Sangerany Mu Ruchingej Retu

“Ritiy riner ni malejan minam yidiokil ku ruchingej ra mwom wa chikupu. Nzamb wakad makasu watushilamu mwom winou pimadinga mangand kand kal amatanga.”—TITUS 1:2.

DICHIRIKIN

․․․․․

Ov, mutapu ik twija anch kukez kwikal musangar mwiur anch muntu umwing uzizidilau many walam mwom wend ushishamena?

․․․․․

Mutapu ik kukwatijadina kuwanyin kwa ruchingej ra amikoku akwau nich kwa azizidilau many?

․․․․․

Chakwel tumana mutapu rikeza ruchingej retu kuwanyin, ov, wisu “mwom utumbila” ni yisal ik ya “in kudandamen kudi Nzamb” tufanyidina kumekesh?

1. Ov, ruchingej rapanay Yehova kudi etu ritukwashin kujijaman mutapu ik?

KAMBUY PAUL walejana anch Yehova udi ‘Nzamb mwin kupan ruchingej.’ Kupwa, walejana kand anch Yehova ukutwish ‘kutwinkish chisambu ni musangar nakash kupandakan, mulong tumwitiyijin ndiy. Chad mwamu tukwikal nich ruchingej rujim nich ukash ukat kupanay Mwiku Utumbila.’ (Rom 15:13) Anch ruchingej retu ripandiken mudi etu, tukez kutwish kujijaman mikadil yin yawonsu yikeza kushiken, michim yetu yikwikal sens nich musangar ni chisambu. Mudi in Kristu azizidilau many, ruchingej riner rikez kwikal “chom chikwadikina ku mupim, ridi rakin ni kudandamen” kudi in Kristu akwau. (Heb. 6:18, 19, TMK) Ruchingej ridi chom chimwing tufanyidina kulam nakash mu chisu cha mar, chom chikeza kutukwash kwipuk kwidjidjek ap kuburen ritiy.—Tang Hebereu 2:1; 6:11.

2. Ov, ruchingej ik raad ridia pakach pa in Kristu lel unou, ni mulong wak “amikoku akwau” asanger piur pa ruchingej rikwetau kudi azizidilau many?

² In Kristu adia mu chirung chinech cha nsudiel atekin manangu mau pa rimwing ra ruchingej riner raad. Yid yishadilaku ya “kachisak ka amikoku” ka in Kristu azizidilau many yikwet ruchingej ra mwom wakad kufang mwiur, ra kwikal ant ni in kupesh pamwing ni Kristu mu Want wend. (Luka 12:32; Kuj. 5:9, 10) Antu avud nakash adia mu “chisak chipandiken kujimb” ap “amikoku akwau” alejen piur pa ruchingej ra kushakam mu paradis pa divu mudi mutu wa mulong wa Want wa Mesia. (Kuj. 7:9, 10; Yoh. 10:16) Amikoku akwau kakezap kuvuramen anch kukolik kwau kwimedin pa kuyikwash nakash “akadivar” azizidilau many a Kristu achidia pa divu. (Mat. 25:34-40) Azizidilau many akez kwandam mu difut diau, pakwez ruchingej ra amikoku akwau rikez kuwanyin chakin kamu. (Tang Hebereu 11:39, 40.) Cha kusambish, shinshikinany bil ruchingej ripaninau kudi azizidilau many.

“RUCHINGEJ RUJIM” RA IN KRISTU AZIZIDILAU MANY

3, 4. Ov, mutapu ik in Kristu azizidilau many ‘avadika kapamp kakwau mulong wa ruchingej rujim ra kashinsh,’ ni ruchingej riner chom ik?

³ Kambuy Pita wafunda mikand kudi in Kristu azizidilau many, atazukay anch “antu atonday Nzamb.” (1 Pita 1:1) Ndiy walejana kachom ni kachom piur pa ruchingej rapanau kudi kachisak kakemp. Mu mukand wend wa kusambish, Pita wafunda anch: “Tumujikitishany Nzamb Tatukwend wa Nsalejetu Yesu Kristu! Ku riy ren rijim twavadika kapamp kakwau mulong wa kuvumbuk kwa Yesu Kristu kwikal kand mwom. Mulong wa chom chinech tukwet ruchingej rujim ra kashinsh. Tuchingejin uswan wakad kuvund, ap kuyip, ap kusheshik ulaminau mwiur kudi Nzamb mulong wenen. En akulaminany ku dikand dia Nzamb, mulong wa ritiy ra dipandish dikez kumekeshau pa chisu cha kwisudiel. Sangarany mulong wa yom yiney ap anch wamananyap nchik mar ma mitapu ni mitapu mu chisu chikemp.”—1 Pita 1:3-6.

⁴ Uvud kanang wa in Kristu atondau kudi Yehova akwez kuyikel pamwing ni Kristu mu winyikel wa Want wa mwiur akez ‘kuvadik kapamp kakwau’ mudi mwan a Nzamb kapwokal wa mu spiritu. Adi azizidilau nich spiritu utumbila chakwel ikala ant ni in kupesh pamwing ni Kristu. (Kuj. 20:6) Pita ulejen anch ‘kuvadik kwinoku kusu’ kudi kwa awiy mudi “ruchingej rujim,” risambidinay anch “uswan wakad kuvund, ap kuyip, ap kusheshik” ralamau mulong wa awiy “mwiur.” Antu amwing ashimokin pa kuman anch azizidilau many ‘asanger nakash’ mulong wa ruchingej rau rujim! Pakwez, kuwanyin kwa richingej riner kwimedin piur pa kushinshaman kwau.

5, 6. Mulong wak in Kristu azizidilau many afanyidin kusal usu wau wawonsu chakwel kuyitazuk kwau kwikal kwa kashinsh?

⁵ Mu mukand wend wa kaad, Pita wayiyula in Kristu azizidilau many chakwel ‘ashinshikina nawamp pa kutazuk kwayitazukau ni kutond kwayitondau kudi Nzamb.’ (2 Pita 1:10) Afanyidin ayinau kusal usu wa kukudish mikadil yiney mudi ritiy, kwipan kudi Nzamb, kuyikatish akadivar, ni antu awonsu. Pita walonda anch: “anch ukwetany yom yiney yivud yikukukwashany kusal mudimu wa Nzamb wakad usweral.”—Tang 2 Pita 1:5-8.

⁶ Mu uruu wend wayituminay amakurump avadikina muspiritu a mu chikumangen cha mu chitot cha kusambish cha mivu cha Filadelifiy, mu Aziy Mukemp, Kristu wavumbulau walonda anch: “Ey walamin kal dizu diam nich kudandamen, chawiy niyam nikez kukuchidij pa chirung cha mar makeza kwez kudi antu awonsu a pa mangand, mulong wa kuyipak. Nikat kwez swa. Lam bang yom yakin yiukweta, chakwel kangal muntu wakwamuk chibangul chey cha kupandakan.” (Kuj. 3:10, 11) Anch mwin Kristu umwing uzizidilau many wafa mu ritiy, ndiy kakezap kutambul “chibangul cha uyaj chakad kusikang” chashilaumu kudi antu atondau chakwel ashinshamana djat ni ku rufu.—1 Pita 5:4; Kuj. 2:10.

CHIS CHA KWANDAMIN MU WANT

7. Ov, ruchingej ik ramushena risambidinau kudi Jud mu mukand wend?

⁷ Mu muvu wa 65 C.C., Jud mwanamakwend a Yesu wayifundina ambay nend in Kristu azizidilau many mukand, ni wayileja mudi “atazukau kudi Nzamb.” (Jud 1; ilikej nich Hebereu 3:1.) Ndiy wasota kuyifundin mukand wimedina pa ruchingej rijim ra kukolik risambidinau kudi in Kristu anch Want wa mwiur wa Nzamb ‘ukwetau awonsu pamwing.’ (Jud 3) Ap anch ndiy wading kand ni milong yikwau ya usey ya kuyilej, kwinsudiel kwa mukand wend wiswimp, ndiy wisambina piur pa ruchingej ramushena radinga kudi in Kristu azizidilau many, pafunday anch: “Kudi ndiy ukutwisha kukulamany wakad kuwa, ndiy ukutwisha kand kukulamany wakad kapad, ukukushikijany nich musangar ujim mu uyaj wend, ndiy kamu Nzamb umwing, Mupandish wetu mu Yesu Kristu Nsalejetu, chifanyidin kwikala uyaj, ni kujimb, ni dikand, ni ulabu, kudiokal ku mivu ni minang, ni katat, ni chikupu!”—Jud 24, 25.

8. Kwambatan nich Jud 24, chom ik chimekeshina anch kukwikal musangar mwiur anch muntu uzizidilau many wamekesh kushinshaman kwend?

⁸ Chakin kamu, in Kristu ashinshamena azizidilau many asotin kwilam chakwel kangal muntu ni muntu awila mu kusheshik. Ruchingej rau rimedina pa Bibil ridi anch Yesu Kristu ukez kuyivumbul ku rufu, ni kusal anch amekana mu kuwanyin kwa muspiritu kurutu kwa Nzamb nich musangar ukash. Anch muntu uzizidilau many wafa mwin kushinshaman, kudi ukashinsh wakwel anch ‘ukuvumbuk mu mujimbu wa mwiku,’ ukuvumbuk ‘wakad kuvund . . . , mu uyaj.’ (1 Kor. 15:42-44) Anch kudi “musangar mwiur anch mwin yitil umwing wakarumuk kudiokal ku yitil yend,” tongin bil musangar udia mwiur anch umwing pakach pa akadivar avadikina muspiritu washikij wapwish mwom wend wa kushinshamen. (Luka 15:7) Yehova ni yitangil yishinshamena ya muspiritu akez kusangar pamwing ni azizidilau may akeza kutambul uyaj wend “nich musangar ujim.”—Tang 1 Yohan 3:2.

9. Ov, ‘ayakin nawamp’ antu azizidilau many ashinshamena pakatau kwandam mu Want mutapu ik, ni ruchingej riner rikwet usu padi antu azizidilau many achidia pa divu mutapu ik?

⁹ Chilik chimwing, Pita wayifundina in Kristu azizidilau many anch ang amekesh anch awanyidin kuyitazuk kusutil ku kushinshaman kwau, “akez [kuyak] nawamp mu Want wa chikupu wa Nsalejetu, ndiy kamu Mupandish wetu Yesu Kristu.” (2 Pita 1:10, 11) Pakezau kwandam mu difut dia mwiur akez ‘kuyak nawamp,’ ngikadil yau ya win Kristu yikez kumunyik nakash. ‘Kuyak nawamp’ kukutwish kumekesh kand kujimb kwa yiyukish yikezau kutambul antu arisha nakash mu mashakamin mau chakwel atambula mwom. Akutwish kuvurik piur pa mwom wau ushinshamena nich muchim wizwila musangar ni kujikitish. Ruchingej riner riletin chakin kamu usu kudi in Kristu azizidilau many achidia pa divu chakwel ‘atenchika manangu mau mulong wa kudandamen kusal.’—1 Pita 1:13.

“RUCHINGEJ RIDI KWAKU” MULONG WA AMIKOKU AKWAU

10, 11. (a) Ov, ruchingej ik rikwetau amikoku akwau? (b) Mutapu ik kuwanyin kwa ruchingej ra pa divu rambatena ni Kristu ni “kumekan kwa an a Nzamb”?

¹⁰ Kambuy Paul wafunda piur pa ruchingej ra uyaj ra “an a Nzamb,” avadikina muspiritu ra kwikal “an a uswan” nenday Kristu. Chawiy lel ndiy wisambina piur pa ruchingej ramushena rikwetay Yehova pantaliken ni amikoku akwau avud nakash anch: “Yom yawonsu yatangay Nzamb [antu] yikatau kuchingel nich impu nakash kuman anany akumekeshay Nzamb mudi anend [azizidilau many]. Mulong yom yawonsu yatangay Nzamb ayifisha nich kwikal yakad usey. Kichadingap ku rusot ra yom iyinau, pakwez Nzamb amwinend watenchika mwamu. Chawiy ruchingej ridi kwaku anch dichuku dimwing yom yatangay Nzamb akez kuyikwol chakwel kangal yez kuvund. Chad niyau yikez kutambul want ipau wa uyaj pamwing nau an a Nzamb.”—Rom 8:14-21.

¹¹ Yehova wayinkisha antu “ruchingej ridi kwaku” papanay kushilamu kwend anch ukez kuyikwol mu makas ma “nnak mukur,” Satan Djabul, kusutil kwi “mbut” ya kushilamu. (Kuj. 12:9; Dis. 3:15) “Mbut” yiney pakusambish wading Yesu Kristu. (Gal. 3:16) Kusutil ku rufu ni kuvumbuk kwend, Yesu waleta mufulandal ukash wa ruchingej ra antu ra kukwolik mu uswik wa chitil ni wa rufu. Kuwanyin kwa ruchingej riner kwambaten nich “kuman anany akumekeshay Nzamb mudi anend.” Azizidilau many atumbila akez kwikal chikunku chikwau cha “mbut.” Awiy akez kwikal “akumekeshay Nzamb”pa chisu chikezau kusal pamwing ni Kristu mudimu wa kudishesh ditenchik diyimp dia yom dia Satan. (Kuj. 2:26, 27) Chinech chikez kuyipandish amikoku akwau, adiokila mu mar makash mapandakena.—Kuj. 7:9, 10, 14.

12. Kumekan kwa azizidilau many kukez kwikal nich yiyukish ik ya uyaj kudi antu?

¹² Ov, ukwash mud ik ukutambula ‘chitang’ cha muntu mu Mivu Kanan ya Kuyikel kwa Kristu! Pa chisu chinicha, “an a Nzamb” atumbishau akez ‘kuyimekesh’ kand pakezau kusal mudimu wa in kupesh nenday Kristu, mu kusadil yiyukish ya chakupesh cha difut dia Yesu mulong wa antu. Padiau yid ya Want wa mwiur, antu ap “yatangay” akusambish kuman kukwolik ku yibudikin ya chitil ni ya rufu. Pakemp-pakemp, antu aziyidila akez kuyikol “mu uswik wa yom yivundila.” Anch adandamen kushinshaman kudi Yehova mu Mivu Kanan ni chirung cha kupakiu kwa nsudiel kukeza kusadik kwinsudiel kwa mivu kanan, majin mau akez kumafund rawonsu mu “mukand wa mwom.” Akez kwandam mu “want ipau wa uyaj pamwing nau an a Nzamb.” (Kuj. 20:7, 8, 11, 12) Ruchingej ra katumb mud ik!

LAMANY RUCHINGEJ RETU RIKASH

13. Ov, pisu pimedina ruchingej retu, ni chisu ik chikezay kumekan Kristu?

¹³ Mikand yaad yapepilau kudi spiritu yafundau kudi Pita yikwet yom yivud yikutwisha kuyikwash azizidilau many ni amikoku akwau chakwel alama ruchingej rau rikash. Ndiy walejana anch ruchingej rau rimedinap pa yisal yau, pakwez rimedin piur pa ranaken ra Nzamb. Ndiy wafunda anch: “babalany, chad tekany ruchingej ren rawonsu ku ranaken riukutambulany pakumekanay Yesu Kristu.” (1 Pita 1:13.) Kristu ukez kumekan pakezay kupan difut kudi in kumulondul end ashinshamena ni kuyirumburish antu ayimp nich dirumburish dia Yehova.—Tang 2 Tesalonik 1:6-10.

14, 15. (a) Ov, chom ik tufanyidina kushinshikin chakwel tulama ruchingej retu rikash? (b) Ov, chiyul ik chapanay Pita?

¹⁴ Chakwel tulama ruchingej retu rikash, tufanyidin kushinshikin manangu metu ni kutek mwom wetu pa “dichuku dia Yehova” diezina. Dikeza kushesh “maur” ma katat, ap antu akata kuyikel, ni “mangand,” ap chisak cha antu ayimp ni “yom” yau. Pita wafunda anch: “Ov, ukwikalany antu a mutapu ik? . . . Piuchingedilany Dichuku dikurumburishay Nzamb. Chifanyidin en usalany usu chakwel Dichuku dined dishika swa. Dichuku dinidia diawiy dikeza kutem maur, ni yom yawonsu ya mwiur yikweta yimunyik yikez kwengurik nich kasu.”—2 Pita 3:10-12.

¹⁵ “Maur” ni “mangand” ma katat akez kumaswimp nich “maur masu [Want wa Kristu] ni mangand masu [chisak cha antu chisu].” (2 Pita 3:13) Pita wapana chiyul chiswapela kutesh, chimedina pa chitongijok cha ‘kuchingel,’ ap kulam ruchingej retu rikash pantaliken nich mangand minam masu ma kushilamu: “Chawiy, arund nam, piuchingedilany Dichuku dined, salany usu wa kwikal zwang wakad kufa nich kurutu kwa Nzamb, ikalany nich chisambu pakach penen nend ndiy.”—2 Pita 3:14.

ENDANY KWAMBATAN NICH RUCHINGEJ RETU

16, 17. (a) Ov, wisu “mwom utumbila” ni yisal ik ya “in kudandamen kudi Nzamb” tufanyidina kumekesh? (b) Ov, ruchingej retu rikez kuwanyin mutapu ik?

¹⁶ Tufanyidinap kulam ching kusu ruchingej retu rikash pakwez tufanyidin kand kushakam kwambatan ni ruchingej retu. Tufanyidin kushinshikin pa untu wetu wa muspiritu. Kwikal nich “mwom utumbila” kwitin ‘kwikal nich yaku yiwamp pakach pa antu a michid yikwau,’ kusutil ku yisal yetu. (2 Pita 3:11; 1 Pita 2:12) Tufanyidin ‘kukatijan.’ Chinech chitin kusal usu wetu wawonsu mulong wa kulam uumwing wa ukadivar wetu pa mangand mawonsu ni pakach pa antu adia mu chikumangen chetu. (Yoh. 13:35) Kwikal “in kudandamen kudi Nzamb” kurumburikin kwikal ni yisal yimekeshina urund wetu wa piswimp ni Yehova. Chinech chitin mutapu wetu wa kulembil, anch chitwishikin kutang kwetu kwa Bibil dichuku ni dichuku, kwilej Bibil kwa muntu ipend, difukwil dia mu dijuku, ni kwipan nakash mu kulejan “Rusangu Ruwamp ra Want.”—Mat. 24:14.

¹⁷ Muntu ni muntu pakach petu usotin kwikal muntu witiyijinay Yehova ni ukeza kukolik pakeza “kusheshik” ditenchik dia yom diyimp dia katat.” Chawiy lel tukez kuman kuwanyin kwa ruchingej retu, “ruchingej ra mwom wa chikupu. Nzamb wakad makasu watushilamu mwom winou pimadinga mangand kand kal amatanga.”—Tit 1:2.

[Chipich chidia pa paj wa 22]

In Kristu azizidilau many ‘avadika kapamp kakwau ku ritiy rend rijim’

[Chipich chidia pa paj wa 24]

Lam ruchingej rikash mu dijuku diey