Ngond wa 10

Tukutwishap kwijik muchim wa muntu mudi mukatau awiy kusal. Chikalap nchik mwamu, tukutwish kusal usu wa kutesh yovil ni kwijik maswir ma antu akwau. (2 Kor. 11:29) Chinyim nau antu in choy adia mu mangand, tufanyidin kusal usu wa ‘kutal dis, kangal mu kusanger ching pa yom yetu ayinetu, pakwez kand mu kusanger pa yom ya antu akwau.’ (Fil. 2:4) Amakurump a chikumangen afanyidin pakampwil kumekesh ranaken. Ij anch akwet chisend cha kupan kuchind mulong wa amikoku ayinkishau kulam. (Heb. 13:17) Mulong wa kuyikwash akadivar nau anambaz, amakurump afanyidin kwikal in ranaken. Mutapu ik ukutwishau amakurump kumekesh ranaken? Mukurump mwin ranaken ukat kusutish chisu pamwing nau akadivar ni anambaz nend. Ukat kuyipul yipul ni kuyitesh nawamp ni kushimpish muchim. Chidi cha usey nakash kusal mwamu pakampwil anch mukoku umwing ukat kurumburil piur pa yitongijok ni yovil yend. (Jnsw. 20:5) Anch mukurump wa chikumangen wasambish kusutish chisu kwa kwikatin pamwing nau akadivar nend, akumuchingejin nakash, akuta nend urund ni akukasikesh rukat rau.​—Mid. 20:37. w19.03 17 par. 14-17

Kujikitish kudi mudi yakudia yiwamp​—yisangareshina pituyidila ni antu akwau. Pakatau antu akwau kutujikitish mulong wa yom twayisadinanga, twoviling musangar. Pitukata kumekesh kujikitish kwetu, tukat kuyisangaresh antu akwau. Muntu ukata kwitiy kujikitish kwetu wijing anch yom yasalangay yikutukwash ap kand wijing anch watwinkishang chom kanang tuswirikedina nakash. Chibudikin chidi anch urund wetu ni muntu winou ukwikal ukash. Kumekesh kwetu kujikitish kudi kwa usey nakash mudi mulejenau mu mufund wa nlel. Tongin ufun ukwetinga dibuj didia mudi dia or ditekinau mwinung ya utad wa usey ukash! Ni tongin kand pa usey ukwetinga dibuj dined! Mutapu ik ukutwisha kwiyov anch watambul chipan mudi chinech? Chakin kamu, mazu ma kujikitish tukata kuyimekeshin antu akwau makutwish kwikal ma usey nakash. Chom chifanyidina kwijik chidi anch: Dibuj didia mudi or dilabining nakash. Chilik chimwing kand, mazu mey ma kujikitish makutwish kushal mu manangu ma muntu ni ukutwish kumalam mudi chipau mu mwom wend wawonsu. w19.02 15-16 par. 5-6

Padiay Adam ni Ev dibuj dia mutond wa ronganyin ra kuwap ni kuyip, amekesha patok yitongijok yau: Kadingap kamuchingejidina Yehova ni mbil jend. Atonda kwitekin mbil jau ayinau piur pa yom yiwamp ni yiyimp. Pakwez tongijokin piur pa yom yashadishau. Ashadisha urund wau wa piswimp ni Yehova. Ashadisha kand ruchingej ra kushakam chikupu, ni ayiswanisha anau chitil ni rufu. (Rom 5:12) Fanikesh mwikadil wa Adam ni Ev ni mutapu wasalay ntung mwin Etiopi pamufundishau kudi Filip. Ntung wasangara nakash piur pa yom yasalay Yehova ni Yesu mulong wendendiy ni pakad kulab watambula dibatish. (Mid. 8:34-38) Anch twipan kudi Nzamb ni twatambul dibatish mudi mwasalay ntung, tukat kumekesh patok yitongijok yetu. Tukat kumekesh anch tujikitishin mulong wa yom yasalay Yehova ni Yesu mulong wetwetu. Tumekeshin kand anch tumuchingejidin Yehova ni twitiyijin anch ching ndiy kusu ufanyidina kutek mbil piur pa yom yiwamp ni yiyimp. w19.03 2 par. 1-2

Anch twisambin piur petwetu atushalapol a Nzamb, kushinshaman kurumburikin kukat nich muchim wawonsu, ni kwipan ni muchim umwing kudi Yehova, ni kusal anch rusot rend rikala pa ndond ya kusambish mu mipak yetu yawonsu tukwatina. Mu Bibil dizu dia Hebereu dikarumwinau anch “kushinshaman” dirumburikin yom yiwanyidina, yakad ulim ap yidia yakabuj. Chilakej, annam apeshangau kudi Yehova afanyina kwikal akad ulim. (Lev. 22:21, 22) Chawiy, atushalapol a Nzamb kafanyinap kulambul nnam wadinga uburedina chizakwal chimwing, ditu ap dis ap nnam wadinga uyedina. Chading cha usey nakash kumulambul Yehova nnam uwanyidina ni wakad ulim. (Mal. 1:6-9) Chawiy komb, tukutwish kwijik mulong wak Yehova ukatin anch twikal awanyidina ni akad ulim. Anch tuyil kuland chom, mudi mabuj, buku ap chom kanang, tukutwishap kusanger chom chikweta ulim ap chakad kuwanyin. Tukusanger chom chiwanyidina, chakad ulim ni chakabuj. Chilik chimwing, Yehova nindiy ukatining mwamu piur pa rukat ni kushinshaman kwetu mulong wendendiy. Kushinshaman kwetu kufanyidin kwikal kwa kabuj, kuwanyidina ni kwakad ulim. w19.02 3 par. 3

Mulong wa kulam muchim wetu, tufanyidinap kwetu ching kulik yitongijok yiyimp pakwez tufanyidin kand kwitiy yitongijok yiwamp. Tong piur pa chilakej cha musumb ukweta mbumbu. Mwin kulam ku yis wading kufungang ku yis ya musumb mulong wa kukangesh akankuny kwandam, pakwez yisu yimwing wading kufungul yis ya musumb mulong wa kwandjik yakudia ni yom yikwau yikwetau nich kuswir. Anch yis ayifungang chisu chawonsu, antu a mu musumb afanyina kufa nzal. Chilik chimwing, tufanyidin kufungul michim yetu chisu chawonsu mulong wa kwandjik yitongijok ya Nzamb. Bibil ukwet yitongijok ya Yehova, chawiy chisu chawonsu tumutangina, tusadin anch yitongijok ya Yehova yikal ni usu pa mutapu wetu wa kutong, wa kwiyov ni wa kusal yom. Mutapu ik tukutwisha kutaninamu mu kutang kwetu kwa Bibil? Chifanyidin kusambish ni malembil mulong wa kutukwash ‘kuman yom yipandakena kuwap’ yidia mu Dizu diend. (Kus. 119:18) Tufanyidin kand kutongijokin nakash pa yom tutangina. Anch twalembil, twatang, ni twatongijokin pa yom tutangina, Dizu dia Nzamb dikat kupukun “mukach mwa muchim” wetu ni tukat kukat yitongijok ya Yehova.​—Jnsw. 4:20-22. w19.01 18 par. 14-15

Yehova wij anch tukwet ukaliweny ni mashakamin kushalijan, ni ukwatining nich usey nakash yakupesh tukutwisha kumwinkish kukwatijan ni usu ap ukaliweny wetu. Tongijokin piur pa yakupesh yapanangau in Isarel yitiyangay Yehova. In Isarel amwing atwishang kupan mukoku ap mpemb. Pakwez mwin Isarel kazwendj wapanang “amaund atwinkudimb aad ap amaund amayemb aad.” Anch mwin Isarel kakwetap mutapu wa kupan atujil aad, Yehova witiyang “chikunku chimwing cha dikum cha chimpay chijim cha wung uwamp.” (Lev. 5:7, 11) Wung wading ni usey ukemp, pakwez Yehova wakwatang nich usey chakupesh chinech, anch udi “wung uwamp.” Nzamb wetu ukat kwiyov kand mutapu wawiy umwing nlel. Pitukata kupan yakul, Yehova kakatap kuchingej anch etu awonsu twikal in kulond awamp mudi Apolo ap in kurumburil akweta ukaliweny mudi Paul. (Mid. 18:24; 26:28) Yom yikimbinay Yehova yidi anch tupana yakul yiwamp kukwatijan ni ukaliweny wetu. Vurik rusangu ra mwadiamufu wapesha nfalang jaad ja usey ukemp. Yehova wamusangera nakash mulong wapana yom ya usey yadingay nich.​—Luka 21:1-4. w19.01 8-9 par. 3-5

Mulong tudi in kwilej a Kristu, tufanyidin kwijik anch akutukis. Yesu watakela kulond anch in kwilejend akez kayizengol nakash mu machuku ma nsudiel. (Mat. 24:9; Yoh. 15:20) Uprofet wa Isay utubabeshin kand anch akankuny netu akusal yom yivud kulik kwau ching kutukis; akusadin mat kushalijan mulong wa kuturishikish. Akankuny netu akusal usu wau wawonsu mulong wa kupalangesh makasu mau mamekana mudi uyakin, akulond yom ya makasu piur petu ap akutuzengol nakash. (Mat. 5:11) Yehova kakuyikangeshap akankuny netu kusadin mat minam mulong wa kuturishikish. (Efes 6:12; Kuj. 12:17) Pakwez tufanyidinap kwov wom ap pakemp. Yehova walonda anch ‘ut wawonsu’ ukuchilau mulong wa kuturishikish ‘ukez kupandikanap bwat.’ (Isay 54:17) Mudi mukata rubumbu kutuking ku rinkind mukash wa ruval, chawiy Yehova ni ndiy ukutuking ku “masok ma akankuny netu.” (Isay 25:4, 5) Akankuny netu kakutwishap ap pakemp kutusal nayimp machuku mawonsu. (Isay 65:17) Akankuny awonsu a Nzamb “akez kafa.”​—Isay 41:11, 12. w19.01 6-7 par. 13-16

En ansand, Yehova ukatining want ipau ni wayitanga antu chakwel niyau akat want ipau. Pakwez Yehova ukatin anch usadin want ipau winou nich manangu chakwel wichidij. Pamwing ap akwen akat kutal pornografi, kusal masandj, kutek mwom yau mu ubaj mu kusengan masengan mayimp, ap kuna yom yilewishena ap maar mu mutapu uyimp. Kwinsambishin yom yiney yikutwish kumekan mudi yiwamp ni yisangareshina, pakwez yisu yivud yikat kutwal ku yibudikin yiyimp mudi mayej, kwikal musuk wa yom yiney ap kumushikij muntu ku rufu. (Gal. 6:7, 8) Ansand iyandjikina mu yom yiney akutwish kutong anch akwet want ipau wakin, pakwez bwat. (Tit. 3:3) Ku mutambu ukwau, kumuziyin Yehova kudi kuwamp mulong wetwetu. Kudi kuwamp mulong wa ukash wetu wa mujimbu ni kukat kutukwol chakin. (Kus. 19:7-11) Ni anch wasadin want ipau wey nich manangu charumburik anch kutond kuziyin ku yijil ni mbil jiwanyidina ja Nzamb, umekeshin kudi Nzamb ni kudi anvaj ey anch udi muntu upamina. Anvajey akutwish kukuchingejin nakash ni kukwinkish want ipau upandakena.​—Rom 8:21. w18.12 19 par. 16-17

Mulong wa chitil cha Adam, yom yivud yaswimpa. Kuswimp kumwing kudi anch antu asambisha kufa, kuswimp kwinoku kwikala ni yibudikin pa uruw. Kambuy Paul wayirumburila in Kristu anch rufu rawiy rikata kupwish uruw ni anch mbay wa uruw ukushala ukutwish kwatan ap kwachik. (Rom 7:1-3) Chijil chapanay Nzamb kudi in Isarel charumburila yom yivud piur pa uruw. Chilakej, ikundj mwin Isarel amwitiyijang kwat amband avud. Chishankur chinech chikalaku kurutu Nzamb apana Chijil. Chawiy, Chijil chading chikangeshin kuyimesh amband nau an mar. Chilakej, anch mwin Isarel wamwat kabindj ni kupwa wat kand mband wa kaad, wading ukwet chisend cha kudandamen kuwanyish maswir ma mukajend mudi mwasalangay pakur. Nzamb wamwitang ikundj kudandamen kumuking ni kumulam mband winou. (Kub. 21:9, 10) Nlel tulondwilap Chijil cha Moses. Pakwez chitufundishin anch Nzamb ukwatin uruw nich usey nakash. Chinech chitukwashin kamu kulimish uruw. w18.12 9-10 par. 3, 5-6

Kupwa kwa Abakuk kumulej Yehova yakamish yend, wafanyina kwiyipul piur pa mutapu ukwakulay Yehova. Mudi Tatuku wa rukat, Yehova wamana mutapu wading wiyovilay Abakuk. Wading wij anch Abakuk wading umen mar ni wading umwilembidin chakwel amukwash. Chawiy Yehova kamupupap Abakuk pakwez wamuleja yom Yafanyinay kusal pakad kulab kudi in Yuda ading akad kushinshaman. Chawiy, Abakuk ndiy wikala pamwing ap muntu wa kusambish walejau kudi Yehova anch dipup dia in Yuda diafanyina kushik pakad kulab. Yehova wamurumburila Abakuk anch Wading piswimp ni kupwish uyimp. Wafanyina kuyipup antu ayimp nau in chisum a mwi ngand ya Yuda. Kusutin kulond anch yom yiney yikusadik “mu machuku minam,” Yehova wamekesha anch dirumburish diafanyina kwez pachidiay Abakuk mwom ap pading pachidiau in Isarel ading amunyingumukina aom. Abakuk kachingejap anch Yehova ukutwish kumwakul mu mutapu winou. w18.11 17 par. 7-8

Nzamb ukatin anch antu a mitapu yawonsu ‘apanda ni kushiken kwikal ni ronganyin rakin ra uyakin.’ Mutapu ik ukata kuyiman antu awonsu akad kal kwilej uyakin? Kambuy Paul walejana kudi in Yuda ading ija kal yom kanang piur pa Yehova. Mu weny wa kusambish wa umishoner wa Paul, ndiy ni Barnabas aya ku musumb wa Listre. Antu a mu Likawoniy ading ashicha kwinakwa amumana Paul ni Barnabas mudi antu a ulabu nakash ni ayipila majin ma anzamb au amakasu Zeus ni Herimes. Ov, Paul ni Barnabas asangera ntumb yiney? Ov, amana anch kwinoku kudi kuswimp kusangareshina mulong ayimesha mar mu misumb yaad ya nsudien yendinau? Ov, atonga anch kuyibangin kwinoku kwafanyina kuyikwash antu avud kutesh rusangu ruwamp? Bwat! Ajimana nakash ni kuswej anch: “Ov, mulong wak usadilanya chom chinech? Etu tudi kamu antu mudi en [akweta kuziy mudi kwenen]!”​—Mid. 14:8-15. w18.09 5 par. 8-9

Anch twilej uyakin ni twasambish kushakam kukwatijan ni mbil ja Bibil, tufanyidin kuswimp pakad kulab mutapu wetu wa kutong ni wa kusal yom. Kambuy Pita wafunda anch: “Mudi an amuziyidila Nzamb, kangal walondulany maku mayimp ma mujimbu, mudi muwadinganya pakur.” Kupwa waweja kand anch: “Ikalany atumbila mu yaku yen yawonsu.” (1 Pita 1:14, 15) Mu musumb wa pakur wa Korint, antu avud ading ni yisal yijondila. Antu ading ashicha mwinimwa afanyina kuswimp mulong wa kwikal ishitwila ku mes ma Yehova. Nlel, antu avud akat kuswimp chisu chikatau kwilej uyakin mudi mwasalau antu inay. Pita wisambina yom yiney pafunday anch: ‘Chisu cha pakur, wadingana in kusal yitil mudi mukat kusalau antu a michid yikwau. Wasalanya kand usund, walondulanya maku mayimp ma mujimbu, wapandakeshanya kukwachik maar, wibombanya mu yisak ya kuna maar, chad wasalanya yitil ya usany, chad wifukwilanya kand akish atakanena.’​—1 Pita 4:3. w18.11 7 par. 13

Mutapu ik tukutwisha kuyitan antu ‘awanyidina mulong wa kutambul mwom wa chikupu’? Kudi in Kristu akusambish, mutapu umwing kusu wa kuyitan antu inay wading wa kulejan. Yesu wayileja in kwilej end anch: “Piukushikany mu musumb ap mu ul, [kimbany] muntu wa kashinsh uwanyidina kukwakany.” (Mat. 10:11) Niyetu tufanyidin kusal mwamu nlel. Chakin kamu, anch antu kadiap in kashinsh, adi in chibud ap kamubanginapaku chakin Nzamb, tufanyidinap kuyichingejin anch akutesh rusangu ruwamp. Tukimbin antu adia in kashinsh, ikepishina, akatina kamu chakin kwijik uyakin. Tukutwish kufanikesh kuyikimb antu kwinoku ni yom yasalangay Yesu chisu chadingay nsongamabay. Kurutu kwa kusal chom kanang, mudi chis, mpand, ap chom chikwau, chakusambish wakimbang dibay diwamp. Kupwa wanonang mushet wend wa yom ya mudimu, wasadinang ukaliweny wend, kupwa wasalang chom chikatinay. Chawiy chimwing kand nlel, tufanyidin chakusambish kuyikimb antu akashinsh, kupwa tukutwish kusadin yom yetu ya mudimu ni ukaliweny mulong wa kuyikwash kwikal in kwilej.​—Mat. 28:19, 20. w18.10 10 par. 3-4

Filip mwin kulejan rusangu ruwamp wading chilakej chiwamp cha muntu wadandamena kushinshikin pa mudimu wend wa kulejan chikalap nchik kuswimp kwend kwa mashakamin. Chisu chimwing, wading usangaredin chisend chisu mu Yerusalem. (Mid. 6:1-6) Kupwa yom yawonsu yaswimpa. Kupwa kwa kumujip Stefan, ayizengola nakash in Kristu, ni achina mu Yerusalem. Mulong Filip wakata kushal ukwatikena mulong wa kumusadin Yehova, chawiy waya mu ul wa Samaria, kwinikwa kwading antu akweta kuswir kwa kutesh rusangu ruwamp. (Mat. 10:5; Mid. 8:1) Filip wayangang kwa kwikatin kwi ndond kwawonsu kwamubachikang spiritu wa Nzamb anch aya. Chawiy Yehova wamusadina chakwel alejan ku jindond kwading antu ading kandikal ateshap rusangu ruwamp. In Yuda avud ayimanang in Samaria mudi antu akad usey ni ayisadinang mu mutapu uyimp. Pakwez Filip kadingap nich kasolikany, ni wayileja nich mushiku rusangu ruwamp. Chad in Samaria amutesha ‘nich muchim umwing’! (Mid. 8:6-8) Filip washala ukwatikena nich mudimu wa kulejan ni Yehova wadandamena kumuyukish ni dijuku diend.​—Mid. 21:8, 9. w18.10 25-26 par. 14-16

Dichuku dimwing, Yesu wading mwi ngand ya Misumb Dikum chisu chamuletinau kudi antu “ikundj kajikamatu wading kand kamam.” (Mar. 7:31-35) Yesu wamwoka, pakwez kamwokinap mukach mwa antu. Mulong wak? Mulong muntu wading kajikamatu, pamwing ap wading wiyovil nayimp mukach mwa antu avud. Yesu wijika yovil yend ni “waya nend kuns” kwi ndond kwading kwakad muntu ni wamwokina kwinakwa. Chakin kamu, etu tukutwishap kusal yilay, pakwez tukutwish kutong piur pa maswir ni yovil ya akadivar netu ni kwikal antu awamp kudi awiy. Yesu wajingunina mutapu wading wiyovilay kajikamatu ni wamwanakena. Chilik chimwing, tufanyidin kuyibangin amapal ni ayilim. Rukat chidi chijingidij cha usey nakash cha chikumangen cha win Kristu, kadiap midimu yivud tukutwisha kusal mu chikumangen. (Yoh. 13:34, 35) Rukat rikat kusal anch tusala yom tukutwisha kusal mulong wa kuyikwash akadivar nau anambaz netu ananapina kal ap ayilim mulong wa kuya ku yikumangan ap mu mudimu wa kulejan. Tukat kuyikwash ap anch chiswapelap kusal mwamu ni ap anch awiy kakutwishap kusal yom yivud.​—Mat. 13:23. w18.09 29 par. 7-8

Kashalapol mwawonsu wa Yehova ukwet usey kudi ndiy ni kudi Yesu. (Gal. 2:20) Tuyikatin nakash akadivar nau anambaz netu, chawiy tufanyidin kuyisadin nawamp. Tukat “kukimb yisu yawonsu mutapu wa kulet chisambu ni kukasikeshijan muntu ni mukwau.” (Rom 14:19) Tuchingedin nakash mwom mu Paradis, mulong mwinimwa kwikil muntu ukulonda kand anch uziyin! Kukwikalap kand mayej ap njit. Antu kakufap kand mulong wa chitil chaswanau, ni kukwikalap kand rupompat, milong ya dijuku, ap kumurumbukin muntu. Ni kwinsudien kwa mivu kanan, antu awonsu akwikal awanyidina. Antu akushala ashinshamena ku kupak kwa nsudien akwikal an a Yehova a pa divu ni ‘kukolik kwa uyaj wa an a Nzamb.’ (Rom 8:21) Chawiy el etu awonsu tumekesha rukat rikata kutukasikesh ni tukwashijan umwing ni mukwau mulong wa kwandam mwi ngand yisu yipandakena kuwap ya Nzamb. w18.09 10-11 par. 10; 13 par. 18

Kwilej Dizu dia Nzamb kwitin yom yivud kusutamu kwau kutang jinsangu mau mau ap kutek yijingidij pa yakul mu chichap kanang cha kwilej. Chisu twilejina, tukat kutong piur pa yom yitufundishina yom yiney piur pa Yehova, yom yisadinay ni mutapu wend wa kutong. Tukat kusal usu wa kutesh mulong wak Yehova utulejin kusal chom kanang ni kwipuk kusal chom kampand. Tukat kushinshikin kand yom tufanyidina kuswimp mu mwom wetu ni mu yitongijok yetu. Chakin kamu, chikutwish kutukasiken kutongijokin pa manans minam mawonsu chisu ni chisu twilejina. Pakwez chidi chiwamp kusutish chisu, pamwing ap chikunku cha chisu cha dilejan mulong wa kutongijokin pa yom tutangina. (1 Tim. 4:15) Chisu tutongijokidina chisu ni chisu pa Dizu dia Nzamb tukat ‘kwitiyij ayinetu’ ap kwikal nich kashinsh anch yitongijok ya Yehova yidi yiwanyidina. Tukat kusambish kwijik mutapu umenay yom, ni pakemp pakemp tukat kwitiyij mutapu wend wa kuman yom. Tukat kuswimp manangu metu ni kusambish kutong mu mutapu usu. (Rom 12:2) Pakemp pakemp, tukat kwikal ni yitongijok ya Yehova. w18.11 28 par. 5-6

Paul walonda anch ndiy nau in Kristu akwau a mu mivu chitot ya kusambish ading ‘ambay a mudimu pamwing ni Nzamb’ mulong alejana ni kuyifundish antu uyakin. (1 Kor. 3:6) Nlel, niyetu tukutwish kwikal ‘ambay a mudimu pamwing ni Nzamb’ mu kupan kwa kwikatin chisu chetu, usu wetu ni yom yetu ya ku mujimbu mulong wa kusal mudimu wa kulejan watwinkishay Nzamb. Yiney yidi ntumb yijim nakash! Kwikal in kupan chisu chetu ni usu wetu chisu tulejena ni tufundishina kukat kutuletin musangar ujim. Mwawiy mwalondau akadivar nau anambaz avud ading ni mutapu wa kutakel malejan ma Bibil. Tukwet musangar nakash pakuyiman antu twilejina nau akat kusangar pakatau kutesh yom yifundishinay Bibil, pakatau kukudish ritiy rakin ni kuswimp mashakamin mau ni kusambish kuyilej antu akwau yom yilejinau. Yesu niyend wova musangar nakash pamanay in kwilej 70 atumay “achirik nich musangar ujim” mulong wa yibudikin yiwamp yamanau.​—Luka 10:17-21. w18.08 17-18 par. 11-12

Tukutwish kusambish kuchingejin pa ronganyin retu. Tukutwish kusambish kwitiyij anch tuteshining mulong kampand ap anch tukwetap uman wawonsu. Chikutwish kand kukasikan kushinshikin nawamp mulong kampand anch umutadin mukadivar utwakad kwovijan nend nawamp. Anch twadandamen kutongin pa milong tukweta, tukutwish kumutongin mukadivar ap nambaz netu yom ya makasu. Kupwa, anch twatesh chom chiyimp piur pend, tukukat kuchitiyij, ap anch kwikil uman umekeshina anch chidi chakin. Dilejan ik twilejidinaku? Anch twikal ni yovil yiyimp piur pa akadivar nau anambaz netu, chinech chikutwish kutubachik kwikal ni yitongijok yiyimp yakad uman wakin. (1 Tim. 6:4, 5) Tufanyidinap kulam yovil yiyimp mudi ris ni mukau yishala mu muchim wetu. Kangal twavuramen anch Yehova usotin anch tuyikata akadivar nau anambaz netu ni tuyilikishin nich muchim umwing.​—Kol. 3:12-14. w18.08 7 par. 15; 8 par. 18

Mulong Yehova watanga antu, muntu mwawonsu udi wendendiy. (Kus. 100:3; Kuj. 4:11) Pakwez pakach pa antu awonsu ikalaku kal, Nzamb watonda antu amwing kwikal aend mu mutapu wa pakampwil. Chilakej, Kuseng 135 urumburil piur pa in kumwifukwil Yehova ashinshamena a mu Isarel wa pasak anch ading “uswan wend.” (Kus. 135:4) Chikwau kand, muprofet Ozey wasambela kulejan anch antu akad kwikal in Isarel akwikal antu a Yehova. (Ozey 2:23) Uprofet winou wawanyina chisu chasambishay Yehova kutond antu akad kwikal in Isarel mulong wa kuyikel pamwing ni Kristu mwiur. (Mid. 10:45; Rom 9:23-26) Antu inay azizidilau many nich spiritu utumbila ayitazukin anch “muchid utumbila.” Adi “antu a Nzamb a pakampwil.” (1 Pita 2:9, 10) Pakwez chidi nchik piur pa in Kristu awonsu ashinshamena nlel akweta ruchingej ra kushakam chikupu pa divu? Yehova uyitazukin niyau anch “antwam” ni anch ‘antu natonda.’​—Isay 65:22. w18.07 21-22 par. 1-2

Tukat kumwimburij Yesu watushila chilakej chiwanyidina cha mutapu ukutwishay muntu kwikal mwin kupan. (Mat. 20:28) Chawiy tukutwish kwiyipul anch: ‘Ov, nikutwish kulondul kamu nawamp chilakej cha Yesu?’ (1 Pita 2:21) Yehova ukat kusangar anch twalondul chilakej chiwanyidina chatushilay ndiy ni Yesu. Tukat kusal mwamu mu kuyibangin antu akwau ni kukimb mitapu ya kuyikwash. Yesu wamekesha mutapu chidia cha usey chisu chalejanay rusangu ra mutej mwin Samaria. (Luka 10:29-37) Wayifundisha in kwilejend anch afanyidin kuyikwash antu akwau, chikalap nchik mutapu udiau ap ndond yidiokilau. Uvurikin mulong wak Yesu walonda rusangu riner? Chading mulong ikundj umwing mwin Yuda wamwipula anch: “Ov, mukwetu win nany?” Chakul cha Yesu chitufundishin anch mudi mwin Samariy winou, tufanyidin kwikal in kupan anch tukatin kumusangaresh Yehova. w18.08 16 par. 5-6

Ov, Yehova wadandamena kumwijikish Mariy mulong wamulila ni kumulam Yesu nich kushinshaman? Mwaning. Nzamb wikala nich kashinsh anch yom yimwing yalonday Mariy ayifunda mu Bibil. Chimeken anch Mariy kadingap ni mutapu wa kwendangan ni Yesu mu mivu yisatu ni chikunku yasalay mudimu wa kulejan. Pamwing ap mulong wading mwadia mufu, wafanyina kushakam ku Nazaret. Chawiy wishalap yom yiwamp yivud yamanau antu akwau. Pakwez wadingaku chisu chafay Yesu. (Yoh. 19:26) Kupwa, Mariy wading kand mu Yerusalem pamwing nau in kwilej a Yesu kurutu atambula spiritu utumbila pa Pentekot. (Mid. 1:13, 14) Chimeken anch niyend amuzizila many pamwing nau in kwilej akwau. Anch chading mwamu, chirumburikin anch niyend watambula mutapu wa kwikal pamwing ni Yesu mwiur chikupu. Dined didi difut dipandakena kuwap mulong wa mudimu wend ushinshamena wasalay! w18.07 6 par. 11; 7 par. 14

Yesu wasadina mbil mulong wa kuyifundish in kwilejend anch yaku ni yisal yikwet yibudikin. Chilakej, wafundisha anch ujim ukutwish kushikij ku chisum ni anch yitongijok yiyimp yikutwish kushikij ku masandj. (Mat. 5:21, 22, 27, 28) Anch twitiy anch mbil ja Yehova jitutakela, kom ketu kakwikal kafumbilau nawamp ni tukukwat mipak yikumuletina Nzamb uyaj. Ap anch in Kristu afumb kom kau mu kusadin Bibil, akutwish kushiken kwikal ni yitongijok yishalijadina piur pa yom kanang. Chilakej, piur pa kuna maar ap bwat. Bibil kalondinap anch chidi chiyimp kuna maar, pakwez utubabeshin anch tufanyidinap kuna maar mavud ap kuleu. (Jnsw. 20:1; 1 Tim. 3:8) Ov, chinech chirumburikin anch mulong mwin Kristu kanilap maar mavud, komb kakutwishap kwend kutong piur pa chom chikwau chisu chikwatinay mupak winou? Bwat. Ap anch kom kamwitiyijin kuna maar, ufanyidin kand kutongin piur pa kom ka antu akwau. w18.06 17-18 par. 10-11

Yesu wayibabesha in kwilejend kwipuk “chivish” ap malejan ma Afaris, Asadus ni in chisak cha Herod. (Mat. 16:6, 12) Ni chidi cha usey anch Yesu wapana kubabesh kwinoku chisu chikemp kupwa kwa antu kupakish kumudish want. Anch marelijon miyandjik mu milong ya politik, chikat kushikij ku chisum. Yesu wayifundisha in kwilejend kulik kwiyandjik ap pakemp mu yom ya politik. Diawiy diyingishin dimwing diasala anch in kupesh ajim nau Afaris akimba kumujip Yesu. Ova wom anch antu akumutesh ndiy ni akulik kuyilondul awiy. Anch yom yiney yashiken, akutwish kushadish relijon wau ni maz yau ya chipolitik. Alonda anch: “Anch twamulikany mwamu, antu awonsu akez kumwitiyij ndiy, chad amakurump a in Rom akez kushesh chikumbu chetu cha Nzamb ni muchid wetu.” (Yoh. 11:48) Chawiy Mwin Kupesh Mujim Kaifas watenchika chakwel amujipa Yesu.​—Yoh. 11:49-53; 18:14. w18.06 7 par. 12-13

Mutapu ukwau wa ndish usadidinay Satan udi kusot kwijik yom ya ayilembil. Nlel, usadin usu chakwel antu akata yom ya ayilembil kusutin kusadin relijon wa makasu pamwing ni yom ya kwipuwangej. Mafilim, masengan ma video ni mitapu yikwau ya kwipuwangej yikutwish kusal anch yom ya ayilembil yikala yisangareshina. Mutapu ik tukutwisha kwipuk ndish winou? Tufanyidinap kuchingejin anch dirijek dia Nzamb ditwinkisha list wa kwipuwangej kuwamp ni kuyimp. Tufanyidin kufumb kom ketu chakwel tutwisha kukwat mipak yiwamp yimedina pa mbil ja Yehova. (Heb. 5:14) Pakwez, tukukwat mipak ya manangu anch twasadin chiyul chamupepilau kambuy Paul kufund chidia kwiur oku. Muntu mwin rubabek ukat kulond yom yindjing kupwa wasal yom yindjing. Chawiy anch twatond mitapu ya kwipuwangej, tufanyidin kwiyipul anch: ‘Ov, nilimishin mbil ja mutapu umwing mudi jinikata kuyilej antu akwau kulimish? In kwilej am a Bibil ap antu nichirikidina mu mudimu wa kulejan akutong yom ik anch aman kwipuwangej nitondina?’ Anch twalondul mbil ja mutapu umwing mudi tuyilejina antu akwau kulondul, chikutuswapel kulik kufa ku andish a Satan.​—1 Yoh. 3:18. w18.05 18-19 par. 13

Mutapu ik tukutwisha kumwimburij Paul? Chakusambish, tufanyidin kuyikimb antu awonsu adia ‘mu mwikadil ufanyidina kutambul mwom wa chikupu.’ Cha kaad, tumwitin Yehova chakwel ayikwasha antu adia in kashinsh kutesh chisu tuyilejina. (Mid. 13:48; 16:14) Mwawiy mwasalay Silvana, wasadina kal mivu 30 ni kusut mu mudimu wa uchibol. Ulondin anch: “Kurutu kwa kuya kukokal ku chikumbu mu teritwar wam, nikat kumulembil Yehova mulong wa kumwit anginkish chitongijok chiwamp.” Tukat kulembil kand anch angel atukwash kutan antu akatina kutesh. (Mat. 10:11-13; Kuj. 14:6) Robert, wasadina kal mivu 30 ni kusut mudi chibol, ulondin anch: “Chisangareshin nakash kusal mudimu pamwing nau angel ija mutapu udia mashakamin ma in chikumbu.” Cha kasatu, tukat kusal usu wa kuman yom yiwamp yidia mu antu ni rusot rau ra kumusadin Yehova. Carl, udia mukurump wa chikumangen ulondin anch: “Nikat kukimb kachisal kawonsu kakemp kamekeshina kashinsh kakwetay muntu, mudi kusip, kutal kuwamp ap chipul chiwamp.” Anch twasal yom yiney, tukutwish ‘kusong mabuj nich kujijaman,’ mudi mwasalay Paul. w18.05 6-8 par. 13, 15

Chikat kutusangaresh anch twatesh anch antu twakwasha pakur adandamedin kushal ashinshamena. Kambuy Yohan wafunda anch: “Kwikil chom chikwau chinsangarishina mudi pinateshina anch anam adandamedin [kwendil] mu uyakin.” (3 Yoh. 4) Ayibol avud akat kwov musangar nakash anch ajingunin anch muntu kampand wakwashau kwijik uyakin pakur udandamedin kumusadin Yehova nich kushinshaman, ap pamwing ap wikadin kal chibol. Chawiy anch ayibol aziy, tufanyidin kuyivurish yom yawonsu yasalau kal mulong wa kuyikwash antu akwau. Atulam a minyingumuku avud akat kulond anch awiy nau akajau akat kwikal akasikeshinau nakash anch atambul mukand wa kujikitish kupwa kwa kwendil chikumangen. Chinech chidi kand chakin mulong wa amakurump, amishoner, ayibol, antu asadidina ku Betel, antu awonsu inay amusadidin Yehova nich kushinshaman. Anch twayijikitish, tukutwish kuyikasikesh nakash kusutamu mutapu tutongidina. w18.04 24-25 par. 14-15

Salomon wabwambwila chijil chinech. Kupwa, wata amband 700 ni amband a kuns 300! (1 Ant 11:3) Amband end avud ading angendj ifukwilang anzamb a makasu. Chawiy Salomon wabwambwila kand chijil cha Nzamb chijidikina kwat amband angendj. (Kuv. 7:3, 4) Pakemp pakemp, Salomon washadisha rukat rend mulong wa yijil ya Yehova. Kupwa, wasala kamu yom yiyimp. Watunga chintamb cha nzamb mband wa makasu Ashitoret ni cha nzamb mukwau wa makasu Kemosh, kupwa wifukwila anzamb inay a makasu pamwing nau akajend. Salomon watunga yintamb yiney ku mukandu udia pantaliken ni Yerusalem, ndond yading yitunginau tempel wa Yehova! (1 Ant 11:5-8; 2 Ant 23:13) Pamwing ap Salomon widimba amwinend mu kutong anch Yehova kakumanap kwend yom yawonsu yiyimp yading yisadinay mulong wading kupanang milambu mu tempel. Pakwez Yehova ukat kumanang yitil yawonsu. w18.07 16 par. 7; 17 par. 8-9

“Jinseu ja kasu” ik jikutwishay Satan kukwas? Pamwing ap ukurishikishin ni makasu piur pa Yehova. Satan ukatin utonga anch Yehova kakukatinap ni anch kwikil muntu ukubangidina. Ida, ukweta mivu 19 ulondin anch: “Niyovang yisu yivud anch Yehova kadiap piswimp ni yamam ni kakatinap anch ikala Murund nam.” Yom ik yikatay kusal anch wiyov mwamu? “Yikumangan yikat kukasikesh ritiy ram nakash. Nayangang kwinakwa ni kushakam pakad kwakul, mulong natongang anch kwikil muntu ukatina kutesh yom nikulonda. Pakwez katat, nikat kwirijek mulong wa yikumangan ni kusal usu wa kwakul tupamp twaad ap tusatu. Rikibu ra ku chikas ra isalay riding kwau ni kujimb kumwing chisu chawonsu. Pakwez mudi mutwileja kal kusutin yom yamushikena Ida, ritiy ridiap mwamu. Ritiy retu rikutwish kujimb ap kukep, kwikal rikash ap kuziy. Chidi kudi etu ayinetu. (Mat. 14:31; 2 Tes. 1:3) Chakwel ‘rikibu ra ku chisak ra ritiy’ ritukinga, tufanyidin kudandamen kurijimbish ni kurikasikesh! w18.05 24-25 par. 12-14

Kalam wa rukan winou waswimpa chitongijok chend ni kwit ukwash ching kupwa kwa kuzal kwa divu. (Mid. 16:25-34) Chilik chimwing, antu alikina kutesh uruu wa Bibil akutwish kuswimp yitongijok yau ni kukimb ukwash anch chinship kanang chashiken mu mwom wau. Pamwing ap antu amwing akutwish kwikal ni yakamish nakash mulong ashadishin mudimu wau. Akwau akutwish kwov ushon nakash mulong ajingunin anch akwet mayej makash ap mulong mukatish nau wafil. Antu akutwish kusambish kwipul yipul piur pa mwom, yipul yalikau kwiyipul kurutu kwa yom yiney kushiken. Akutwish pamwing ap kwiyipul anch: ‘Yom ik nifanyidina kusal chakwel nipanda?’ Akutwish kukat kutesh uruu wetu wa ruchingej kapamp ka kusambish mu mwom yau. Chawiy anch twadandamen kulejan nich kushinshaman, tukutwish kwikal tayad chisu chikwitiyau rongoj tuyitwadidina.​—Isay 61:1. w18.05 12 par. 10-12

Nlel, Satan wayibwikin kal antu avud pa mes ni kajinguninap kwau anch adi asuk a relijon wa makasu, a yom ya ku mujimbu ni a yom ya politik. (2 Kor. 4:4) Mudi Yesu, tukwet chisend cha kuyikwash antu akwau chakwel amwijika ni amwifukwila Yehova, Nzamb wa want ipau. (Mat. 28:19, 20) Kulejan rusangu ruwamp kudi antu akwau chidiap chiswapela. Ku jindond jimwing, antu kasangaredinap kumwijik Nzamb ni amwing akat kujiman nakash anch twayilej rusangu ruwamp. Pakwez mulong Yehova utulejin anch tufanyidin kulejan, tufanyidin kwiyipul anch: ‘Ov, nikutwish kusadin want ipau wam mulong wa kusal yom yivud mu mudimu wa Yehova?’ Chidi chikasikeshina kwijik anch antu avud a Yehova ajingunin kal anch disudien dia mangand minam diasej kal piswimp nakash ni akwatin kal mupak wa kuswapej mwom yau ni kusambish mudimu wa uchibol. (1 Kor. 9:19, 23) Amwing asadin mudi ayibol kwol kwau, ni akwau akat kushemunikin mu chikumangan mudia maswir. Chisangareshin mudi ik kuman anch antu avud asadidin want ipau mulong wa kumusadin Yehova mu mutapu winou!​—Kus. 110:3. w18.04 13 par. 13-14