Ov, An Akutwish Kwilej Piur pa Nzamb?

“Tukwet marelijon mavud mulong wa kukisijan, pakwez makemp kusu mulong tukatijana umwing ni mukwau.”—MWIN KUFUND WA MU ANGLETERRE JONATHAN SWIFT.

SWIFT walejan chitongijok chinech mu chitot cha 18, pakwez antu avud nlel akutwish kumwitiyij. Pa chinech, amwing itiyijin anch anvaj kafanyidinap kwikal nich mbil ya kuyilej anau piur pa Nzamb. Atongin anch chidingap cha ukwash mu mitapu kanang kudi an kupamin mu relijon wa dijuku diau.

Ov, utongin nchik? Chisu chitongijok cha usey pakach pa yitongijok yilondwila ey?

● Chifanyidinap kuyilik anvaj ayileja anau piur pa Nzamb.

● Anvaj afanyidin kuchingel kushik ni pa chisu chikupamau anau kurutu kwa kwisamb nau piur pa relijon.

● Pachidiau an akemp, anvaj afanyidin kuyilej anau yitiyijinau piur pa Nzamb. Pakwez anch anau akemp apam, anvaj afanyidin kuyikasikesh chakwel kutongijokin piur pa mulong winou ayinau.

● An akemp afanyidin kwitiy yitiyij ya anvajau piur pa Nzamb pakad kwipul anch yidi yakin ap bwat.

Ov, Relijon Ukat Kuyipish An?

Anvaj akad kubangin asotining kuyipish an. Pakwez, ov, chom chinech chikasikeshidin mazu ma antu ayikangeshina an kwilej piur pa Nzamb? Mu makum ma mivu katat, in kukimbijol ilejin nakash usu ukweta yitiyij ya relijon wa anvaj pa an akemp. Ov, in kukimbijol inay ileja chom ik kusutil ku kwilej kwau?

In kukimbijol ajingunina anch pa ndond ya kwikal nich usu wa kushesh, relijon ukutwish kwikal nich chibudikin chiwamp mu kupam kwa mwan. Mu 2008 gazet Social Science Researcha wapalangesha rapor ulondina anch: “Relijon umeken kwikal ukasikeshina mwoj umukasina mwan ni anvaj awonsu aad amaku ni atatuku.” Rapor winou ulondin kand anch: “Relijon ni mwom wa muspiritu yimeken kwikal chikunku cha usey mu mwom wa an avud ni yidi ya usey nakash ku urund wa mu dijuku.” Tal mutapu chovijadina chibudikin cha kukimbijol kwinoku ni yom yalonday Yesu Kristu anch: “Ayuk kwau antu ija anch: ‘Tukwet kuswir kwa yom ya Nzamb mu michim yetu.’”—Mateu 5:3.

Ov, chidi nchik piur pa chitongijok chakwel anch an afanyidin kupam kurutu kwa kwilej piur pa Nzamb ni relijon? Chitongijok chinech chivuramedin mulong unou: manangu ma mwan madi mudi chipaz chamwamu chichingendina chakwel achizwisha. Chakin kamu, anvaj afanyidin kutond, ap kwizwish “chipaz” chinech ku chikumbu nich yijil ya mwikadil ni yitiyij yimenau anch yifanyidin ap kutond kulikidil ruval wa yitongijok ya pol pa chikumbu yizwila mu manangu ni mu muchim wa mwan.

Ov, Wisu Ujindj?

Rusangu rimekeshin anch antu akutwish kusadil yitongijok ya chirelijon mudi diyingishil dia kuyikis antu akwau. Chawiy lel, mutapu ik ukutwishau anvaj kwipuk chibudikin charumburilay Jonathan Swift? Mutapu ik ukutwishau kuyilej anau yitiyij yikutwisha kuyikwash kuyikat akwau?

Ujindj wimedin mu kutan chakul ku yipul yisatu ey: (1) Ov, yom ik yifanyidinau an kwilej? (2) Nany ufanyidina kuyilej? (3) Yisu milad ya kulejan yisadila nawamp?

[Dizu didia Kwishin kwa paj]