Ngond wa 9

Yesu wamekesha ranaken mulong wa Mart ni Mariy. Pamanay mutapu wading wovilau ushon mulong wa rufu ra mwanamakwau Lazar, “Yesu wadila.” (Yoh. 11:32-35) Kadilap kwend mulong wa rufu ra murund nend wa piswimp. Mulong wading wij kwend anch ukumuvumbul. Pakwez Yesu wadila mulong wamana mutapu wading wiyovilau arund nend nayimp mulong wa rufu ra mpanyau Lazar. Kwijik anch Yesu wading kwitek pa ndond ya antu akwau kutukasikeshin nakash. Chakin kamu, tudiap antu awanyidina mudi Yesu. Pakwez, tumukatin mulong wayisadina antu akwau nich ranaken. Twiyovil akasikeshinau kwijik anch katat ukat kuyikel mudi Mwant wa Want wa Nzamb. Piswimp ap ukupwish mar mawonsu. Mulong Yesu wading mudi muntu pa divu, ndiy kamu uwanyidina kuyidiosh antu mu mar ni kudiosh kusansan kukash kudiokila ku winyikel wa Satan. Chawiy, tudi ayukina kwikal ni Nyikel ukutwisha “kutwovil riy mulong wa kuziy kwetu.”​—Heb. 2:17, 18; 4:15, 16. w19.03 17 par. 12-13

Tukutwish kusal chom kanang mulong wa kuyikwash antu kwilej piur pa Nzamb, pakwez tufanyidin kwijik anch kiyetwap tusadina mudimu upandikena kujimb. (1 Kor. 3:6, 7) Yehova ndiy ukata kuyipwit antu. Ni kupwa, muntu ni muntu ukutwish kwitiy ap kulik rusangu ruwamp kulondwish mutapu udia muchim wend. (Mat. 13:4-8) Vurik anch antu avud kitiyap uruu wa Yesu​—ap anch wading Mulej mujim! Chakin kamu, tufanyidinap kuziy anch antu avud tusadina usu wa kukwash alik kwau kutesh uruu. Tukwikal ni yibudikin yiwamp anch twamekesh ranaken mu mudimu wa kulejan. Tukusanger nakash mudimu wa kulejan. Tukwikal ni yiyukish yipandikena yikata kudiokal ku kupan. Ni tukusal anch chiyiswapel antu akweta ‘muchim uwanyidina mulong wa mwom wa chikupu’ kwitiy rusangu ruwamp. (Mid. 13:48) Chawiy “yisu yawonsu [tukweta mutapu] chifanyidin etu kusal nawamp kudi antu awonsu, pakwez kupandakan kudi anamakwetu in ritiy.” (Gal. 6:10) Kupwa tukwikal ni musangar wa kumutumbish Tatukwetu wa mwiur.​—Mat. 5:16. w19.03 25 par. 18-19

Mwant David wafunda anch: “[Yehova] udi mujim, chifanyidin kumushiman.” (Kus. 145:3) Wading umukatin Yehova ni rukat riner ramubachika kumushiman Nzamb ‘mukach mwa chikumangen.’ (1 Jsng. 29:10-13; Kus. 40:5) Nlel unou, mutapu umwing wa kumushiman Yehova udi kusutin kwakul chisu cha yikumangan yetu ya win Kristu. Etu awonsu tukat kusanger kutesh yakul kushalijan ku yikumangan yetu. Tukat kusanger yakul yiwamp ni yiswapela yikatau kupan an akemp. Tukat kwikal akasikeshinau pitukata kutesh mutapu wakwilay muntu urumburila piur pa uyakin wilejangay. Ni tukat kuyisanger antu akata ‘kumekesh kutakaman’ mulong wa kwakul, ap anch akwet usany ap kijap dizu dietu nawamp. (1 Tes. 2:2) Mutapu ik tukutwisha kujikitish mulong wa usu wau usadinau? Kupwa kwa yikumangan, tukutwish kuyijikitish mulong wa yakul yau yikasikeshina. Mutapu ukwau wa kuyijikitish udi wa kwakul niyetu. Kupwa, kadiap kwau anch ching etu yetu ukasikeshinau ku yikumangan yetu, pakwez, niyetu tukat kuyikasikesh antu akwau.​—Rom 1:11, 12. w19.01 8 par. 1-2; 9 par. 6

Antu dikum ading ayedin mayej mayimp nakash ma musong wa mak. Antu inay kadingap ni ruchingej anch dichuku dimwing akez kuyerik. Pakwez, dichuku dimwing amumena kulemp Yesu Mulej Mujim. Awiy atesha anch Yesu wading wokin mitapu kushalijan ya mayej. Chawiy atoya anch: “Mwant Yesu! Itwovilap etu riy!” Antu inay dikum ayerika kapamp kamwing. Chakin kamu awonsu ikala ni yovil ya kujikitish mulong wa ranaken ra Yesu. Pakwez, umwing kusu wasala yom yivud kusutamu kwau kwiyov kwikal mwin kujikitish​—waya mulong wa kumekesh kujikitish kwend kudi Yesu. Ikundj winou wayerika wading mwin Samariy, ni wiyova anch chifanyidin kumutumbish Nzamb “ni dizu dikash.” (Luka 17:12-19) Mudi mwasalay mwin Samariy, tufanyidin niyetu kumekesh kujikitish kudi antu atusadidina yom yiwamp. Yehova utulejin chilakej chiwamp cha kumekesh kujikitish. Mutapu umwing usadiningay mwamu uding wa kuyiyukish antu amusangareshina. (2 Sam. 22:21; Kus. 13:6; Mat. 10:40, 41) Ni Bibil utukasikeshin ‘kumwimburij Nzamb mulong tudi mudi anend akatish.’ (Efes 5:1) Chawiy, diyingishin dimwing dijim disadina anch tumekesha kujikitish didi anch tufanyidin kwimburij chilakej cha Yehova. w19.02 14 par. 1-2; 15 par. 4

Changadim umwing ku shikol ulikin nich kalimish kwiyandjik mu musambu wa dichuku dijim diakad kumusangaresh Yehova. Nsand umwing wakad kulondolang nakash ulejena ku chis ni chis wakokal kal ku chikumbu kushichingay nsand udingay nend ku shikol yimwing, nsand winou wading kuyisipang Atuman a Yehova pakur. Ikundj umwing ukata kusal mudimu nakash mulong wa kuwanyish maswir ma dijuku diend, mukurump wend wa mudimu wamulej kal kusal chom chimwing chiyimp chakad kukwatijan ni yijil. Ap anch wij anch ukutwish kushadish mudimu wend, ikundj winou umurumburidin anch ufanyidin kwikal muntu mwin kashinsh ni kuziyil ku chijil mulong Nzamb uyitin atushalapol end kusal mwamu. (Rom 13:1-4; Heb. 13:18) Mwikadil ik wajingunina kal mu antu inay asatu? Ukutwish kuman mikadil yivud, mudi kutakaman ni win kashinsh. Pakwez awonsu amekeshang mwikadil umwing wa usey nakash​—kushinshaman. Umwing ni umwing wau wamekeshang kushinshaman kudi Yehova. Umwing ni umwing wau walikang kujip yijil ya Nzamb. Kushinshaman kwayibachikang Atuman inay kusal mudi mutapu wasalangau. Yehova ukutwish kusangar nakash anch waman umwing ni umwing wau ukat kumekesh mwikadil winou. Chilik chimwing, niyetu tukatining kumusangaresh Tatukwetu wa mwiur. w19.02 2 par. 1-2

Chijil chayichidijang pakampwil antu ading akad diking, mudi an anshon, adiaafu ni aeny. Ayileja ankalansambu a mu Isarel anch: “Kangal wez warumburishany nayimp mulong wa mweny, ap mulong wa mwan anshon, ap kangal watambulany yidjal ya mwadiamufu mu chizu.” (Kuv. 24:17) Yehova wamekesha anch umubangidin muntu win mwawonsu wading wakad diking. Ni wayipupang antu ayimeshang antu inay mar. (Kub. 22:22-24) Yehova ukatin anch antu inkishinay yisend ayibangina nich rukat antu atakedilau. Ukisin nakash antu a mu dijuku ap a mash mamwing kwatijan, ni ukatin anch antu awonsu, pakampwil antu akad diking ayisadina nich kutentam ni ayikinga. (Lev. 18:6-30) Anch tukwet kashinsh anch Yehova ukat kutusadin nich kutentam, rukat retu mulong wendendiy rikat kukul. Anch twamukat Nzamb ni twakat yijil yend yitentamina, tukat kwikal abachikinau kuyikat antu akwau ni kuyisadin mu mutapu utentamina. w19.02 24-25 par. 22-26

Shinshikin chilakej piur pa mutapu tukutwisha kwichidij ku yibachikin ya kwikal ni yitongijok ya Satan. Yehova ukat kutufundish anch “kichifanyidinap [etu] kulond yom ya usund, ap ya kwijond,... pakach [petu].” (Efes 5:3) Pakwez yom ik tukutwisha kusal anch arund ku mudimu ap ku shikol asambish kulond piur pa yom ya kwijond? Kalam ap kom ketu kafanyidin kutubabesh piur pa ubaj. (Rom 2:15) Pakwez ov, tukukatesh anch katubabesh? Akutwish kutupak chakwel tuyitesh arund netu ap tutal yipich yipalangeshinau. Pakwez, tufanyidin kwipuk ubaj winou kusutil kuswimp mambamb ap kudiokal pa ndond yiney. Chitining kutakaman mulong wa kujijamen yibachikin yidiokila kudi arund netu ya kutong piur pa kusal yom yiyimp. Ukutwish kwikal nich kashinsh anch Yehova umen usu tusadina ni ukutwinkish usu ni manangu tukweta nich kuswir mulong wa kulik yitongijok ya Satan.​—2 Jsng. 16:9; Isay 40:29; Jak. 1:5. w19.01 17-18 par. 12-13

Salomon, wading mpich nakash ni muntu ukweta ulabu nakash wajingunina chom chimwing. Walonda anch: ‘El bil nisangar chakwel nimana uwamp udiamu.’ (Mul. 2:1-10) Chawiy, Salomon watunga yikumbu ya ufun, wadima yir yiwamp ni wading ni mapark mawamp ni wasalang yom yawonsu yading yikatinay kusal. Ov, wikala ni musangar? Patalay Salomon yom yawonsu yasalay, walonda mazu madia mu mufund wa nlel. Ov, ukutwish kwilejin ku yom yajinguninay Salomon? Antu amwing akat kwilej malejan mamwing mu mwom kupwa kwa kurumbuk ni kuman mar ma yibudikin yiyimp. Yehova kakatinap anch yom mudi yiney yikushiken. Ukatin umutesh ni umuziyin ndiy. Kusal mwamu kwitin ritiy, pakwez ukwinanap ap pakemp piur pa mipak witekidina mu mwom mulong wa ritiy rey. Ni Yehova kakuvuramenap ap pakemp ‘rukat umekeshina mulong wa dijin diend.’ (Heb. 6:10) Chawiy sal usu wa kukasikesh ritiy rey. Kupwa ukukwat mipak yiwamp mu mwom ni ukuman amwiney anch Tatukwey wa mwiur ukatin yom yiwamp mulong weyey.​—Kus. 32:8. w18.12 18-19 par. 14-15

Muntu wa mu spiritu ukweting ritiy mudiay Nzamb ni usadining usu wa kuman yom mudi muyimenay Nzamb. Ukat kwitiy anch Yehova atakel mwom wend ni ukat kukwat mupak wa kumuziyin. (1 Kor. 2:12, 13) David udi chilakej chiwamp cha muntu wa mu spiritu. Wawanga anch: “[Yehova] ndiy chikunku cham.” (Kus. 16:5) David wading ujikitishin mulong wa “chikunku” chend, charumburik anch urund wend wa piswimp ni Nzamb ni wachininang kudiay ndiy. (Kus. 16:1) Mudi chibudikin, walonda anch: ‘Nikwet musangar mu mwom wam wawonsu.’ Kwikil chom chikwau chamusangareshang David mudi urund wend wa piswimp ni Yehova! (Kus. 16:9, 11) Antu ashinshikidina nakash pa nfalang ap pa musangar kakutwishap kwikal nich musangar nakash mudi wadingay nich David. (1 Tim. 6:9, 10) Anch wakasikesh ritiy rey mudiay Yehova ni kumusadin, ukwikal kamu ni mwom uwamp ni usangareshina. Chawiy, yom ik ukutwisha kusal mulong wa kukasikesh ritiy rey? Ufanyidin kusutish chisu ni Yehova mu kutang Dizu diend, kutal yom yiwamp yatangay ni kutongijokin pa mikadil yend, kuwejinaku rukat rikwetay mulong weyey.​—Rom 1:20. w18.12 22-23 par. 7-8

Paul kadingap kisambidina piur pa yom yawonsu piur pa uruw. Wading uyilejin in Kristu anch afanyidin kulimish uruw, charumburik anch kuukwat nich usey. Ov, wawiy mutapu umena uruw, pakampwil uruw wey anch waten kal ap wachikin kal? Anch ukwatin uruw nich usey nakash, wimburijin chilakej chiwamp. Yesu amwinend walimisha uruw. Pamwipulau kudi Afaris piur pa kujip uruw, wisambina yom yalonday Nzamb piur pa uruw wa kusambish anch: “Pa chinech ikundj ukez kudiokal kudi tatukwend ni makwend, ni kulamat kudi mukajend, chad awiy aad akwikal mujimbu umwing.” Yesu walonda kand anch: “Muntu kafanyidinap kwauril antu abombakeshay kal Nzamb.” (Mar. 10:2-12; Dis. 2:24) Yesu witiyija anch Nzamb ndiy watanga uruw, ni uruw ufanyidin kwikal wa rawonsu. Patangay Nzamb uruw wa kusambish, kamulejap Adam ni Ev anch akutwish kujip uruw. Pakwez, chitongijok chend chading mulong wa “awiy aad” kushakam mu umwing mu uruw chikupu. w18.12 9-10 par. 2-4

Chisu twasambisha kwilej uyakin, twileja anch chidi cha usey kuziyin kwi mbil ya Yehova. Pakwez pitudandamedina kuya kurutu, twilejin yom yivud piur pa yitongijok yend, charumburik anch yom yikatinay, yikisinay ni mutapu umenay yom ni yom yiney yikat kwikal ni yibachikin pa kutond kwetu ni yisalijok yetu. Ap anch tusangaredin kwilej yitongijok ya Yehova, yisu yimwing chikasiken kutong mudi mutonginay Yehova mulong tudi antu akad kuwanyin. Chilakej, twij mutapu umeningay Yehova mwikadil wishitwila, yom ya ku mujimbu, mudimu wa kulejan, kusadin kuyimp kwa mash, ni yom yikwau. Pakwez chikutwish kwikal chikash kudi etu kutesh mulong wak Yehova uyimen yom yiney mu mutapu winou. Chawiy mutapu ik tukutwisha kwilej kutong kamu nakash mudi Yehova? Tufanyidin kuswimp manangu metu kusutil kutang Dizu dia Nzamb, kutesh yitongijok yend, kuyitongijokin, ni kusal usu wa kwikal ni yitongijok ya Yehova. w18.11 27-28 par. 2-4

Abakuk washakama pa chirung chimwing chikash. Antu ading amunyingumukina ading ayimp ni akweta chisum, ni chinech chamunenganesha nakash. Kwi ndond yawonsu kwatalangay, wamanang in Isarel akat kusalijadin umwing ni mukwau mu mutapu uyimp ni wa chisum. Abakuk wiyipula anch: ‘Ov, chisu ik chikupwa uyimp winou? Mulong wak Yehova ulabin mwamu pa kusal chom kanang piur pa uyimp winou?’ Wiyova nayimp nakash. Chawiy wamwilembila Yehova chakwel asala chom kanang. Abakuk wafanyina pamwing ap kusambish kutong anch Yehova kabangidinap kand antu end ap kakusalap chom kanang. Ov, niyey wiyovilap kal mwamu? Ov, Abakuk wipula yipul yiney mulong wading walikin kal kuchingejin mudiay Yehova ni mu kushilamu kwend? Bwat kwau! Abakuk wading umwitin Yehova ukwash mulong wa kwidjidjek ni milong yend, chinech chimekeshin anch wading uchidandamedin kuchingejin mudiay Yehova. Abakuk wading kamu wiyakamishin ni wading mu kanvundangesh. Kadingap kateshina mulong wak Yehova wading uchingedin kupwish yom yiney ni mulong wak Wading ulikidil anch aman mar nakash. w18.11 16-17 par. 4-5

Pita ni Andare ading in kuta ansh, pakwez chisu chayitazukau kudi Yesu mulong ikala in kwilejend, alika mudimu wau wa kuta ansh. (Mat. 4:18-20) Chinech chirumburikinap anch ang wilej uyakin, ufanyidin kulik mudimu wey. Muntu ufanyidin kusal mudimu mulong wa kuwanyish maswir ma dijuku diend. (1 Tim. 5:8) Pakwez anch wilej uyakin, mutapu wey wa kutong piur pa yom ya ku mujimbu ukuswimp. Ukwijik chom chidia cha usey nakash mu mwom wey. Shinshikin chilakej cha Maria. Chitongijok cha Maria chading anch ikala mwin kusengan wa piur wa masengan ma golf mu mwom wend chakwel ikal ni nfalang jivud. Pakwez wasambisha kwilej Bibil ni wasambisha kusadin yom yading yilejinay mu mwom wend. Maria wajingunina anch chikutwish kumukasiken kushinshikin pa urund wend ni Yehova ni pa masengan. (Mat. 6:24) Walikap chitongijok cha kwikal mwin kusengan wa piur wa masengan ma golf. Nlel, Maria udi chibol ni ulondin anch ukwet “mwom wa musangar ni uwamp.” w18.11 5-6 par. 9-10

Pawanyishay Yesu mivu 30, wimika mudimu wend wa kusong mabay ni wikala mulej mulong wading wij anch wawiy wading mudimu wa usey nakash wafanyinay kusal. Walonda anch kulejan rusangu ruwamp ra Want wa Nzamb diawiy diyingishin dimwing diamutuminau kudi Nzamb pa divu. (Mat. 20:28; Luka 3:23; 4:43) Mu mwom wend, Yesu washinshikina pa mudimu wa kulejan rusangu ruwamp ni wakata anch antu akwau asala mwamu. (Mat. 9:35-38) Avud pakach petu kadiap ansongamabay, pakwez etu awonsu tudi in mudimu wa kulejan akata kuyilej antu akwau rusangu ruwamp. Mudimu winou udi wa usey nakash mulong tuusadin pamwing ni Nzamb. Chawiy, atutazukin anch in ‘kusal mudimu pamwing ni Nzamb.’ (1 Kor. 3:9; 2 Kor. 6:4) Twitiyijin yom yalonday nfund a Kuseng anch: “Mazu mey mawonsu . . . madi makin.” (Kus. 119:159, 160) Mazu ma Yehova madi makin. Chawiy tufanyidina kwikal nich kashinsh anch tudi in “kulejan dizu dia uyakin nich kutentam” mu mudimu wetu wa kulejan. (2 Tim. 2:15) Chawiy tudandamedina kusal usu wa kwikal nich ukaliweny wa kusadin Bibil, chom chetu cha pakampwil mulong wa kuyifundish antu akwau piur pa Yehova, Yesu, ni piur pa Want. w18.10 9-10 par. 1-2

Anch ngatan wimburij chilakej cha rukat cha ntakel wend Yesu Kristu, chikumuswapel mukajend kwikal nich ‘kalimish kakurikina’ mulong wendendiy. (Efes 5:22-25, 33) Ni anch wamulimish nfumwend, ukusal usu wa kutesh yovil yend ni kumusadin mu mutapu uwamp. Anch anvaj akat kubangijadin umwing ni mukwau, ashil chilakej chiwamp kudi anau. Afanyidin kand kuyifundish anau kuyitongin antu akwau ni kwikal antu awamp. Chilakej, anvaj akutwish kuyifundish anau anch kafanyidinap kuya mau mu Chot cha Want. Ap chisu chidiau ku musambu, akutwish kuyilej anau kuchingel amakurump asambel kunon yakudia. Chawiy tufanyidin kumujikitish mwan anch wasal chom chiwamp, chilakej, anch watwazuril ku chis. Chinech chikumwovish mwan kuwap ni chikumukwash kwilej anch “chiyukish cha mwin kupan chipandakenamu cha mwin kutambul.” w18.09 28-29 par. 5-6

Wintakel utwinkishinay Kristu, Mwant wetu uyikedila, ukutukwash katat ni machuku ma kurutu. Sal usu wa kushinshikin mutapu watanyidinamu mulong wijididin kuswimp kusu. Pa chisu cha difukwil dia mu dijuku, ukutwish kwisambinany mutapu kuswimp kwa yikumangan ap kwa mudimu wa kulejan kwakwashina dijuku dien. Anch twavurik anch kulondul mbil jiletinau kudi dirijek dia Yehova kutwadin ku yibudikin yiwamp, chikutuswapel kulondul wintakel winou ni tukwikal ni musangar. Chilakej, mulong tuchapinap kand mikand yivud mudi pakur, tulamin nfalang jivud. Ni mulong tusadidin teknoloji wa katat, tukwet mutapu wa kuyitan antu avud mulong wa kuyilej rusangu ruwamp. Chawiy sadin chipandikena mikand ni yom yikwau kand ya chielektronik anch chitwishikin. Winou udi mutapu umwing wa kumukwash Kristu, ukatina anch tusadin yom ya dirijek ni manangu. Anch twakwash wintakel wa Kristu, tuyikwashin akadivar nau anambaz kwikal ni ritiy rikash ni kwikal kamu mu umwing. w18.10 21 par. 17-19

Anch tudi antu adimukina mudi Yehova, tukutwish kupan rongoj ritinau akadivar netu mu malembil! (2 Kor. 1:3-6) Kangal wachingejin anch akadivar nau anambaz ney ikala antu awanyidina. Ikal muntu wisikena. Anch wayichingejin akadivar ney kwikal antu awanyidina, ukushiken ku kuziy. (Mul. 7:21, 22) Vurik anch Yehova, uding wisikena mu yom yichingejinay anch tusala. Chawiy, tufanyidin kwikal in kushimpishijadin muchim umwing ni mukwau. (Efes 4:2, 32) Tukatinap kuyisal akadivar netu iyova anch kasadinap yom yivud ap kuyisikesh ni antu akwau. Pakwez, tukat kuyikasikesh ni kushinshikin pa yom yiwamp yisadinau. Chinech chikutwish kuyikwash kwikal ni musangar pamusadidinau Yehova.​—Gal. 6:4. w18.09 12-13 par. 16-17

Kusal rusot ra Nzamb kwading mudi yakudia ya Yesu. Kudia yakudia yiwamp kukat kusal anch twiyova nawamp ni twikala ni mijimbu yiwamp. Chilik chimwing, kusal rusot ra Nzamb kukat kutwovish nawamp ni kukasikesh ritiy retu. Anch twasal yom yitinay Yehova kusal, tudi in manangu. (Kus. 107:43) Ni yom yivud yiwamp yikat kushiken kudi antu akweta manangu. “Kwikil chom cha rusot rey chiukumwilikeja nich.... Manangu udi mutond wa mwom kudi awiy akuukwata, ni awonsu akuukwata akuyitazuk anch ayukil.” (Jnsw. 3:13-18) Yesu walonda anch: “Anch en wijany yom yiney, wayukany kwen anch wayisadilany.” (Yoh. 13:17) In kwilej a Yesu afanyina kwikal ni musangar padandamenau kusal yom yayilejau kusal kudi Yesu. Kulondul mafundish mend ni chilakej chend yikala yom yisadidinau mu mwom wau wawonsu. w18.09 4 par. 4-5

Ap anch Adam ni Ev ading ayinau mu chir cha Eden, afanyina kutong piur pa anau akuvalau. Mulong wak? Yehova wayinkisha mudimu wa kusal. Wayileja kwizwish divu ni anau ni kudikadish paradis. (Dis. 1:28) Adam ni Ev afanyina kukat anch anau akuvalau ikal ni musangar, mudi mwakatay Yehova anch awonsu ikal ni musangar. Afanyina awonsu kusal mudimu pamwing mulong wa kwikadish divu diawonsu paradis. Winou wading mudimu ujim nakash mud ik! Antu awanyidina afanyina kand kusal pamwing ni Yehova mulong wa kwikadish divu Paradis ni kuwanyish rusot rend. Mu mutapu winou, afanyina kwandam mu kwiswedish kwend. (Heb. 4:11) Tong musangar ni kuzangijal kwafanyinau kwov mu kusal mudimu winou! Yehova wafanyina kuyiyukish nakash mulong wa kulik kwikal ni choy ni kuyibangin anau. w18.08 15 par. 2; 16-17 par. 8-9

Yom ik ukusala anch muntu wapalangesh makasu piur pey? Yom yiney yamushikena Yesu ni Yohan Mubatish. (Mat. 11:18, 19) Yom ik yasalay Yesu? Kasadinap chisu chend ni usu wend mulong wa kuyilej antu nich kashinsh anch nsangu jading ja makasu. Pakwez, wayikasikesha antu kukimb uman. Wakata anch antu ashinshikina pa yom yasalay ni yafundishay. Yesu walonda anch: “Manangu... makat kumekan anch madi makin ku yisalijok yau.” (Mat. 11:19) Tukutwish kwilej malejan ma usey kusutin Yesu. Yisu yimwing antu akutwish kulond yom yakad kutentam ap yiyimp piur petu, ni tukutwish kwov wom anch yom yiney yikutwish kuyipish kalimish ketu. Pakwez mutapu tushicha ukutwish kumekesh kudi antu akwau chitudia kamu chakin. Mudi mutapu twileja kal kusutin chilakej cha Yesu, mwikadil wetu ukutwish kumekesh anch uyakin wa chikunku ni makasu matudimbenangau yidiap yakin. w18.08 6-7 par. 11-13

Kain, Salomon nau in Isarel awonsu ading ni mutapu wa kukarumuk ni kuswimp mwikadil wau. (Mid. 3:19) Chakin kamu, Yehova kakatap kapamp kamwing kuyilik antu mulong kwau arumbuk kal. Tong mutapu wamulikishinay Aron. Nlel unou, Yehova ukat kutubabesh kwa rukat mulong wa kutuchidij ku kusal yom yiyimp. Ukat kusadin Bibil, mikand yetu ap kand in Kristu akwau. Anch twata matu ku kubabesh kwa Yehova, tukutwish kwikal nich kashinsh anch ukutwovil riy. Ranaken ra Yehova rikwet chitongijok. (2 Kor. 6:1) Ritwinkin mutapu wa “kulik mwom uyimp ni maku mayimp ma yom ya mangand.” (Tit. 2:11-14) Mu mangand minam, mukwikal chisu chawonsu yom yikutwisha kupak kushinshaman kwetu kudi Yehova. Kwat mupak wa kushal kamu ku mutambu wa Yehova! w18.07 20 par. 20-21

Mutapu ik ukutwisha kukul nakash maswir metu ma kwikal ijikena kudi Yehova chakwel tulika kukat kwijikan kwa mangand? Tufanyidin kushinshikin uyakin waad wa usey. Chakusambish, Yehova ukat kuyijik chisu chawonsu antu amusadidina nich kushinshaman. (Heb. 6:10; 11:6) Yehova uyimen atushalapol end ashinshamen mudi adi a usey nakash, chawiy umen anch chikutwishap kwikal ‘chitentamina’ anch wayivuramen. Ndiy “wij njil ya in kutentam” ni wij mutapu wa kuyipandish. (Kus. 1:6; 2 Pita 2:9) Cha kaad, Yehova ukutwish kutwijik mu mitapu yitwakad kuchingejin. Anch antu asal yom yiwamp mulong kwau wa kuyibaz kudi antu akwau, Yehova kakuyifutap. Mulong wak? Mulong mudi mwalonday Yesu, dined diawiy difut diau. (Mat. 6:1-5) Ku mutambu ukwau, Yehova ukat ‘kuman mu ujindj’ antu akad kubazau mulong wa yom yiwamp yisadinau kudi antu akwau. Ukat kuman yom yisadinau ni ukat kuyifut ap kuyiyukish. w18.07 5 par. 8, 10

Pita kateshap kurumburik kwa mazu minam. Chisu chikemp, aruu a Korney eza. Spiritu utumbila wamubachika Pita kuya ku chikumbu cha Korney, chawiy waya pamwing nau aruu. Anch Pita warumburisha ‘kusutin yom yimenay ni mes,’ kafanyinap kuya ku chikumbu cha Korney. In Yuda kayangangap ap pakemp ku yikumbu ya akamichid. Chad mulong wak Pita waya? Ap anch wading nich kasolikany mulong wa akamichid, chishimushimu chamanay ni umutakel wa spiritu utumbila waswimpa mutapu wend wa kutong. Kupwa kwa Pita kumutesh Korney, walonda anch: “Katat am nijikal anch, Nzamb kakwetap kasolikany pakach pa antu, bwat. Ku michid yawonsu, muntu mwawonsu ukata kumulimish ni kusal yom yitentamina, Nzamb ukat kumwitiy.” (Mid. 10:34, 35) Kutesh kwinoku kwa katat kwamusangaresha nakash Pita ni kufanyidin kwikal ni yibachikin padi in Kristu awonsu. w18.08 10 par. 3-4

Tudi kulemp ni yom yikisinay Nzamb. Pakwez yom ik tufanyidina kusal anch tudi mu mulong kampand twakad kutan chijil cha pakampwil mu Bibil? Mutapu ik tukwijika yom yikatinay Nzamb anch tusala? Anch twitiy anch Bibil afumba kom ketu, tukukwat mupak wa manangu. Mulong Yehova utukatin, watwinkisha mbil jikutwisha kutakel kom ketu. Urumburil anch: “Yam [Yehova] Nzamb wen, nikata [kukufundishany mulong wa uwamp wen ayinen], ni kukulejany njil yiufanyidinanya kuya.” (Isay 48:17, 18) Anch twatongijok nakash pa mbil ja Bibil ni twitiy anch jipukuna muchim wetu, tukutwish kuwapish ni kutenchik kom ketu. Chinech chikat kutukwash kamu kukwat mipak ya manangu. Mbil udi uyakin wa pa dishin utakedina yitongijok yetu ni utukwashina kukwat mipak yiwamp. Kwijik mbil ja Yehova kutukwashin kwijik mutapu ukatay kutong ni mulong wak utwinkishin yijil yimwing. w18.06 16 par. 5; 17-18 par. 8-10

Chisak cha in ku mutambu wa Herod, charumburik anch antu akwashang yitongijok ya chipolitik ya Herod, achingeja anch ang Yesu walond anch kafanyidinap kulambul chitad chinech, afanyina kumufund ndiy anch udi mukankuny wa Want wa Rom. Pakwez anch Yesu walonda anch afanyidin kulambul chitad chinech, antu afanyina kulik kumulondul ndiy. Chawiy, chom ik chasalay Yesu? Yesu wading ubabel mulong wa kulik kwiyandjik mu mulong winou. Yesu wijika anch in kulambwish yitad avud ading akat kuyikatul milamu, pakwez kashinshikinap pa mulong winou. Chawiy washinshikina pa chom chakin chikutwisha kupwish milong ya antu, Want wa Nzamb. Yesu watushila chilakej. Tufanyidinap kwiyandjik mu milong ya politik, ap anch mutambu umwing umeken anch uyingin nich ni utentamin chad mutambu ukwau umeken anch ufil nich ni udi wakad kutentam. In Kristu akat kushinshikin pa Want wa Nzamb ni pa yom yilondinay Nzamb anch yidi yakin. Mulong wa diyingishin dined, tufanyidinap kwikal ni yitongijok yikash piur pa kuburen kutentam ap kulond nayimp piur pau. (Mat. 6:33) Atuman a Yehova avud atwishin kal kudiosh yitongijok yikash ya politik yadingau nich. w18.06 6-7 par. 9-11

Kupwa kwa kusadin masandj mulong wa kuyoz angel inay, chimeken kand anch Satan wayikana anch akutwish kwikal ni usu mulong wa kuyikel antu awonsu. Mu kusal mwamu, Satan wapakisha kukangesh kuwanyin kwa uprofet wa Yehova piur pa ‘rubut ra mband.’ (Dis. 3:15) Pakwez Yehova kamulikap anch atwisha kusal mwamu. Waletisha Mabeb, mayipisha kutenchik kwawonsu kwa Satan ni ayilembil. Masandj ni chibud yidi mitapu ya andish a usu adidina nakash. Angel ibomba ni Satan asala mivu yivud mwiur pamwing ni Nzamb. Ap mwamu, avud akudisha maku mayimp ni maku minam mikala ni usu nakash. Tufanyidin yisu yawonsu kuvurik anch chikalap nchik uvud wa mivu twamusadidina kal Yehova, maku mayimp makutwish kwikun mu michim yetu. (1 Kor. 10:12) Chawiy tufanyidina chisu chawonsu kushinshikin yom yidia mu michim yetu ni kudiosh yitongijok yawonsu yiyimp ni chibud!​—Gal. 5:26; Kol. 3:5. w18.05 18 par. 11-12

Twij anch Paul waziya mulong in Yuda alika kutesh uruu piur pa Want. Pakwez, Paul kalikap kuyilej. Warumburila mutapu wiyovay piur pa in Yuda inay palonday anch: “Rusot ruwamp ra muchim wam ni kulembil kwam kudi Nzamb mulong wa awiy yidi mulong wa dipandish diau. Mulong nikat kuyilej uman anch akwet mushiku mulong wa Nzamb, pakwez kadiap kukwatijan ni ronganyin rakin.” (Rom 10:1, 2, NWT) Paul walonda anch ‘rusot ra muchim wend’ ramubachika kuyilej in Yuda. Chakin wakata anch apanda. (Rom 11:13, 14) Paul wamwita Yehova mulong wa kuyikwash in Yuda kwitiy uruu piur pa Want. Cha kasatu, Paul walonda anch: “Akwet mushiku mulong wa Nzamb.” Paul wamana yom yiwamp yidia mu antu inay ni rusot rau ra kumusadin Yehova. Wading wij anch in Yuda inay akweta mushiku akutwish kwikal in kwilej a Yesu akweta mushiku, mudi ndiy amwinend. w18.05 4 par. 4; 6-7 par. 13-14

Etu awonsu tufanyidin kushinshikin pa yom yikwetau nich antu akwau maswir, mwamu tukutwish kuyikwah. Paul wayifundina in Kristu in Hebereu anch: “Kasikeshany makas men maziyila, ni manungun men mazalizadina! Endany salal mudi antu endidila mu jinjil jitentamina, chakwel mwin kubet kangal wawa, pakwez ayerika kwend.” (Heb. 12:12, 13) Etu awonsu tukutwish kukasikeshijan umwing ni mukwau kusutin yom tulondina, ap anch tudi an akemp nakash. Paul wafunda anch: “Chawiy anch kuding ruchingej mu Kristu, anch kuding kwongoj kwa rukat, anch kuding urund mu spiritu, kwonganyin ni kwanaken, chad izwishany musangar wam mu kushakamany pamwing mu kwovijan, ikalany mu rukat rumwing, ikalany ni muchim umwing ni chiyul chimwing. Kangal wasalany yom ya kwaurok ap ya kwitumbish nich, pakwez ikepishany, umwing amutonga mukwau kujimb chipandakena amwinend. Kangal umwing ni umwing asotijolang ku yom yend amwinend, pakwez asota kand yom ya akwau.”​—Fil. 2:1-4, TMK. w18.04 23 par. 10; 24 par. 12

Diyingishin diasala anch Yehova amusadina Yesu mulong wa kutukwol mu usuk wa chitil ni rufu didi mulong wa kusadin mwom wawonsu mulong wa kumusadin ndiy. Mutapu uwamp wa kusadin want ipetu udi wa kusadin chisu ni usu wetu mulong wa kumusadin kamu Yehova. Kusal mwamu kukat kutuchidij mulong kangal mipak ya mangand ni maku metu yikala ya usey nakash mu mwom wetu. (Gal. 5:16) Tong piur pa yom yasalay Nowa ni dijuku diend. Ading ashich mu mangand mayimp ni ma chisum. Pakwez kiyandjikap mu mipak ni milong ya antu ading ayinyingumukina. Atonda kushal akwatikena mu kusal mudimu wayinkishau kudi Yehova kusal. Asala waat, akumangeja yakudia mulong wa ayinau ni mulong wa annam ni ayibabesha antu akwau piur pa Mabeb. “Nowa wasala mudi mwamulejinau yom yawonsu kudi Nzamb, ndiy wayisala.” (Dis. 6:22) Mudi chibudikin, Nowa ni dijuku diend apanda pasheshau mangand minima.​—Heb. 11:7. w18.04 11-12 par. 8; 12-13 par. 11-12

Satan ni ayilembil end asadidin kand relijon wa makasu ni yom ya kwisak mulong wa kudimb ap kupumbul “ngand ya kabuj,” charumburik anch antu awonsu. (Kuj. 12:9) Satan usadidin relijon wa makasu mulong wa kupalangesh makasu piur pa Yehova ni usadin kand usu wa kujimwangesh dijin dia Nzamb. (Jer. 23:26, 27) Mudi yibudikin, antu amwing a kashinsh atongin anch amwifukwidil Nzamb komb ayifukwidil ayilembil. (1 Kor. 10:20; 2 Kor. 11:13-15) Satan usadidin kand yom ya kwisak ya mangand mulong wa kupalangesh makasu, mudi makasu malondina anch nfalang ni yom ya ku mujimbu yikutwish kuyiletin antu musangar. (Jnsw. 18:11) Antu akata kwitiyij makasu minam akat kusadin mwom wau wawonsu mulong wa “mapit” pa ndond pa kumusadin Nzamb. (Mat. 6:24) Ap anch amukatinap nchik Nzamb, rukat rau mulong wa yom ya ku mujimbu rikat kwikal rijim nakash ni chinech chikat kusal anch rukat rau mulong wa Nzamb rishadika.​—Mat. 13:22; 1 Yoh. 2:15, 16. w18.05 16-17 par. 6-7