Ngond wa 8

Ku yikumangan tukat kwilej chisu chin chawonsu yom yasalau mulong wetwetu. Nich kujikitish, tukat kusal usu wa kumwimburij Yesu kusutil mashakamin metu ma pichuku pichuku. (2 Kor. 5:14, 15) Chikwau kand, muchim wetu ukat kutubachik kumushiman Yehova mulong wa difut diapanay mulong wetwetu. Mutapu umwing tukutwisha kumushiman Yehova udi kusutil kupan yakul ku yikumangan yetu. Tukutwish kumekesh rukat retu rikurikina mulong wa Yehova ni Mwanend kusutil kwikal aswakela kulikap chom chin chawonsu mulong wawawiy. Yisu yivud tukat kusalang mwamu mulong wa kukumangan ku yikumangan yetu. Yikumangen yivud yikat kusal yikumangan urel chisu chaziyangau kal antu kupwa kwa kusal midimu yau ya ku mujimbu. Yikumangan yikwau akat kuyisalang kwinsudien kwa rubing, machuku makatau antu akwau kwiswedish. Ov, Yehova ukat kutuman chisu tukata kuya ku yikumangan ap anch tuziyin? Mwaning! Chawiy, anch twasal usu nakash wa kukumangan, Yehova ukat kusanger rukat retu tumekeshina mulong wendendiy.​—Mar. 12:41-44. w19.01 29 par. 12-13

Cha kasatu, Yesu amwinend warisha ni yakamish yimwing yirishiningau nich antu. Chilakej, chimeken anch Yesu wapamina mu dijuku dia atuzwendj. Kusutil kusal mudimu pamwing ni tatukwend wamulila, Josef, Yesu wileja mutapu wa kusal mudimu ukash wa makas. (Mat. 13:55; Mar. 6:3) Chimeken kand anch Josef wafa kurutu kwa Yesu kupwish mudimu wend panap pansh. Chawiy chimeken anch Yesu niyend wiyova nayimp mulong wa rufu ra mukatish nend. Ni Yesu wading wij mutapu chidia chikash kwikal mu dijuku mudia antu akweta yitongijok kushalijan piur pa relijon. (Yoh. 7:5) Yishiken yiney ni yikwau kand yamukwasha Yesu kwijik yakamish ni yovil yikatau kurish nich antu. Ranaken ra Yesu ramekanang nakash chisu chasalangay yilay. Yesu kasalangap kwend yilay mulong kwau chimufanyidin kusal mwamu. Ndiy ‘wayovila riy nakash’ antu ading amena mar. (Mat. 20:29-34; Mar. 1:40-42) Yesu witeka pa ndond ya antu akwau ni wakata kuyikwash.​—Mar. 7:32-35; Luka 7:12-15. w19.03 16 par. 10-11

Wading uchuku wa nsudien wa mwom wa Yesu pa divu. Tong piur pa yakamish yikalay nich Yesu. Ov, washala kamu ushinshamena djat ni ku rufu? Anch Yesu kashalap ushinshamena, kwikil muntu ap umwing ukwikala ni mwom wa chikupu. (Rom 5:18, 19) Ni chidia cha usey nakash, yom yasalay yafanyina kutumbish ap kusaadikish dijin dia Tatukwend. (Job 2:4) Kupwa, chisu chading chidilay yakudia yend ya nsudien pamwing nau atwimbuy end, mambamb ma atwimbuy mashikena ku kulangwish “ntad” mulong wa kwijik “nany wa pakach pau ukutongau antu anch upandakenamu kujimb.” Cha kushimok, Yesu kajimanap. Pakwez, wayakula nich kudut. Nich kudimuk, pakwez pakad maswimbu, Yesu wayirumburila​—kand​—mwikadil wading ufanyidinau kwikalau nich. Kupwa wayijikitisha atwimbuy end mulong wa kushinshaman kwau kudi ndiy. (Luka 22:24-28; Yoh. 13:1-5, 12-15) Tukutwish kumwimburij Yesu ni kulik kujiman swa ap anch tukwet yakamish anch twavurik anch niyetu tukat kulond ni kusal yom yikata kuyisal akwetu nayimp. (Jnsw. 12:18; Jak. 3:2, 5) Ni sal usu wa kuyijikitish akwen mulong wa yom yiwamp yisadinau.​—Efes 4:29. w19.02 11-12 par. 16-17

Chijil cha Moses chasalang anch chikasikana kumudimben muntu makasu anch wasalang chom chiyimp. Muntu wafundangau wading ni mbil ja kwijik nany wamufundang. (Kuv. 19:16-19; 25:1) Ni kurutu amufisha nich, chading chitin atuman anch akep aad mulong wa kupan uman. (Kuv. 17:6; 19:15) Chawiy, chading nchik anch mwin Isarel wasalang mulong amumanang kwend kudi kaman umwing? Muntu wasalang mulong kafanyinap kutong anch kakumupupap piur pa mulong wasalangay. Yehova wading kumanang yom yawonsu. Mwaning, Yehova udi chilakej chiwamp nakash; kwikil chom chikatay kusal pakad kutentam. Ukat kuyifut antu awonsu akata kuziyil kwi mbil jend, pakwez ukat kuyipup antu akata kusadin nayimp usu wau mu mutapu uyimp. (2 Sam. 22:21-23; Ezek. 9:9, 10) Antu amwing akutwish kusal yom yiyimp ni kutong anch kakuyipupap kwau pakwez anch Yehova waman anch chisu chawanyin kal, ukat kusal anch ayirumburish antu inay. (Jnsw. 28:13) Ni anch kakarumukinap, afanyidin kwijik kamu anch “chidi chom cha wom nakash kuwil mu makas ma Nzamb mwom.”​—Heb. 10:30, 31. w19.02 23-24 par. 20-21

Chakin kamu Moses wading umutadin Yehova chakwel amutakel. Bibil utulejin anch “wadandamena [kujijaman] mudi umumen Nzamb wakad kumekanang ku mes.” (Heb. 11:24-27) Piswimp angond aad kupwa kwa in Isarel kudiokal mu Idjibit, ni kurutu ashika ku Mukandu wa Sinay, chom chimwing chikash chashikena. Antu asambisha kunyinyit mulong kwadingap mem. Asambisha kumulond Moses nayimp ni ajimana nakash chawiy “Moses wamudidila [Yehova] anch: ‘Nikusal nchik nau antu inay? Awiy adi piswimp ni kwingas am mayal!’” (Kub. 17:4) Yehova wamwinkisha Moses mbil jovikena kamu nawamp. Yehova wamuleja kusend mukombu wend ni kuubul ku diyal dia mu Horeb. Bibil ulondin anch: “Moses wasala mwamu kurutu kwa amakurump a in Isarel.” Kupwa mem mabudika, in Isarel ikala ni mem mavud ma kuna ni mulong wapwa.​—Kub. 17:5, 6. w18.07 10 par. 4-5

Yehova usadidin kand chikumangen mulong wa kutukudish mu rukat rend. Anch twayikat akadivar nau anambaz netu, tumekeshin rukat retu mulong wa Yehova. Tukat kusal chom chin chawonsu tukutwisha kusal mulong wa kuyikwash akadivar netu kwijik anch akwet usey ni Yehova uyikatin. (1 Yoh. 4:19-21) Kambuy Paul wafunda anch: ‘Chawiy ongojijanany pamwing umwing ni mukwau, ni kukudishijan mudi chiukat kusalany kand.’ (1 Tes. 5:11) Kadiap kwau ching amakurump a chikumangen afanyidina kusal mwamu. Muntu ni muntu pakach petu ukutwish kumwimburij Yehova ni Yesu kusutin ku kuyikasikesh akadivar nau anambaz netu. (Rom 15:1, 2) Antu amwing a mu chikumangen amena mar ma kuziy kwa mu manangu ap yakamish akutwish kwikal ni kuswir kwa ukwash wa chimwingang. (Luka 5:31) Ap anch amakurump nau antu akwau mu chikumangen kayifumbinap mulong wa kwikal adokter, ij anch ukwash ni rongoj yipaninau yikutwish kwikal ya usey nakash. Antu awonsu mu chikumangen akutwish ‘kulond mu mutapu wa kuyongoj akweta wom, kuyikwash aziyila, kushimpish muchim kudi antu awonsu.’​—1 Tes. 5:14. w18.09 10-11 par. 10-11

Tukat kukasikesh ruchingej retu mudiay Yehova kusutil ku kumwijik nawamp. Mutapu umwing tukutwisha kumwijik kamu nawamp Nzamb udi wa kutang Bibil ni kutongijokin pa yom tutangina. Bibil ukwet jinsangu jakin jilejena mutapu Yehova wayikingay antu end a pasak. Jinsangu jinej jitwinkishin kashinsh anch Yehova ukat kutubangin ni katat. Shinshikin chilakej chisangareshina chasadinay Isay chimekeshina mutapu ukatay Yehova kutuking. Ndiy wamufanikesha Yehova mudi kafung, pakwez atushalapol a Nzamb mudi amikoku. Isay walonda piur pa Yehova anch: “Ukez kasend an a amikoku mwi nkond yend.” (Isay 40:11) Pitumeninga anch Yehova utusendin mwi nkond yend, tukat kwiyov anch tudi mu diking ni tukatap kuzazat. Mulong wa kukukwash ulika kwov wom ap kuzazat chikalap nchik milong urishina nich, tongijokin pa mazu makasikeshina madia mu mufund wa nlel. Makukukasikesh chisu ukurisha ni yakamish yikutwisha kukushiken. w19.01 7 par. 17-18

Ov, ukwet mupak ap umwing usadina usu wa kuwanyish? Pamwing ap witekina kal mupak wa kutang Bibil dichuku diawonsu ap kupan yakul yiwamp ap kusal nawamp yikunku ku yikumangan. Ap pamwing ap usadin usu wa kusadin nawamp Bibil mu mudimu wa kulejan. Mutapu ik ukata kwiyov anch wajingunin anch ukat kuwapish yom yimwing mu mwom ap anch antu akwau akulej mwamu? Ukat kwov pamwing ap musangar nakash, ni ufanyidin kamu kwov mwamu! Mulong wak? Mulong usadin yom yikatinay Yehova anch usala, mudi mwasalay Yesu. (Jnsw. 27:11) Anch washinshikin pa mudimu wey mulong wa Yehova, usadin mudimu ukukuletina musangar ni kukwinkish chitongijok cha mwom. Paul wapana chiyul chilondina anch: “Ikasikeshany, wimanany dang mu ritiy, salany nich mushiku midimu ya Nsalejetu Yesu. Ijikany anch, midimu yiukat kusalanya ya Nsalejetu Yesu kiyidiap yamwamu, bwat.” (1 Kor. 15:58) Pakwez anch antu ashinshikin pa mipak ya mangand minam, mudi kwikal ni nfalang jivud nakash ap kwikal ni ntumb nakash, yikuletangap kamu musangar. Ap anch antu inay akat kutwish mu mwom, yisu yimwing akat kwiyov anch aburedin chom kanang.​—Luka 9:25. w18.12 18 par. 12-13

David wading wisambidin piur pa chisu chikezau antu awonsu adia pa divu kuziyin kwi mbil jitentamina ja Nzamb. (2 Pita 3:13) Uprofet udia mu Isay 65:22 ulondin anch: “Antwam akez kashakam mivu yivud mudi ya mitond.” Chinech chimekeshin anch antu amusadidina Yehova akushakam tunan twa mivu mwi ngand yisu. Kukwatijan ni Kujingunik 21:1-4, Nzamb ukuyiyukish antu ni chiyukish chimwing pakach pa yiyukish yiney chidi anch “kukez kikalap kand rufu.” Adam ni Ev ashadisha dilau diau dia kushakam chikupu mu Paradis, pakwez divu dikwikal kand Paradis. Mudi mwashilayimu Nzamb, ukuyiyukish antu akwikala pa divu. David walonda anch antu itudishina nau atentamina akuswan divu ni akushakamap chikupu. (Kus. 37:11) Ni uprofet udia mu mukand wa Isay utukwashin kuchingel chisu tukusangera mwom mu paradis upandikena kuwap pa divu. (Isay 11:6-9; 35:5-10; 65:21-23) Yom yiney yikusadik chisu ik? Chisu chikuwanyina kushilamu kwa Yesu kudi mpongarik. (Luka 23:43) Niyey ukutwish kwikal mu Paradis. w18.12 8 par. 22-23

Ov, tukutwish kwipuk kamu yitongijok yawonsu ya mangand? Bwat, tukutwish kutesh ap kuman yom yimwing yikweta yitongijok ya mangand mulong tukutwishap kamu kudiokal mu mangand. (1 Kor. 5:9, 10) Ap chisu tudia mu mudimu wa kulejan, tukutwish kutesh antu akat kulond piur pa yitongijok yiyimp ap yitiyij ya makasu. Mulong tukutwishap kamu kwipuk yitongijok yawonsu yiyimp, tufanyidinap kudandamen kutong mudi awiy ap kwitiy yitongijok yau. Mudi Yesu, tufanyidin kwikal aswapela kulik yitongijok yikatinay Satan anch twikal nich. Ni tukutwish kwichidij ayinetu kusutin kwipuk kwibwand kwa kwikatin yitongijok ya mangand. Chilakej, tufanyidin kutond arund netu nich manangu. Bibil utubabeshin anch ang twikal mu urund wa piswimp nau antu akad kumwifukwil Yehova, tukusambish kutong mudi awiy. (Jnsw. 13:20; 1 Kor. 15:12, 32, 33) Chikwau kand, anch twalik kwipuwangej kukasikeshina malejan ma dikarumuk, chisum, yom ya kwijond, twipukin kuyipish manangu metu nich yitongijok ‘yakad kukwatijan ni ronganyin ra Nzamb.’​—2 Kor. 10:5. w18.11 25 par. 16-17

Yom ik yikutwisha kutukwash kukwat mupak wa kudandamen kwendil mu uyakin? Mutapu umwing tukutwisha kusal mwamu udi kusutil kusal usu wa kuyifundish antu akwau uyakin wa Bibil. Bibil amufanakeshin ni mpak ya musamun. Mudi mwalamangay baa isalay muwamp mpak yend ya musamun, tufanyidin kulam baa “Dizu dia Nzamb.” (Efes 6:17) Etu awonsu tukutwish kwikal in kufundish awamp, “kulejan dizu dia uyakin nich kutentam.” (2 Tim. 2:15) Pitusadidina Bibil mulong wa kuyifundish antu akwau, tukat kushiken kwijik uyakin ni kuukat nakash. Ni tukat kukwat mupak wa kudandamen kwendil mu uyakin. Uyakin udi chipan cha usey nakash chidiokila kudi Yehova. Ukat kusal anch chituswapel kwikal ni urund wa piswimp pamwing ni Tatukwetu wa mwiur Yehova. Chinech chidi chom cha usey nakash tukutwisha kwikal nich. Yehova watufundishin kal nakash, pakwez dined didi kwau disambishin! Utukanin anch ukudandamen kutufundish chikupu. Chawiy, kumangej uyakin mudi ukutwisha kukumangej yom ya usey. Dandamen “[kuland] uyakin, kangal waulandish.”​—Jnsw. 23:23. w18.11 9-10 par. 2; 13-14 par. 15-17

Kurutu Mabeb meza, uruu walejanay Nowa kudi antu wafanyina kwikal wa kubabesh piur pa disheshik diading diezina. Mulong Yesu walonda anch: “Mu machuku mading mabeb kand kal mashika, antu ading kudia ni kuna, amakundj ni amband atijanang djat ni ku dichuku diandamay Nowa mu waat. Awiy kijikap chom chikushika djat ni pezina mabeb mayijiyish awonsu shutit. Yom yiney yikez kwikal kand mwamu pa dichuku [dia kwikalaku kwa] Mwan a Muntu.” (Mat. 24:38, 39) Ap anch antu avud amudiula Nowa, ndiy walejana nich kushinshaman uruu wa kubabesh wamwinkishau kudi Yehova. Nlel unou, tulejen uruu piur pa Want mulong wa kuyikwash antu ijika yom yikusalay Nzamb mulong wa antu mu machuku ma kurutu. Mudi Yehova, tukatin kamu anch antu ata matu ku uruu ni “chakwel apanda.” (Ezek. 18:23) Chisu tulejena ku chikumbu ni chikumbu ni pa ndond yidia antu avud, tukat kusal usu wa kuyibabesh antu avud anch Want wa Nzamb ukwez ni ukushesh mangand minam mayimp.​—Ezek. 3:18, 19; Dan. 2:44; Kuj. 14:6, 7. w18.05 11-12 par. 8-9

Yom ik ufanyidina kusal anch mudimu wetu aujidikin kwi ndond ushicha chad amakurump a ngand akukwat ni akwipol piur pa akadivar ney? Ov, ukuyilej yom yawonsu wija? Yom ik yasalay Yesu chisu chamwipulau kudi nyikel wa mu Rom? Yesu wasadina mbil ja Bibil jilondina anch kudi “chisu chimwing cha kunenet, kudi chisu chikwau cha kulond” ni yisu yimwing kalondap chom ap chimwing! (Mul. 3:1, 7; Mat. 27:11-14) Anch tukwet mulong mudi winou, tufanyidin kuninet ni kwikal ababela chakwel kangal tuyitek akadivar netu mu ubaj. (Jnsw. 10:19; 11:12) Chikwikal nchik anch murund ney wa piswimp ap muntu wa mu dijuku wasal chitil chijim ni ey wij nawamp mulong winou? ‘Lond uyakin.’ Ukwet chisend cha kuyilej amakurump uyakin pakad kujindjik chom ap chimwing. Amakurump akwet mbil ja kwijik uman wawonsu chakwel akutwish kuman mutapu uwamp wa kumukwash muntu mulong awapish urund wend ni Yehova.​—Jak. 5:14, 15. w18.10 7-8 par. 17-18

Mutapu ik tukutwisha kuyikasikesh antu akwau nich rukat? Mutapu umwing tukutwisha kusal mwamu udi kusutil kwikal mwin kutesh muwamp. (Jak. 1:19) Tukat kumekesh rukat anch twamutesh muntu nich ranaken. Ipul yipul yiwamp yikutwisha kukukwash kutesh nawamp mutapu wiyovilay mukadivar ney. Ndiy ukuman anch umubangidin, ap kusutin mutapu udia chifu chey. Chisu ulondina, shimpish muchim ni mulika akuleja pakad kumukaturij. Kusutin kwikal mwin kutesh muwamp, ukutwish kumutesh nawamp nakash ni chinech chikumukwash akuchingejin. Mwamu chikumuswapel chad ndiy kutesh yom ulondina piusadina usu wa kumukwash. Anch wayibangin antu akwau nakash, ukutwish kwikal mwin kuyongoj muwamp. w18.09 10-11 par. 10; 12 par. 13

Chitin kusadin chisu mulong wa kuland uyakin. Chitin chisu chakwel anch muntu atesh uruu wa Want, kutang Bibil ni mikand yimedina pa Bibil, kwilej Bibil nau Atuman a Yehova, kurijek yikumangan, ni kuya ku yikumangan. Mulong wa kusal yom yiney yawonsu, tufanyidin kusadin chisu chitwafanyinang kusal midimu yikwau yakad usey nakash. (Efes 5:15, 16) Chitin machuku minch mulong wa kwilej uyakin wa pa dishin wa mu Bibil? Yishalijangen kulondwish muntu ni muntu. Kwikil mwimbu piur pa yom tukutwisha kwilej piur pa manangu ma Yehova, jinjil jend, ni piur pa yom yasalay kal. (Rom 11:33) Nimero wakusambish wa Chinong cha Kalam wafanikesha uyakin nich “kachisalamb kakemp kawamp” ni walonda anch: “Kangal wasanger kwey chisalamb chimwing cha uyakin. Anch chimwing chading chiwanyidin, ing kwafanyinangap kwau kwikal yikwau. Pol kamu, kimb kamu yisalamb yivud.” Ap anch twashakam chikupu, kukudandamen kwikal yom yivud tufanyidina kwilej piur pa Yehova. Nlel chidi cha usey nakash kusadin chisu tukweta katat mulong wa kwilej nakash piur pa Yehova. w18.11 5 par. 7

Bibil ulondin anch angatan afanyidin kuyibangin ni kuyitesh akajau. (1 Pita 3:7) Ngatan muwamp wij anch ap anch ushalijadin ni mukajend mu mitapu yivud, kadiap muwamp nakash kumusutamu mukajend. (Dis. 2:18) Ukat kubangin yovil ya mukajend ni kumusadin nich kalimish. Ngatan ubangidina yovil ya mukajend kakutwishap kwizez nau amband akwau ap kumekesh anch uyibangidin nakash, patanijadinay nau kwi ndond kanang, pa tupend twa antu awonsu ap pa Internet. (Job 31:1) Chakin kamu, ukat kushal ushinshamena kudi mukajend mulong umukatin ni mulong umukatin Yehova ni ukisin yom yidia yiyimp.​—Kus. 19:14; 97:10. w18.09 28 par. 3-4

Mulong wak chikasiken kusadin yom twilejina mu Dizu dia Nzamb? Diyingishin dimwing didi anch mulong wa kusal yom yiwamp, tufanyidin kwikal ikepishina. Mu “machuku ma kwisudiel,” chidi chikash kushal ikepishina, mulong antu avud atunyingumukina adi “in kwikat ayinau, in kukat nfalang, in kwibaz, in kwishimek,” ni “akad kwikand ayinau.” (2 Tim. 3:1-3) Chitudia atushalapol a Nzamb, twij anch mikadil mudi yiney yidi yiyimp, pakwez chikutwish kumekan anch antu akweta mikadil yiney atwishin mu mwom ni asangaredin mwom yau nawamp. (Kus. 37:1; 73:3) Tukutwish kwiyipul anch: ‘Ov, chidi kamu cha usey kusal usu wa kutek maswir ma antu akwau pa ndond ya kusambish? Ov, antu akudandamen kwinlimish anch nikal mwin kwikepish?’ Anch twitiyij anch mwikadil wa choy wa mangand utupumbula, tukutwish kuyipish urund wetu uwamp nau akadivar netu ni kusal anch chiyikasikena antu akwau kujingunin anch tudi in Kristu. Pakwez anch twilej yilakej ya atushalapol a Nzamb ading ikepishina ni kuyimburij, tukwikal ni yibudikin yiwamp. w18.09 3-4 par. 1

Chisu chimwing Yehova wading kwend amwinend. Kupwa wakwata mupak wa kupan chipan cha mwom ku yitang yikweta manangu yidia mwiur ni yidia pa divu. Yehova, ‘Nzamb wa musangar’ ukatining kupan yom yiwamp. (1 Tim. 1:11; Jak. 1:17) Ni mulong Yehova ukatin anch niyetu twikala ni musangar, utufundishin kwikal in kupan. (Rom 1:20) Nzamb wayitanga antu mu chifu chend. (Dis. 1:27) Chinech chirumburikin anch Yehova watutanga nich mikadil mudi yikwetay ndiy. Mulong wa kwikal chakin kamu ni musangar ni kutambul yiyukish ya Yehova, tufanyidin kwimburij chilakej chend. Tufanyidin kuyibangin antu akwau ni kupan kwa kwikatin. (Fil. 2:3, 4; Jak. 1:5) Mulong wak? Mulong wawiy mutapu watutangau kudi Yehova. Ap anch tudi antu akad kuwanyin, tukutwish kumwimburij Yehova ni kwikal in kupan. Yehova ukatin anch tumwimburij, chawiy chikat kumusangaresh anch tudi in kupan.​—Efes 5:1. w18.08 15 par. 1-2; 16 par. 4

In kwilej a Kristu akat kumekesh anch amuteshin Yesu kadiap kwau kusu ching kusutil kutesh dizu diend pakwez kusal kand kukwatijan ni dizu dien. Kakwetingap kampuw mulong wa “yakamish ya mwom.” (Luka 21:34) Pakwez, kudi awiy chidi cha usey nakash kuziyin kwi mbil ja Yesu ap anch chikasiken kusal mwamu. Chikalap nchik yakamish yiney yawonsu yirishinau nich, akadivar netu akat kushal ashinshamena kudi Yehova. Mutapu ukwau tukutwisha kumekesh anch tumuteshin Yesu udi kusutil kovijan nau antu atondinau mulong wa kututakel. (Heb. 13:7, 17) Dirijek dia Nzamb diaswimpin yom yivud mu mivu yasutina ey, kuwejinaku mutapu wa kusadin yom yisu ni milad ya kusadin mu mudimu wa kulejan, mutapu wa kusal chikumangan chetu cha mukach mwa rubing, ni mutapu wa kutung, wa kurijek ni wa kulam Yot yetu ya Want. Tujikitishin nakash mulong wa malejan minam ni umutakel winou wa rukat! Tukutwish kwikal nich kashinsh anch Yehova ukuyukish usu tusadina mulong wa kuziyin ku umutakel udiokila ku dirijek diend. w19.03 10-11 par. 11-12

Jinsangu jikwau jikatap kupan uman wawonsu. Tukutwish kwilejin ku yom yayishikena in Isarel ading ashicha kurand kwa Wit wa Yordan pa chirung cha Joshua. (Jos. 22:9-34) Atesha anch in Isarel adinga kwingangel atungang kal chintamb chijim piswimp ni wit. Chikunku cha rusangu riner chading chakin, pakwez radingap rusangu rawonsu. Ni chayibachika in Isarel adinga kurand kutong anch akadivar nau adinga kwingangel amubwambwil kal Yehova. (Jos. 22:9-12) Pakwez kurutu ayirishikish, in Isarel a kurand atuma amakundj amwing mulong wa kushinshikin uman. Yom ik yatanau amakundj atumau? Atunga chintamb mudi chivurikish chakwel antu awonsu ijika anch amwifukwidil Yehova. In Isarel ova musangar nakash mulong karishap njit nau anamakwau, pakwez itekina chisu cha kushinshikin uman wawonsu. w18.08 6 par. 9-10

Mudi mwalonday Paul, ap antu amwifukwidila Yehova akutwish kwiyandjik mu kusal yom yiyimp. Akutwish pamwing ap kutong anch Yehova udandamedin kuyitiy. Pakwez chidiap kwau anch mulong muntu usotin kwikal murund wa Yehova ap kulond anch ushinshamen kudi ndiy chawiy chirumburikina anch Yehova umwitiyin. (1 Kor. 10:1-5) Padingay Moses kand kal achirika ku mukandu wa Sinay mudi mwading muchingejinau in Isarel, iyakamisha nakash. Anch disudiel dia mangand dishikinap swa mudi mutwadia tuchingejidina, niyetu tukutwish kwiyakamish. Tukutwish kusambish kutong anch machuku ma kurutu mapandakena kuwap makanay Yehova madi kulemp nakash ap mapandaken kuwap mulong wa kuwanyin, ni tukutwish chad kusambish kushinshikin pa yom tukatina pa ndond pa yom yikatinay Yehova. Anch tubabelap, tukutwish kupumbuk kulemp ni Yehova ni kusal yom yitwakad kutong anch tukutwish kuyisal. w18.07 19 par. 17; 20 par. 18

Yehova ukutwish kutwijik pakampwil. Pakwez yom ik tufanyidina kusal mulong wa kwikal arund a Yehova? Tufanyidin kumukat ni kupan mwom wetu kudi ndiy. (1 Kor. 8:3) Pakwez, tufanyidin kudandamen kulam urund wetu wa usey nakash ni Tatukwetu wa mwiur. Mudi in Kristu a kusambish a mu Galatia, tufanyidin kulik kusal mudi asuk a “yom ya pa dishin yiziyina ni ya chamwamu” ya mangand minam, pamwing ni ntumb ni kwijikan kudia mu mangand. (Gal. 4:9) In Kristu a mu Galatia inay ading amwijikin kal Nzamb ni Nzamb wading wayijikin kal. Pakwez Paul walonda anch akadivar inay amwing ading “achirikin kal kand” ku yom ya chamwamu. Chawiy mu kulond kukwau, Paul wading uyipwil anch: ‘Mulong wak uchirikidinany ni kusambish kusal kand mudi asuk mulong wa yom ya chamwamu ni ya usup?’ w18.07 4 par. 5-6

Tukwetap kuswir kwa kuman mar madiokiling ku kujip yijil ya Nzamb mulong wa kwilej yom yidia yiwamp ni yidia yiyimp. Tukutwish kwilejin kusutin kurumbuk kwasalau kudi antu akwau pasak. Yilakej yiney yidi mu Bibil. Malejan minam madiokil kudi Nzamb ni madi mapandakena kuwap nakash! Chilakej, tong mutapu wamanay David mar kupwa kwa kumubwambwil Yehova ni kusal masandj ni Batisheba. (2 Sam. 12:7-14) Chisu utangina rusangu riner, iyipula anch: ‘Mutapu ik wafanyinay David kwipuk milong yiney? Yom ik nikusala anch yom mudi yiney yanshiken? Anch angoz mulong wa kusal masandj, ov, nikwikal mudi David anch mudi Josef?’ (Dis. 39:11-15) Anch twatong nawamp piur pa yibudikin yikash ya kusal chitil, tukudandamen ‘kukis yom yidia yiyimp.’​—Amos 5:15. w18.06 16-17 par. 5, 7

Pameningau antu kuburen kutentam kusadikina, akat kwikal abachikinau kwiyandjik mu yom ya politik. Pa chirung cha Yesu, kulambwish yitad wading mulong umwing wayibachika antu avud kwiyandjik mu yom ya politik. Ni kwading yitad yivud yifanyidina kufut, mudi kufutin yom ukweta, ngand ushicha ni chikumbu. Chikwau kand, in kulambwish yitad ading kuyikatul milamu nakash, ni chinech chasala anch yom yiyipa nakash. Yisu yimwing ayifutang amakurump a mburamatad mulong wa kwikal ni ndond ya piur ni kusadin usu wau mulong wa kwikal ni nfalang jivud. Zakeu, mukurump wa in kulambwish yitad mu Yeriko wikala mpich mulong wayifutishang antu nfalang jivud. (Luka 19:2, 8) Akankuny a Yesu apakisha kumwandjik mu milong ya kulambwish yitad. Amwipula piur pa “chitad,” chitad cha denier umwing chafanyinau in Yuda awonsu kufut. (Mat. 22:16-18) In Yuda ading akisin nakash chitad chinech mulong chading chiyivurishin anch ayiyikedil kudi in Rom. w18.06 6 par. 8-10

Kutond mutambu wa Satan kukweting chisu chawonsu yibudikin yiyimp. Mwikiling kutaninamu kwakin! (Job 21:7-17; Gal. 6:8) Mulong wak chidi chiwamp kudi etu kwijik anch Satan ndiy uyikedina mangand? Chinech chitukwashin kwikal ni chitongijok chiwamp piur pa maguvernema ni chitukasikeshin kulejan rusangu ruwamp. Twij anch Yehova ukatin anch tulimisha maguvernema. (1 Pita 2:17) Ukatin anch tuziyina yijil yau anch yijil yiney yitanijadin ni yijil ya Nzamb. (Rom 13:1-4) Pakwez twij anch tufanyidinap kwiyandjik mu milong ya mangand ap kukwash chisak cha politik ap nyikel wa chiuntu. (Yoh. 17:15, 16; 18:36) Mulong twij anch Satan usadin usu wa kujimwangesh dijin dia Yehova ni kuyipish kalimish kend, tusadin usu wawonsu wa kuyifundish antu uyakin piur pa Nzamb. Tukwet musangar nakash wa kututazuk pa dijin diend ni kudisadin. Rukat mulong wa Nzamb ridi ra usey nakash kusutamu rukat mulong wa nfalang ap yom.​—Isay 43:10; 1 Tim. 6:6-10. w18.05 17-18 par. 8-9

Anch kudi milong mu uruw, ov, kwaurik kukutwish kupwish milong? Bibil kalejenap mayingishin makutwisha kusal anch ambay a uruw aurika. Paul wafunda anch: “Anch mwanamakwetu mwin Kristu ukwet nfumwend wakad kal kumwitiyij Kristu, chad ikundj winou witiy kudandamen kushakam nend, kangal mband wamulik, bwat.” (1 Kor. 7:12, 13) Chidi kand chilik chimwing nlel. Pakwez, kukutwish kwikal yom yimwing yikutwishay kusal ‘ikundj wakad kal kwitiyij’ yikumekesha anch kawanyidinap “kudandamen kushakam” ni mukajend. Chilakej, ukutwish kusambish kumubulang mu mutapu uyimp, mu chilik cha kwiyov anch ukash wend wa mujimbu ap mwom wend udi mu ubaj. Ukutwish kulik kuwanyish maswir ma ku mujimbu ma mband ni ma dijuku, ap kumukangesh mband kumusadin Nzamb. Mu milong mudi yiney mband mwin Kristu ukutwish amwinend kukwat mupak, chikalap nchik yom yikutwishay kulond ikundj, ikundj winou kawanyidinap “kudandamen kushakam” nend ni chinech chitin anch kwikal kwaurik. Pakwez in Kristu akwau ading ni milong mudi yiney akwata mupak wa kushakam ni ambay nau. Ajijamana ni asala usu wa kuwapish uruw wau. w18.12 13-14 par. 14, 16-17

Mu chishimu cha mwin kukus mbut tutanina mu Luka 8:5-8, 11-15, Yesu warumburila anch mbut didi “dizu dia Nzamb,” ap uruu piur pa Want wa Nzamb. Divu didi muchim wa muntu. Mbut jawila pa divu diwamp jaminya, jasapurika ni jikala mutond. Kupwa mutond ‘wasonga mabuj 100 ni kusut.’ Rubut riner radandamena kukul kushik ni chisu rawanyina kusong mabuj. Mudi muding ritiy ra tidiku twajimbulang kwisambishil oku, rikatap kusong mitiy yisu, pakwez rubut risu, niyetu tukatap kwikadish in kwilej asu, pakwez rubut risu. Mutapu ik tukata kusal mwamu? Chisu chawonsu tukata kuyilej antu akwau piur pa Want wa Nzamb, chidi mudi tukat kuvudish ni kukus mbut jakunau mu muchim wetu. (Luka 6:45; 8:1) Chawiy, pitudandamedina kulejan uruu piur pa Want wa Nzamb, tukat ‘kusong mabuj nich kujijaman.’ w18.05 5-6 par. 10-11

Paul wading tayad “kupan yom yawonsu ni kwipan kand amwinend” mulong wa akadivar nau anambaz nend. Wamekesha kusutin yisal yend anch wading tayad mulong wa kuyisadin yom yiwamp. (2 Kor. 12:15) Chilik chimwing, amakurump afanyidin kuyongoj ni kuyikasikesh antu akwau, kadiap kwau ching kusutin yom yilondinau pakwez kusutin kand yom yisadinau. Chinech chimekeshin anch ayibangidin kamu chakin. (1 Kor. 14:3) Mulong wa kuyikasikesh akadivar, amakurump yisu yimwing afanyidin kupan yiyul. Amakurump akutwish kwilej mu Bibil mulong wa kusal mwamu mu mutapu ukasikeshina. Yesu washa chilakej chiwamp nakash mulong wa kupan yiyul chisu chatumay uruu ku yikumangen ya mu Aziy Mukemp kupwa kwa rufu ni divumbuk diend. Wading ni yiyul yikash ya kupan ku chikumangen cha Efes, Perigam ni cha Tiatir. Pakwez kurutu kwa kuyinkish chiyul, wayijikitisha mulong wa yom yawonsu yiwamp yading yisadinau. (Kuj. 2:1-5, 12, 13, 18, 19) Amakurump etu amwimburijin Yesu mu mutapu wa kupan yiyul. w18.04 23 par. 8-9

Anvaj, ukwetany chisend cha pakampwil cha kuyichidij anen ku usu usadinay Satan mulong wa kuyipish michim yau. Chidi chakin anch usadiningany yawonsu ukutwishanya mulong wa kuyichidij anen ku mayej. Ukat kulamany yikumbu yen yinangina, ukat kudjibulany chom chin chawonsu chikutwisha kukuletilany en ap anen mayej. Chilik chimwing, ufanyidinany kuyichidij anen ku mafilim, maprogram ma televizion, masengan ma video ni tupend twa internet yikutwisha kwandjik yitongijok ya Satan mu manangu mau. Yehova wakwinkishinany kal chisend cha kuyikwash anen chakwel ikala arund a Yehova. (Jnsw. 1:8) Kangal wov wom wa kutek mbil kanang jimedina pa Bibil ku chikumbu. Yileja aney yom yifanyidinau kutal ni yifanyidinau kulik kutal, ni yikwasha kutesh nawamp mayingishin ma mipak yey. (Mat. 5:37) Payilau aney kupam, yifumba chakwel ijika ayinau kujingunin yom yidia yiwamp ni yiyimp kukwatijan ni mbil ja Nzamb. (Heb. 5:14) Ni ijik anch, aney akutwish kwilej yom yivud kusutil yom usadila.​—Kuv. 6:6, 7; Rom 2:21. w19.01 16-17 par. 8

Anch udi nsand, ukutwish kuta urund ni akadivar nau anambaz amapal. Yipula yom yayikwasha kudandamen kumusadin Yehova mu mivu yivud. Akutwish kukufundish malejan ma usey nakash. Chinech chikutwish kamu kuyikasikesh nakash awiy pamwing niyey! Ni etu awonsu, twikalap nchik nsand ap ipal, tukutwish kuyak nawamp antu ezina ku Chot chetu cha Want. Anch akwinkish chisend cha kutakel yikumangan mulong wa mudimu wa kulejan, ukutwish kuyikwash antu amapal kudandamen kumunyik chitokish chau. Ikal nich kashinsh anch akwet teritwar wa kulejan. Tond ansand chakwel alejan nau pamwing. Akadivar nau anambaz ananapina kal ni antu ayedodina akat kuziy yisu yivud mulong kakutwishap kand kulejan nakash mudi mwasalangau pakur. Pakwez akutwish kwiyov nawamp anch ijik anch ukat kuyibangin ni wij mashakamin mau. Chikalap nchik mivu yikwetau ap yasadinau kal mu uyakin, kuyibangin kwey kukutwish kuyikasikesh chakwel adandamena kulejan nich mushiku.​—Lev. 19:32. w18.06 23-24 par. 10-12

Tufanyidinap kuvuramen anch Yehova watukwola mu usuk wa chitil ni wa rufu. Difut ditukwashin kumusadin Nzamb wetu ni kom kadia zwang ni chinech chikat kutwinkish musangar wakin. (Kus. 40:8) Tufanyidinap kwetu kulond anch tumujikitishin Yehova, pakwez tufanyidin kamu kubabal nakash mulong kangal tusadina want ipau mu mutapu uyimp. Chilakej, kambuy Pita watubabesha anch tufanyidinap kusadin want ipau mudi chitambal cha kwijindjik nich mulong wa kusal yom yiyimp. Kubabesh kwinoku kutuvurishin yom yayishikena in Isarel mwi mpay. Nlel unou tukwet kuswir nakash kwa kubabesh kwinoku kusutamu pakur. Satan ni mangand mend maletin yom yivud yisangareshina ya kudjal, ya kudia, ya kuna ni ya kwipuwangesh nich. In kusal ma piblisite akweta ukaliweny akat kusadin antu awamp mulong wa kusal tutong anch tufanyidin kuland yom ap anch tuyikwetap nich kuswir. Chikutwish kwikal chiswapela kwikal adimbinau kudi mangand mu kusadin want ipau wetu mu mutapu uyimp. w18.04 11-12 par. 7-8