarel mar mudi aswik mu Idjibit, wamana mutapu wading umenau mar ni wakwata mupak wa kuyikwol. Yehova wamuleja Moses anch: “Am namen kal mar ma antwam. . . . Nateshil kal kudil kwau . . . nij mar mau. Katat nez kal pansh mulong wa kuyikamunin ku chikas cha in Idjibit.” (Kub. 3:7, 8) Mulong Yehova wayovila antu end ranaken, wayikwola mu uswik. Kupwa kwa yitot ya mivu, in Isarel ayirishikisha nakash kudi akankuny nau padingau mwi Ngand ya Kushilamu. Mutapu ik wasalay Yehova? Ndiy “wayovila riy ku kwinan kwau, mulong wa in kuyimesh mar ni kuyakamish.” Chikwau kand, ranaken ramubachika Yehova kuyikwash antu end. Watuma ankalansambu (anzuj) mulong wa kuyipandish in Isarel ku makas ma akankuny nau.​—Ank. 2:16, 18. w19.03 15 par. 4-5

Yijidik yaad ya kusambish pakach pa Yijidik Dikum yayileja in Isarel anch afanyidin kumwifukwil ching Yehova ni yayilikisha kwifukwil akish. (Kub. 20:3-6) Yijidik yiney yadingap mulong wa kutaninamu kwa Yehova. Pakwez, yading mulong wa kutaninamu kwa antu end. Pakwez, chisu chifukwilangau anzamb a michid yikwau, amananga mar nakash. Chinyim ni chinech, Yehova wayiyukishang antu end pashalangau ashinshamena kudi ndiy ni payisadinangau antu akwau nich kutentam. (1 Ant 10:4-9) Tukutwishap kumufish nich Yehova anch antu alondina anch amusadidin alik mbil jend ni asambish kuyisal antu end nayimp. Pakwez, Yehova utukatin ni ukat kuman chisu turishina ni kuburen kutentam. Ukat kwiyov nayimp nakash mulong wa kusansan kwetu kusutamu mutapu ukatay maku kwiyov anch mwanend umen mar. Ap anch kakukangeshangap kapamp kamwing yom yiyimp kutushiken, pa chisu chiwanyidina ukez kayirumburish in kusal yitil akad kukarumuk mulong wa mutapu wayisadilau antu akwau. w19.02 22-23 par. 13-15

Mbing jikemp kurutu kwa Chivurikish, yikumangan yetu yikat kwisambin nakash piur pa Yesu ni kwikepish kwamekeshay mu kupan mwom wend mudi difut. Tukat kwiyov abachikinau kwimburij chilakej chend cha kwikepish ni kusal rusot ra Yehova ap pa chisu chikasikena kusal mwamu. Tukat kusal kand usu wa kumwimburij Yesu kusutil kumekesh kutakaman. Tong piur pa kutakaman kwamekeshay machuku matakela kurutu afa. Wading wij nawamp anch akankuny nend ading piswimp ni kumuswingish, kumubul, ni kumujip. (Mat. 20:17-19) Pakwez witiyina kufa. Pawanyina chisu, wayileja atwimbuy end ashinshamena adingay nend pamwing ku Getiseman anch: “Tumbukany, tuyany. Talany, mwin kwintungun ou kamu ou!” (Mat. 26:36, 46) Peza chisak cha amasalay akweta mat mulong wa kumukwat, Yesu wimana kurutu wimekesh amwinend ni wayileja amasalay anch ayilika atwimbuy chakwel aya. (Yoh. 18:3-8) Kutakaman mudi ik kwamekeshay Yesu! Nlel, in Kristu azizidilau many nau amikoku akwau akat kusal usu wa kumwimburij Yesu kusutil kumekesh kutakaman. w19.01 27-28 par. 7-8

Mudi mwin kufwatul ukweta ukaliweny ukata kubomb ulombu kushalijan chakwel afwatula chom kanang, niyetu tufanyidin kubomb mikadil kushalijan yiwamp chakwel twikala antu itudishina. Pakach pa mikadil yiney padi kwikepish, kuziyin, kudut ni kutakaman. Antu ikepishina awiy kusu akata kuziyin ku rusot ra Nzamb. Chawiy rusot ra Nzamb ridi anch twikala antu adutina. (Jnsw. 29:11; 2 Tim. 2:24) Pitukata kusal rusot ra Nzamb, tukat kumujimesh Satan. Chawiy ap anch tudi antu ikepishina ni adutina, pakwez antu avud adia mu mangand minam ma Satan atukisining. (Yoh. 15:18, 19) Chawiy, tukwet kuswir kwa kwikal atakamena mulong wa kumurishikish Satan. Muntu wakad kwikal witudishina udi muntu ukweta chibud, kijingap mutapu wa kudut ni kakatap kumuziyin Yehova. Wawiy mutapu udingay kamu Satan. Chidiap chom cha kushimok mulong ndiy ukisining antu itudishina! Antu inay akat kusal anch mikadil yiyimp ya Satan yimekana patok pakatau kusal usu wa kwikal ni mikadil yiwamp. Ap anch ayikisin kamu kudi Satan, pakwez awiy amumekeshin kamu anch udi mwin makasu. Mulong wak? Mulong chikalap nchik yom yilondinay ap yisadinay, Satan kakutwishap kuyikangesh antu itudishina kumusadil Yehova!​—Job 2:3-5. w19.02 8-9 par. 3-5

Yehova wading wij anch antu a mu Babilon afanyina kwov wom. In Babilon afanyina kuyirishikish kudi amasalay akweta usu a in Mediy ni Peris. Yehova wafanyina kusadin amasalay inay mulong wa kuyikol antu end mu winkwal mu Babilon. (Isay 41:2-4) Chisu chijikau in Babilon nau antu a michid yikwau anch akankuny nau ading asejin piswimp, asala usu wa kulam kutakaman kwau kusutin kulond kudi umwing ni mukwau anch: ‘Ikal mukash.’ Asonga kand akish, mulong ading achingejin anch akish inay ela kuyiking. (Isay 41:5-7) Pa chisu chawiy chimwing kand, Yehova watudisha michim ya in Yuda adinga mu winkwal payilejay anch: ‘Ey, Isarel, [udiap mudi amutej ney] udi kashalapol wam . . . Kangal wazal, mulong nidi Nzamb wey.’ (Isay 41:8-10) Vurik anch Yehova walonda anch: ‘Nidi Nzamb wey.’ Kusutil ku mazu minam, Yehova wayikasikesha in kumwifukwil end ashinshamena anch kayivuramedinap ni anch awiy ading adandamedin kwikal antu end. Wayileja anch: “Nikukulamany . . . ni kukukamuninany.” Chakin kamu, mazu ma dikasikesh minam mayikasikesha kamu in Yuda adinga mu winkwal.​—Isay 46:3, 4. w19.01 4 par. 8

Marko 1:9-11 ulejen kapamp kakusambish ka tupamp tusatu twalonday Yehova kudiokal mwiur. Yehova walonda anch: “Ey udi Mwanam unikatila nakash. Am nikat kusangar mulong weyey.” Mazu minam mamupukuna Yesu chipandikena pateshay Dizu dia Tatukwend dikat kulond anch umukatin ni umuchingejidin! Mazu ma Yehova mamekesha yom yisatu ya usey nakash piur pa Yesu. Chakusambish, Yesu udi Mwanend. Cha kaad, Yehova umukatin Mwanend. Ni cha kasatu, Yehova umusangaredin Mwanend. Kusutil kulond anch “Ey udi Mwanam” Yehova wamekesha anch Mwanend mukatish, Yesu wandam kal mu urund usu ni Tatukwend. Padingay Yesu mwiur, wading mwan wa mu spiritu wa Nzamb. Pakwez, pa chisu cha dibatish amuzizila many kusutil spiritu utumbila. Pa chisu chinicha, Nzamb wamekesha anch Yesu Mwanend uzizidilau many, wikala chadi ni ruchingej ra kuchirik mwiur mulong wa kwikal Mwant watondau kal kudi Nzamb ni Mwin Kupesh Mujim. (Luka 1:31-33; Heb. 1:8, 9; 2:17) Chawiy, choviken patok mulong wak pa chisu cha dibatish dia Yesu Tatukwend walonda anch: “Ey udi Mwanam.”​—Luka 3:22. w19.03 8-9 par. 3-4

Yiyul yiyimp yidiaku kudiosh chisu chilemp. Satan ndiy wading wa kusambish kuyinkish antu chiyul chiyimp. Wamuleja Ev anch ndiy ni Adam akwikal ni musangar anch akwat ayinau mupak piur pa mutapu ukushakamau. (Dis. 3:1-6) Pakwez Satan wading mwin choy! Wakata anch Adam ni Ev, pamwing ni anau akuvalau, amuziyil ni amwifukwil ndiy, pa ndond pa kumwifukwil Yehova. Pakwez Yehova ndiy wayinkisha yom yawonsu yadingau nich. Wayinkisha chir chiwamp cha kushakam, ni mijimbu yiwanyidina yafanyina kushakam chikupu. Cha ushon, Adam ni Ev amubwambwila Nzamb. Mu kumubwambwil, iyaurila ayinau kudi Muntu wayinkisha mwom. Kwikala yibudikin yiyimp nakash. Mudi yisalamb yidioshinau ku mutond, Adam ni Ev ananapa pakemp pakemp ni afa. Anau niyau amana mar, ni mar minam matukwatin etu awonsu. (Rom 5:12) Antu avud nlel kijap yom yilondinay Nzamb ni asadin yom yikatinau ayinau kusal. (Efes 2:1-3) Yibudikin yidiaku yimekeshin patok uyakin udia mu mufund wa nlel. w18.12 16 par. 3-4

Kambuy Paul wading ni manangu, wading muntu wileja, ni walondang mazu anch makep maad. (Mid. 5:34; 21:37, 39; 22:2, 3) Pakwez walika manangu ma mangand ni wakwata mipak yend yimedina pa Dizu dia Nzamb. (Mid 17:2; 1 Kor. 2:6, 7) Mudi chibudikin, watwisha kusal nawamp mudimu wend wa kulejan ni wachingeja kutambul difut dia chikupu. (2 Tim. 4:8) Chakin kamu, yitongijok ya Yehova yidi ya piur nakash. Anch twalondul mbil ja Nzamb, tukwikal kamu chakin nich musangar ni tukutwish mu mwom. Pakwez Yehova kakumushindinap muntu chakwel atong mudi ndiy. ‘Kashalapol ushinshamena ni kubabal’ kakatap kusop yitongijok yetu, ni ap amakurump a chikumangen kakusalangap mwamu. (Mat. 24:45; 2 Kor. 1:24) Umwing ni umwing wa pakach petu ukwet chisend cha kurijek yitongijok yend chakwel aman yom mudi muyimenau kudi Yehova. w18.11 24 par. 12-13

Nzamb wasambela kulond kusutin muprofet Isay anch chisu chikezau in Isarel kuchirik mwi ngand yau, ngand yau yikwikal mu chisambu. Kwikil muntu wafanyina kwov wom anch akumusal nayimp kudi nnam wa chidiany ap kudi muntu kanang. Ansand nau amapal afanyina kwikal mu diking. (Isay 11:6-9; 35:5-10; 51:3) Isay wasambela kand kulond anch ngand ya kabuj, kadiap kwau ching muchid wa Isarel, “yikez kizul nich ronganyin ra [Yehova] mudi mukata kwizul mem mu karung.” Chakin kamu, yom yiney yikushiken mu machuku ma kurutu. Ijik anch Isay walonda kand anch in Isarel akudiokala mu Babilon kakezap kuyisal nayimp kudi annam ayidiany ap kudi antu kanang. Walonda anch ngand yau yikusong yakudia yivud yiwamp mulong kwafanyina kwikal mem mavud, mudi mwading mu chir cha Eden. (Dis. 2:10-14; Jer. 31:12) Ov, uprofet winou wafanyina kuwanyin kwau ching pa chisu cha in Isarel? Ijik anch uprofet winou walonda kand anch amputames, ayilim, ni atujikamatu akuyerik. Pakwez yom yiney yasadikap kudi in Isarel adiokala mu winkwal mu Babilon. Chawiy, Nzamb wading ulejen anch ukuyok ayej awonsu mu machuku ma kurutu. w18.12 5-6 par. 11-12

Tuchingejin anch tukudandamen kwendil mu uyakin chikupu. Pakwez yom ik yikutwisha kutukwash kukwat mupak wa kudandamen kwendil mu uyakin? Dandamen kwilej Bibil ni kutongijokin pa yom wilejina. Chisu chawonsu ikal ni program wa kusalang mwamu. Anch wilej nakash, ukukat uyakin ni ukukwat mupak wa kuulam baa. Jinswir 23:23 utulejin ‘kuland uyakin’ ni utulejin kand anch tufanyidin kuland “manangu, [dipup] ni ronganyin.” Chitinap kwau ching kusu kwijik uyakin wa mu Bibil. Pakwez tufanyidin kuusadin mu mwom wetu. Anch twatambul ronganyin, tukat kukumangej yom yin yawonsu twilejina pamwing ni yom twijing kal. Manangu makat kutubachik kusal kukwatijan ni yom twija. Yisu yimwing uyakin ukat kutupup kusutin kutulej yom kanang tufanyidina kuswimp. Tufanyidin kwikal aswapela kwitiy dipup dined, dilondinay Bibil anch dipandakenamu utad wa usey nakash.​—Jnsw. 8:10. w18.11 10 par. 3; 13 par. 13-14

Chom ik chidia cha usey nakash mu mwom wey? Mulong tudi antu a Yehova, chom chidia cha usey nakash kudi etu udi urund wetu ni ndiy. Tukutwishap kuuswimp nich chom chikwau. Tukwatining kand nich usey uyakin udia mu Bibil mulong ukat kusal anch chituswapel kwikal arund a Yehova. (Kol. 1:9, 10) Yehova udi Mulej wetu Mujim, ukata kutufundish uyakin wa usey udia mu Dizu diend Bibil. Ukat kutufundish usey wa dijin diend ni ukat kutulej piur pa mikadil yend yiwamp. Ukat kutulej anch utukatin nakash, ni rukat riner rasala anch apana mwom wa Mwanend mukatish mulong wetwetu. Yehova ukat kutufundish piur pa Want wa Umesia ni piur pa ruchingej ra Paradis panap pansh. Yehova ukat kutufundish mutapu tufanyidina kushakam. Tumen uyakin winou mudi dipit mulong ukat kutukwash kumusejin Sakatang wetu ni ukat kutwinkish chitongijok mu mwom. w18.11 3-4 par. 1-2

Antu akata kulond makasu kakutwishap kumudimb Yehova. Bibil ulondin anch “ndiy ukat kuman yom yawonsu zwang.” (Heb. 4:13) Chilakej, Ananias ni Safira ayidimba atwimbuy. Alandisha chom chimwing mu yom yadingau nich ni apana chikunku cha nfalang kudi atwimbuy. Ananias ni Safira akata kwimekesh kudi antu a mu chikumangen, chawiy ayileja atwimbuy anch apan kal nfalang jawonsu. Pakwez Yehova wading wij anch adimben ni wayipupa. (Mid. 5:1-10) Mutapu ik ukatay kwov Yehova mulong wa antu akata kudimban? Antu awonsu alondina makasu mayimp nakash ni alikina kukarumuk akuyidjubwil mu “dijiy dia kasu,” mudi Satan. Charumburik anch akuyijiyish chikupu. (Kuj. 20:10; 21:8; Kus. 5:6) Twij anch Yehova “kadiap muntu chakwel ing adimbana” ni anch “Nzamb kakutwishap kudimban.” (Kuch. 23:19; Heb. 6:18) ‘Yehova ukisin... rudim rikata kulond makasu.’ (Jnsw. 6:16, 17) Anch tukatin kumusangaresh, tufanyidin kulond uyakin. w18.10 5-6 par. 10-13

Ukusal nchik anch mukurump wey wa mudimu wakwit kupan nfalang mulong wa musambu ukwatijadina ni relijon wa makasu? Pa ndond pa kuchingel chom mudi chinech chishiken, chikwikal chiwamp kutongijokin katat piur pa mutapu umenay Yehova yom yiney. Kupwa, anch twikal mu chishiken mudi chinech, chikutuswapel kusal ni kulond yom yiwamp. Kutongijokin pa yitongijok ya Yehova kukutwish kutukwash kushal ashinshamena kudi ndiy anch twayel mayej mitina kwok mau mau. Chakin kamu, twakwatin kal mupak wa kulik kututek mash ap yikunku yinying yijim ya mash. (Mid. 15:28, 29) Chisu ik chiwamp cha kukwat mupak wa yom tukusala? Ov, chidi chisu tudia mu opital, pamwing ap twovil kusansan ni atubachikin kukwat mupak wa mau mau? Bwat kamu. Chinech chawiy chisu cha kukimbijol, kwinzwish kart utazukinau anch DPA urumburila patok yom tukatina ni kwambamb pamwing ni dokiter wetu. w18.11 28 par. 5; 30-31 par. 15-16

Yehova udi kafung ukatina ni ukata kuyilam antu end. Uyilamin mu diking ni uyichidijin mu makas ma akankuny au. Chinech chitwinkishin kashinsh ni chitukasikeshin nakash pitusejina piswimp ni disudiel dia mangand minam. Yehova ukudandamen kuyilam antu end pa chisu cha mar makash mezina kamu piswimp ap. (Kuj. 7:9, 10) Chawiy, ikala ansand ap amapal, akweta ukash wa mujimbu uwamp ap ayilim, antu a Nzamb kakwovap wom ap kuzal pa chisu cha mar makash. Pakwez, akusal yom yishalijadina! Akuvurik mazu ma Yesu malondina anch: “Imanany piur, zambulany mes, mulong dipandish dien diez kal piswimp.” (Luka 21:28) Ap chisu chikuyirishikishau kudi Gog udia kubombakan kwa michid yikweta usu, antu a Nzamb akwikal nich kashinsh anch Yehova ukuyichidij. (Ezek. 38:2, 14-16) Mulong wak? Mulong ij anch Yehova kakuswimpangap. Ukumekesh chisu chawonsu anch udi mwin Kupandish, mwin rukat, ni mwin kuyibangin antu end.​—Isay 26:20. w18.09 26 par. 15-16

Tong mutapu wiyovau in Isarel chisu chayilejau kudi Yehova mazu madia kwiur oku. Twij anch muntu ni muntu pakach petu ukwet usey kudi Yehova. Bibil ushidinamu anch: ‘Mulong udi mwin Dikand, ukukupandishany. Ukez kakusangerany en.’ (Sof. 3:16, 17) Yehova ukanin kuyikasikesh ni kuyongoj antu end chikalap nchik milong yikwetau. Ulondin anch: “Ukez kikalany, mudi mwan wamwishilau kudi makwend, usendilau mwi nkond nich rukat. Nikez kakwongojany... mudi mwan ukat kwogonjau kudi makwend.” (Isay 66:12, 13) Tong mutapu ukatay mwan kwiyov nawamp chisu chimulaminau nawamp ni kumusengesh kudi makwend! Yehova ukukatin nakash ni usotin wiyova anch udi mu diking. Kangal wavuramen anch udi wa usey nakash kudi Yehova.​—Jer. 31:3. w18.09 9-10 par. 6-7

Chisu cha pakur, in Isarel ading ni mitapu yivud ya kukwash. (Kub. 36:2; Neh. 11:2) Nlel unou, niyey ukwet mitapu yivud ya kupan chisu chey, yom ya ku mujimbu ni ukaliweny ukweta mulong wa kuyikwash akadivar nau anambaz ney. Anch wasal mwamu, ukukwikal ni musangar nakash ni Yehova ukukuyukish. Antu akwashina mu midimu ya kutung akat kwikal ni arund asu. Nambaz Margie wasala mivu 18 mu midimu ya Kutung Yot ya Want. Mu midimu yiney, wayibanginang nakash anambaz ayangadim ni wayifumbang. Ulondin anch winou udi mutapu uwamp wa kwipan mulong wa kukasikeshijan umwing ni mukwau. (Rom 1:12) Chawiy, anch wikal ni milong yikash mu mwom wend, arund ikalay nich chisu chasalay mudimu akat kumukasikesh. Ov, wakwashinap kal mu mudimu wa kutung? Ukutwish kukwash ap anch ukwetap ukaliweny wa pakampwil. w18.08 24-25 par. 9, 11

Chisu chafunday Paul yom yiney, Timote wading ukwet piswimp mivu 30. Pakwez Paul wamwinkisha yisend yijim. Dilejan ik twilejidinaku? Tufanyidinap kuyirumburish akadivar ansand kusutin mivu yau. Tong bil piur pa yom yawonsu yasalay Yesu pa chisu chadingay ni mivu 33! Mu yaku ya jindond jimwing, antu kakatap kwau kuyilimish ansand. Mudi chibudikin, amakurump amwing a chikumangen akutwish kulik kuyitond ansand kusal mudi ankwash a mudimu ap amakurump a chikumangen, ap anch awanyishin yom yitinau. Pakwez Bibil kalondinap anch mukadivar ufanyidin kwikal ni mivu kanang kurutu amutonda kwikal nkwash wa mudimu ap mukurump wa chikumangen.​—1 Tim. 3:1-10, 12, 13; Tit. 1:5-9. w18.08 13-14 par. 15-16

Chakwel tukwata mipak yiwamp, tufanyidin kwikal ni uman wakin. Chawiy, tufanyidin kubabal nakash chisu tutondina yom tutangina. (Fil. 4:8, 9) Tufanyidinap kwetu kusutish chisu mu kutal jinsangu ja makasu jidia pa Internet ap kutang mesaj mapalangeshina jinsangu jakad uman. Chinech chidi cha usey nakash kwipuk tupend twa web tukatau kusadin in kupumbok mulong wa kukasikesh yitongijok yau ya makasu. Asadin mwamu mulong wa kuziyish ritiy ra antu a Nzamb ni kuyipish uyakin. Jinsangu ja makasu jikat kushikij ku kukwat mipak yiyimp. Kangal watong anch jinsangu ja makasu jikutwishap kwikal nich yibachikin padi ey. Shinshikin yom yashikena pa chisu cha Moses payau in kutentish 12 kwendish Ngand ya Kushilamu. In kutentish 10 alonda yom yiyimp pachirikau. (Kuch. 13:25-33) Awejinaku yom ya makasu ni antu a Yehova ova wom nakash ni aziya. (Kuch. 14:1-4; 6-10) Pa ndond pa kushinshikin uman ni kumuchingejin Yehova, antu atonda kwa usup kwitiy jinsangu ja makasu. w18.08 4 par. 4-5

Antu amwing akwetaku mikadil yiwamp. Ni antu akad kumwifukwil Yehova kakusalangap kwau chisu chawonsu yom yiyimp. Pamwing ap wij antu a mutapu winou. Ov, chinech chirumburikin anch adi kamu arund awamp? Chakin, mutapu ik ukutwishau kwikal ni usu pa urund wey ni Yehova? Akukwashin kusej piswimp ni Nzamb? Yom ik yidia kamu ya usey nakash kudi antu inay? Yom ik yikatau kwisambin nakash? Ov, akat kwisambin chisu chawonsu piur pa masun ma katat, nfalang, yom ya tekinoloji ya katat, kwipuwangej ap yom yifanakena ni yiney? Ov, akat kuyilond antu akwau nayimp? Akatin kulond yom ya uses ni ya masaal? Yesu wababesha anch: “Kan ka muntu kakat kubudish yom yizwila mu muchim wend.” (Mat. 12:34) Anch wajingunin anch antu usutishina nau chisu akat kuyipish urund wey ni Yehova, kwat mupak! Kepish chisu ukata kusutish nau pamwing, ni anch chidi cha usey, jip urund winou.​—Jnsw. 13:20. w18.07 18 par. 11

Pawanyishay Moses mivu 80, Yehova wamwinka chisend cha kukwol muchid wa Isarel mu usuk wa Idjibit. (Kub. 3:10) Tupamp tuvud, Moses wading ukat kusal usu wa kwiyep. Pakwez Yehova washimpisha muchim mulong wa Moses ni wamwinkisha kand usu wa kusal yilay. (Kub. 4:2-9, 21) Wafanyina kusadin usu wend mulong wa kumwovish Moses wom ni kumushindil chakwel aziyin. Pakwez, Yehova wading muwamp ni ushimpishina muchim, ni wamukasikesha kashalapol wend wikepishina ni witudishina anch ukwikal nend. Ov, kusal mwamu kwading ni yibudikin yiwamp? Mwaning! Moses wikala ntakel mujim nakash wa antu a Nzamb. Wasala usu wa kwikal witudishina ni mwin kuyibangin antu akwau, mudi mwasalay Yehova pantaliken nend ndiy. Anch ukwet ulabu kampand piur pa antu akwau, chidi cha usey nakash anch wamwimburij Yehova mu kwikal mwin kubangin, muwamp, ni ushimpishina muchim mulong wa mukajey, aney ni antu akwau adia mu chikumangen. (Kol. 3:19-21; 1 Pita 5:1-3) Anch wamwimburij Yehova Nzamb ni Yesu Kristu, udia Moses Mujim, ukusal anch chiyiswapel antu akwau kwez kudi ey ni kwambamb ney, ni ukwikal mwin kuyikasikesh.​—Mat. 11:28, 29. w18.09 23-24 par. 7-10

Chilik chimwing, tukutwish kuyikasikesh akadivar nau anambaz netu kusutin kuyisanger ni kuyibangin. Chinech chikat kusal anch chikumangen chikala mu uumwing nakash. Ov, ukutwish kusal usu wa kuyijik nawamp akadivar a mu chikumangen chey? (2 Kor. 6:11-13) Chitokish chey chikutwish kumunyik chikalap nchik ndond udia. Kubangin kwey kukutwish kuyibachik amutej ney kukat kwilej uyakin piur pa Yehova. Iyipula anch: ‘Yom ik yitonginingau amutej nam piur pam? Chikumbu cham chidi chiwamp ni chinangin? Ov, amutej nam achimen kamu anch chiwapin? Nidi mutej nau muwamp?’ Yipula Atuman akwau akuleja mutapu yaku yiwamp ni chilakej chau chiwamp yayikwasha anamakwau a ku mujimbu, amutej nau, ambay a mudimu ni a ku shikol.​—Efes 5:9. w18.06 24 par. 13-14

Mwawiy mwatongau antu amujipa mwin kwilej Stefan. (Mid. 6:8, 12; 7:54-60) Mu rusangu ra antu, antu avud a marelijon asala kal yom yiyimp nakash, mudi kujipan ni kulond anch asadin mwamu mulong wa Nzamb. Pakwez mu win kashinsh, yom yasalau yikwatijadinap ni yijil ya Nzamb. (Kub. 20:13) Chakin kamu, kom kau kayitakelap nawamp! Chawiy mutapu ik tukutwisha kwikal nich kashinsh anch kom ketu kasadin nawamp? Yijil ni mbil jidia mu Bibil jidi ja ‘ukwash mulong wa kulejan, mulong wa kupup, mulong wa kutenchik yom, mulong wa kukand mu kutentam.’ (2 Tim. 3:16) Tufanyidin kwilej Bibil chisu chawonsu, kutongin chikurikina pa yom yilondinay ni kuyisadin mu mwom wetu. Mu mutapu winou, tukwilej kutong mudi mutapu ukatay Yehova kutong. Mwamu tukutwish kwikal nich kashinsh anch kom ketu kakututakel nawamp. w18.06 15-16 par. 3-4

Amasalay a mu Rom asadinang jimpak ja musamun jading jikweta kulep kwa asantimetre 50. Amasalay inay ading akwet ukaliweny nakash wa kusadin jimpak ja musamun mulong iyijidishang mutapu wa kujisadin dichuku diawonsu. Kambuy Paul walonda anch Dizu dia Nzamb didi mudi mpak ya musamun. Yehova watwinkisha Dizu diend. Pakwez tufanyidin kwilej mutapu wa kudisadin nich ukaliweny mulong wa kulond piur pa ritiy retu ap kuwapish mutapu wetu wa kutong. (2 Kor. 10:4, 5; 2 Tim. 2:15) Tufanyidinap kwov wom wa Satan nau ayilembil. Chidi chakin anch akwet usu, pakwez kakwetap usu kumusutamu Yehova. Ni kakushakamap chikupu bwat. Akuyikas mu rukan ni kakutwishap kand kumusal muntu ap umwing chom chiyimp mu Mivu Kanan ya Winyikel wa Kristu, ni kupwa kwa yiney akuyijiyish. (Kuj. 20:1-3, 7-10) Tumwij mukankuny netu, mipit yend ni yitongijok yend. Kusutin ukwash wa Yehova, tukutwish kwiman dang pantaliken nend ndiy! w18.05 25 par. 15; 26 par. 19-21

Adam wading wij anch nnak kakutwishap kulond. Chawiy pijikay anch nnak wambambang ni Ev, pamwing ap Adam wajingunina anch wading spiritu walonda. (Dis. 3:1-6) Adam ni Ev kijikap anch spiritu winou wading nany. Pakwez, atonda kuya ku mutambu wa chom chakad kwijikau ni kumubwambwil Tatukwau wa rukat wa mwiur. (1 Tim. 2:14) Pakad kulab, Yehova wasambisha kulejan yom yivud piur pa mukankuny winou muyimp ni washilamu anch ukumujiyish. Pakwez Yehova wababesha mu kuchingel anch, spiritu winou walonda kusutin nnak ukwikal mukankuny wa antu awonsu amukatina Nzamb. (Dis. 3:15) Yehova katulejap dijin dia pakampwil dia mwangel wamubwambwila ndiy. Pasuta mivu 2500 kupwa kwa wintombwij wa mu Eden pawiy palejanay chad Yehova nany wading ntombwij winou.​—Job 1:6. w18.05 22 par. 1-2

Ov, waziyinap kal mulong antu adia mu teritwar wey kakatinap kwau kutesh uruu piur pa Want? Anch mwawiy, ukutwish kwijik mutapu wovay kambuy Paul. Wasala piswimp mivu 30 mu kulejan ni kuyikwash antu avud kwikal in Kristu. (Mid. 14:21; 2 Kor. 3:2, 3) Pakwez, katwishap kuyikwash in Yuda kwikal in Kristu. Chinyim ni chinech, in Yuda avud alika kumutesh Paul ni amwing amuzengola. (Mid. 14:19; 17:1, 4, 5, 13) Mutapu ik wiyovay Paul piur pa yom yiney? Walonda anch: “Am nikwet ushon nakash ni runeng rakad kupwang mu muchim wam.” (Rom 9:1-3) Mulong wak wiyova mwamu? Mulong wading ukatin kamu mudimu wa kulejan ni wading uyikatin antu. Paul wading uyibangidin in Yuda ni wova ushon nakash palikau ranaken ra Nzamb. Mudi Paul, niyetu tuyilejin antu mulong tuyibangidin ni tukatin kuyikwash.​—Mat. 22:39; 1 Kor. 11:1. w18.05 4 par. 4-5

Etu awonsu yisu yimwing tukweting kuswir kwa kutukasikesh. Paul wovikesha patok anch ap antu akweta chisend cha kuyikasikesh akwau akwet niyau kuswir kwa kuyikasikesh. Wayifundina akadivar nend a ku Rom anch: “Niswiridin nakash kukumananyaku, chakwel nikukwashany kuman chiyukish chidiokila kudi [spiritu] wa Nzamb, mulong wa kukukasikeshany. Charumburik anch, etu awonsu tukwashijanany. Ritiy ramam rukukukwashany en, chad niyam ritiy renen rukwinkwash am.” (Rom 1:11, 12) Chawiy ap kambuy Paul wading ukwet kuswir kwa kumukasikesh yisu yimwing. (Rom 15:30-32) Nlel unou, tukutwish kuyikasikesh antu amusadidina Yehova chisu chawonsu. Anany kand akwau tufanyidina kukasikesh? Tukutwish kand kuyikasikesh akadivar nau anambaz avud atondina kushal ajich mulong akatin kumuziyin Yehova ni kwatijan “ching mu Mwant.” (1 Kor. 7:39, TMK) In Kristu ajijamedina kuzengol ap mayej akwet kuswir niyau kwa kuyikasikesh.​—2 Tes. 1:3-5. w18.04 22 par. 3-5