Jimbany Mu Rukat Ra Ukadivar

“Endilany mu rukat mudi Kristu chakukatanyay en.”—EFES 5:2.

1. Chijiken ik chijim nakash cha in kwilejend chisambinay Yesu patok?

KULEJAN rusangu ruwamp ra Want wa Nzamb ku chikumbu ni chikumbu kudi chijiken chijim cha Atuman a Yehova. Pakwez, Kristu Yesu ndiy wisambina pa chom chindjing cha Ukristu chikutwisha kuyijikish in kwilejend akinakin. Ndiy walonda anch: “Napan kal chijidik chisu kudi en, chakwel en ukatijanany; mudi chinakukatanya en ni yen ukatijanany kand muntu ni mukwau. Ku chinech kwawiy kukwijikinau antu awonsu anch en udiany in kwilej amam anch wakatijanany.”—Yoh. 13:34, 35.

2, 3. Rukat retu ra ukadivar rikwet usu ik padi antu akata kwez kukumangan ku yikumangan yetu ya Ukristu?

² Rukat rakin ra ukadivar wa in Kristu kirikwetap chom cha kwilikan nich mu rusangu rawonsu ra muntu. Mudi mukatay ema kupwit utad, chawiy chikata rukat kuyikakin pamwing ni mu uumwing atushalapol a Yehova ni kuyikakin antu akweta michim yiwamp ku difukwil diakin. Chilakej, talany Marcelino, ikundj udinga mu Cameroun, wafa mes ku mudimu wend. Kupwa kwa aksident wend, kwadinga kayauyau kapalangana anch wikal kal mputames mulong uding mulaj. Pa ndond pa kumwongoj, paster wend ni yid yikwau ya mu egliz wau yakwata mupak wa kumwopat mu chikumangen chau. Pamutazukau kudiay Kaman umwing wa Yehova anch eza ku chikumangan, Marcelino widjidjeka. Kasotap kand amudimbujola kakwau.

³ Marcelino washimoka nakash mulong wa chom chamushikena ku Chot cha Want. Amwaka nich chirungul, ni amwongoja ni malejan ma Bibil mateshay. Wasambisha kuya ku yikumangan yawonsu ya chikumangen, waya kurutu mu kwilej kwend Bibil, ni wababatishiwa mu muvu wa 2006. Katat ukat kudilej dijuku diend uyakin ni kuyilej ansulangan nend ni wasambishin malejan ma Bibil mavud. Marcelino usotining anch antu ilejenay nau Bibil niyau ova rukat ra chilik chimwing mudi rikatau kumukeshin ndiy kudiau antu a Nzamb.

4. Mulong wak tufanyidin kutesh chiyul cha Paul cha ‘kwendil mu rukat’?

⁴ Chisangareshin mudi ik, ni rukat retu ra ukadivar kiridiap chom chamwamu. Tongany bil anch wakishany kasu uchuku, antu akwez chakwel ota kasu, nikawiy kazupok lel mizwizu. Anch antu asangaredina kwot kasu alik kuwejinap nkuny, kakujim. Chawiy chimwing, moj wamushena wa rukat udia mu chikumangen ukutwish waziy anch etu antu in Kristu umwing ni umwing tudiamu tusadilap usu wa kuukasikesh. Mutapu ik tukutwisha kusal mwamu? Kambuy Paul utwakwil anch: “Endilany mu rukat mudi Kristu chakukatanyay en, wipana amwinend mulong wetwetu kwikal mulambu ni yakupesh kudi Nzamb ya rupwembu ruwamp.” (Efes 5:2) Chipul chitufanyidina kwiyipul chidi chinech, Mu mitapu ik nikutwisha kwendil mu rukat?

“Michim Yen Yijimba Kand.”

5, 6. Mulong wak Paul wayikasikesha in Kristu adinga ku Korint chakwel ‘ajimba mu michim’?

⁵ Kambuy Paul wayifundina in Kristu adinga mu Korint wa pasak anch: “En in Korint, twalonda kudi en patok, michim yetu ayijimbish kudi en. Kwikil kukep ku rukat retu, kukep kudi ku rukat ren. Katat chitusotila chawiy ech, (nikat kukulejany mudi anam), michim yen yijimba kand.” (2 Kor. 6:11-13) Mulong wak Paul wayikasikesha in Korint chakwel ajimba mu rukat rau?

⁶ Tushinshikinany mutapu wasambisha chikumangen cha pasak cha in Korint. Paul waya ku Korint piswimp musanj a ruval mu muvu wa 50 C.C. Ap anch wasambisha mudimu wend wa kulejan kwinikwa nich yikokujol, kambuy kalikap. Kupwa kwa kachisu kakemp, antu avud adinga mu musumb winou itiyija rusangu ruwamp. Paul wipana mu chirung cha “muvu ni angond musamban” mulong wa kuchilej ni kuchikasikesh chikumangen chisu. Choviken patok, ndiy wadinga uyikatin nakash in Kristu a ku Korint. (Mid. 18:5, 6, 9-11) Adinga niyau ayingin kamu kumukat ni kumulimish. Pakwez, antu amwing adinga mu chikumangen adinga ni kumuwembujok. Pamwingap antu inay akemp kadingap ni kukat mutapu wend wa kuyulan patok. (1 Kor. 5:1-5; 6:1-10) Pamwingap antu akwau atesha makasu madingau ni kulond “apostol . . . apandikena kujimb.” (2 Kor. 11:5, 6) Paul wadinga usotin rukat rakin ra akadivar ni anambaz nend. Chawiy chayilembilay chakwel ‘ajimba mu michim’ kusutil ku kumushejin ni kuyishejin piswimp ambay akwau in kwitiyij.

7. Mutapu ik tukutwisha ‘kujimb mu michim’ pa mulong wa kumekesh rukat ra ukadivar?

⁷ Chidi nchik kudi etu? Mutapu ik tukutwisha ‘kujimb mu michim’ mu kumekesh rukat ra ukadivar? Antu akweta mivu yimwing ap antu muchid umwing akutwish akatijan swa umwing ni mukwau. Ni antu akweta yom yimwing ya kwipuwej nich akat kusutish chisu chilemp pamwing. Pakwez anch mutapu tukata kuyisanger in Kristu amwing kusadil anch twikala palemp ni akwau, chawiy tuswiridin ‘kujimb mu michim.’ Chikwikal cha manangu anch twiyipul ayinetu anch: ‘Nikat kuyang pa chipatu mu mudimu wa kulejan ap kwipuwej pa chipatu ni akadivar ni anambaz akad kwikal arund nam a piswimp? Ku Chot cha Want, niding palemp ni antu asu ezina mulong niyakamishin anch akutwish akwat nam urund? Ov, nikat kuyilangwish awonsu adia mu chikumangen ikala anikanch ap amakurump?’

8, 9. Chiyul cha Paul chidia mu Rome 15:7 chikutwish chatukwash mutapu ik kulangwishijan umwing ni mukwau mu mutapu wa kulangwish rukat ra ukadivar?

⁸ Pa mulong wa kulangwishijan muntu ni mukwau, mazu ma Paul mayifundinay in Rome makutwish matukwash twikala nich yitongijok yiwamp piur pa ambay netu in kwitiyij. (Tang Rome 15:7.) Dizu dia Grek diakarumunau anch “akijanany” dirumburikin “kwitiyij nich kalimish ap kwakan, kwinung ni muntu ni kwikal murund nend.” Pa chisu chafundau Bibil, anch muntu ukweta muchim wa kwakan wayak arund nend kwolikwend, wadinga ni kuyilej anch usanger nakash pa kuyiman. Kristu watwaka mu mutapu winou mu chifanikesh, ni chawiy chitukasikeshinau chakwel tumwimburija mu kuyak ambay netu in kwitiyij.

⁹ Pitukata kuyilangwish akadivar ku Chot cha Want ni ku jindond jikwau, tufanyidin kubangin nakash padiau antu akatwakad kuman ap akatwakad kulond nau mu machuku minam. Mulong wak ukutwishap wambambaku nend pakemp? Ku chikumangan chikwezaku tukutwish twasal kand mwamu ni antu akwau. Mu kachisu kakemp, tukwikal twisambin kal ni akadivar ni anambaz netu awonsu. Tufanyidinap kwiyakamish anch tutwishinap kwambamb nau awonsu pa dichuku dimwing. Kwikil ukunenganana anch tutwishinap kumulangwish pa chikumangan ni chikumangan.

10. Mutapu ik wa usey nakash ukwetau antu awonsu adia mu chikumangen ni mutapu ik tukutwisha kuwisakin?

¹⁰ Kuyilangwish antu akwau kwawiy kukata kusambel bil kurutu kwa kuyak. Ridi ruzau rikutwisha kusarumun minsamb yiwamp ni urund wa chikupu. Chilakej, anch antu ezina ku yitentam ya distrik, ya munyingumuku ni pakampwil ya dichuku dimwing ayilej antu akwau majin mau ni asambish kwisamb, akat kushiken ku kuchingejin anch akutwish amanijan kakwau. In kwikatin kusal mudimu wa kutung Yot ya Want pamwing ni akata kusal mudimu wa kuyikwash antu adia mu yak, chisu chivud akat kushiken ku kwikal arund awamp mulong akat kwijikijan nawamp ngikadil ya umwing ni mukwau kusutil ku minsamb yau. Kudi mitapu yivud ya kuta urund wa chikupu mu dirijek dia Yehova. Anch ‘twajimb mu michim,’ tukwikal ni arund avud, tukukasikesh rukat ritutekina mu uumwing mu difukwil diakin.

Lik Antu Akwau Akushejina

11. Mudi muchilejenau mu Marko 10:13-16, chilakej ik chashay Yesu?

¹¹ In Kristu awonsu afanyidin kwikal aswapela kushejin, mudi mwadingay Yesu. Tushinshikinany chasalay Yesu pa in kwilejend asota kuyikangesh anvaj anch alika kumuletin anau. Yesu walonda anch: “Yilikany kwau an akemp eza kudi am, kangal wayikojany; mulong want wa Nzamb udi wa awiy.” Kupwa “wayitambula, wayiyukish, wayanzwok makas mend.” (Marko 10:13-16) Tongijokin musangar wovau an inay payimekeshinau rukat mudi riner kudiay Mulej Mujim!

12. Chom ik chikutwisha kutukangesh kwambamb ni antu akwau?

¹² Mwin Kristu umwing ni umwing ufanyidin wiyipul anch: ‘Ov, chikat kuyiswapel antu akwau kwinshejin, ap anch niding chisu chawonsu nikwatiken?’ Yaku yimwing yakad kwikal chakin kamu yiyimp yikutwish yikal yikangesh mambamb. Chilakej, anch tukat kusadil chisu ni chisu telefon wa kusend ku makas ap kusadil tuyom twa kutesh nich twa mu matu mulong wa kutesh miminy yitwakwatina kal mu chisak mutudia ni antu akwau, chikutwish chikal mudi anch tukat kuyilej anch tuyisotilap. Anch antu akwau akumen chisu ni chisu ching mutu mu ka ordinater key, akutwish atongin anch tusotilap kwambamb nau. Chakin kamu, kuding “chisu chimwing cha kunenet.” Pakwez anch tudi ni antu, chisu chivud chawiy “chisu . . . cha kulond.” (Mul. 3:7) Muntu ukutwish walond anch: “Nikatin nikala kwam pa amwinam” ap anch “Novilap ja kwambamb pamanch.” Chikalap nchik mwamu, kubutul mambamb ma urund ap anch twovilap ja kwambamb udi uman wa kwel anch rukat “kirikat kwisotilangip yom yau irinau.”—1 Kor. 13:5.

13. Mutapu ik wa kuyiman akadivar ni anambaz in Kristu wamukasikeshau Timote kudiay Paul anch ikala nich?

¹³ Paul wamukasikesha nsand Timote chakwel ayilimisha antu awonsu adia mu chikumangen. (Tang 1 Timote 5:1, 2.) Niyetu tufanyidin tuyikwata in Kristu amakurump mudi amakwetu ni atatukwetu ni ansand mudi anamakwetu, mudi anch, tudi an a tatuku ni maku umwing. Anch tukwet manangu minam, kwikil ap umwing wa akadivar ni anambaz netu ukutwisha kwiyov mudi udi ngendj kudi etu.

14. Yisu yiyukish yimwing ya kwikal ni mambamb makasikeshina pamwing ni antu akwau?

¹⁴ Anch tukat kwisamb nawamp ni antu akwau, tukuwejin pa mwikadil wau wa muspiritu ni kwiyov nawamp mu manangu. Mukadivar umwing wadinga ni kusal biro wa mutiy ukat kuyivurik in kusal mudimu ku Bethel avud amapal nich rukat nakash mulong itekina chisu cha kwisamb nend padinga uchid muntu musu ku Bethel. Mambamb mau ma kumukasikesh masala iyova anch wikal kal chakin kamu chid cha dijuku dia Bethel. Katat uyimburijin kusutil ku kusal usu wend chakwel ambamba ni ambay nend in kusal mudimu ku Bethel.

Kwikepish Kutukwashining Kulet Chisambu

15. Chom ik chilejena anch chitwishikin pa yisu yimwing tukakalijana?

¹⁵ Ewodia ni Sintik, anambaz aad in Kristu adinga mu Filipoi wa pasak, chimeken anch chadinga chiyikasikedin kupwish kamulong kadingau nich. (Filip. 4:2, 3) Ntad jikash jalanka pakach penday Paul ni Barnabas jijikana kwawonsu ni ashikena ku kwaurik muntu ni muntu wiyil amwinend. (Mid. 15:37-39) Jinsangu jinej jilejen anch chitwishikin pa yisu yimwing anch in kwifukwil akin akakalijana. Yehova utwinkishin ukwash utukutwisha kusadil mulong wa kupwish tumilong chakwel tuchirisha urund. Pakwez kudi chom chitwitinay.

16, 17. (a) Kwitudish kukwet usey pa mulong wa kupwish tumilong pakach pa antu? (b) Rusangu ra Yakob ra kumushejin Esau rimekeshin nchik usey wa kwitudish?

¹⁶ Tongin bil anch ey ni murund ney ukuyany mu weny mu motak umwing. Pakwel anch motak usambisha kwend, ufanyidin wandjika rufungul mu kontak chakwel wakisha motak. Mwamu kand, kuding rufungul rifanyidina kusadil mulong wa kusot kupwish tumilong. Rufungul riner ridi kwitudish. (Tang Yakob 4:10.) Mudi muchilejenau mu chilakej chinech chidia mu Mifund, rufungul riner rikat kuyitwishish antu ijimena kal asambisha kand kusadil yijidik yidia mu Bibil.

¹⁷ Esau wadinga usotil kumujip mpamb wend Yakob mulong wamutambula mbil yend ya kabuzivumu, ni padinga pasutil kal mivu makum maad. Ampamb inay adinga asotin kutanijan kand kupwa kwa kusut kwa chisu chinech chawonsu, “[Yakob] wova wom ukash, wasambisha kwiyakamish.” Wadinga ni kutongin pinap anch Esau ukutwish wamujip. Pakwez, pasankanijanau, Yakob wasala chom kanang chakadiay Esau kuchingejin. Ndiy ‘wibumburola pansh’ pandingay ni kumushejin mwanamakwend. Chom ik chasadikaku kand? “Esau waya mau ni kumusankan, wamubwikat, wamukwat mwi nshing, wamususu. Awiy abutula kudil kwa musangar.” Kwadingap kand chak cha kuchin. Kwitudish kwa Yakob kwamukwasha apandakana rukuny rawonsu radingay nich Esau.—Dis. 27:41; 32:3-8; 33:3, 4.

18, 19. (a) Anch kwalank tumilong pakach pa antu, mulong wak chidinga cha usey anch twikala wa kusambish kusadil chiyul chidia mu Mifund? (b) Mulong wak kitufanyidinap kulik anch muntu mukwau kitiyijinap kapamp ka kusambish mu mutapu uwamp?

¹⁸ Mu Bibil mudi yiyul yiwamp yilejena mutapu wa kupwish tumilong. (Mat. 5:23, 24; 18:15-17; Efes 4:26, 27)a Pakwez, anch twachisadil pakad kwitudish, chikwikal chikash kutan chisambu. Kuchingel anch ching muntu mukwau itudisha kudiap mutapu uwamp wa kupwish milong pa chisu tukweta niyetu rufungul riner mu chikas.

¹⁹ Anch ruzau retu ra kusambish ra kusot chisambu rakangany mulong wa diyingishin kanang, kitufanyidinap kushadish ruchingej. Pamwingap muntu winou ukwet kuswir kwa chisu chakwel atongijokina pa yitongijok yend. Anamakwend a Yosef amutunguna matung. Padinga pasutil kal mivu yivud kushiken ni pa chisu chamanijanau nend mudi kanampumb wa kusambish mu Idjibit. Pakwez, awiy adinga aswimpa kal michim yau ni ita dilikishin. Yosef wayilikishina, ni an a Yakob ikala muchid witapila dilau dia kwipil dijin dia Yehova. (Dis. 50:15-21) Kusutil ku kwikal mu chisambu ni akadivar ni anambaz netu, tukat kuwejin ku uumwing ni musangar wa mu chikumangen.—Tang Kolosay 3:12-14.

Tukatijanany “mu Midimu ni mu Yakin”

20, 21. Dilejan ik tukutwisha kwilej kusutil ku mutapu Yesu wowishay atwimbuy end mend?

²⁰ Chisu chikemp kurutu kwa kufa kwend, Yesu wayileja atwimbuy end anch: “Nakwinkishany kal chilik, chakwel ni yen kand ukusalany mudi chinasala am kudi en.” (Yoh. 13:15) Wadi wapwish kal kuyowish a 12 mend yau. Chom chasalay Yesu kichadingap kwau chaku cha chamwamu ap mudi chisal cha riy. Kurutu isambina rusangu ra kuyowish ku mend, Yohan wafunda anch, Yesu wayikata “aend a pa kampwil adinga mu mangand, ndiy [wayikata] ni kwisudiel.” (Yoh. 13:1) Rukat mulong wa in kwilejend rawiy ramubachika Yesu asala mudimu wadingau ni kusal kudi musuk. Katat adinga afanyidin kwitudish chakwel asadilijana yom yimekeshina kukatijan umwing ni mukwau. Mwaning, rukat rakin ra ukadivar rifanyidin kutubachik chakwel tuyibangina akadivar ni anambaz netu awonsu in Kristu.

²¹ Kambuy Pita, muntu wowishau mend kudiay Mwan a Nzamb, watesha kurumburik kwa yom yasalay Yesu. Chawiy chafunday anch: “Talany mudi muwatokishilany kal mipim yen mu kuziyil kwen ku uyakin, mulong wa rukat kudi akadivar, chawiy katijanany muntu ni mukwau mu michim yen.” (1 Pita 1:22) Kambuy Yohan, niyend amwosha mend kudiay Nsalejetu, wafunda anch: “Anam akemp, kangal twikatilany mu mazu ap mu jindim, pakwez ching mu midimu ni mu yakin.” (1 Yoh. 3:18) El michim yetu yitubachika chakwel tumekesha rukat retu ra ukadivar ku yisal yetu.

[Mazu madia kwishin kwa paj]

Ov, Uvurikin?

• Mu jinjil ik tukutwisha ‘kujimb mu michim’ mu kukatijan kwetu muntu umwing ni mukwau?

• Chom ik chikutwisha kutukwash chakwel twikala ni chisu cha kuyibangin antu akwau?

• Kwitudish kukwet usey ik pa mulong wa kulet chisambu?

• Chom ik chikutwisha kutubachik tuyibangina ambay netu in kwitiyij?

[Chipich chidia pa paj wa 24]

Tuyakany nich chirungul ambay in kwitiyij

[Chipich chidia pa paj wa 26]

Kangal twaburenany chisu cha kuyibangin antu akwau