Uyimp—Ov, Kudi Ukutwisha Kuuyikel?

Mwan mukemp usotina kwijik yom unonin chom kanang mwisuku—chom chitazukinau anch mine—ni chamubuz mes ni kumukatwol yid ya mujimbu mu mwom wend wawonsu. Maku umushil mwanend kabas uchidia kuvadik, wamujindjik mu yishoshot ya ku balibal. Muntu wa mudimu wadioshau pa mudimu uchirikidin ku mudimu kwasalangay pasak, ukat kuloz muntu mwawonsu usankenay, ni kupwa wijip amwinend. Mwan-a-ngand ulimishinau kamu nakash ukat kusot anikanch akad wa kuyiking ni kuyiyipish mu kusal nau masandj.

CHA USHON, jinsangu mudi jinej ja yisal yiyimp javulijadin kal kamu nakash pa chirung chetu. Chipandakenamu kand kuyip, chisu chivud, jinsangu jinej, jikatap kwovikan kamu nakash mulong wa jinsangu ja kupompatijan ni kujipijan kwa tubil, ni yisal ya chisum yiletina mwong. Mazu ma kusambish nich ma jurnal umwing wapalangeshau mu 1995, malonda anch: “Mivu chitot ya makum maad, yading kamu yiyimp nakash, yading ya chirung cha Satan. Kwikil chirung ap chimwing cha pasak chezau kumekesh antu ukaliweny upandakena kujimb, ni impu ya kusot kamu ching kujip mamiliyon ma antu akwau mulong kusu wa ulombu wa chikit, difukwil ap ndond yikwetau.”

Pa chisu chawiy chimwing, antu akat kuyipish chipepil, divu, ni kushesh mapit madia pa divu ni kunongish milad ni milad ya annam. Mulej umwing wafunda kal nakash piur pa kuyip walonda anch: “Ov, antu akutwish kupwish kuyip kwawonsu kwinoku ni kuwapish mangand, chakwel mikala ndond yimwing ya diking? Nisotining kamu nakash kukarumun mangand, kurijek mangand. Pakwez chimeken anch mangand makutwishap kukarumuk.” Pamwing ap mwamu utongina niyey.

Mutapu utakedinau mangand tukutwish kuwisikesh nich wat udia mu karung wa mem ukweta mambek makash pichuku-pichuku. Ap anch kwikil muntu usotila kuutadishin mutambu kanang, usu wawonsu wa kusot kukarumun ukat kukangany. Wat ukat kuyang kusu ku mutambu uyila rinkind muyimp, wakad mutapu wa kuwimik.

Mu chilik kanang, mwikadil winou uyila mu kuyip tukutwish kulond anch udiokil ku kuburen kuwanyin kwa muntu. (Rom 3:23) Pakwez, kuvulijan kwa kuyip, ni chisum kumeken kwikal kupandakenamu kamu nakash kuyip kukutwisha kudiokal kusu kudi antu. Ov, chitwishikin anch kwikala usu kanang ujingamina ukweta dikand ni uyimp uyibachikina antu kusal yom yiyimp? Anch udiaku, usu ik, ni mutapu ik tukutwisha kwiking? Mutu wa mulong ulondwila ou ukwisambin yipul yiney.

Dizu Dirumburila Chipich Chidia pa paj wa 3]

© Heldur Netocny/Panos Pictures