Lamany Mwikadil Tukweta Mudi “Aeny mu Mangand Minam”

“En udianya mudi angez ap mudi aeny mu mangand minam, nikat kukushindilany anch, likany maku men mayimp ma mujimbu.”—1 PITA 2:11.

MUTAPU IK UKUTWISHA KWAKUL?

Ov, mulong wak azizidilau many akutwish kuyitazuk anch angez?

Ov, mu mutapu ik udiau niyawiy “amikoku akwau” angez?

Ov, chom ik chimedina pa rusot rey piur pa machuku ma kurutu?

1, 2. Ov, anany isambinay Pita pasadilay dizu “antu atonday Nzamb,” ni mulong wak wayitazuka anch “aeny mu mangand minam”?

PASUTA mivu 30 kupwa kwa Yesu kukandam mwiur, kambuy Pita watuma mukand kudi “antu atonday Nzamb, aya mu ukatu, apalangena mu yibar ya ngand ya Pont, ni ya Galatia, ni ya Kapados, ni ya Aziy, ni ya Bitiniy.” (1 Pita 1:1) Chimeken patok, palonday anch “antu atonday Nzamb,” Pita wisambina piur pa antu, mudi ndiy, azizidilau nich spiritu utumbila ni ‘avadika kapamp kakwau’ mulong wa kuyikel nich Kristu mwiur. (Tang 1 Pita 1:3, 4.) Pakwez mulong wak ndiy wayitazuka antu inay atondau mudi “angez ap aeny mu mangand minam”? (1 Pita 2:11) Ov, chinech chirumburikin ik kudi etu nlel unou anch muntu 1 kusu pakach pa Atuman 650 asadila mudimu ukash mu mangand ulondina anch udi umwing wa antu azizidilau many?

² Chading choviken kusadil dizu “aeny mu mangand minam” kudi azizidilau many mu mivu chitot ya kusambish. Mudi mudiau atushal akin a chisak chinech nlel unou, kwikal kwau pa divu kwadingap kwa rawonsu. Kambuy Paul, amwinend chid cha “chisak chikemp,” warumburila anch: “Pakwez etu, kwol kwetu kudi mwiur, chad tukat kumuchingel Mupandish wetu nich musangar, ndiy kamu Yesu Kristu ukudiokala kwinikwa kwez pansh.” (Luka 12:32; Fil. 3:20) Ndiy walejana anch “kwol [kwau] kudi mwiur,” pakatau kufa azizidilau many akat kusha divu ni kuya kutan chom chimwing chiwamp nakash, mwom wakad kufa mwiur. (Tang Filip 1:21-23.) Chawiy chimekeshina anch, awiy adinga “aeny mu mangand minam” pa divu didia mu umutakel wa Satan.

3. Ov, chidi nchik piur pa “amikoku akwau” adiaku nlel unou?

³ Pakwez chidi nchik piur pa “amikoku akwau”? (Yoh. 10:16) Ov, kakwetap ruchingej rimedina pa Mukand wa Nzamb ra kushakam rawonsu pa divu? Chikwau kand, yikez kwikal ndond yau chikupu! Pakwez, akutwish katat kwikal niyawiy aeny mu mangand minam. Ov, mutapu ik?

“YOM YAWONSU YATANGAY NZAMB YIKAT KUKIMWOK”

4. Ov, chom ik chikatau kukangany antakel a mangand kupwish?

⁴ Pakatau kulikidil ditenchik diyimp dia Satan chakwel dikalaku, antu awonsu, kuwejaku ni in Kristu, akez kudandamen kuman mar madiokila ku kubwambwil kwa Satan pantaliken ni Yehova. Tutangin mu Rom 8:22 anch: “Kushik ni ku chisu chinech twij anch, yom yawonsu yatangay Nzamb yikat kukimwok mudi mband ukweta misong ya kuval.” Pakwez, antakel a mangand, in siyans, ni in kupan ukwash akashinsh, akangeny kupwish mar minam.

5. Kudiosh muvu wa 1914, ov, chom ik chasala ma miliyon ma antu, ni mulong wak?

⁵ Kudiosh pa muvu wa 1914, atonda mamiliyon ma antu chakwel ikala antu akuyikelau kudi Yesu Kristu, Mwant wadishau want kudi Nzamb. Kasotinap kwikal mu ditenchik dia mangand ma Satan. Alikin kukasikesh mangand ma Satan. Pakwez, akat kusadil mwom ni yom yau mulong wa kukasikesh Want wa Nzamb, ni kusadil yisakin yend.—Rom 14:7, 8.

6. Ov, mu mutapu ik ukutwishau kuyitazuk Atuman a Yehova anch aeny?

⁶ Mwaning, Atuman a Yehova adi an a ngand alimishina yijil mu mangand 200 ni kusut, chikalap nchik kwindond kushakaminau, adi kwau mudi aeny. Alamin mwikadil wa kulik kwiyandjik mu milong ya mangand mudi milong ya chipolitik ni ya mu chisak. Ap katat, imen ayinau mudi an a ngand a mangand masu, makezau kulet kudi Nzamb. Akwet musangar pamenau anch machuku mau ma kushakam mudi aeny mu ditenchik dia mangand diakad kuwanyin madi piswimp ni kupwa.

7. Ov, mutapu ik ukezau atushalapol a Nzamb kushakam rawonsu, ni kwisu?

⁷ Piswimp ap Kristu ukez kusadil uyaj wend pakezay kushesh ditenchik diyimp dia Satan. Winyikel uwanyidina wa Kristu ukez kudiosh chitil ni mar ma divu. Ndiy ukez kudiosh yom yawonsu yimekena ni yakad kumekan ya kubwambwil ku ukaleng utentamina wa Yehova. Atushalapol ashinshamena a Nzamb akez kutwish kushakam rawonsu mu Paradis pa divu. (Tang Kujingunik 21:1-5.) Chawiy lel, yom yatangay Nzamb akez “kuyikwol chakwel kangal yez kuvund. Chad niyau yikez kutambul want ipau wa uyaj pamwing nau an a Nzamb.”—Rom 8:21.

OV, CHOM IK CHITINAU KUDI IN KISTU AKIN?

8, 9. Rumburil chasotay Pita kulond pisambinay piur pa ‘kulik maku mayimp ma mujimbu.’

⁸ Pita warumburila chom chitinau kudi in Kristu palonday anch: “Akarukat, en udianya mudi angez ap mudi aeny mu mangand minam, nikat kukushindilany anch, likany maku men mayimp ma mujimbu makata kurish njit ni mupim.” (1 Pita 2:11) Chiyul chinech achipana pa kusambish kudi in Kristu azizidilau many, pakwez chidi kand cha usey ni kudi amikoku akwau a Yesu.

⁹ Kuwanyish maku mamwing mambatena ni rusot ra Sakatang kuyipinap kwau. Chikwau kand, makat kulet musangar mu mwom. Chilakej, kudi kwau maku mawamp mudi kudia yakudia yiwamp ni yakuna, kwipan mu mijikit ya kwiswedish, ni kusanger arund awamp. Ap maku ma kumanijan ni mbay nend wa uruw chidi kwau chom chiwamp ni chikweta chisu chach. (1 Kor. 7:3-5) Pakwez, Pita wisambina piur pa “maku mayimp ma mujimbu” makata “kurish njit ni mupim.” Pakatau kulejan patok kurumburik kwa mazu minam, in kukarumun amwing a Bibil isambindin piur pa “maku ma mujimbu” (Testament Musu ni Kuseng) ap “maku ma chitil.” Chimeken patok anch, maku mawonsu ma muntu makata kurish njit nich rutong rilejenau kudi Yehova ni makutwish kuyipish urund uwamp ni Nzamb ni kuukangesh. Chikwau kand ruchingej ra mwin Kristu ra kulam mwom wend rikutwish kusheshik.

10. Ov, yom ik yisadidilay Satan mulong wa kusal anch in Kristu ikala chikunku cha mangand mend?

¹⁰ Rutong ra Satan ridi ra kuziyish mupak wa in Kristu akin wa kwiman ayinau mudi “aeny” mu ditenchik dined dia katat. Kusot yom ya ku mujimbu, kudimban kwa masandj, kusot kwikal nich katumb, kusot kulond anch ‘am bil,’ ni kusot kwa wan a ngand—yawiy mipit yawonsu ya Satan ni tufanyidin kuyiman mwamu. Mu kusal usu wa kwipuk maku minam ma ku mujimbu, tumekeshin patok anch tusotinap kwikal chikunku cha mangand mayimp ma Satan. Tumekeshin patok anch tushakaminamu kusu chisu chikemp. Chitusotina chakin kamu, ni rutong retu ridi ra kusal usu wa kushakam rawonsu mu mangand masu matentamina ma Nzamb.

YAKU YIWAMP

11, 12. Ov, mutapu ik ukatau kuyiman yisu yimwing angez, ni chom ik tukutwisha kulond piur pa Atuman a Yehova?

¹¹ Pita wadandamena kurumburil yadinga yiyichingedina “aeny mu mangand minam” in Kristu, palonday mu verse wa 12: “Ikalany nich yaku yiwamp pakach pa antu a michid yikwau, chakwel pakez kukufundanyau anch udiany antu ayimp, awiy ayinau akez kuman yisalijok yen yiwamp, chad akumushiman Nzamb pa dichuku dikwezay ni kuyirumburish antu.” Angez, ap aeny ayilondining yisu yivud mwi ngand yayen. Mulong kusu ashalijadin ni atej nau, akutwish kuyiman ap mudi antu ayimp. Mazu mau, yisal yau, ni yidjal yau, yikutwish kumekan anch yishalijadin. Pakwez anch asadil midimu yiwamp, chawiy kulond anch anch yaku yau yidi yiwamp, uyimp ukatau kulondang piur pa kushalijan kwa mwikadil wau kukat kumekan anch kudi kwakad usey.

¹² Chilik chimwing, in Kristu akin ashalijadin nakash ni amutej nau avud mu mikadil yimwing, mudi mu minsamb ap mu kwipuwangesh. Kudjal ni kwileng kwau kukat kuyimekesh anch ashalijadin nakash ni antu avud adia mu chisak. Kushalijan kwinoku kwasala anch antu amwing akad kwijik nawamp mutapu udiau alonda anch adi antu ayimp. Pakwez, antu akwau akutwish kuyishiman mulong wa mashakamin mau ma mwom.

13, 14. Ov, mutapu ik “manangu ma Nzamb makat kumekan anch madi makin ku yisalijok yau”? Let chilakej.

¹³ Mwaning, yaku yiwamp yikutwish kukangesh kuyifish nich pakad mulong. Ap Yesu, muntu umwing kusu washakama mu kushinshaman kuwanyidina kudi Nzamb, amufisha nich ya makasu. Antu amwing amwela anch “ndiy upumbil kudia ni kuna, udi murund wa in kulambwish yitad ni in yitil!” Pakwez, mashakamin mend ma manangu mu kumusadil Nzamb mamekesha anch yadingau ni kulond anch udi muntu muyimp yading ya makasu. Yeswu walonda anch: “Manangu ma Nzamb makat kumekan anch madi makin ku yisalijok yau.” (Mat. 11:19) Chidi mwamu ni nlel unou. Chilakej, antu amwing pakach pa amutej nau amen anch chidi chom chishimokishina pa kuyiman akadivar ni anambaz asadin midimu ya kutung yikumbu ya Bethel wa Selters mu Allemange. Pakwez antu avud alondin mulong wa awiy anch: “Atuman asadila kwinikwa akwet mashakamin mau ma mwom, pakwez mwikadil winou ukatap kuyipish mwom wa antu akwau mu chisak.”

¹⁴ Ashikena mu kulond yom yiney yimwing pantaliken ni Atuman a Yehova adia mu ul wa Moscou, mu Russie. Afundau cha makasu piur pa yisal yiyimp yivud. Kupwa pa Kalol, 2010, Cour européenne des droits de l’homme udia mu ul wa Strasbourg, mu France, walejana anch: “Dirumburish dijim diamana anch kukangesh kwa Moscou kusadil kwa want ipau wa relijon ni wa kukumangan kwadingap kwa usey. Dirumburish dia ul diakanganya kulet mayingish ‘makash ni mawanyidina’ mulong wa kumekesh anch atuman a Yehova” asala uyimp wa kujip majuku, kubachik ku kwijip, ap kulik kuyok kudi amwingang. Chawiy lel, “kuyifish nich kwa dirumburish dia ul kwading kukash mulong wa kuburen kuziy kwa dirumburish dia ul ni kukangany kwijik rutong ra usey rilondwilau.”

KUZIYIL KUWANYIDINA

15. Ov, chany ik cha Bibil chilondwilau in Kristu akin pa mangand mawonsu?

¹⁵ Atuman a Yehova adia ku Moscou​—ni adia pa mangand mawonsu—asadin chom chikwau chitinau kudi in Kristu mudi mwalejanau kudi Pita. Ndiy wafunda anch: “Ziyilany kudi in kutakel awonsu a antu, mulong wa kumwambat Nsalejetu. Ziyilany kudi mwant mujim wa ngand, ni kudi anyikel.” (1 Pita 2:13, 14) Ap anch kadiap mu mangand mayimp, in Kristu akin akat kuziyil kwa kwisotil kudi in kutakel mulong “usu ukwetau udi wa Nzamb,” mudi mwalejanay Paul.—Tang Rom 13:​1, 5-7.

16, 17. (a) Ov, chom ik chimekeshin anch tukatap kupwitijan ni winyikel? (b) Ov, chom chitiyijinau kudi antakel amwing a chipolitik?

¹⁶ Pashakaminau Atuman a Yehova mudi “aeny mu mangand minam” mu ditenchik dined dia katat, kasadinap mwamu mudi mukatau kusal antu amwing mulong wa kumekesh ujim wau bwat; ni kakatap kupwitijan ni antu akwatina mipak wa kwiyandjik mu politik ap mu chisak. Chinyim ni marelijon makwau, Atuman a Yehova alikining kwiyandjik mu politik. Kakutwishap kupakish kuyishindil in kuyikel chakwel alondula yany yau. Chitongijok cha kwel anch awiy akutwish kupakish kulet kanvundangesh ap kukangesh winyikel chikwetap dishin!

¹⁷ Mu kuziyil kudi in kuyikel kwambatan nich chiyul cha Pita anch “mulimishany kand mwant mujim wa ngand,” in Kristu akat kuyilimish kwambatan ni mutapu mudiau in kuyikel inay. (1 Pita 2:17) Yisu yimwing, in kuyikel inay itiyija anch kadingap ni diyingish ap dimwing dia kuyilikish Atuman a Yehova. Chilakej, Steffen Reiche, mutu umwing wa chipolitik mu Allemagne, wadinga pasak mukurump wa biro wa ministre mu winyikel wa Brandenburg ni kupwa wikala kand chid cha parlement mu Allemagne, walonda anch: “Yaku ya Atuman a Yehova yamekesha mikadil padingau mu jindond ja mar ni mu rukan, yidi ya usey nlel, mudi muyadinga pasak mulong wa kwikalaku kwa winyikel wa démocratie: mulong wa kwiman kwau dang pantaliken ni a SS ni rukat ramekeshau kudi akwau adinga nau mu rukan. Yaku yiney yasal anch kwikala chisum chipandakena chayimeshau angez pamwing ni in ntad a politik ap a yitongijok, mikadil yiney yidiaku mulong wa mwan a ngand mwin mwawonsu udia mwingand yetu.”

KUMEKESH RUKAT

18. (a) Ov, mulong wak etu tuyikatining anamakwau awonsu? (b) Ov, chom ik chalondau amwing akad kwikal Atuman?

¹⁸ Kambuy Pita wafunda anch: “yikatany anamakwen in Kristu, mwovany Nzamb wom.” (1 Pita 2:17) Atuman a Yehova akwet wom wa kumwovish Nzamb kuyip, ni chinech chiyikasikeshin kusal rusot rend. Akwet musangar wa kumusadil Yehova mudi chid cha akadivar ni anambaz a pa mangand mawonsu asotina kusal chilik chimwing. Chawiy chiyisadila anch ‘ayikata anamakwau in Kristu.’ Rukat riner ra ukadivar, ridia rakad kumekan nlel unou mu chisak cha choy, rikat kuyikashimwish yisu yivud antu akad kwikal Atuman. Chilakej, muntu wadinga ntakel wetu wading usadila ni chisak chimwing cha in Amerik chitadila milong ya kukwash antu ayila mu weny washimoka mulong wa rukat ni ukwash wamekeshau kudi angez Atuman eza ku chitentam cha mangand mawonsu cha muvu wa 2009 mu Allemagne. Ndiy walonda anch mu mivu yend yawonsu yasalay mudi mwing kuyitwal a ngez, ndiy wading kandikal kamanap chom mudi chinech. Kupwa Kaman umwing walonda anch: “Yawonsu yalonday piur petwetu ndiy wayilonda nich dizu dia kushimwok nich mushiku.” Ov wateshap kal yom ya chilik chimwing ku mutambu wa antu adinga ayimen Atuman ku chitentam ku wakumangana?

19. Ov, chom ik tufanyidina kusal, ni mulong wak?

¹⁹ Mu yom yiney yawonsu—ni mu yikwau kand yivud—Atuman a Yehova amekeshin chakin kamu anch adi “aeny” mu ditenchik dined dia katat dia Satan. Ni asangaredin nakash kudandamen kushakam mwamu. Ruchingej rau ridi rikash ni rikweta mufulandal wakin anch piswimp ap akez kwikal in ngand a rawonsu mu mangand masu matentamina ma Nzamb. Ov, uchingejinap niyey kushakam mwamu?

[Chipich chidia pa paj wa 23]

Tusadilap usu wa kukol mangand ma Satan

[Chipich chidia pa paj wa 23]

Tukasikeshin mangand masu ma Nzamb

[Chipich chidia pa paj wa 25]

Uyakin udia mu Bibil wakwasha dijuku dined dia in Russie chakwel dikala mu umwing