Sanger Ndond Yey Mu Chikumangen

“Nzamb wateka chid pa chid mu mujimbu umwing mudi mwasotilay.”—1 KOR. 12:18.

1, 2. (a) Chom ik chimekeshina anch muntu ni muntu udia mu chikumangen ukutwish wikal nich ndond yikusangeray? (b) Yipul ik tukushinshikina mu mutu wa mulong winou?

KUDIOSH pa chirung cha Isarel wa pasak, Yehova watenchika chikumangen chiding mulong wa kuyidish antwend muspiritu ni mulong wa kuyitakel. Chilakej, pa chisu chakwatau in Isarel musumb wa Ai, Yoshua “watanga mazu mawonsu ma yijil, ma kuyuk ni ma riyind, mudi yawonsu yifundilau mu mukand wa yijil . . . kurutu kwa chisak chawonsu cha in Isarel.”—Yosh. 8:34, 35.

² Mu mivu chitot ya kusambish mu C.C., kambuy Paul wamuleja Timote mukurump mwin Kristu anch chikumangen cha Ukristu chadinga “chikumbu cha Nzamb” ni “dinguj dia diyal dikash dia uyakin.” (1 Tim. 3:15) Nlel “chikumbu” cha Nzamb chidi ukadivar wa pa mangand mawonsu wa in Kristu akin. Mu shapitre wa 12 mu mukand wend wa kusambish wapepilau, wayifundinay in Korint, Paul wafanikesha chikumangen ni mujimbu. Ndiy walonda anch, ap anch chid ni chid chikwet mudimu wach, yawonsu yidi ya usey. Paul ufundil anch: “Nzamb wateka chid pa chid mu mujimbu umwing mudi mwasotilay.” Kupwa walonda kand anch: “Yikunku ya mujimbu yitutongila etu anch kiyilimishinip, pawiy pitulimididina nakash.” (1 Kor. 12:18, 23) Chawiy, mudimu wa muntu utentamina udia mu chikumbu cha Nzamb kiudiap uwamp nakash ap uyimp nakash pa kuwisikesh nich mudimu usadilay mwin Kristu mukwau ushinshamena. Yidi kwau yishalijadina. Mutapu ik lel tukutwisha kuman ndond yetu mu ditenchik dia Nzamb ni kuyisanger ni kuyikat? Yom ik yikutwisha kukwat kwi ndond yetu yitukweta? Ni mutapu ik tukutwisha kusal chakwel ‘kuya kwetu kurutu kumekana kudi antu awonsu’?—1 Tim. 4:15.

Mutapu ik Tukusangera Ndond Yetu?

3. Mwi njil ik mutukutwisha kutanin ndond yetu mu chikumangen ni kumekesh anch tuyisangaredin?

³ Njil yimwing tukutwisha kusadil mulong wa kutan ndond yetu mu chikumangen ni kusal chakwel chimekena anch tuyisangaredin yidi kusal mu kwovijan ni “kashalapol ushishamena ni kubabal” pamwing ni ntimesh wend Chisak Chitakedila. (Tang Mateu 24:45-47.) Tuswiridin kushinshikin mutapu utusadilinga pantaliken nich umutakel utwinkishinay chisak cha kashalapol. Chilakej, mu kusut kwa mivu, atwinkishin kal umutakel wa patok pa mulong wa kudjal, kwikil ni kwileng, kwipuwej ni piur pa mutapu uyimp wa kusadil Internet. Tukat kutesh nawamp kamu ku chiyul chinech chakwel twilama muspiritu? Chidi nchik pa mulong wa kwikal nich program muwamp wa kwifukwil mu dijuku pakad kujing? Twateshin usey wa chiyul chinech ni kwitekin urel umwing mulong wa rutong riner? Anch tudi ajich, ov, twitekidin chisu cha kwilej kwetu ayinetu Mifund? Yehova ukez kumuyukish muntu ni muntu ni majuku anch twalondul umutakel wa chisak cha kashalapol.

4. Yom ik tufanyidina kushinshikin pa chisu tutondina yom yetu ayinetu?

⁴ Antu amwing akutwish ashiken ku kutongin anch yom mudi kwipuwej, kudjal, kwikil ni kwileng yidi yom yimutadila muntu amwinend. Pakwez, kudi mwin Kristu wipana kal usangaredina ndond yend mu chikumangen, yom yikatiningay muntu amwinend yikutwisha kwikal mufulandal wa kukwatin mipak yend. Chifanyidin kushinshikin pa chitongijok cha Yehova chidia mu Dizu diend, Bibil. Uruu udiamu ufanyidin kwikal ‘kutok ku mend yetu ni chimunyik mwi njil yetu.’ (Kus. 119:105) Tusal cha manangu anch twashinshin yom yitutondininga kusal mu yom yetu ayinetu yikutwisha kwikal nich usu pa mudimu wetu wa kulejan ni piur pa antu akwau, adia mu chikumangen ni adia pol.—Tang 2 Korint 6:3, 4.

5. Mulong wak tufanyidina kwilam pantaliken nich spiritu wa wan ipau?

⁵ ‘Usu wa chipepil, ukata kusadil mudimu katat mu an a in kubwambul’ upalangen nakash mudi rikind utukata kupwit pa kupim. (Efes 2:2) Usu winou ukutwish kutushikij ku kutongin anch kituswiridinap umutakel udiokila ku dirijek dia Yehova. Chakin kamu, tusotil twikala mudi mwadingay Diotref, muntu wadinga ni kulik ‘kutambul nich kalimish chom chawonsu chatumay kambuy Yohan.’ (3 Yoh. 9, 10) Tufanyidin kudimuk kangal tukudisha spiritu wa wan ipau. Ku mazu ni ku yisal, kangal twabwambwil ap pakemp njil yisadidilay Yehova mulong wa kwisamb netu nlel unou. (Kuch. 16:1-3) Pakwez, tufanyidin kusanger chisend chetu cha kusal mu kwovijan nich chisak cha kashalapol. Ov, tufanyidinap tusala usu wetu wawonsu chakwel tuziyila ni kwikepish kudiau antu atakedila chikumangen cha pol petu?—Tang Hebereu 13:7, 17.

6. Mulong wak tufanyidina kushinshikin mikadil yetu ayinetu?

⁶ Njil yikwau ya kumekeshin anch tusangaredin ndond yetu mu chikumangen yidi kusutil ku kwishinshikin mikadil yetu ayinetu ni kusal yawonsu yitukutwisha kusal mulong wa ‘kutumbish mudimu wetu’ ni kumushiman Yehova. (Rome 11:13) Antu amwing akutwish ikal ayibol a rawonsu. Akwau niyau akat kusal mudimu wa pakampwil wa chisu chawonsu mudi amishoner, atulam in kwendangan ni akwau mudi yid ya majuku ma Bethel madia mu mangand mawonsu. Akadivar ni anambaz avud asadil mudimu wa kutung Yot ya Want. Antu avud a Yehova asadil usu wau wawonsu mulong wa kubangin maswir ma muspiritu ma majuku mau ni akat kusal nakash mudimu wa kulejan pa rubing ni rubing. (Tang Kolosay 3:23, 24.) Tufanyidin twikal nich kashinsh anch pitukata kwipan ayinetu mu mudimu wa Nzamb ni pitusadilinga usu wetu wawonsu mulong wa kumusadil ni muchim wetu wawonsu, kuding chisu chawonsu ndond yetu mu ditenchik diend.

Yom Yisadila Kwikala Kushijan

7. Rumburil mutapu ukutwisha mikadil yetu kwikal nich usu pa ndond yitukweta mu chikumangen.

⁷ Chidi cha usey ujim kushinshikin mikadil yetu mulong, mu chilik kanang, ndond yetu mu chikumangen yengamidin pa yom yitukutwisha kusal. Chilakej, ndond yikwetay mukadivar mu chikumangen yishalijadinaku mu mitapu kanang ni ndond yikwetay nambaz. Uvud wa mivu, ukash wa mujimbu ni yom yikwau yikutwish yikal nich usu pa yom yikutwisha kusal mu mudimu wa Yehova. Jinswir 20:29 ulondil anch: “Uyaj wa ansangarum wawiy usu wau, ni ufun wa amapal udi jinvu jau.” Ansand adia mu chikumangen akutwish asal midimu yivud ya ku mujimbu mulong wa usu wa usand wau, pakwez amapal ading yiyukish ya chikumangen mulong wa manangu mau ni ronganyin rau. Tuswiridin kand kwijik anch chom chawonsu tukutwisha kusal mu dirijek dia Yehova chengamidin pa riy ra Nzamb.—Mid. 14:26; Rome 12:6-8.

8. Maswir makwet usu ik pa yom yitusotila kusal mu chikumangen?

⁸ Chilakej cha ayangadim aad avarikena chikasikeshidin chom chikwau chidinga cha usey pa mulong wa kwikal nich ndond mu chikumangen. Awonsu aad apwisha shikol yijim. Adinga ni mikadil ya chilik chimwing. Anvaj au asala usu wau wawonsu kuyikasikesh awonsu aad chakwel awanyisha yitinau eza asala mudimu wa uchibol anch apwish shikol. Papwishau kal shikol, umwing wasambish mudimu wa uchibol, mukwau wasambisha kusal mudimu wa ku mujimbu. Kushalijan kwadinga pak? Kushalijan kwadinga pa maswir mau. Kwinsudiel umwing ni umwing wasala chadinga chisotinay kusal. Ov, kimwawiyap chidinga kudi avud etu? Tuswiridin kutongijokin nawamp win kamu piur pa chom tukusota kusal mu mudimu wa Nzamb? Tukutwish twawejinaku kand pa yitusadila, ap anch kusal mwamu kukutwish tutenchika mikadil yetu?—2 Kor. 9:7.

9, 10. Chom ik tukutwisha kusal anch tuburedin chibachikin cha kusal yivud mu mudimu wa Yehova?

⁹ Pakwez chikwikal nchik anch tuburedin chibachikin cha kusal yivud mu mudimu wa Yehova ni tukat ching kusal yom yikemp yiwanyidina mu chikumangen? Mu mukand wayifundilay in Filipoi, Paul ulondil anch: “Nzamb ukat kusal mudimu mu en, kunitongish ni kunisadish, chakwel rusot rend ruwamp arisala.” Mwaning, Yehova ukutwish watusadish ni kututongish, ap anch kulangwish maku metu.—Filip. 2:13; 4:13.

¹⁰ Ov, tukutwishap twamwit Yehova atusadisha chakwel tusala rusot rend? Mwamu mwasalay Mwant David wa Isarel wa pasak. Ndiy walembila anch: “Ngijikishap yaku yey, A [Yehova, NW], nlejap jinjil jey. Ntakela kwendil mwi njil ya uyakin wey, nlejap amboku, mulong Ey udi Nzamb wa dipandish diam, nachingej kudi Ey muten wawonsu kamu.” (Kus. 25:4, 5) Niyetu tukutwish twasal chilik chimwing kusutil ku kulembil anch Yehova ukutusadish chakwel tusala yom yimusangareshina. Anch twatongijokin piur pa mutapu wovilingay Yehova Nzamb ni Mwanend piur pa yom yitusotilinga mu kusal yisakin yau, michim yetu yikat kwizulijan nich kujikitish mulong wau. (Mat. 26:6-10; Luka 21:1-4) Yovil yiney ya kujikitish yikutwish yatubachik ku kumwit Yehova atusadisha chakwel tusota kuya kurutu muspiritu. Muprofet Isay washa chilakej cha mwikadil utufanyidina kwikal nich. Pateshay dizu dia Yehova dikat kwipul anch: “Ov, nany nikutumap? Ov, nany ukwikala muruwetu?” Muprofet wakula anch: “Yam unou, ntuma.”—Isay 6:8.

Mutapu ik Tukuya Kurutu?

11. (a) Maswir ik madiaku mayitina akadivar anch awanyisha yitinau chakwel ikala nich yisend mu dirijek? (b) Mutapu ik ukutwisha mukadivar kuwanyish yitinay mulong wa yisend yend ya mudimu?

¹¹ Kudi maswir majim ma akadivar akutakela, mulong mu muvu wa mudimu wa 2008 kusu, ababatishin antu 289678 mu mangand ma kabuj. Mutapu ik ukutwishay mukadivar kusal pa kuman maswir minam? Mu kulond kuswapela, chidi kusutil ku kusal usu wa kuwanyish yitinau yidia mu Mifund mulong wa kwikal ankwash a mudimu ni ya kwikal amakurump. (1 Tim. 3:1-10, 12, 13; Titus 1:5-9) Mutapu ik ukutwishay mukadivar kuwanyish ngikadil yiney yitinau mu Mifund? Chidi kusutil ku kusal nakash mudimu wa kulejan, kusutil ku kuwanyish nich mushiku yisend yend mu chikumangen, kusutil ku kusal usu wend wawonsu chakwel apana yirumburil yiwamp ku yikumangan ya Ukristu ni kusutil ku kuyisanger ambay nend in kwitiyij. Chawiy chikumekeshay anch usangaredin ndond yend mu chikumangen.

12. Mutapu ik ukumekeshau ansand mushiku wau mulong wa uyakin?

¹² Chom ik chikutwishau kusal akadivar ansand, pakampwil in akweta dikum dia mivu, chakwel aya kurutu mu chikumangen? Afanyidin kusal usu wa kukul mu “manangu ni ronganyin” kusutil ku kwak ronganyin ra Mifund. (Kol. 1:9, MM) Kwikal in kwilej akweta mushiku a Dizu dia Nzamb ni kusal nakash pantaliken nich yikumangan ya chikumangen yikutwish chakin kamu yawejin ku rutong riner. Ansand akutwish kand awanyish yitinau kusutil ku kusal usu wau chakwel atwisha kwandamin ku ‘chis chijim chakwel asala mudimu ukash’ mu mitapu kushalijan ya mudimu wa chisu chawonsu. (1 Kor. 16:9) Kusal mudimu wa machuku mawonsu mu mudimu wa Yehova yidi njil ya mwom yisangareshina chakin kamu ni yidi njil yiletininga yiyukish yivud nakash.—Tang Mulej 12:1.

13, 14. Mu jinjil ik mukutwishau anambaz kumekesh anch asangaredin mudimu wau mu chikumangen?

¹³ Anambaz niyau akutwish amekesh anch asangaredin chisend chau kuwanyish kwa muntu ni muntu Kuseng 68:11. Tutanginamu anch: “Nsalejetu walonda dizu, ni [amband, NW] aruu a jinsangu jiwamp adi chisak chijim kamu.” Yimwing ya jinjil jijim mukutwishau anambaz kumekeshin kujikitish kwau mulong ndond yau mu chikumangen yidi kusutil ku kusal mudimu wa kuyikadish in kwilej. (Mat. 28:19, 20) Chawiy lel, kusutil ku kusal nakash mudimu wa kulejan ni kusutil ku kwipan mu mudimu winou, anambaz amekeshining anch asangaredin mudimu wau mu chikumangen.

¹⁴ Pamufundinay Titus, Paul walonda anch: “Amband amakurump chawiy chimwing, ikal ni kalimish, . . . ikal alej akulejan yom yiwamp, chakwel akutwish kuyilej amband achidi ayangadim kuyikat anfumwau ni anau, ni mwa kwikal ni michim yitudila, ni kwikal mudi antu atumbila, ni kusal mudimu ku yikumbu yau, ni kwikal ni kalimish ni kuziyil kudi anfumwau, chawiy dizu dia Nzamb kakudisalip.” (Titus 2:3-5) Anambaz amapal aswila akutwish ikal usu uwamp mudi ik mu chikumangen! Ku kuyilimish akadivar atakedila ni kusutil ku kukwat mipak ya manangu mu yom yikwatina ku mwom mudi mutapu wa kudjal, kwileng ni kwipuwej, akwikal yilakej yiwamp kudi akwau ni akumekesh kalimish kakurikina mulong wa ndond yau mu chikumangen.

15. Chom ik chifanyidinay nambaz mujich kusal chakwel alika kwiyov kwikal amwinend?

¹⁵ Pa yisu yimwing, chikutwish chikal chikash kudi nambaz wakad kwachik kutan ndond yend mu chikumangen. Nambaz umwing wadinga mu mwikadil mudi winou walonda anch: “Mwom wa ujich ukutwish wamushikij muntu ku kwiyov mudi udi kwend amwinend.” Pamwipulau alonda mutapu ukatay kujijamen mwikadil winou, ndiy walonda anch: “Malembil ni kwilej yankwasha nimana ndond yam kakwau. Nileja chakwel nimana mutapu wimenay Yehova. Kupwa nawanyisha yitinau chakwel niyikwasha antu akwau mu chikumangen. Chom chinech chankwasha nilika kutongijokin ching padi am amwinam.” Kukwatijan nich Kuseng 32:8, Yehova wamuleja David anch: “Nikez kuyul padi ey ni dis diam.” Mwaning, Yehova ukat kuyisangaredin atushalapol end awonsu umwing ni umwing, pamwing ni anambaz ajich, ni ukuyikwash antu awonsu chakwel atana ndond yau mu chikumangen.

Lamany Jindond Jen!

16, 17. (a) Mulong wak kwitiyij diladikij dia Yehova mulong wa kwikal chid cha dirijek diend wawiy mupak upandakena kuwamp utukutwisha kukwat? (b) Mutapu ik tukutwisha kulam ndond yetu mu dirijek dia Yehova?

¹⁶ Yehova ndiy wayipwita atushalapol end awonsu umwing ni umwing chakwel ikala nend mu urund wa piswimp. Yesu walonda anch: “Pikil muntu ukutwisha kwiyezil kudi am, ching Tatuku wantuma am wamukak.” (Yoh. 6:44) Mukach mwa mamiliyon ma antu adia pa divu, Yehova wapalangesha diladikij diend kudi etu chakwel twikala yid ya chikumangen chend cha nlel. Twakwata mupak uwamp nakash pa kwitiyij ku diladikij dined. Mwom wetu wikadil kal ni rutong ni urumburikin. Ni tukwet musangar ni mazang mudi ik mulong wa kwikal nich ndond mu chikumangen!

¹⁷ Mwin kufund kuseng walonda anch: ‘A Yehova, nikatil kushakam mu chikumbu chey.’ Kupwa wawang kand anch: “Mend mam miminy mwi njil yitentamina. Nikez kamutumbish [Yehova, NW] mu kukumangan.” (Kus. 26:8, 12) Nzamb wakin ukwet ndond mulong wa muntu ni muntu mu dirijek diend. Kusutil ku kudandamen kulondul umutakel wa uteokras ni kusutil ku kukwatikan mu mudimu wa Nzamb, tukutwish twalam ndond yetu ya usey mu ditenchik dia Yehova.

Ov, Uvurikin?

• Mulong wak chidi cha manangu kulond anch in Kristu awonsu akwet ndond mu chikumangen?

• Mutapu ik tukata kumekesh anch tusangaredin ndond yetu mu dirijek dia Nzamb?

• Yom ik yikutwisha kwikal nich usu pa ndond yetu mu chikumangen?

• Mutapu ik ukutwishau ansand ni amakurump in Kristu kumekesh anch asangaredin ndond yau mu ditenchik dia Nzamb?

[Chipich chidia pa paj wa 21]

Mutapu ik ukatau akadivar kuwanyish yitinau chakwel ikala nich yisend muchikumangen?

[Chipich chidia pa paj wa 22]

Mutapu ik ukutwishau anambaz kumekesh anch asangaredin ndond yau mu chikumangen?