Yipul Ya In Kutang . . .

Ov, divu dikez kwikal ni nsudiel?

▪ Antu amwing atonga anch divu dikez kushik kwinsudiel mu Mwinkind 21, 2011. Disudiel diashikap. Chawiy lel, uprofet wa Harold Camping walejana mwamu ku radio wa États-Unis wamekana anch wading wa makasu. Ndiy watakela kulejan anch Dichuku dia Dirumburish dikez kushik pa Ndol-Mem 21, 2011—kuzal kwa divu kwamushena kukez kunyikesh divu diawonsu, ni mu angond atan, pa Mwinkind 21, divu dikez kusheshik.

Pakwez, divu dikezap ap pakemp kushik kwinsudiel. Sakatang wa divu kakezap kulikidil anch yom yiney yishikena. Dizu diend dilejen anch: “Ey wakunyin divu, dishicha.”—Kuseng 119:90.

Pakwez, in kutang Bibil amwing akutwish kutadik anch, divu dined akez kudishesh nich kasu. Akat kujimbul mukand wa 2 Pita 3:7, 10 mulong wa kukasikesh chitongijok chinech anch: “Chawiy maur ni divu, mangand ma katat, ayilamidin kand ku dizu dia Nzamb chakwel yez yisheshik nich kasu. Ayilamin mulong wa kuchingel Dichuku dikurumburishay Nzamb ni kuyishesh antu amubwambwidila ndiy. . . . Pakwez Dichuku dikez kurumburishay [Yehova] dikez kuyikashimwish antu mudi mukat kwezay mwij. Pa Dichuku dinidia maur makez kushadik nich chidjimin chijim cha wom. Yom yawonsu ya mwiur yikweta yimunyik yikez kwengurik nich kasu, chad divu ni yom yawonsu yidiamu yikez kutem.” Ov, mwawiy chifanyidina kutesh mazu minam ma Pita?

Bwat, chifanyidinap kumatesh mwamu. Ov, mulong wak? Mulong kurumburik kwa maverse minam kufanyidin kwambatan nich chitongijok cha mukand wa Pita ni kwambatan kand nich yifundinau mu Bibil mwawonsu. Chitongijok cha ma verse minam chikutwish kurumburik anch maur—ap mamiliyon ni mamiliyon ma atutumbu ni yom yikwau—ni yikez kusheshik ku kasu mulong kusu wa antu ayimp adiamu. Ov, ukez kushesh ma kilometre ni ma kilometre ma usukuril mulong dibuj dimwing dia usukuril didiap mutapu usotina? Kudi kuburen manangu! Chawiy lel Yehova kakezap kushesh yom yawonsu yatangay mulong wa kubwambul kwa chom chimwing chatangay.

Chikwau kand, chitongijok chinech chambatenap nich mazu ma Yesu malonday anch: “Ayuk kwau itudishila, mulong awiy akez kuswan ngand.” (Mateu 5:5; Kuseng 37:29, TMK) Ov, tatuku wa rukat ukutwish kutungin dijuku diend chikumbu chiwamp mulong wa kuchishesh kand? (Kuseng 115:16) Chitwishikinap kusadik mwamu! Yehova kadiap ching kusu Sakatang pakwez udi kand Tatuku wa rukat.—Kuseng 103:13; 1 Yohan 4:8.

Pita wasadila dizu “divu” mu chifanikesh, wisambina piur pa chisak cha antu—pa chinech piur pa antu ayimp. Shinshikin anch Pita wilikeja nich Mabeb ma pa chirungu cha Nowa. (2 Pita 3:5, 6) Pa chisu chinech, ayishesha ching kusu antu ayimp; divu, Nowa ni dijuku diend apanda. Chilik chimwing, Pita ukat kusadil kand dizu “maur” mu chifanikesh. Chawiy lel, dizu “maur” dirumburikin winyikel wa antu piur pa antu ayimp. Chad, antu awonsu ayimp akez kuyishesh, ni winyikel uyimp, akez kuushesh ni kuuswinkesh nich winyikel wa mwiur wa Nzamb, ap Want.—Daniel 2:44.

Ov, divu dikez kwikal nich nsudiel? Bwat. Chikeza kwikal nich nsudiel didi divu dia mu chifanikesh, ap chisak cha antu ayimp. Divu adinad ni chisak cha antu awamp yikez kwikalaku chikupu.—Jinswir 2:21, 22.