Yakul Ku Yipul Ya Bibil
Ov, kudi ruchingej piur pa rufu?
Rufu ridi mudi tul tusadila anch antu afila aburena kwijik ni kusal chom ap chimwing. Pakwez, Sakatang wa mwom ukutwish kuyichirish antu afila ku mwom kusutil ku kuvumbuk. Chimekeshina mwamu chidi anch, Nzamb wamwinkisha Yesu ulabu wa kuyilangwish antu avud chakwel ikala aom.—Tang Mulej 9:5; Yohan 11:11, 43, 44.
Ov, rufu ridi mudi tul mu mutapu ik?
Nzamb washilamu anch afu adia mu manangu mend akez kuyivumbul chakwel ikala nich mwom mu mangand masu matentamina. Antu akezau kuvumbul afanyidin kushal mu rufu djat ni pakezay kand Nzamb kuyinkish mwom. Nzamb wa dikand diawonsu usotin nakash kusadil usu wend mulong wa kuyichirishin afu mwom.—Tang Job 14:14, 15.
Ov, kuvumbuk kukwikal nchik?
Pakezay Nzamb kuyivumbul antu, awiy akutwish kwijingunin ayinau, kuyijingunin arund nau, ni dijuku diau. Ap anch mujimbu wa muntu wavund, Nzamb ukutwish kumuvumbul muntu winou ni mujimbu usu.—Tang 1 Korint 15:35, 38.
Pakwez kudi antu akemp akuvumbulau mulong wa kwikal nich mwom mwiur. (Kujingunik 20:6) Antu avud akuvumbulau akushakam mu paradis ukezau kuchirish pa divu. Kukwikal disambishil disu, nich ruchingej ra kushakam chikupu.—Tang Kuseng 37:29; Midimu 24:15.