Kangal Watalany Yom Yidia “Kwinyim”

“Muntu mwawonsu anch wakwat rukasu mu chikas, wasambish kudim, chad ndiy ukat kutal kwinyim, mwinou kawanyidinap kwikal mu Want wa Nzamb.”— LUKA 9:62.

OV, MUTAPU IK UKUTWISHA KWAKUL?

․․․․․

Mulong wak tufanyidin kuvurik “rusangu ra mband wa Lot”?

․․․․․

Yom ik yisatu tufanyidina kwipuk kutongijokin chisu ni chisu?

․․․․․

Mutapu ik tukata kwend pamwing nich dirijek dia Yehova?

1. Yesu wapana kubabesh ik, ni chipul ik chilankina?

“VURIKANY rusangu ra mband wa lot.” (Luka 17:32) Kubabesh kwinoku kwababeshay Yesu Kristu pasutin kal mivu piswimp 2000 kudi katat kwa usey nakash kupandakanamu pakusambish. Ov, chom ik chasotay kulond Yesu kusutil ku dibabesh dined diakin? In kumutesh Ayuda kadingap nich kuswir kwa kurumburil kukwau. Ading ija yom yamushikena mband wa Lot. Pachinay mu Sodom ni dijuku diend, wabwambwila wakarumuk watal mes kwinyim ni ndiy wikala dinguj dia mungu.​—Tang Disambishil 19:17, 26.

2. Mulong wak pamwing ap mband wa Lot watala kwinyim, ni chisal chend cha kulik kuziyil chamuletina yik?

² Chad mulong wak mband wa Lot wakarumuka watal kwinyim? Ov, wading usotin kwijik yom yadinga yisadikina? Ov, wakarumuka watal kwinyim mulong wa kuburen ruchingej ap kuburen kwa ritiy? Ap, ov, rading kamu rusot ra kutal yom yawonsu yashay kwinyim mu Sodom? (Luka 17:31) Chikalap nchik diyingish diend dia kutal kwinyim mwom wend washeshika mulong wa kuburen kuziyil. Tongijokin bil pa chinech! Wafa dichuku diawiy dimwing mudi antu in kwijond a mu Sodom ni Gomor. Pakad kwidjidjek Yesu walonda anch: “Vurikany rusangu ra mband wa Lot”!

3. Mutapu ik wakasikeshinay Yesu anch tufanyidinap kutal kwinyim mu chifanikesh?

³ Niyetu tudi pa chirung chidia cha usey chitufanyidina kwipuk kutal kwinyim mu chifanikesh. Yesu wakasikeshina pa dinans dined pamwakulay ikundj umwing wamwita anch ukutwish kuchirik ku dijuku diend chakwel ayiladika ni kupwa ikala mwin kwilej wend. Yesu walonda anch: “Muntu mwawonsu anch wakwat rukasu mu chikas, wasambish kudim, chad ndiy ukat kutal kwinyim, mwinou kawanyidinap kwikal mu Want wa Nzamb.” (Luka 9:62) Ov, Yesu waburena ranaken ap manangu mu kwakul mu mutapu winou? Bwat kwau, mulong wading wij anch kwit kwa ikundj winou kwading kusu mutapu wa kwipuk chisend. Yesu walejana anch kuladik yom mwamu kwading mudi kutal ‘yom yidia kwinyim.’ Ov, kudi mulong anch muntu wakwat rukasu mu chikas chisu chikemp watal yom yidia kwinyim ap chakin kamu watul rukasu ni wakarumuk kwinyim? Mutapu ukwikalay uzuwodilau ku yom yisadilay, ni mudimu wend ukutwish kukwachik mu mutapu uyimp.

4. Ov, tufanyidin kulam mes metu matadila pa yom ik?

⁴ Pa ndond pa kusambish kuvurik yom ya pasak, tufanyidin kudandamen kushinshikin mes metu pa yom yidia kurutu. Tushinshikin mutapu ulondilau patok piur pa chinech mu Jinswir 4:25: “Djindul mes mey utal neng kurutu, ni mes mey matal sweeng kurutu kwey.”

5. Ov, diyingish ik tukweta dia kulik kutal yom yidia kwinyim?

⁵ Tukwet diyingish diwamp dia kulik kutal pa yom yidia kwinyim. Ov, diyingish ik? Minam madi “machuku ma kwisudiel.” (2 Tim. 3:1) Katat tukat kurish nich, kangal kusu ni kusheshik kwa misumb yaad yiyimp, pakwez kusheshik kwa ditenchik diawonsu dia mangand. Chom ik chikutukwasha twipuka chom chin chawonsu chifanikena ni chamushikena mband wa Lot? Chakusambish, tufanyidin kujingunin yom kanang yidia kwinyim kwetu yikutwisha kutupak chakwel tutala. (2 Kor. 2:11) Chawiy lel, tushinshikinany yom kanang, yikutwisha kutupak tutala kwinyim ni kukwat mupak wa kwipuk kutal yom yiney.

MACHUKU MAWAMP MA PASAK

6. Mulong wak manangu metu madiap ma kuchingejin?

⁶ Ubaj umwing ujim chidi chitongijok cha makasu cha machuku ma pasak mawamp. Manangu metu madiap ma kuchingejin. Tukutwish pakad kwijik kudiburil milong twadinga nich pasak ni pa chisu chawiy chimwing kupandakesh musangar, kusal chimekana anch yom yadinga yiwamp nakash kupandakanamu mutapu yading chakin kamu. Kuvurik kwinoku kuyimp kukutwish kutusal tusota nakash machuku mawamp ma pasak. Pakwez Bibil utubabeshin anch: “Kangal walond anch: ‘Mulong wak machuku masutila mading mawamp kupandankan ma katat?’ Mulong kwinoku kudiap kwipul kwa manangu.” (Mul. 7:10) Ov, mulong wak mulad winou wa kutong udi wa ubaj?

7-9. (a) Yom ik yayishikena in Isarel mu Idjibit? (b) Ov, in Isarel amana mayingish ik ma musangar? (c) Ov, piur pa chom ik pasambishau in Isarel kwinan ni kununganijan?

⁷ Shinshikin chayishikena in Isarel mu machuku ma Moses. Ap anch in Isarel ading ayimen pakusambish mudi angez mwi ngand ya Idjibit, kupwa kwa chirungu cha Josef in Idjibit “ayitekina in Isarel amakurump in kuyilam kwakuyimesh mar ni yisend yilimina.” (Kub. 1:11) Antu a Nzamb ashikena ku kurish nich mulad umwing wa kujiyish muchid pasotay Farao kukepish uvud wau. (Kub. 1:15, 16, 22) Pakwez, chishimokishinap, anch Yehova wamuleja Moses anch: “Am namen kal mar ma antwam adia mu Idjibit. Nateshil kal kudil kwau mulong wa in kuyilam au, nij mar mau.”—Kub. 3:7.

⁸ Ov, ukutwish kutong musangar wovau in Isarel pabudikau mwi ngand ya uswik wau mudi antu akweta want ipau? Mu mutapu wamushena, apana uman wa dikand dia Yehova paletay Yipupu Dikum padiay Farao mwin chibud ni antu end. (Tang Kubudik 6:1, 6, 7.) Chakin kamu, in Idjibit kashikenap ching kusu ku kuyilikidil in Isarel chakwel aya pakwez ayopata chakwel aya swa, ayinkisha yileng yivud ya utad wa argent ni ya utad wa or chawiy chalejanau anch antu a Nzamb ‘ayibuwau in Idjibit.’ (Kub. 12:33-36) In Isarel asangara kand pamanau kusheshik kwa Farao ni amasalay end mu Karung Usuz. (Kub. 14:30, 31) Chikwikal chikasikeshina ritiy mud ik kupan uman wa yisal yamushena mudi yiney!

⁹ Pakwez, chovikenap, mulong mu chisu chinech chikemp kupwa kwa kukwolik kwau mu chilay, antu inay amwing asambisha kand kwinan ni kununganijan. Mulong wak? Mulong wa yakudia ! Alika kusanger yom yadingay Yehova ni kuyinkish ni inana anch: “Tukat kuvurik ansh twadinga ni kudia chamwamu mu Idjibit, ni yibat, ni sausau, ni sabol wa mutapu ni mutapu, ni sabol wa didjimb dikash, Pakwez katat usu wetu wapwa kal. Twaburen kal chom chawonsu ching kusu yakudia ya mwiur tumenaku.” (Kuch. 11:5, 6) Mwaning, chitongijok chau chading chijondila—nakash mud ik mu chilik chakwel anch asota ap kuchirik mwi ngand ya uswik wau! (Kuch. 14:2-4) In Isarel atala yom yadinga kwinyim ni ashadisha kwitiyik kwa Yehova.—Kuch. 11:10.

10. Chilakej cha in Isarel chaleta dilejan ik kudi etu?

¹⁰ Ov, dilejan didi disu kudi etu nlel unou? Piturishina ni yikokujol ni milong kanang, tufanyidinap kutek manangu metu pa yom yamekana pasak mudi yom yiwamp—pamwing ap kurutu kwa kushiken ku ronganyin ra uyakin. Ap anch chiyipinap kutongijokin pa malejan matwileja kusutil ku yom yasadika pasak ap kuvurik yom yiwamp, tuswiridin kulam kwisikan, chitongijok chisikena piur pa yom ya pasak. Chikwau kand, tukutwish kukasikesh kulik kusanger kwetu kwa mikadil yetu ya katat ni kusot kuchirikin ku mulad wa mwom wetu wa pasak.—Tang 2 Pita 2:20-22.

YAKUPESH YA PASAK

11. Mutapu ik umenau antu amwing yakupesh yau ya pasak?

¹¹ Cha ushon, amwing atadil kwinyim piur pa yakupesh yapanau pasak ni kuyiman mudi yisu yashadishau. Pamwing ap wadinga ni yisu ya kwilej shikol yijim, ya kwikal nich katumb, ap ya kwikal ni nfalang jivud, pakwez wakwata mupak wa kulik kukimbijol yom yiney. Akadivar ni anambaz avud asha kwinyim mikadil ya nfalang mu chingand cha wingend a mushing, cha kwipuwangesh, cha kwilej, ap cha sport. Katat chisu chasut kal, ni nsudiel kand kal yeza ni katat. Ov, ukat kutongijokin piur pa yom yela kushiken anch walika kwipan mudi kwinoku?

12. Mutapu ik wovay Paul piur pa yom yashay kwinyim?

¹² Kambuy Paul walika yom yivud chakwel ikala mwin kumulondul Kristu. (Fil. 3:4-6) Mutapu ik wovay piur pa yom yashay kwinyim? Watuleja anch: “yom yawonsu yinadinga ni kusal pa kuziyil Yijil ya Moses chakwel nikala muntu mujim, katat nimen anch yom yiney yawonsu kiyikwetap usey mulong wa yom yasadilay Kristu.” Ov, mulong wak? Udandamedin anch: “Am nimen anch, yom yawonsu yidi yamwamu kamu, mulong wa usey ujim upandakena wa kumwijik Kristu Yesu Nsalejam. Mulong wa kumwambat ndiy am nashadishin kal yom yawonsu, niyimen anch yidi kwau dishit divundila, mulong nisotil kwikal wayen wa Kristu.”a (Fil. 3:7, 8) Mudi kamu muntu udjibwila chom chakad usey, kupwa pakad kwinan, Paul kinanap mulong wa chom ap chimwing piur pa mitapu ya kutan mapit ma kumujimbu yashay kwinyim. Kwovap ap pakemp anch yading ya usey.

13, 14. Ov, mutapu ik tukutwisha kulondul chilakej chashay Paul?

¹³ Ov, chom ik chikutwisha kutukwash anch twajingunin ayinetu anch twasambish kal kutongijokin piur pa yitazukinau anch yisu tushadishina ya kusal yom kanang ya ku mujimbu? Londul chilakej chashay Paul. Ov, mutapu ik? Shinshikin usey wa yom udia nich nlel. Wikadil kal nich urund wa usey nenday Yehova ni wikadila kal ni ritiy rijim mudiay ndiy. (Heb. 6:10) Ov, mafut ik ma ku mujimbu makutwisha mangand kupan makutwisha kushejin piswimp ni yiyukish ya muspiritu tukweta nlel ni tukwikala nich mu machuku ma kurutu?—Tang Marko 10:28-30.

¹⁴ Paul ulejen kand chom chimwing chikeza kutukwash kudandamen kushinshaman. Ndiy walonda anch nading “nivuramen yom yawonsu ya kwinyim, chad nikasikesh nich usu wam wawonsu chakwel nitambul yom yezila kurutu.” (Fil. 3:13) Shinshikin anch Paul ukasikeshidin yisal yaad, yawonsu ya usey. Chakusambish, tufanyidin kuvuramen yom twashila kwinyim, kangal twasheshany usu wa usey ni chisu mu kwiyakamish chipandikenamu piur pa yom yiney. Cha kaad, mudi mwin kubambel mau pa mulong wa kupwishil, tuswiridin kuya kurutu, kulam mes metu pa yom yidia kurutu.

15. Ov, chiyukish ik tutambwila pitukata kutongijokin pa yilakej ya atushalapol ashinshamena a Nzamb?

¹⁵ Anch twatongijokin pa yilakej ya atushalapol a Nzamb—a pasak ap a katat—tukutwish kutambul chibachikin chikwau chakwel kudandamen kuya kurutu pa ndond pa kutal yom yidia kwinyim. Chilakej, anch Aburaham ni Sara adandamena kutongijokin pa Ur, “ing elang kwikal nich mutapu wa kuchirikinamu kand.” (Heb. 11:13-15) Pakwez kachirikap kwinikwa. Moses pakusambish washa kwinyim yom yivud mu Idjibit kupandakanamu in Isarel akwau. Pakwez, kwikil rusangu ra kusot kwend yom yiney. Chinyim ni chinech, rusangu ra Bibil ritulejin anch, “witiya anch antu amudiul mudi mumudiwilau Kristu, mulong kudiul kwinoku kukwet usey upandakenamu mapit mawonsu ma in Idjibit, mulong mes mend mading matadil ku difut dikutambulay kurutu kudi Nzamb.”—Heb. 11:26.

YOM YIYIMP YASHIKENA PASAK

16. Ov, mutapu ik tukutwisha kukwachik nich yom yashikena pasak?

¹⁶ Pakwez, yidiap yawonsu yashikena pasak, yikutwisha kumekan anch yiwapin. Pamwing ap tukwachikin nakash nich yitongijok piur pa yitil ap yilim twasala pasak. (Kus. 51:3) Tukutwish kwov kand ni katat ukash wa chiyul chikash twatambwila. (Heb. 12:11) Kasolikany—kakin ap pamwing ap twamana—kakutwish kuyikel yitongijok yetu. (Kus. 55:2) Chom ik tukutwisha kusal chakwel twikala nich kashinsh anch tukutwish kulikidil yom yiney yisala anch tushinshikina pa yom yidia kwinyim? Shinshikinany yilakej yisatu.

17. (a) Mulong wak Paul wimekesha amwinend mudi “mukemp wa kwisudiel kwa antu a Nzamb”? (b) Chom ik chamukwasha Paul kulik kukwachik nich yitongijok yiyimp?

¹⁷ Yilim ya pasak. Kambuy Paul wimekesha amwinend mudi “mukemp wa kwisudiel kwa antu a Nzamb.” (Efes 3:8) Ov, mulong wak wiyova mwamu? Ndiy ulejen anch: “Mulong am nayizengola in Chikumbu cha Nzamb.” (1 Kor. 15:9) Ov, ukutwish kutong mutapu wafanyidinay Paul kwiyov pasankanay antu amwing azengolay pakusambish? Pakwez, pa ndond ya kulikidil kukwachik nich yitongijok yiney yiyimp ni kumukangesh, Paul walama yitongijok pa ranaken ramumekeshinau. (1 Tim. 1:12-16) Kujikitish kwovay kwamukasikesha mu mudimu wend. Mu mwikadil wend wa chitil wa pasak mwading kand yom yasalay Paul usu chakwel avuramena. Anch niyetu twalam mes pa ranaken ratumekeshinay Yehova, tukez kwipuk chakwel usu wetu kangal washeshik nich yakamish yipandakenamu piur pa milong ya pasak yitwakad kutwish kuswimp. Tukutwish kusadil usu wetu mu mudimu utwinkishinau.

18. (a) Chom ik chikutwisha kusadik anch twatongijokin mutapu uyimp pa chiyul twatambula? (b) Mutapu ik tukutwisha kutesh mazu ma Salomon piur pa kwitiy chiyul?

¹⁸ Chiyul chovishena kuyip. Chikwikal nchik anch twasot kutongijokin ni ujim pa chiyul kanang twatambwila? Chinech chikutwishap ching kusu kutwovish kuyip pakwez kand kutuchirish kwinyim—kusal anch ‘tuziya.’ (Heb. 12:5) Ap anch ‘twapipej’ chiyul mulong tulikin kuchitesh ap ‘tuziyin’ mulong tukat kuchitiyij ni kupwa twalik, chibudikin chidi kwau cha chilik chimwing—tukatap kulikidil chakin kamu chakwel tutana ukwash ni chitokish mu chiyul chinech. Chiwapil mud ik kutesh mazu minam ma Salomon malonday anch: “Lam ba malejan, kangal wamadjibul. Malama, mulong mawiy madia mwom wey.” (Jinsw. 4:13) Mudi mwin kwendish motak ukata kuziyil ku yijingidij ya njil, el amboku twitiy chiyul, tuchisadil, ni tuya kurutu.—Jinsw. 4:26, 27; tang Hebreu 12:12, 13.

19. Mutapu ik tukutwisha kwimburij ritiy ra Abakuk ni ra Jeremiy?

¹⁹ Kasolikany—kakin ap kamekena. Tukutwish kwov chisu chimwing mudi muprofet Abakuk, wamuleja Yehova mulong wa kasolikany, pakad kwijik mulong wak Yehova walikidila yom kanang ya kasolikany chakwel yishikena. (Aba. 1:2, 3) Chidi cha usey kudi etu kwimburij ritiy ra muprofet winou, walonda anch: “Ap mwamwap nchik nikez kasangar ni kuzangijal, mulong [Yehova] Nzamb udi Mupandish wam.” (Aba. 3:18) Mudi Jeremiy wa pasak, anch twalam “ruchingej” nich ritiy sens mudiay Yehova, Nzamb wakad kasolikany, tukutwish kuchingejin anch yom yawonsu akez kuyitenchik pa chisu chifanyidina.—Kud. 3:19-24.

20. Ov, mutapu ik tukutwisha kumekesh anch tuvurikin “rusangu ra mband wa Lot”?

²⁰ Tudi pa chirung chimwing cha musangar. Yom yamushena yikat kushiken katat ni yivud yikez kusadik mu machuku ma kurutu. Muntu ni muntu pakach petu ukutwish kudandamen kwend pamwing nich dirijek dia Yehova. Teshany amboku chiyul cha Mukand wa Nzamb cha kutal kurutu ni kwipuk kutal yom yidia kwinyim. Chawiy lel, tukez kumekesh anch tuvurikin “rusangu ra mband wa Lot”!

[Dizu didia Kwishin kwa paj]