Itiyij Kom key

“Yom yawonsu [yitokil] ku mes ma antu akweta michim yitok; pakwez kudi ayimp akad ritiy, kwikil chom chitokila ku mes kwau.”—TITUS 1:15.

1. Mutapu ik wakwatikanay Paul mulong wa yikumangen yadinga mu Kret?

KUPWA kwa kambuy Paul kusal maweny masatu ma umishoner, amukwata ni amutwala ku Rom, kwawiy kwamulaminau mivu yaad. Chom ik chasalay pamulikishau? Pa chisu chimwing, waya pa ditung dia Kret pamwing ni Titus, wafundilay Paul anch: “Wawiy mulong unakushila ey ku Kret, chakwel ukutenchik yom yashala yakad kufanyin, ni kutond amakurump ku mal mawonsu mudi munakwinka usu.” (Titus 1:5) Titus wasala mudimu winou wadinga ukwatina ku kom ka antu kadinga kasadila nayimp ap nawamp.

2. Titus wafanyina kurish nich mulong ik pa ditung dia Kret?

² Paul wamuyula Titus piur pa amakurump ayifuvu a chikumangen ni kupwa walejana anch kwadinga “antu in kubwambul ni kulondol, in makasu, . . . apandiken mwamu.” Antu inay adinga “aumbodila kal majuku ma kabuj, end alejan yom yakad kufanyin.” Titus wadinga ufanyidin “[a]yikanda nakash.” (Titus 1:10-14; 1 Timote 4:7) Paul walonda anch manangu mau ni kom kau yadinga “yasheshikin kal,” wasadila dizu dirumburikina kwikal nich matayeng ap anch manans, mudi mudikutwisha diswin dia ufun kukwachik matayeng ma ulombu. (Titus 1:15) Amakundj inay amwing adinga in Yuda, mulong adinga ‘alamatin ku kuya ku mukand.’ Ilel yikumangen kiyimenap mar ma amakundj inay alamatina ku usey wa kuya ku mukand; pakwez tukutwish kwilej yom yivud piur pa kom kusutil ku chiyul chamwinkishau Titus kudiay Paul.

Antu Akweta Kom Kasheshikina Kal

3. Paul wamufundila Titus chom ik piur pa kom?

³ Tushinshikinany mikadil yisambidinay Paul piur pa kom. “Yom yawonsu [yitokil] ku mes ma antu akweta michim yitok; pakwez kudi ayimp akad ritiy, kwikil chom chitokila ku mes kwau; manangu mau ni kom kau yasheshikin kal. Akat kulond ni milamu anch tumwij Nzamb, pakwez akat kumulik mu yisalijok yau.” Choviken patok anch, antu amwing adingaku pa chisu chinicha ading afanyidin kukarumuk “chakwel ajijaman mu ritiy.” (Titus 1:13, 15, 16) Chadinga chiyikasikedin kwauril pakach pa chitokina ni chijondila, ni mulong winou wakwata ku kom kau.

4, 5. Chisal ik chiyimp chadingau nich antu amwing mu yikumangen, ni mutapu ik chayikwata?

⁴ Kurutu kwa mivu dikum, chisak chitakedila cha Ukristu chakwata mupak anch kuya ku mukand kwadingap kand kwa usey chakwel kwikal mwin kwifukwil wakin, ni ijikisha yikumangen yawonsu mupak winou. (Midimu 15:1, 2, 19-29) Pakwez, antu amwing a mu Kret adinga ‘achidandamedin kulamat ku kuya ku mukand.’ Amekesha patok anch kitiyijinap yalonda chisak chitakedila, chawiy “alejana yom yakad kufanyin kulejan.” (Titus 1:10, 11) Nich yitongijok yiyimp, adinga ni kukasikeshin Chijil piur pa yakudia ni chaku cha kwitokish. Ni pamwing ap adinga ni kulejan mu mutapu uwamp nakash yom yalonda Chijil, mudi mwasalau ashankur au mu machuku ma Yesu, pamwing ni kukasikeshin yishimu ya in Yuda ni yijil ya antu.—Marko 7:2, 3, 5, 15; 1 Timote 4:3.

⁵ Kutong kwinoku kwadinga nich yibudikin yiyimp pa mupak wau ni yovil ya mashakamin mau, ni kom kau. Paul wafunda anch: “Kudi ayimp akad ritiy, kwikil chom chitokila ku mes kwau.” Kom kau kadinga kayimp mu chilik chakwel anch chadinga chikasiken kuchingejin umutakel wak mu yisal yau ni mipak yau. Chikwau, adinga ni kuyirumburish ambay in Kristu pa yom yadinga yimutadina muntu amwinend, mu milong yimwing mukutwishay mwin Kristu umwing kukwat mupak mu mutapu umwing ni mukutwishay mukwau kukwat mupak mwi njil yindjing. Pa mulong winou in Kret inay adinga amen mudi yom yakad kutok yom yakad chakin kamu kwikal yijondila. (Rom 14:17; Kolosay 2:16) Padingau ni kulond anch amwij Nzamb, yisal yau yamekeshanga yom yindjing.—Titus 1:16.

“Yawonsu Yitokila ku Mes ma Antu Akweta Michim Yitok”

6. Paul wisambina milad ik yaad ya antu?

⁶ Tukutaninamu ik mu yom yamufundilau Titus kudiay Paul? Inge, tushinshikinany kushalijan kudia mu mazu minam: “Yom yawonsu yitokil ku mes ma antu akweta michim yitok; pakwez kudi ayimp akad ritiy, kwikil chom chitokila ku mes kwau; manangu mau ni kom kau yasheshikin kal.” (Titus 1:15) Chakin kamu Paul kadingap wisambidina anch mulong wa mwin Kristu wishitwila, yom yin kamu yawonsu yitokin ni chitwishikin kuyisal. Tukutwish kwikal nich kashinsh ka chom chinech mulong Paul walonda patok mu mukand ukwau anch muntu win mwawonsu usadila masandj, wifukwidila akish, wisambina ni aspiritu ayimp, ni kusal yom yikwau yijondila “kakez kaswanip want wa Nzamb.” (Galatia 5:19-21) Chawiy tufanyidin kulond anch Paul wadinga ulondil uyakin wa yirung yawonsu piur pa milad yaad ya antu, antu ishitwila mu manangu ni mu spiritu ni antu ijondila mu manangu ni mu spiritu.

7. Hebreu 13:4 ufishin nich ik, pakwez yipul ik yikutwisha kulank?

⁷ Yom yifanyidinay mwin Kristu wakin kwipuk yidiap ching kusu yom yijidikinay Bibil patok. Mudi chilakej, tushinshikinany bil mazu manam malondila patok anch: “Chifanyidin uruu aulimish kudi antu awonsu. Chifanyidin ikundj kwikal ching kusu ni mukajend, niyend mband ufanyidin kwikal ching kusu ni nfumwend, mulong Nzamb ukez kuyirumburish in kwimik dis ni in usund awonsu.” (Hebreu 13:4, MM) Ap antu akad kwikal in Kristu ni antu akad kwijik chom kanang pa Bibil akutwish kulond nich kutentam anch verse winou ujidikin kusal masandj. Choviken patok kusutil ku verse winou ni ku maverse makwau ma Bibil anch Nzamb ufishin nich kulalijan kwa antu akad kwatijan ni muntu windjing wakad kwikal nfumwey ap mukajey. Ov, chidi nchik lel anch antu akad kwatijan asal chisal cha kwel ikundj wandjik mujimbu wend mu kan ka mband? Ansand avud akat kulond anch chisal chinech chiyipinap mulong chidiap masandj. Ov, mwin Kristu ukutwish waman chisal chinech mudi chiwamp?

8. Pa mulong wa kwandjikijan ukundj ap wimband mu kan, mutapu ik ushalijadinau in Kristu ni antu avud a mangand?

⁸ Hebreu 13:4 ni 1 Korint 6:9 alondil anch Nzamb ukisin kusotan ni masandj (Grek, por·neiʹa). Dizu dined dirumburikin ik? Mu dizu dined dia Grek mudi kusadil yid ya ukundj ap wimband mwi njil yakad kwikal mudi mwayitanginau ap kuyisadil kuyimp mwi njil ya masandj. Disambidin mitapu yawonsu yijondila ya kulalijan kudia pol pa uruw. Chawiy komb mudi ni kutek chid cha ukundj ap wimband mu kan, ap anch ansand avud adia mu mangand ayileja ap alondil anch chiyipinap kusal mwamu. In Kristu akin kakatap kutakel yitongijok ni yisal yau nich yitongijok ya “in kubwambul ni tulondol, in makasu.” (Titus 1:10) Awiy alamatin ba ku chijil cha piur chidia mu Mifund Yitumbila. Pa ndond pa kupakish kusot kuyingish mulong wa kulalijan kwa kwandjik ukundj ap wimband mu kan ka mukwau, awiy ovil kurumburik kwambatan nich Bibil anch madi masandj, por·neiʹa, ni afumbin kom kau chakwel kulik yisal yiney.a—Midimu 21:25; 1 Korint 6:18; Efes 5:3.

Kusombangan kwa Kom, Kusombangan kwa Mipak

9. Anch “yom yawonsu [yitokil],” kom kakwet mudimu ik?

⁹ Chom ik chasotay kulond Paul palonday anch “yom yawonsu [yitokil] ku mes ma antu akweta michim yitok”? Paul wadinga wisambidin in Kristu ambatanisha yitongijok yau ni manangu mau nich yijil ya Nzamb, yidia mu Dizu diend diapepilau. In Kristu inay adinga ij anch pa milong yivud yakadiay Bibil kuyifish nich kapamp kamwing, kudi kushalijan kwa yitongijok mukach mwa in kwitiyij. Padond pa kwika in kurumburish, adinga ij mudi “chitokila” yom yakaday Nzamb kuyifish nich. Kadingap kuchingejin anch antu in awonsu akutong mudi mutonginau awiy piur pa mikadil ya mwom yakaday Bibil kulond patok. Tushinshikinany katat mutapu chom chinech chikutwisha kushiken.

10. Ov, mutapu ik ukutwisha uruw (ap madil) kwikal musul wa mulong?

¹⁰ Kudi majuku mavud mudia mbay umwing wa uruw udia mwin Kristu pakwez mukwau bwat. (1 Pita 3:1; 4:3) Chom chinech chikutwish kwikal musul wa yikokujol yivud, mudi chilakej anch kwikal mwanamaku watena ap kwachikina ap kand anch kwikal rufu mu dijuku. Tonginany bil chilakej cha mband mwin Kristu, anch nfumwend kitiyijinap yitiyij yend. Umwing wa anamakwend wachikin, ni musambu akuusadil mu egliz wa Kristedom. (Ap mwanamaku, pamwing ap nvaj, wafa, ni chidil akuchisadil mu egliz.) Ambay inay a uruw ayiladikijin, ni usotil anch aya ni mukajend. Kom kend kamulejin ik piur pa kuya kwin ndond jinej? Chom ik chikusalay? Tongin bil yom yiney yaad yitwishikina kushiken.

11. Rumburil mutapu ukutwishay mband mwin Kristu kutong anch ukuya ku uruw usadikidina mu egliz, ni ku kumubachik kukwat mupak ik?

¹¹ Lois watongijokina nakash pa chijil cha Bibil chilondila anch, ‘Diokalany mu Babilon mujim,’ want wa mangand wa relijon wa makasu. (Kuburik 18:2, 4) Pasak wadinga mu egliz mu kusadikina musambu wa uruw ni wij anch pa chisu cha musambu awonsu adiaku akuyit kusal yisal ya kwifukwil, mudi kulembil, kuwang miminy, ap yijingidij kanang ya kwifukwil. Wakwat mupak wa kulik kusal yom yiney ni kasotinap kwikalaku ni kupwichik chakwel ajiril kushinshaman kwend. Lois umulimishin nfumwend ni usotil kwovijan nend, mutu wend kwambatan nich Bibil; pakwez, kasotilap kujiril yijil yend ya Bibil. (Midimu 5:29) Chawiy lel, umulejin mbay nend wa uruw nich kalimish anch ap anch watond kwikalaku, pakwez ndiy amwinend kasotilap kwikalaku. Ukutwish kulond anch wayaku ni walik kusal chisal chimwing, chikumunenganesh, pa chinech chiwapidil anch alika kwikalaku. Mupak wend wamusha nich kom katok.

12. Mutapu ik ukutwishay kutong muntu ni kusal pantaliken nich diladikij dia musambu wa uruw ukusadikina mu egliz?

¹² Rut uril nich mulong mudi winou. Umulimishin nfumwend, ukwatin mupak wa kushal ushinshamena kudi Nzamb, ni witiyijin dizu dia kom kend kafumbau kal nich Bibil. Kupwa kwa kutongijokin pa manans mudi matongijokinangay Lois, Rut walembil nakash ni washinshikin “Yakul ku Yipul Yen” mu Chinong cha Kalam cha Ndol-Mem 15, 2002 (Français). Wavurik anch in Hebreu asatu itiyija mbil ya kwikal kwi ndond kwasadikina difukwil dia akish, pakwez alama kushinshaman kwau ni alika kusal chisal cha kwifukwil akish. (Daniel 3:15-18) Wakwat mupak wa kumutwal nfumwend pakwez walik kusal yisal ya kwifukwil, ni wasal kwambatan nich kom kend. Wamurumburil nich kalimish pakwez patok nfumwend yom yitwishina kom kend kamulej kusal ni yik yikulikay kusal. Rut uchingejin anch ukez kuman kushalijan kudia pakach pa difukwil diakin ni dia makasu.—Midimu 24:16.

13. Ov, mulong wak chishimokishinap anch in Kristu inay aad akwata mipak kushalijan?

¹³ Ov, mulong in Kristu inay aad ashikedin ku mipak kushalijan chimekeshin anch kwikil kwau mulong pa yisadilay muntu ap anch umwing wa antu inay aad ufanyidin kwikal nich kom kaziyina? Bwat. Mulong wa yamanay pakur pantaliken nich mizik ni yifwatul ya misambu ya egliz, Lois ukutwish kwov anch kwikalaku kukutwish kwikal kwa ubaj kudi ndiy. Ni yamanay pasak mu yisal yend ni ya nfumwend pa milong ya kwifukwil yikutwish kwikal nich usu pa kom kend. Chawiy witiyijin anch mupak wend udi uwamp kudi ndiy.

14. Chom ik chifanyidinau in Kristu kulam mu manangu piur pa milong yitadila mupak wa muntu amwinend?

¹⁴ Ov, mupak wa Rut udi uyimp? Chidiap kudi antu indjing kukatul mulong winou. Kafanyidinap kumufish nich ap kumunyinyit anch mulong wayang pakwez kasalangap chisal cha kwifukwil. Kwikal nich chiyul cha Paul mu manangu piur pa mipak yikutwishay kwikwatin muntu amwinend piur pa kudia ap kulik kudia yakudia kanang: “Muntu ukat kudia yom yiney, kangal wamupipej wakad kuyidiang; ni yend wakad kuyidiang, kangal wamurumburish ukata kuyidia . . . Ndiy wiminy ap uwil kudi Nsalejend amwinend. Ni ndiy ukez kwiman, mulong Mwant ukwet usu wa kumutumbwish.” (Rom 14:3, 4) Chakin kamu, kwikil mwin Kristu wakin ukusota kumushindil muntu ap umwing ajirila umutakel wa kom kafumbau kal, chakwel asala chom chikeza kumekan mudi kujiril dizu diletina nawamp uruu wa mwom.

15. Ov, mulong wak tufanyidin kuta nakash muchin ku kom ni yovil ya antu akwau?

¹⁵ Kudandamen nich chilakej chinech, in Kristu awonsu aad afanyidin kushinshikin yom yikwau, chom chimwing chikutwish kwikal nich usu pa yikwau. Paul watuyula anch: “Twitiyijany chakwel pikil muntu ukutek chom cha kuwishan nich mwi njil ya mwanamakwend.” (Rom 14:13) Lois wadinga wij anch mikadil yiney yayinenganesha antu avud mu chikumangen ap mu dijuku diau, ni yisadilay yikutwish kwikal nich usu padi anend. Pakwez, Rut wadinga wij anch kutond kwinoku kwaletap kanvundangesh mu chikumangen chau ap mu chisak chau. Anambaz awonsu aad—ni etu awonsu—tufanyidin kwijik anch kom kafumbinau nawamp kakat kutesh yovil ya antu akwau. Yesu walonda anch: “Wawonsu ukeza kamutakel umwing wau akemp inang angitiyila am ku kwipwakal, chinech chilikedilimu kamu kumukudik diyal dijim mwi nshing mwend ni kumujiyish mu difut dia karung.” (Mateu 18:6) Anch muntu wadiburil kwijik anch yisal yend yikutwish kuyipwakesh antu akwau, ukutwish kushiken ku kwikal nich kom kasheshikina kal, mudi mwadingau in Kristu amwing mu Kret.

16. Tukutwish kumuchingejin mwin Kristu asala yikarumun ik mu kusut kwa chisu?

¹⁶ Kukul kwa mu spiritu kwa mwin Kristu kufanyidin kuya kurutu pichuku-pichuku, mudi mufanyidina kwikal kuya kwend kurutu mu kutesh kwend ni kusal kwambatan nich kom kend. Tumushinshikinany Marko, wababatishinau katat kamu ak. Kom kend kamulejin kuchin yisal yakad kwambatan nich yilondila Bibil yadingay ni kusal pasak, pamwing ap kwifukwil akish ni kukwachik ku mash. (Midimu 21:25) Chakin, katat wipukin nakash ap yom yifanikenaku pakemp ni yijidikinay Nzamb. Ku mutambu ukwau, ushimokin nakash pa kuyiman antu amwing adjibwidil kulemp yom yimenay anch yiwapin, mudi maprogram kanang ma televizion.

17. Let chilakej chimekeshina anch mu kusut kwa chisu ni kukul mu spiritu yikutwish kwikal nich usu pa kom ni mipak ya mwin Kristu.

¹⁷ Mu kusut kwa chisu, Marko wakula mu ronganyin ni wamushejina Nzamb piswimp nakash. (Kolosay 1:9, 10) Kwikala chibudikin ik? Kom kend katambula diyiy dijim nakash. Katat Marko uteshin nakash kom kend ni kushinshikin nawamp yijil ya Bibil. Chakin, katat wij anch yimwing ya yom “yifanikenaku” nich yom yachinay chakin kamu yidiap chinyim nich yitongijok ya Nzamb. Chikwau, kwitiyij nakash yijil ya Bibil ni kwikal tayad kwitiyij kom kend kafumbinau kal, katat Marko usadil yom kukwatijan nich kom kend chakwel kwipuk maprogram madingay ni kutongin pasak anch mawapin. Inge, kom kend akatenchik kal nawamp.—Kuseng 37:31.

18. Musul ik wa musangar utukweta?

¹⁸ Mu yikumangen yivud, mudi antu adia mu reng ni reng ra kukul kwa Ukristu. Antu amwing adi asu mu ritiy. Pamwingap kom kau kalondilap chom kanang pa milong kanang, pakwez kom kalondil mukach mwau nich dizu dijim pa milong yikwau. Antu inay akutwish aswiridin chisu ni ukwash chakwel ikal ateshina umutakel wa Yehova ni kwitiyij ku kom kau kafumbau kal. (Efes 4:14, 15) Cha musangar, mu yikumangen yawiy yimwing, mukutwish kwikal antu avud akweta ronganyin rijim, uman ujim mu kusadil yijil ya Bibil, ni akweta kom kasadila yom kwambatan nich yitongijok ya Nzamb. Udi musangar mudi ik kwikal pamwing ni antu inay “akweta michim yitok” amena mudi “chitokila” mu mwikandil ni mu spiritu yom yitiyijinay Nsalejetu! (Efes 5:10) El etu awonsu twitekinany rutong ra kukul pa mulong winou ni kulam kom kinak mu kwambatan nich ronganyin rakin ra uyakin ni kwipan kudi Nzamb.—Titus 1:1.

[Mazu madia kwishin kwa paj]

Ov, Mutapu ik Ukwakula?

• Ov, mulong wak in Kristu amwing adinga mu Kret adinga ni kom kasheshika kal?

• Ov, chitwishikin nchik anch in Kristu aad akweta kom kafumbinau nawamp akwata mipak kushalijan?

• Pa kusut kwa chisu, chom ik chikutwisha kushiken kom ketu?

[Kart udia pa paj wa 26]

(Chakwel kutan mazu mawonsu, tal mu mukand)

Sisil

GRES

Kret

AZIY MUKEMP

Kiprus

KARUNG WA MEDITERANE

[Chipich chidia pa paj wa 20]

In Kristu aad arila nich mwikadil umwing akutwish kukwat mipak kushalijan