“Angez” Atekau mu Uumwing mu Difukwil Diakin

“Aeny . . . akez kalam yivam yen, ni kudim yir yen, ni kulam kand mitond yen ya nviny. Akez kakupilany anch, in kupech a [Yehova].”—ISAY 61:5, 6.

MUTAPU IK UKUTWISHA KWAKUL?

Ov, antu amwing ayimening angez mutapu ik, pakwez mutapu ik rutong ra Bibil rishalijadin?

Ov, diladikij ik dikatau kupalangesh kudi antu a michid yawonsu?

Ov, mu mutapu ik tudi nlel unou mu mangand makad angez?

1. Ov, mutapu ik muyimenau antu avud aeny, pakwez mulong wak chinech chidap chakin?

MUDI mulejenau mu mutu wa mulong wasutina ou antu amwing akat kusadilang dizu “ngez” mudi masaal, mulong wa kumwovish muntu usany, ap kumuswingish nakash. Chidi kuburen kalimish anch tuyimana antu a muchid ukwau anch adi mwishin mwa an a ngand. Chikwau kand, chaku cha mutapu winou chimekeshin kuburen kwijik yom nawamp. Buku Les races de l’humanité (angl.) ulejen anch: “Bibil wisambin piur pa antu awonsu anch adi—akadivar.” Akadivar akutwish kushalijan, chikalap nchik mwamu adi kwau akadivar.

2, 3. Ov, chom ik chitonginay Yehova piur pa aeny?

² Chakin kamu, chikalap nchik kwawonsu tukutwisha kushakam, aeny akutwish kwikal pakach petu. Chawiy chayishikena kand in Isarel a pasak, awiy kusutil ku manswik ma Chijil ading mu urund wa pakampwil ni Yehova Nzamb. Mbil ya antu akad kwikal in Isarel yading ni mipak, pakwez in Isarel afanyidina kuyilimish ni kushakam nau nawamp. Chidi chilakej chiwamp mud ik tufanyidina kulondul! Kwikilap kasolikany ap kutond pakach pa in Kristu akin. Ov, mulong wak? Kambuy Pita walonda anch: “Katat am nijikal anch, Nzamb kakwetap kasolikany pakach pa antu, bwat. Ku michid yawonsu, muntu mwawonsu ukata kumulish ni kusal yom yitentamina, Nzamb ukat kumwitiy.”—Mid. 10:34, 35.

³ Mu Isarel wa pasak, aeny ataninamu yiyukish kusutil ku kushakam pamwing ni Isarel cha chivadik. Chinech chamekesha chitongijok cha Yehova pa mulong winou mudi mwalejanau mivu yalondulaku kudi kambuy Paul pashikenay mu kwipul piur pa Yehova anch: “Ov, Nzamb udi ching kusu Nzamb wa in Yuda? Ov, kadiap kwend Nzamb wa antu a michid yikwau? Chakin, ndiy udi kand Nzamb wa antu a michid yikwau.”—Rom 3:29; Jow. 2:32.

4. Ov, mulong wak chitwishikin kulond anch kwikil aeny pakach pa “in Isarel akin a Nzamb”?

⁴ Kusutil ku manswik masu, chikumangen cha in Kristu azizidilau many aswimpa Isarel wa ku mujimbu ni muchid wikala nich urund wa pakampwil ni Nzamb. Muchid winou autazuka anch “in Isarel akin a Nzamb.” (Gal. 6:16) Ni mudi mwarumburilay Paul, mu muchid musu winou, “kwikil kand Mugrek ap Muyuda, ap uyila ku mukand ni wakad kuya ku mukand, muntu wamwamu, win Skitan, muswik ap mwant ipau; pakwez Kristu ndiy yawonsu ni mu yawonsu.” (Kol. 3:11, TMK) Chawiy lel, kwadingap kand “aeny” mu chikumangen cha win Kristu.

5, 6. (a) Ov, chipul ik tukutwisha kwipul piur pa Isay 61:5, 6? (b) Ov, anany adia “in kupesh a [Yehova]” ni “aeny” isambidinau mu Isay? (c) Ov, Yom ik ya pamwing yikwetau yisak yiney yaad?

⁵ Ku mutambu ukwau, muntu ukutwish kushinshikin piur pa shapitre wa 61 wa buku wa Isay, ukweta uprofet uwanyidina mu chikumangen cha win Kristu. Verse wa 6 wa shapitre winou wisambidin piur pa antu akeza kusal mudi “in kupesh a [Yehova].” Pakwez, verse wa 5, wisambidin piur pa “aeny” akez kusal mudimu pamwing ni “in kupesh” inay. Ov, mutapu ik tukutwisha kutesh mazu minam?

⁶ Twatesh kal anch “in kupesh a [Yehova]” inay akez kwikal in Kristu azizidilau many akeza kusut “mu kuvumbuk kwa kapamp ka kusambish” ni awiy “akwikal in kupesh a Nzamb ni a Kristu, chad akez kuyikel pamwing nend Kristu mivu kanan.” (Kuj. 20:6) Chikwau kand, kudi in Kristu avud ashinshamena akweta ruchingej cha kushakam pa divu. Inay, ap anch asadil pamwing ni mu urund wa piswimp ni antu akeza kusal mwiur, adi aeny mu chifanikesh. Asanger kupan ukwash ni kusal pamwing ni “in kupesh a [Yehova],” ni kusal mudi “[in] kudim” yir yau ni “kulam kand mitond [yau] ya nviny.” Mwaning, apanin ukwash wa kukudish dibuj dia muspiritu ku uyaj wa Nzamb, kuyidish ni kuyikun antu. Chikwau kand, azizidilau many ni “amikoku akwau” akat kutan ni kuyilam nich rukat antu a kashinsh asotina kumusadil Nzamb chikupu.—Yoh. 10:16.

“ANGEZ” MUDI ABURAHAM

7. Ov, mutapu ik in Kristu nlel unou adi mudi Aburaham ni antu akwau ashinshamena a pasak?

⁷ Mudi mwalejanau mu mutu wa mulong wasutina, in Kristu akin adi mudi “aeny”, ap mud angez, mu mangand mayimp ma Satan. Mu mangand minam, adi chilik chimwing ni antu ashinshamena a pasak—kuwejaku ni Aburaham—alejanau anch “adi[ng] kwau aeny ni angez pa mangand.” (Heb. 11:13) Chikalap nchik ruchingej retu piur pa machuku ma kurutu, tukwet chisend cha kusanger urund ni Yehova mudi wadingay nich Aburaham. Jakobu walejana anch “‘Aburaham wamwitiyija Nzamb, chad amwela anch utentamin,’ chad Nzamb wamupil anch: ‘Murund nam.’”—Jak. 2:23.

8. Ov, kushilamu kwisu kwapanau kudi Aburaham, ni mutapu ik wamanay piur pa kuwanyin kwend?

⁸ Nzamb washilamu anch kusutil kudi Aburaham ni kudi anend, majuku mawonsu madia pa divu—kadiap kusu dijuku dimwing bwat—akez kumayukish. (Tang Disambishil 22:15-18.) Ap anch kuwanyin kwa kushilamu kwinoku kwa Nzamb kwafanyidina kuwanyin mu machuku ma kurutu, Aburaham walama ruchingej rend mu kuwanyin kwinoku. Mu chikunku chend chawonsu cha mwom wend, ndiy ni dijuku diend ading akat kutambitamb ndond yimwing ni yikwau. Mu yisu yiney yawonsu Aburaham walama urund wend ni Yehova.

9, 10. (a) Ov, mutapu ik tukutwisha kwimburij chilakej cha Aburaham? (b) Ov, diladikij ik tukutwisha kupalangesh kudi antu awonsu?

⁹ Ap anch kadingap wija mu machuku minch mafanyidinay kuchingel chakwel amana kuwanyin kwa ruchingej riner, rukat ra Aburaham ni kwipan kwend kudi Yehova yashadikap. Ndiy kadandamenap kushinshikin mes mend mulong wa kushakam rawonsu mu muchid kampand bwat. (Heb. 11:14, 15) Chidi cha manangu mud ik kudi etu anch twalondul chilakej cha Aburaham, mu kushakam nich mwom uswapela, ni pakad kutongin nakash ayinetu piur pa yom ya ku mujimbu, kwikal ni ndond ya piur mu chisak, ap jintong ja kwikal ni mudimu uwamp! Ov, mulong wak tukutwish kwipan mu mwom utazukinau anch uwanyidin mu ditenchik dined dikez kupwa piswimp ap! Ov, mulong wak tukutwish kulamat ku yom yidia ya chisu chikemp? Mudi ku mutambu wa Aburaham, nlel unou atutakedin kudi chom chimwing chiwamp nakash. Tusotin kumekesh kushimpish muchim, kuchingel djat ni pakeza kuwanyin ruchingej retu.—Tang Rom 8:25.

¹⁰ Yehova udandamedin kuyitazuk antu a michid yawonsu chakwel ayiyukisha kusutil kwi mbut ja Aburaham. Ni “in kupesh a [Yehova],” azizidilau many ni amikoku akwau “aeny,” akat kuyitazuk niyawiy mwamu antu adia mu mangand mawonsu alondina jindim 600.

KANGAL WABANGIN PIUR PA MIPAK YA MICHID

11. Ov, rutong ik rapalangeshay Salomon kudi antu akad kwikal in Isarel?

¹¹ Pa chisu cha kufungul kwa tempel mu muvu wa 1026 K.C.C., ni kwambatan nich kushilamu kwasalay Yehova kudi Aburaham, Salomon washinshikina antu a michid yawonsu akutwish kwez kumushiman Yehova. Mu malembil madiokila ku muchim, ndiy walonda anch: “Palemp mweny umwing wakad wa antwey in Isarel ukudiokala ngand yilemp, wez mulong wa dijin diey. Akez katesh kujimb kwa dijin diey ni usu wa chikas chey chiwatandjeka. Chad anch mweny wez ni kulembil mu chikumbu chinech, ey ushicha mwiur, mutesha. Musadila mudi mudia kwilemb kwend, chakwel antu awonsu a pa mangand ijik dijin diey, ni kukulimish mudi mukat kukwovau antwey in Isarel.”—1 Ant 8:41-43.

12. Ov, mulong wak antu amwing ayimen Atuman a Yehova anch udi mutapu windjing ap adi mudi “angez”?

¹² Ngez udi muntu udia mwingand yayen ap udiokila mu chisak chindjing. Mwikadil winou udi wa Atuman a Yehova. Akat kuziyil bil ku winyikel udia mwiur, ku Want wa Nzamb udi mwinshin mwa Kristu. Chawiy, chilikidinau kwiyandjik mu milong ya politik, ap anch antu amwing ayimen anch adi mutapu windjing mu chisal cha katat.

13. (a) Ov, mu mutapu ik dizu “ngez” dikat kwimedin pa yitongijok ya antu? (b) Ov, mu rutong ra kusambish ra Yehova mwading chitongijok cha wingez? Rumburil.

¹³ Angez ijiken yisu yivud kusutil ku mikadil yikwetau ayinau. Chikutwish kwikal rudim rilondinau, yaku yau, mikadil ya mujimbu wau, ap mutapu wau wa kudjal. Chikwau kand, yom yikwetau ya pamwing ni antu akwau, chikalap nchik muchid wau, yidi ya usey nakash kupandakanamu mikadil yiney. Chawiy lel, ngez udi muntu ujimbwilau mwau mulong ushalijadin mu mutapu kanang ni antu akwau. Anch twalik kushinshikin pa kushalijan kwinoku, dizu “ngez” dikwikalap kand nich usey. Anch antu awonsu pa divu adinga mwishin mwa ditenchik dia chipolitik ap mwa winyikel kanang, kwikil muntu wela kwikal ngez mudi mukatau kurumburil dizu dined mu chipolitik. Chawiy, kwinsambishil Yehova wasota anch antu awonsu ikala mu umwing mudi dijuku dimwing mwinshin mwa winyikel umwing—winyikel wend. Ov, kudi chom chimwing chikutwish kusal anch chinech chikala mwamu nlel unou kudi antu a michid yawonsu yidia pa divu?

14, 15. Ov, chom ik Atuman a Yehova chashikenau ku kusanger mudi chisak?

¹⁴ Mu mangand ma choy ni ma katond ka wan a ngand, chisangareshin pa kutan antu alikina kubangin pa mipak ya michid. Pakwez, kwipuk kasolikany kukutwish kukasikan. Ted Turner, muntu wateka televizion utazukinau anch CNN, ulejen piur pa mudimu wasalay pamwing ni antu avud a manangu adiokila ku michid kushalijan anch: “Kukumangan ni antu inay chading chom chimwing chikasikena kutongin. Kinashikenap mu kuyiman antu a michid yikwau mud ‘angez’ bwat, pakwez mud ambay an a ngand adia pa divu. Nasambisha kuman dizu ‘ngez’ mudi chom chiyimp ni twateka chijil mu CNN anch afanyidin kwipuk kusadil dizu dined ndond yawonsu ap mu mambamb mu biro. Pakwez, ading akat kusadil dizu ‘ya michid yawonsu.’”

¹⁵ Mu mangand mawonsu madia pa divu, ching kusu Atuman a Yehova, awiy asadila chisak chikweta chitongijok cha Nzamb. Mu kwilej mutapu wa kuman yom mudi musadilay Yehova, awiy atwishin kudiosh mipak ya michid mu manangu ni mu yovil yau. Pa ndond pa kuyimesh mar ap kulik kuyichingejin antu michid yikwau, awiy ileja mutapu wa kuyisanger kushalijan kwa mikadil ni ukaliweny wa yisak yinay mudi chom chimwing cha ufun. Ov, watonginap bil pa yom yiney ni mutapu watana amwiney yiyukish pa chinech mu kushakam ni antu akwau?

MANGAND MAKAD ANGEZ

16, 17. Ov, chom ik chirumburikina kuwanyin kwa Kujingunik 16:16 ni kwa Daniel 2:44 kudi ey?

¹⁶ Piswimp ap michid yawonsu ya katat yikez kurish ni Yesu Kristu ni amasalay end a mwiur mwinjit ja nsudiel jikeza kusal pantaliken ni winyikel wa Nzamb, njit jinej jidi “mu win Hebereu anch, Harmagedon.” (Kuj. 16:14, 16; 19:11-16) Pasutin kal mivu, 2500, muprofet Daniel amupepila kudi Nzamb anch abwaka piur pa yom yikushiken winyikel wa antu udi mu kupwitijan nich rutong ra Nzamb, pafunday anch: “Pa chisu cha in kutakel inay, Nzamb wa mwiur ukez kukasikesh want ukwau wakad kwez kwikal nich disudiel chikupu. Kakez kuukwatap want winou, pakwez ukez kushesh mant makwau mawonsu, chad wawiy ukez kushakam chikupu.”—Dan. 2:44

¹⁷ Ov, ukutwish kutongin chikeza kurumburik kuwanyin kwa uprofet winou kudi ey? Mipak yitekinau antu nlel unou mulong wa michid, ni yisadila anch antu awonsu ikal angez, yikwikalakwap kand. Kushalijan kwawonsu kwa mujimbu ap mikadil yawonsu yishalijadina yikez kumekesh kusu anch kushalijan kwamushena kudia mu chitangil cha Nzamb. Ruchingej riner ramushena rifanyidin kutubachik etu awonsu chakwel tudandamena kumushiman ni kumulimish Sakatang wetu, Yehova Nzamb, mudi mutukutwisha kusal.

18. Ov, chom ik chiyila kurutu katat chimekeshina anch chitwishikin kupandakan chitongijok cha “ngez”?

¹⁸ Ov, chitwishikinap kwitiyij anch kukarumuk kwinoku kukez kushiken pa mangand mawonsu? Bwat kwau. Pakwez, chiwapidil kwitiyij anch kukarumuk kwinoku kukez kushiken. Dizu “ngez” diashadishin kal kurumburik kwend pakach pa Atuman a Yehova, mulong kakatap kushinshikinang nakash pa michid ya antu adia nau. Chilakej, katat mu jingand jivud atekin pamwing ma biro mau ma mutiy mulong wa kupipesh mudimu wa ukalam ni wa kuya kurutu mu kusal mudimu wa kulejan rusangu ruwamp ra Want. (Mat. 24:14) Kwambatan nich yijil ya ngand, kashinshikinap piur pa mipak ya ngand pasalau mwamu. Chawiy chom chikwau chimekeshin patok anch Yesu Kristu Mwant watekau kudi Yehova ukat kudiosh mipak ya antu, ni ndiya “uyila ni kupandakan” piswimp ap!—Kuj. 6:2.

19. Ov, chom ik rudim rishitwila rasala anch chikalaku?

¹⁹ Ap anch adiokil ku michid yivud ni kulond jindim kushalijan, Atuman a Yehova asadin usu wa kulond rudim rishitwila ra uyakin. Chinech chiletin uumwing wakad kuyipish. (Tang Sofoniy 3:9.) Didi dijuku didia pa mangand mawonsu pakwez didia kulemp ni ditenchik diyimp dia katat. Dijuku dined didia mu uumwing katat dimekeshin mangand makeza kwikal kurutu—mangand makad angez. Mu mangand minam antu awonsu, akez kwijik nich musangar uyakin wa buku twisambidina kwinsambishil ulejen anch: “Bibil wisambin piur pa antu awonsu anch adi—akadivar.”— Les races de l’humanité.

[Tablo wa jinsangu udia pa paj wa 31]

Ov, uchingejin chisu kukezap kwikal mipak ya michid yitekinau kudi antu, ni dizu “ngez” dikezap kwikalaku kand?

[Chipich chidia pa paj wa 28]

Ov, ukez kudandamen kuchingel kuwanyin kwa yakushilamu ya Nzamb mudi mwasalay Aburaham?

[Chipich chidia pa paj wa 30]

Ku mes kwa Yehova, kwikil muntu ap umwing pakach pau udia ngez