Ov, Bibil Ufaniken ni Buku Mukwau?

“Mazu mawonsu ma mukand wa Nzamb madiokala ku [s]piritu wa Nzamb [ni ma ukwash] . . . , chakwel muntu wa Nzamb ukwikal uwanyidina mu kusal mudimu wawonsu uwamp.”—2 TIMOTE 3:16, 17, TMK.

ANTU amwing kitiyijinap mazu madia kwiur oku piur pa Bibil. Ov, chidi nchik kudi ey? Ov, mazu ik malondwilaku malejena nawamp piur pa mutapu umena Bibil?

• Mukand ulejena jinsangu jiwamp

• Umwing wa mikand yitumbula yitiyijinau chilik chimwing

• Mukand wa jingany ukweta malejan mawamp piur pa kuwap ni kuyip

• Dizu dia Nzamb

Chipul chikwau chawiy ech: Ov, chom ik ufanyidina kwitiyij? Shinshikin yilejenay Bibil piur pend amwinend: “Yom yawonsu yafundau pakur mu Mukand wa Nzamb ayifunda mulong wa kutulej etu. Afunda mwamu chakwel tukujamish ni kukasikesh mulong wa ruchingej rezila mu Mukand wa Nzamb.” (Rom 15:4) Bibil ulondin anch rutong rend ridi ra kutulej ni kutukasikesh ni kutwinkish ruchingej.

Pakwez, anch Bibil wading kwend mukand wa jinsangu ap kusu umwing wa mikand yivud yitumbila, ov, ukutwish kumuchingejin chakwel akuleja ni kutakel dijuku diey, pakampwil anch rusangu rend rishalijadin ni yom utongina anch yitentamina? Anch Bibil wading wizwila jingany, ov, wela kutambul rongoj ni ruchingej ridiokila ku kushilamu kwend?

Ku mutambu ukwau, ma miliyon ma antu ileja Bibil akwet kashinsh anch diawiy dimwing kusu Dizu dia Nzamb. Ov mulong wak? Ov, chom ik chimekeshina anch Bibil ushalijadin nich mikand yikwau yawonsu? Tukwitin kushinshikin yom yitan yisadila chakwel Bibil ikala ushalijadina ni mikand yikwau mu mutu wa mulong wambakedina.