Udi Kashalapol wa Kashinsh!
“En kiudianyap ant ipen.”—1 KOR. 6:19.
OV, MUTAPU IK UKUTWISHA KWAKUL?
Ov, mudimu ik wadingay nich kashalapol wa pasak?
Ov, yisend ik yikwetau atushalapol awonsu a Nzamb?
Ov, mutapu ik tufanyidina kuman midimu yitwinkishinau kusal?
1. Ov, mangand makwet chitongijok ik piur pa want ipau?
PASUTIN kal mivu 2500, nfund umwing wa Grek wafunda anch: “Kwikil muntu wasenda kwa kwisotil chisend cha uswik.” Nlel unou antu avud akat kwitiyij dizu dined. Uswik uletin chitongijok cha antu ameshinau mar ni adia mu rukan, asadila mudimu ni kwipan mulong wa kuyiyukish antu akata kuyitakel, kangal ayinay.
2, 3. (a) Ov, mwikadil ik wa answik ap atushalapol umusangareshininga Kristu? (b) Ov, yipul ik tukeza kushinshikin piur pa mudimu wau?
2 Chikwau kand, Yesu walejana anch in kwilejend akez kwikal atushalapol ikepishina, ap aswik. Piur pa uswik winou wa in Kristu akin, kwikil chom chimekeshina kuyitek pansh ap kuyimesh mar. Aswik inay akwet mwikadil wa katumb, ruchingej, ni kalimish. Chilakej, tal yalejanay Yesu piur pa “kashalapol” umwing kurutu kwa rufu Rend. Kristu watakela kulejan anch ukez kupan mudimu kudi “Kashalapol ushishamena ni kubabal.”—Mat. 24:45-47.
3 Chinech chidi cha usey kamu anch mu rusang mudi riner, amutazuka muswik winou anch “kashalapol.” (Tang Luka 12:42-44.) In Kristu avud ashinshamena adiaku katat kadiap yid ya chisak cha kashalapol ushinshamena. Pakwez, Bibil ulejen anch antu awonsu akata kumusadil Nzamb adi atushalapol. Ov, yisend ik yikwetau? Mutapu ik chifanyidinau kuyiman? Chakwel twijika, shinshikinany bil piur pa mudimu wa kashalapol a pasak.
ATUSHALAPOL—MUDIMU WAU
4, 5. Ov, chisend ik chadingau nich atushalapol a pasak? Let yilakej.
4 Pasak, kashalapol ading akat kumwinkish mudimu wa kulam chikumbu ap yisakin ya mwant wend. Chimeken anch, kashalapol wading ni uyaj ukash ni amwinkisha mbil ja kuyikel yom yidia mu chikumbu, nfalang, ni atushalapol akwau. Tukutwish kushinshikin mudimu winou wamushikena Eliezer, wikala mwin kutakel wa yom yawonsu yiwamp ya Aburaham. Chikutwish kumekan anch Eliezer ndiy watumau kudi Aburaham ku ul wa Mesopotamiy chakwel amukimbina mwanend Isak mband. Chading chisend chimwing cha usey ni chikash mud ik!—Dis. 13:2; 15:2; 24:2-4.
5 Josef mwijikurend a Aburaham wading ulamin chikumbu cha Potifar. (Dis. 39:1, 2) Kupwa, Josef wikala ni kashalapol wend, watekay mudi “kalam wa chikumbu cha Josef.” Kashalapol winou wayaka anamakwend dikum a Josef. Kwambatan ni mbil ya Josef, ni wasala anch ateka rupas rend ra utad wa argent chakwel rikala mudi ra ‘wij.’ Chimeken patok anch, kashalapol adinga akat kumuchingejin nakash.—Dis. 43:19-25; 44:1-12.
6. Ov, midimu ik yisadilau kudi amakurump kushalijan in Kristu?
6 Pasuta yitot ya mivu, Kambuy Paul wafunda anch atulam in Kristu afanyidin kwikal in ‘kulam mudimu wa Nzamb.’ (Tit. 1:7) Payitekinau mulong wa kuyilam “yisak ya amikoku,” amakurump akat kutakel ni kuyikel mu yikumangen. (1 Pita 5:1, 2) Pakwez, yisend yishalijadin. Chilakej, nlel unou atulam avud in Kristu akat kusal mu yikumangen. Atulam a munyimuku asadil mu yikumangen yivud. Yid ya Komite wa Mutiy yikat kuyilam yikumangen yidia mu jingand jawonsu. Chikwau kand, awonsu asadila midimu yau mu mutapu ushinshamena; awonsu afanyidin ‘kupan kuchind’ kudi Nzamb.—Heb. 13:17, TMK.
7. Ov, mutapu ik twija anch in Kristu awonsu adi atushalapol?
7 Ov, chikwikal nchik anch in Kristu avud ashinshamena kadiap atulam? Kambuy Pita wayifundina in Kristu awonsu, palonday anch: “Muntu mwawonsu wa pakach pen watambula kudi Nzamb yiyukish ya kusal nich, chawiy chifanyidin muntu ni muntu kusadil yiyukish yiney mulong wa kukwashijan nich.” (1 Pita 1:1; 4:10) Mu ranaken rend, Nzamb watwinkisha etu awonsu yipan, mapit, ukaliweny, ap manangu tukutwisha kusadil mulong wa kuyikwash ambay netu akaritiy. Chawiy lel, antu awonsu akata kumusadil Nzamb adi atushalapol, ni ukashalapol wau uyinkishin katumb, ruchingej, ni chisend.
TUDI ANTU A NZAMB
8. Ov, chany ik chimwing cha usey tuswiridina kuvurik?
8 Tukushinshikin katat yany yisatu yitumekeshina mudi atushalapol. Chakusambish: Tudi antu a Nzamb ni tukez kupan kuchind kudi ndiy. Paul wafunda anch: “En kiudianyap ant ipen. Akulandanya kal nich usey ukash,” yakupesh ya mash ma Kristu. (1 Kor. 6:19, 20) Mulong tudi antu a Yehova, tufanyidin kuziyil ku yany yend, mulong yikasikenap. (Rom 14:8; 1 Yoh. 5:3) Twikadin kal kand aswik a Kristu. Mudi atushalapol a pasak, atwinkishin kal want ipau ukash—pakwez want ipau wetu ukwet mipak. Tufanyidin kuwanyish yisend yetu yatwinkishau. Chikalap yisend yawonsu ya mudimu tukutwisha kutambul, tudi kwetu atushalapol a Nzamb ni a Kristu.
9. Ov, mutapu ik waletay Yesu chishimu piur pa urund wadinga pakach pa mwant ni muswik?
9 Yesu utukwashin kutesh urund udia pakach pa mwant ni muswik. Payilejay in kwilejend piur pa muswik wachirika ku chikumbu kupwa kwa kusal mudimu wa dichuku dia kabuj. Ov, mwant walonda anch: “Yang swa, udia”? Bwat. Ndiy walonda anch: “Yang, winrijekin yakudia, chad djal maswin ma mudimu wa mu chikumbu chakwel winletina yakudia ni yakuna. Chawiy anch wapwish, niyey ukutwish kudia ni kuna.” Ov, mutapu ik warumburilay Yesu chishimu chinech? “Chawiy chimwing niyen, anch wasalany yom yawonsu yinakulejanya, londany kwen anch: ‘Tudi kwetu atushalapol amwamu, twasalang ching kusu mudimu wetu.’”—Luka 17:7-10.
10. Ov, chom ik chimekeshina anch Yehova usangaredin usu tusadila wa kumusadin ndiy?
10 Chawiy lel, Yehova ukat kusanger usu tusadila wa kumusadil ndiy. Bibil utukasikeshin anch: “Nzamb utentamin, ndiy kakutwishap kuvuramen yisalijok yen ap rukat ruumekeshinanya mu dijin diend.” (Heb. 6:10) Yehova kakatap kutwit kumusadil yom yakad kutwish etu kusal. Chikwau kand, yom yawonsu yitwitinay yidi mulong wa yisakin yetu ni kakezap kututek yisend yilimina nakash. Kupwa, kwambatan nich chishimu cha Yesu, muswik kakutwishap kwisangaresh amwinend, ap kutek yisakin yend amwinend pa ndond ya kusambish. Chinech chirumburikin anch pitukata kwipan kudi Nzamb, tukat kutond kutek yisakin yend pa ndond ya kusambish mu mwom wetu. Ov, witiyijin mwamu?
CHITINAY YEHOVA KUDI MUNTU NI MUNTU PAKACH PETU
11, 12. Pitudia atushalapol, ov mashakamin ik tufanyidina kumekesh ni yisu tufanyidina kwipuk?
11 Chany cha kaad chawiy ech: Pitudia atushalapol, etwawonsu tulondwil yijil yimwing ya pa dishin. Chakin, yisend yimwing ayinkishin kudi antu akemp mu chikumangen cha in Kristu. Pakwez, yisend yivud yiding ya antu awonsu. Chilakej, pitudia in kwilej a Kristu ni Atuman a Yehova, tusangaredining kukatijan umwing ni mukwau. Yesu walonda anch rukat riner ridi chijingidij cha in Kristu akin. (Yoh. 13:35) Pakwez, rukat retu ripalangen kudi akadivar. Twikasikeshin kumekesh rukat kudi antu akad kwikal akaritiy pamwing netu. Chinech chidi chom tukutwisha ap chitufanyidina kusal.
12 Tufanyidin kand kwikal nich chaku chiwamp. Tusotin kwipuk chaku ni mashakamin malikishinau mu Dizu dia Nzamb. Paul wafunda anch: “Antu in kusotijan, ap in kwifukwil akish, ap in kwimik dis, ap in usund wa amakundj ni amakundj, ap wa amband ni amband, ap in kwiy, ap in ris, ap in kukwachik maar, ap in kusalan masaal, ap ambwitan, antu a mitapu yiney kakutwishap kuswan mu Want wa Nzamb.” (1 Kor. 6:9, 10) Chimeken anch, chifanyidin kusal usu mulong wa kuziyil ku yijil yitentamina ya Nzamb. Mwaning, usu winou udi wa usey, ukat kutuletin yiyukish yivud, ni mashakamin maletina ukash uwamp wa mujimbu, urund uwamp ni antu akwau, ni mashakamin mitiyijinay Nzamb.—Tang Isay 48:17, 18.
13, 14. Ov, chisend ik chiyinkishinau in Kristu awonsu, ni mutapu ik tufanyidina kuchiman?
13 Vurik kand anch, kashalapol wading ni mudimu wa kusal. Niyetu kand. Atwinkishin chipan chimwing cha usey nakash—ronganyin ra uyakin. Nzamb witin chakwel tulejana ronganyin riner kudi antu akwau. (Mat. 28:19, 20) Paul wafunda anch: “Chawiy chifanyidin en ututongijokany etu anch, tudi atushalapol a Kristu, tudi kand atulam a uyakin wa ujindj wa Nzamb.” (1 Kor. 4:1) Paul witiyija anch ukashalapol winou wadinga urumburikin kulam “uyakin wa ujindj” ni kuulejan mu mutapu ushinshamena kud antu akwau mudi mwalejanau kudi Mwant, Yesu Kristu—1 Kor. 9:16.
14 Chawiy lel, kulejan uyakin chidi chom chimwing cha rukat chitufanyidina kusal. Pakwez, mikadil yishalijadin kudi mwin Kristu umwing ni mukwau. Antu awonsu kakutwishap kusal chilik chimwing mu mudimu wa kulejan. Yehova wij mwamu. Cha usey chidi kusal yawonsu yitukutwisha ayinetu kusal. Chawiy lel, tukutwish kumekesh rukat rakad choy kudi Nzamb ni kudi mutej netu.
USEY WA KWIKAL ASHINSHAMENA
15-17. (a) Ov, mulong wak chidi cha usey anch kashalapol ikala mwin kushinshaman? (b) Ov, mutapu ik waletay Yesu chishimu piur pa yibudikin yiyimp ya kuburen kushinshaman?
15 Chany cha kasatu, chikwatijadina nakash ni cha kaad chilondwilaku chidi anch: Tufanyidin kwikal ashinshamena, akashinsh. Kashalapol ukutwish kwikal ni mikadil yiwamp ni ukaliweny, pakwez yiney yikutwishap kwikal ya usey anch kawanyishinap chisend chend ap udi wakad kushinshaman kudi mwant wend. Kushinshaman kudi kwa usey mulong wa kwikal kashalapol uwanyidina ni utwishina. Vurik yafunday Paul anch: “Chifanyidin kashalapol kusal mudimu wa mwant wend nich win yakin.”—1 Kor. 4:2.
16 Anch tushinshamen, akez kutuyukish; chidi chakin kamu. Anch tudi akad kushinshaman, tukez kuman mar ma kushadish. Tumen chany chinech mu chishimu cha Yesu cha nfalang. Atushalapol ‘isaka [nawamp] nich’ nfalang ja mwant ayijikitisha ni kuyiyukish nakash. Muswik wisaka nayimp ni yom yamwinkishau kudi mwant wend amwela anch udi “muyimp,” ni “ukwet usweral.” Amutambula nfalang jamwinkishau, ni kumudjibula—Tang Mateu 25:14-18, 23, 26, 28-30.
17 Chisu chikwau, Yesu walejana yibudikin yiyimp ya kuburen kushinshaman. Ndiy walonda anch: “Kwading mpich umwing wading ukwet kashalapol wamulaminanga yom. Amuleja mpich anch: ‘Kashalapol wey winou ukat kushesh dipit.’ Chawiy ndiy wamutazuka kashalapol wend, wamwipul anch: ‘Ov, yom ik yiniteshila yiusadila ey? Fund yawonsu chakwel winleja mutapu ulamina dipit diam, mulong kiukwikalap kand kashalapol wam.’” (Luka 16:1, 2) Mulong kashalapol winou washesha mapit ma mwant wend, mwant winou wamwopata. Didi dilejan dikash mud ik kudi etu! Tusotinap chakin kamu kuburen kushinshaman mu yom yitwitinau kusal.
KWIYILIKEJ NI ANTU AKWAU —OV, CHIDI CHA MANANGU?
18. Ov, mulong wak tufanyidinap kwiyilikej ni antu akwau?
18 Muntu ni muntu pakach petu ukutwish kwiyipul anch, ‘Ov, mutapu ik nimena ukashalapol wam?’ Milong yikutwish kulank anch twasambish kwiyilikej ni antu akwau. Bibil ukat kutuyul anch: “Chifanyidin muntu mwawonsu kwirumburish amwinend. Anch yisalijok yend yidi yiwamp, ndiy ukutwish kwibaz amwinend wakad kwiyilikej ni yisalijok ya muntu mukwau.” (Gal. 6:4) Pa ndond pa kwiyilikej yitusadila ni yisadilau antu akwau, tufanyidin kushinshikin pa yom tukutwisha ayinetu kusal. Chinech chikutwishap kusal anch twipuka kusu kwitutul mulong wa chibud pakwez tukwipuk kand kuziy. Mu kwishinshikin ayinetu, tufanyidin kwitiyij anch mikadil yikutwish kukarumuk. Pamwing ap mulong wa kuyip kwa ukash wa ku mujimbu, upal, ni yisend kushalijan, tukutwishap kusal yawonsu twadinga ni kusal. Chikwau kand, tukutwish kusal yom yivud kupandakanamu yitusadila katat. Anch chidi mwamu, mulong wak tukutwishap kupakish kukudish mijikit yetu?
19. Anch katwinkishinap yisend kampand, mulong wak tufanyidinap kuziy?
19 Yom yikwau tufanyidina kushinshikin yidi yisend tukweta ap tusotina kwikal nich. Chilakej, mukadivar ukutwish kusot kwikal mukurump mu chikumangen ap kwikal nich chisend kampand ku yitentam. Chiwapin kusal mudimu ukash chakwel kuwanyish yitinau mulong wa kwikal ni yisend yiney, chikwau kand tufanyidinap kuziy anch katwinkishinap yisend yiney pa chisu twadinga tuchingedina kwikal nich. Mulong wa mayingish makad etu kwijik, yisend yimwing yikutwish kwez pa chisu chakad kutongin. Vurik anch Moses wading tayad kuyidiosh in Isarel mu Idjibit pakwez ndiy wafanyidina kuchingel mivu 40 kurutu kwa kusal mwamu. Chinech chasala anch ikala nich chisu chiwanyidina cha kukudish mikadil yifanyidina mulong wa kuyitakel antu in kubwambwil.—Mid. 7:22-25, 30-34.
20. Ov, dilejan ik tukutwisha kutaninamu piur pa yom yamushikena Jonatan?
20 Yisu yimwing yisend yimwing kakutwishap kutwinkish etu. Chawiy chamushikena Jonatan. Ndiy wading mwanend a Saul ni wadinga mu dijuku dia kwikal mwant wa Isarel. Pakwez, Nzamb wamutonda David, nsand, chakwel ikala mwant. Ov, chom ik chasalay Jonatan pamanay anch yom yikez kwikal mwamu? Ndiy witiyija ni wamukwasha David ap mu chilik cha kutek mwom wend mu ubaj. Ndiy wamuleja David anch: “Ey yey ukuyiyikela in Isarel, am niyam nikwikal ney piswimp.” (1 Sam. 23:17) Ov, umen mulong winou? Jonatan witiyija mwikadil winou, ni chinyim ni tatukwend, ndiy kamovilap David mukau bwat. Pa ndond pa kuyovil antu akwau mukau piur pa yom yitwishinau kusal, etu awonsu tukutwish kushinshikin piur pa kuwanyish yisend tukweta. Tukutwish kwikal nich kashinsh anch mu mangand masu, Yehova ukez kuwanyish maku mawamp ma atushalapol end awonsu.
21. Ov, mutapu ik tufanyidina kuman ukashalapol wetu?
21 Vurikany amboku anch pitudia atushalapol a kashinsh, tukatap kuman mar ni kudil kwa uswik. Chidi chinyim kamu. Tukwet mikadil ya kalimish kajim, atwinkishin mudimu umwing wakad kwez kusadik kand kapamp kakwau wa kulejan rusangu ruwamp mu machuku mansudiel ma ditenchik dined dia yom. Pitusadila mwamu, tukwet want ipau ukash piur pa mutapu tukeza kuwanyish yisend yetu. Ikalany amboku atushalapol ashinshamena. Sangerany lel chisend tukweta cha kumusadil udia Mujim nakash mu mangand mawonsu.
[Chipich chidia pa paj wa 20]
Salany amboku mu mutapu ushinshamena mudimu utwinkishinau kusal