Uprofet Uwanyidina Chisu Chawonsu

“Kushilamu kwawonsu kuwamp kwashilayimu [Yehova] Nzamb wen mulong wenen, kwikil chom ap kusu chimwing chaburena kuwanyin.”—JOSHUA 23:14.

MUTAPU IK USHALIJADINAY BIBIL NI MIKAND YIKWAU? Chijiken nakash kamu anch in kupesh in Grek a pasak abwaka yom ya kurutu mu mutapu urumbangena ni wakad kuchingejin, ni kubwak yom kusutil atutumbu kwa katat kuyipin. Malejan piur pa mutapu ukutwisha kwikal machuku ma kurutu, kulondulijan ni mutapu uyila machuku ni ap kand kupim yisu yimwing kusambel kulejan yinship kanang mu yitot ya mivu kurutu. Chinyim ni chinech uprofet wa Bibil ulejena kachom pa kachom ni chisu ni chisu umekening kwikal wakin, ap anch aulejen kudiokal pa kusambish “yom yikeza kamekan kurutu.”—Isay 46:10.

CHILAKEJ CHIMWING: Mu chitot cha mivu cha musamban K.C.C., muprofet Daniel wamana chishimushimu chasambela kulejan piur pa kuyiwin in Mediy ni Peris kudi in Grek. Chasambela kand kulejan anch mwant mwin kuwin winou wa Grek pakwikalay nich “usu ukash,” want wend ukez “kubukuk.” Ov, nany ukez kumuswinkan? Daniel wafunda anch: “Mant manying makez kumekan pa ndond ya want wa in Grek. Pakwez mant minam kimakez kwikalap nich usu mudi want wa kusambish.”—Daniel 8:5-8, 20-22.

CHILEJENAU KUDI IN KWILEJ RUSANGU RA MUNTU: Mivu 200 ni kusut kupwa kwa chirung cha Daniel, Alexandre le Grand wikala mwant wa Grek. Mu mivu dikum, Alexandre wauwina want wa in Mediy ni Peris ni wajimbisha want wa in Grek kushik ku wit wa Indus (mu Pakistan wa katat). Pakwez wafa swaa pa chimbu cha mivu 32. Kupwa, njit jasalika piswimp mu ul wa Ipsus mu Aziy Mukemp jashikisha want wend ku kwiyauril. Atulal anying awina kwin njit yiney anganijana ayinau Want wa Grek. Pakwez, kwikil ap umwing pakach pau wikala ni usu mudi wa Alexandre.

OV, CHOM IK UTONGINA? Ov, buku mukwau ukutwish kulond anch uprofet wend ukat kuwanyin chisu ni chisu? ov, Bibil udi wa pakampwil?

[Tablo wa jinsangu udia pa paj wa 4]

“Uprofet wa Bibil . . . upandiken kuvul chitwishikinap kulond anch winou wawonsu wawanyina kwa kukashimukin.”—BUKU ALAWYER EXAMINES THE BIBLE, WAFUNDAU KUDI IRWIN H. LINTON

[Dizu Dirumburila Chipich Chidia pa paj wa 4]

© Robert Harding Picture Library/SuperStock