Uyakin Piur pa Chitil

OV, MUNTU uyedina ukutwish kumekesh anch kayedinap mashik anch wabukun termometre? Bwat kwau! Chilik chimwing, mulong antu avud alikin chitongijok cha Nzamb piur pa chitil, chirumburikinap anch kwikilingap chitil. Dizu diend, Bibil, dialonda yom yivud pa mutu winou wa mulong. Ov, chom ik chifundishinay chakin kamu piur pa chitil?

Antu Awonsu Kawanyidinip

Pasutin kal tunan twaad twa mivu, kambuy Paul walejana piur pa chakamish chadingay nich anch ‘mulong yiwamp yinisotila kusal kinikatap kuyisal, pakwez yiyimp yinikisila kusal yawiy yinikata kusal.’ (Rom 7:19) Anch tudi antu akin, tukutwish kwitiy anch mwikadil wetu udi mudi wa Paul. Pamwing ap tusotin kushakam kwambatan nich Yijil Dikum ap kulondul yijil yikwau ya mwikadil, pakwez, tuyikatisha ap bwat, etwawonsu tuwanyidinap ku uyaj wa Nzamb. Chidiap anch tutondin kwa kwisotin kulik kulondul chijil, pakwez tudi kwetu antu aziyina. Ov, chirumburikin ik? Paul amwinend wakula anch: “Pakwez anch nasal yinakad kusot kusal, chinech kiyamip nikat kuchisal, pakwez yitil yisokila mu am.”​—Rom 7:20.

Antu awonsu akwachikin nich kuziy kwa chivadik, mudi mwadingay Paul​—chinech chimekeshin kwikalaku kwa chitil cha chivadik ni kuburen kuwanyin. Kambuy ulondin anch “Antu awonsu asala yitil, kawanyidinip ku uyaj wa Nzamb.” Ov, yik yasala anch mwikadil winou wikalaku? Paul udandamedin kulond anch: “Chawiy mudi chitil chandama mu mangand mulong wa muntu umwing, ni rufu randama mulong wa chitil, chawiy rufu rashika kudi antu awonsu mulong antu awonsu asala chitil.”​—Rom 3:23; 5:12.

Ap anch antu avud alikin chitongijok chinech—kurumbuk kwinok kwasambisha kudi anvajetu a kusambish kwatuteka kulemp ni Nzamb ni kwasala anch tushadisha kuwanyin kwa kusambish—chawiy, chilejenay Bibil. Yesu wajimbula shapitre wa kusambish wa Disambishil utufanyidina kulondul, ni walejana anch wading witiyijin rusangu ra Adam ni Ev.​—Disambishil 1:27; 2:24; 5:2; Mateu 19:1-5.

Dinguj dimwing pimedina uruu wa Bibil didi kwez kwa Yesu panap pansh mulong wa kuyikol ku mwikadil wa chitil wa antu itiyijina mudiay ndiy. (Yohan 3:16) Mwom wetu wa machuku ma kurutu wimedin pa kwitiyij kwetu kwa jinjil jisadidilay Yehova mulong wa kuyikol antu itiyijina ku mar makanganyau kupwish. Pakwez anch tuteshinap nawamp kurumburik kwa chitil kwambatan nich chitongijok cha Nzamb, tukutwishap kusanger jinjil jatenchikay mulong wa kutukol ku chitil.

Yakupesh ya Yesu ni Mulong Wak Yafanyidina

Yehova wamwinkisha muntu wa kusambish ruchingej ra kushakam chikupu. Adam wela kushadish ruchingej riner rishimokishina ching anch wamubwambwila Nzamb. Chawiy lel, Adam wabwambwila, pasalay mwamu, wikala mwin chitil. (Disambishil 2:15-17; 3:6) Adam wasala yom yakad kwambatan nich rusot ra Nzamb, wawila mu kuburen kuwanyin, ni wayipisha urund wend ni Nzamb. Pasalay chitil kusutil ku kuyipish chijil cha Nzamb, ndiy wasambisha kunanap ni washikena ku kufa. Cha ushon, an awonsu a Adam​—ni etwawonsu—​twavadikina mu chitil, ni tukez kufa mulong wa chitil. Ov, mulong wak?

Diyingish diswapel kwau kuditesh. Anvaj akad kuwanyin kakutwishap kuval an awanyidina. An awonsu a Adam avadikina mu chitil, ni mudi mulondinay kambuy Paul: “Difut dia chitil didi rufu.” (Rom 6:23) Chikunku cha kaad cha verse winou, chitwinkishin ruchingej anch: “Pakwez kupand kwa Nzamb kudi mwom wa chikupu kudi Nsalejetu Yesu Kristu.” Chirumburikin anch kusutil ku yakupesh ya rufu ra Yesu, chitwishikin kudi antu aziyila, ni itiyijina chakwel ayitokisha ku yibudikin ya chitil chasalay Adam.a (Mateu 20:28; 1 Pita 1:18, 19) Ov, chinech chikez kukwovish nchik?

Rukat ra Kristu Rikat “Kutusadish Etu”

Kambuy Paul wapepilau nich spiritu waleta chakul cha Nzamb ku yipul yitwipulang kwinsambishil. Ndiy wafunda anch: “Mulong rukat ra Kristu rikat kutusadish etu, mulong twitiyan kal anch umwing wayifila awonsu, . . . Ni ndiy wayifila awonsu chakwel ashicha kakwishakaminap kand ayinau, pakwez kudiay ndiy wafa mulong wa awiy ni kusanguk kand.” (2 Korint 5:14, 15) Anch muntu witiyij anch yakupesh ya Yesu yikutwish kumukol ku yibudikin ya chitil​—ni usotin kujikitish mulong wa ditenchik dined—​ufanyidin kusal usu wa kushakam kwambatan nich yisotinay Nzamb. Chinech chiwejidinaku kand chovu cha yitinay Nzamb, kwijidish kwom kend kwambatan nich yany ya Bibil, ni kushakam kwambatan nich yany yiney.​—Yohan 17:3, 17.

Yisal yiyimp yiyipishining urund wetu ni Yehova Nzamb. Pitiyinay Mwant David uyimp ukash wa masandj ni Batisheba ni kumujip nfumwend, ndiy wova chakin kamu usany ujim. Pakwez chadinga chibangidinay nakash​—mu mutapu utentamina—​chading anch chitil chend chading kumurumbukin Nzamb. Ndiy wamuleja Yehova patok anch: “Nasala nayimp kudi ey, kudi ey kamu, nasala yom yiyimp ku mes mey.” (Kuseng 51:4) Mudi, mwawilay Yosef mu choziu, kom kend kumubachika ku kwipul anch: “Am nikutwish nchik nlel kusal kuyip mudi kwinoku, ni kusal kand chitil kurutu kwa Nzamb?”​—Disambishil 39:9.

Chitil chirumburikinap kwov kuyip mulong tukutwish kwov usany bwat. Chidiap kusu mulong wa kwakul ku yakul ya antu tuktutwisha kwiyov aburedina chom kanang. Kujip chijil cha Nzamb piur pa masandj, win-yakin, kalimish, kwifukwil, ni yom yikwau, kuyipishining urund wetu wa piswimp ni ndiy. Anch twasal chitil cha kwisotil, twisadin ayinetu kwikal akankuny a Nzamb. Wawiy uyakin witina kutongijokin nakash.​—1 Yohan 3:4, 8.

Chawiy lel, chom ik chashikena piur pa chitil? Chimeken patok anch kwikil chom chayishikena. Antu asambishin kwau kuchitazuk pa majin makwau ni kuchingejin anch chikez kushadish usu wach. Chikwau kand, antu avud alika kwitiy yiyilejinau kudi kom kau. Antu awonsu asotina kwitiyik kudi Nzamb afanyidin kujijaman ku chaku chinench. Mudi mu twatesha, difut dia chitil didiap kwov kuswan ku muchim ap usany pakwez didi rufu. Chitil chidi mulong wa mwom ap rufu.

Rusangu ruwamp ridi anch dilikishin kusutil ku usey wa kukolik nich wa yakupesh ya Yesu dikwikalaku anch twakarumuk chakin ni kudiokal ku yitil yetu ni kuyilik. Paul wafunda anch: “Ayuka kwau antu alikishidinau kal kuyip kwau kudi Nzamb, awiy kamu ajimangeshinay kal yitil yau. Wayuk kwend muntu wakad kuchindilau yitil yend kudi Mwant Nzamb.”​—Rom 4:7, 8.

[Dizu didia kwishin kwa paj]

[Kamushet/​Chipich chidia pa paj wa 10]

Kukarumuk kwa Teoloji

Antu avud ayilinga mu egliz Katolik alondining anch, chitongijok cha Limbes chovikeningap. Mu mivu dikum yasutina, asambisha kuvuramen chitongijok chinech pakemp pakemp​—ni kushiken ku kukangany kuchisadin kand mu malejan maegliz. Mu muvu wa 2007, Egliz Katolik wafunda mukand kudi antu awonsu anch kakutwishap kulejan kand “malejan” ma Limbes, mu mukand umwing afundin anch “Teoloji ni Liturji yilejen kuchingejin anch an afila pakad kutambul dibatish akutwish kuyipandish ni kuyinkish musangar wa chikupu.”​—Commission théologique internationale.

Mulong wak chitongijok chaswimpin, ov, Teoloji wakarumukin kal? Chimeken chakin anch, chinech chamukwasha egliz kudiokal mu uswik utazukinau kudi mwin kufund umwing mwin France Henri Tincp anch “uswan ulimina, wakasikeshau mu chirung cha Moyen Âge kushik mu yitot ya mivu 20, kudi egliz wasadilau, ni kusanger kusadil chitongijok cha Limbes mulong wa kuyibachik anvaj chakwel ayibatisha swaa anau anch chitwishikin.” Pakwez kukarumuk kwa malejan ma Limbes kwalangwishin kand yipul yikwau.

Yishankur ap Bibil? Kwambatan nich rusangu ra muntu, chitiyij cha Limbes chasambisha pa chisu kwadinga kutadikijan kwa teoloji piur pa pirgatwar mu chitot cha mivu cha 12. Egliz Katolik wafundisha anch mupim upandining kupwa kwa rufu, ni uyiling kutan ndond kudia mipim ya an yakanganya kuya mwiur mulong kayibatishap pakwez kiyikuyap mu dijiy dia kasu. Kwawiy kwasambisha malejan ma Limbes.

Pakwez Bibil kafundishinap anch mupim upandining kupwa kwa rufu. Chikwau kand, ulondin patok anch pandond pa kwikal wakad kufa, mupim wa muntu usadina chitil akez ‘kaujiyish’ ni “ukez kufa.” (Midimu 3:23; Ezekiel 18:4) Mulong mupim ukat kufa, kwikilingap ndond yitazukiningau anch Limbes. Chikwau kand, Bibil ulejen patok anch rufu ridi mwikadil wakad kwijik chom ap chimwing, ridi mudi tul.​—Mulej 9:5, 10; Yohan 11:11-14.

Bibil ulejen anch kudi Nzamb an akemp akweta anvajau in Kristu adi atumbila. (1 Korint 7:14) Dizu dined dielap kwikal dia usey anch dibatish dia an akemp diading dia usey mulong wa kukolik kwau.

Malejan ma Limbes mading chakin kamu masaal kudiay Nzamb, mading mamumekeshin anch udi mwin chisum ukat kuyipup antu akad milong, pandond pakwikal Tatuku mwin rukat ni mwin kutentam mudi mudiay. (Kuvurik Yijil 32:4; Mateu 5:45; 1 Yohan 4:8) Chishimokishinap pa kuman anch malejan minam makad kudiokal mu Bibil makwetingap kwau kurumburik kudi in Kristu akin.

[Yipich yidia pa paj wa 9]

Kushakam kwambatan nich Dizu dia Nzamb kuletining urund uwamp ni Nzamb kupwa ni Antu akwau