Ilejina Ku Dizu Dia Nzamb

Mulong Wak Nzamb Ukwet Dirijek?

Mutu wa mulong winou ushinshikidin pa yipul ukutwisha kwiyipul ni ulejen kwisu ukutwisha kutang yakul mu Bibil wey. Atuman a Yehova akez kusangar kwisambin ney piur pa yakul yiney.

1. Ov, mulong wak Nzamb wayitenchika in Isarel?

Nzamb watenchika muchid wa an a nshakur Aburaham ni wayinkisha muruzu wa yijil. Ndiy wayitazuka anch muchid wa in Isarel ni wasala anch alama difukwil diakin ni Dizu diend, Bibil. (Kuseng 147:19, 20) Chawiy lel, michid yawonsu yafanyidina kutambul chiyukish.​—Tang Disambishil 22:18.

Nzamb wayitonda in Isarel chakwel ikala atuman end. Padingau in kuziyil, awiy atambula yiyukish ya kuziyil ku yijil ya Nzamb. (Kuvurik Yijil 4:6) Kusutil ku kwilej rusangu ra in Isarel, tukutwish kwijik yom yivud piur pa Nzamb wakin.—Tang Isay 43:10, 12.

2. Ov, mulong wak in Kristu akin irijekin?

Pashadishay Isarel dilau dia Nzamb, ni Yehova waswinkesha chikumangen cha in Kristu pa ndond ya muchid winou. (Mateu 21:43; 23:37, 38) Pasak, in Isarel ading atuman a Nzamb. Katat, in Kristu akin asadil mudi atuman a Yehova.—Tang Midimu 15:14, 17.

Yesu wayifundisha in kumulondul end chakwel apana uman piur pa Yehova ni kusal in kwilej mu mangand mawonsu. (Mateu 10:7, 11; 24:14; 28:19, 20) Mudimu winou wikadil kal ukash. Pakusambish, Yehova wakumangeja ma miliyon ma antu a michid yawonsu mu difukwil diakin. (Kujingunik 7:9, 10) In Kristu akin irijekining kand chawiy lel akutwish kwikasikesh ni kukwashijan umwing ni mukwau. Akwet program umwing wa kwilej Bibil mu mangand mawonsu ku yikumangan yau.—Tang Hebereu 10:24, 25.

3. Ov, Atuman a Yehova asambisha pa chirung chetu mutapu ik?

Dirijek dia katat dia Atuman a Yehova diasambisha mu muvu wa 1870. Ka chisak kakemp ka in kwilej Bibil kasambisha kujingunin uyakin wa Bibil washadishau pasak. Ijika anch Yesu watenchika chikumangen cha in Kristu mulong wa kulejan. Chawiy chasambishau kampany wa kulejan Want mu mangand mawonsu. Mu muvu wa 1931 itiyija dijin dia Atuman a Yehova.​—Tang Midimu 1:8; 2:1, 4; 5:42.

4. Ov, mutapu ik wirijekinau Atuman a Yehova nlel unou?

Mu chitot cha kusambish cha mivu, mu jingand jivud yikumangen ya in Kristu yatana chiyukish chadiokala ku chisak chitakedila chitiyija anch Yesu udi Mutu wa chikumangen. (Midimu 16:4, 5) Chilik chimwing nlel unou, Atuman a Yehova itiyijin anch Yesu udi Ntakel wau. (Mateu 23:9, 10) Atambwil kand chiyukish chidiokila ku umutakel wa Chisak Chitakedila cha amakurump akweta ukaliweny chipanina dikasikesh ni umutakel udiokila mu Bibil ku yikumangen 100 000 ni kusut. Mu chikumangen ni chikumangen mudi antu awanyishina yitinau asadila mudi amakurump, ap atulam. Antu inay alamin yisak ya amikoku a Nzamb nich rukat.—Tang 1 Pita 5:2, 3.

Atuman a Yehova irijekin kal mulong wa kulejan rusangu ruwamp ni kwikadish in kwilej. Mulong wa kuyikwash antu adia kwindond jawonsu, akat kukarumun, kuchap, ni kupalangesh mikand ya kwilej nich Bibil mu jindim 500 ni kusut. Mudi mwasalau atwimbuy, alejen ku chikumbu ni chikumbu. (Midimu 20:20) Ilejin Bibil ni antu akatishina chakin kamu uyakin. Mulong antu a Yehova atekin manangu mau pa kumusangaresh Yehova ni kuyikwash antu akwau, awiy asadil dirijek dia antu akweta musangar.—Tang Kuseng 33:12; Midimu 20:35.

Chakwel wileja yom yivud, tang shapitre wa 19 wa buku winou wapalangeshau kudi Atuman a Yehova, Chom Ik Chakin Kamu Chifundishinay Bibil?