Ov, Ufanyidin Kwikal Mwin Kashinsh Chisu Chawonsu?

ANTU awonsu ading in kashinsh yisu yimwing; avud pamwingap yisu yivud. Pakwez antu inch wija ikasikeshina chakwel ikala in kashinsh chisu chawonsu?

Nlel unou, kuburen kwa win kashinsh kupalangen mu milad yivud ya mwom. Pakwez, chitongijok cha Nzamb piur pa win kashinsh chijiken nawamp. Chilakej, antu avud ij nawamp chijil cha chinan cha Yijil Dikum: “Kangal wiy.” (Kubudik 20:15) pakwez, antu avud atongin anch mikadil yikat yisu yimwing kuyingish kwiy ap milad yikwau kuburen win kashinsh. Tushinshikinany yilakej yisatu ya wij wiyingishilau yisu yivud.

Ov Chitiyikin Kwiy Anch Udi Kazwendj?

Nyikel mwin Rom umwing walonda anch: “Uzwendj udi musul wa yisal yiyimp.” Atuzwendj akutwish kutong anch kwiy kwitiyikin. Antu atadidila kulemp akutwish kwitiy. Yesu wadinga ni chitongijok ik pa mulong winou? Wading nich ranaken nakash mu yisal yend pakach pa atuzwendj. “Ndiy wayovila riy.” (Mateu 9:36, MN) Pakwez, wadinga—mu yisu yin yawonsu kandikal—afishap nich kwiy. Pa chinech, chom ik chifanyidinau atuzwendj kusal?

Nzamb ukwet ranaken mulong wa antu asotina chakin kamu kumuziyil, ni ukez kayukish usu usadilau chakwel atana yom yiswiridinau. (Kuseng 37:25) Bibil ukanin anch: ‘Yehova kakumulikangap mwin kutentam kufa nich nzal, pakwez ukat kukangesh maku mayimp ma antu ayimp.’ (Jinswir 10:3) Ov, atuzwendj kakutwishap kuchingejin kushilamu kwinoku? Victorine witiyijin chom chinech.

Chidiay mwadiamufu nich an atan amakundj ni amband ayila ku shikol, chadingap chipipela kudiay Victorine. Wadinga ushicha mwi ngand yiyila kurutu mwadingau ni kupan ukwash ukemp wa nfalang kudi winyikel. Mwom wa dichuku ni dichuku wadinga ni kuusutishin yisu yivud ndond yindjing, kwadinga ni kumekan mitapu yivud ya kwiy. Pakwez, Victorine kapakishap kwiy. Pandond ya kwiy, wasotanga kutan yom yiswiridinay chakin kamu mudi mwin kulandish mwi njil udia mwin kashinsh. Ov, mulong wak wadandamena kwikal mwin kashinsh?

“Chakusambish, nitiyijin anch Nzamb udi mwin kashinsh ni anch ukez kikal mwin kashinsh mu yisal yend pantaliken niyaman anch namwimburij. Chakad, anam akutwish kwilej kashinsh ching kusu anch akamen kudi am.”

Mutapu ik watwishay kwikal nich yom yiswiridinay? “Twading nich yakudia, masun, ni ndond ya kushakam. Pakwez, kwading yisu yinafanyinanga kwit ukwash kudi arund—chilakej, nfalang ja kuland nich mwon wakad kuchingejin. Nanding ni kutambul chisu chawonsu yom niswiridina. Mulong wak? Mulong arund nam ij anch namekeshin kal win kashinsh, ni nikatap kusot kutambul yivud kupandakanamu yiniswiridina.

“An apamin mu kwikal in kashinsh. Machuku ma kwinyim ok mutej nam wamana nfalang ja utad jimwing pa tebur ni wangipula anch nakaminap anch an akujisend. Chamukasikena kwitiyij panamuleja anch an am kakutwishap kusal mwam. Pakad am kwijik, wakwata chiyul cha kuyipak. Mu ujindj washa falang ja utad jaad ja 100 mu chikumbu cham mwi ndond mukutwishau kujiman swa kudi an. Pezay pa dichuku dialondulap, washimoka pakuman anch nfalang ja utad jadinga pinipa. Kwikal nich an in kashinsh chidi chiyukish chipandakenamu kwikal nich yom yivud ya kumujimbu.”

“Mwawiy Musadilau Antu Awonsu”

Kwiy ku mudimu kupalangen kwawonsu. Mudi chibudikin, antu avud atongining anch, “Mwawiy musadilau antu awonsu, chad mulong wak chinfanyidinap am?” Chinyim ni chinech, Bibil ulondil anch: “Kangal kulondul chisak cha antu avud chakwel usala nau kuyip.” (Kubudik 23:2, MN) Victoire watesha kubabesh kwinoku. Ov, chaleta chibudikin chiwamp?

Padingay nich mivu 19, Victoire watana mudimu kwadingau ni kusal many ma ngaj. Washinshikina anch amband 40 adinga ku mudimu winou adinga ni kusend mis ya ngaj mu ujindj mu yipay yau. Diampos din diawonsu, ading ni kulandishang mis ya ngaj ku usey wisikena nich difut dia machuku masatu ap manying. Victoire ulondin anch: “Chakin kamu antu awonsu adinga ni kusal mwamu. Anchingejina kwingandjikamu, pakwez nalika, ni kulond anch win kashinsh wawiy mulad wa mwom wam. Answingisha, ni kulond anch nikuburen chom chiwamp.

“Dichuku dimwing pitwabudika kal etwawosu mu mudimu, ntakel washika kapamp kamwing. Wayisopa mu yimpay ya antu awonsu ni watana ngaj mu yimpay ya antu awonsu kudioshaku chamam. Awonsu akwatau afanyina kuyopat pinipa ap kusal mudimu mu jimbing jaad pakad difut. Mu jimbing jinej jinying, amband inay ashikena ku kwitiy anch kinashadishap chom.”

“Chisenda Chom Unonina”

Ov, mutapu ik ukata kutong anch wanon chom kanang cha usey chishadishinay muntu? Kudi antu avud, chinech chikat kulangwish yovil ya kuchisend chikala nchau, ni kuyisal adiosha chitongijok chin chawonsu cha kuchichirish. Akwet chitongijok cha in “kusend chom chinoninau”. Amwing akutwish kutong anch kwikil kwau uyimp kusal mwamu. Kupwa kwa yawonsu, atongin anch mwin chom kachingejinap kand kuchiman. Amwing alondin anch chidiap chisend chau cha kukimb kudiay mwin chom—mudimu ufanyidina kwit kusal usu nakash.

Mutapu ik umenay Nzamb mulong winou? Kuvurik Yijil 22:1-3 ulejen anch mwin kunon kadingap kusu ufanyidina kuchilam chom chinoninay pakwez kuchilam “djat ni pakezilay [mwin chom] mwanamakwey ni kuchikimb. Chad niyey ukez kamuchirishinach.” (Mukand wa Nzamb) Anch muntu unonina yom walik kwijikish yom yanonangay, akumukwat wij. (Kubudik 22:9) Ov, achisadil nlel unou? Kristin witiyijin anch mwawiy.

Kristin udi ntakel wa shikol ya muntu umwing. Diakasatu dimwing watambula nfalang ja difut diend dia ngond. Mudi mukatau kusal antu avud a Kurand kwa Afrik, wajibomba pamwing ni kujandjik mu kasakosh kend. Kupwa watazuka mwin kwendish moto wa taxi ni waya swa ku chikumangan. Pashikay, wakimba nfalang mu ka sakosh kend chakwel amufuta mwin kwendish. Mu mididim, wawisha mubombu wa nfalang pansh pakad kwijik.

Kupwa chisu chikemp, Blaise mwan wa mivu 19, ngendj mu mwab winou, weza, wading wirijekang kal chakwel ayisankana arund nend ku chikumangan chawiy chimwing kwakumanganay Kristin. Wamana mubombu wa nfalang ni wajinona ni kujitek mu dibeng. Kwinsudiel kwa chikumangan, wayijikishamu arund nend anch wanonang chom chimwing pol ni anch muntu umena anch washadishang chom ukutwish kumutazuk kwinshing chakwel kuchijikish.

Pachirikay Kristin kuchikumbu urel, wanenganana pa kujingunin kushadik kwa nfalang jamufutau ja ngond. Kupwa kwa rubing rumwing, pamwijikishay murund Josephine piur pa kushadish kwinoku, wamuleja anch ngendj umwing weza ku chikumangan chinech wanona chom kanang. Kristin wamutazuka Blaise kwinshing ni wijikisha yom yashadishay chakin kamu. Wasangara nakash pamuchirishinau nfalang kudiay Blaise. Chading nchik piur pa Blaise? Walama nfalang jinej rumbing rakabuj, pakwez walonda anch, “Musangar unatana pa kuchirish nfalang jinej wading ujim nakash kupandakanamu kujilam.”

Mulong Wak Asadil Usu wa Kwikal in Kashinsh pa Yisu Yawonsu

Victorine, Victoire, ni Blaise ashich mu miab yishalijadina ni kijikijadinap umwing ni mukwau. Pakwez, asadil yom chilik chimwing. Adi Atuman a Yehova, akasikeshidina yilondilay Bibil piur pa win kashinsh. Achingejin kuwanyin kwa kushilamu kwa Nzamb kwa mangand masu. “Pakwez etu tutadil ku maur masu ni ngand yisu, mudi mulondila kushilimu kwend, kukusokau in kutentam.” Antu awonsu akushakamamu akwikal in kutentam—ni in kashinsh.—2 Pita 3:13.

Victorine wadinga ni ruchingej rikemp anch mwikadil wend wa nfalang ukez kuwap mu chisik chimwing chijim kushik ni pakukarumwinay Nzamb yom. Pakwez, upitin nakash mu spiritu, chom chakad kutwishik kuland ni nfalang. Anend adi in kashinsh ni akwet kalimish. Diarubing din diawonsu akat kusangar nakash pakatau kwambamb ni amutej nau piur pa kuwap kwa Nzamb ni kurumburil mutapu ukeza kayisangaresh “awonsu akat kutazuk padi Ndiy chakin” ni ukuyichidij “awonsu amukatila.”—Kuseng 145:7, 18, 20.

Mu kusut kwa chisu, Victoire wadiokala ku mudimu wa kusal many ma ngaj. Wasambisha kusal mudimu wend amwinend ni kulandish mu chiku. Kashinsh kend kapwitina manangu ma in kuland kudi ndiy. Chakin kamu, watwisha swa kukepish chisu chend mu chiku ni kusutish chisu chivud mu kuyilej akwau piur pa ruchingej ra kushakam mu mangand makad in kuburen kashinsh. Kupwa waata mband, ni ndiy ni mukajend asadil katat mudimu wa chisu chawonsu.

Pashadishay Kristin nfalang jend kurutu kwa Chot cha Want cha Atuman a Yehova. Blaise kandingap wija in kukumangan avud ku chimangan, pakwez wading wij anch akadivar ni anambaz nend in Kristu, ikasikeshin kwikal in kashinsh yisu yawosu.

Antu inch wija ikasikeshina chakin kwikal in kashinsh chisu chawonsu? Tong bil ushich pamwing ni antu 50, 100, ap 200 in kashinsh. Winou wawiy musangar umenau Atuman a Yehova ku Yot ya Want yau. Ov, mulong wak ukutwishap kuya kwinikwa ni kwijikijan nau?

[Dizu dirumburila chipich chidia pa paj wa 12]

“Kwikal nich an in kashinsh chidi chiyukish chipandakenamu kwikal nich yom yivud ya kumujimbu.”—VICTORINE

[Kamushet pa paj wa 14]

Ov, Jinswir 6:30 Jiyingishil Wij?

Jinswir 6:30, MN, jilondil anch: “Antu kakat kumuswingishap mwij anch wiy yom ya kupwish nzal yend.” Ov, mazu minam makat kuyingish wij? Bwat kwau. Mwikadil wa verset winou umekeshin anch Nzamb udandamedin kumufish nich mwij mulong wa kurumbuk kwend. Verse ulondwilap ulondil anch: “Pakwez anch amukwat, ndiy ukufut tupamp sambwad, ni kupan yom yawonsu ya chikumbu chend.” (Jinswir 6:31, MN) Pakwez mwij wiyina mulong wa nzal kakutwishap kufa nich mu chilik chimwing ni wiyina mulong wa ris ap nich chitongijok cha kumusal muntu wiyinay nayimp, ap mwamu, ukwet chisend cha kudandamen ‘kusal yom yiwamp,’ ap kufut kand. Antu asotila kwitiyik kwa Nzamb kafanyidinap kufa nich wij mu mitapu yin yawonsu.