Kwatijan “Ching mu Mwant”​—Ov, Chitwishikin?

Atushalapol amwing a Nzamb ashikena ku kwikal ni yitongijok yiney piur pa kutan mbay wa uruw. Pakwez, asadin usu wa kulondul chiyul chafunday kambuy Paul cha kwatijan “ching mu Mwant”​—chiyul chinech chifanyidin kutakel mwikadil wa in Kristu awonsu. (1 Kor. 7:39,TMK) Ov, mulong wak lel ulondinau antu mwamu?

MULONG UKATA ANTU AMWING KWIDJIDJEKANG

Antu alondininga mwamu amening anch uvud wa akadivar udiap chilik chimwing ni wa anambaz. Mu jingand jivud akat kulondang mwamu. Tushinshikinany yilakej yaad yiney: Mu Corée, pakach pa ajich 100 adia Atuman padi anambaz 57, ni akadivar 43. Rapor wasalau mu Colombie umekeshin pakach pa ajich chitot adia Atuman kudi anambaz 66 ni akadivar 34.

Mu jingand jimwing, chom chiletininga yikokujol chidi anch anvaj akad kwikal akaritiy itininga mapit mavud, ni chiyikasikedining akadivar atuzweny kwatan. Pa kuman yikokujol yiney, nambaz ukutwish kwiyov anch chikasiken kwatijan “ching mu Mwant.” Chawiy lel, ukutwish kwiyipul anch: “Ov, chidi chakin kutong anch Nikutwish kutan mbay wa uruw muwamp pakach pa in Kristu?”a

KUMUCHINGEJIN YEHOVA KUDI KWA USEY

Anch niyey ukwet yitongijok ya mutapu winou, ikal nich kashinsh anch Yehova wij nawamp mwikadil wey. Chikwau kand, ndiy wij mutapu wiyovila.​—2 Jnsg. 6:29, 30.

Pakwez, Yehova ukat kutulej patok mu Dizu diend anch chifanyidin kwatijan ching mu Mwant. Ov, mulong wak? Mulong ukatin anch antwend asala mwamu. Chidiap kusu anch mulong usotining kuyiking atushalapol end ku yom yiyimp yikutwisha kuyishiken pakwez usotining kand anch ikala ni musangar. Pa chirung cha Nehemiy, chisu chatijanangau in Yuda nau angez adinga akad kumwifukwil Yehova, Nehemiy wisambina piur pa chilakej chiyimp cha Salomon. Ap anch Salomon ‘amukata kudi Nzamb, . . . amband angez amwandjikisha mu yitil.’ (Neh. 13:23-26) Mulong wa uwamp wa atushalapolend, Nzamb utulejin anch tufanyidin kwatijan ching ni in kwifukwil end akin. (Kus. 19:7-10; Isay 48:17, 18) In Kristu akin ajikitishin kamu mulong wa diking dia Nzamb dia rukat ni atekin ruchingej rau mu umutakel wend. Pamuziyidilau mwamu mudi Ntakel wau, akat kumwitiyij mudi Sakatang wa pa Mangand Mawonsu.​—Jinsw. 1:5.

Usotining chakin kamu kwipuk ‘kwibomb’ ni muntu kanang ukutwisha kutwal kulemp ni Nzamb. (2 Kor. 6:14) Nlel unou in Kristu avud akat kuziyil ku umutakel upaninay Nzamb pa chisu chiwanyidina ni akat kuman anch alondwil njil jiwamp ja manangu. Pakwez, amwing akat kutond kusal yisotinau.

CHITWISHIKIN KAMU

Maggy,b nambaz umwing udia mu Australie, ulejen chamushikena pasambishay kumwendil muntu wakad kwikal mukaritiy mulong wa kwatijan nend anch: “Naburena yikumangan yivud mulong wa kwikalang nend pamwing.” Mwikadil wam wa muspiritu wayipa kapamp kamwing. Ratana udinga mu Inde, wasambisha kumekesh rukat kudi mbay nend wa ku shikol, wasambisha kwilej Bibil. Pakwez, pasuta machuku, ndiy wasambisha kumekesh yovil ya rukat. Nambaz winou wadiokala mu uyakin ni waswimpa relijon chakwel atijana nend.

Chilakej chikwau chidi cha Ndenguè wa mu Cameroun. Wading nich mivu 19 pamwatau. Nsand wamutonda wamushilamu anch ukez kwey kwikal nich want ipau wa kusadil relijon wey. Pakwez, pasuta mbing jaad kwinyim kwa uruw wau, nfumwend wamukangesha kuya ku yikumangan ya win Kristu. Ulondin anch: “Nashala amwinam ni nasambisha kudil. Nashikena ku kuman anch nakanganya kuyikel mwom wam. Nikala nich runeng nakash.”

Pakwez, kadiap ambay a uruw awonsu akad kwitiyij adinga in chisum ap akad kwikal ni yitongijok yiwamp. Ap anch umenap mar ma kushakam ni mbay wakad kwikal mwin kwitiyij, ov, mutapu ik ukutwisha kwikal urund wey ni Tatukwey wa rukat udia mwiur? Ov, wiyova nchik piwalika kutesh chiyul chiletinau mulong wa uwamp wey? Cha usey nakash, mutapu ik wiyovay piur pa mupak wakwata?​—Jinsw. 1:33.

Akadivar ni anambaz a pa mangand mawonsu akutwish kulond anch kwatijan “ching mu Mwant” kuwapin nakash. Ajich akwatin mupak wa kumusangaresh Nzamb, akat kwatijan ching ni mbay uwanyidina wa pakach pa in kumwifukwil end akin. Michiko udia mu Japon udi nambaz umwing udia mujich, anamakwend amubachika chakwel atijana ni muntu wakad kwikal mukaritiy. Kupwa kwa kushinshaman ku yikokujol yiney, ndiy wamana mutapu wamanau arund nend ni antu akwau ijay antu akwatijan nau a mu chikumangen. Walonda anch: “Nalonda anch mulong Yehova udi ‘Nzamb wa musangar,’ musangar wetu ufanyidinap kwimen ching pa kwatijan ap kwikal mujich bwat. Nitiyija kand anch ndiy utwinkishininga yawonsu yisotina muchim wetu. Chawiy lel, anch tutaninap mbay wa uruw wakwatijan nend, tufanyidin kwitiy kushal ajich mu chisu kanang.” (1 Tim. 1:11) Chipasuta machuku, Michiko watijana ni mukadivar muwamp, ni ukwet musangar wadingay ni kuchingel.

Akadivar amwing achingela niyawiy chakwel atana mbay wa uruw uwanyidina. Bill udia mu Australie udi pakach pa akadivar inay. Ndiy ulondin anch chisu chimwing nasota kwatijan ni mband umwing wading wakad kwikal kaman. Pakwez, nalika kuta urund wa piswimp nakash ni mband winou. Ov, mulong wak? Chidi mulong kasotap kusambish kuta urund ap kubombakan nau “antu akad ritiy.” Chipasuta mivu, ndiy wasambisha kuyipolaku anambaz amwing mwamu piur pa milong ya uruw, pakwez awiy kamwitiyap. Bill wachingela mivu 30 kurutu amana nambaz uwanyidina kwatijan nend. Bill ulondin anch: “Nishimwokinap kwam.” Ulejen kand anch: “Niyova kwikal uyukishinau mulong tuyiling nend pamwing mu mudimu wa kulejan, kwilej pamwing, ni kwifukwil pamwing. Nikwet musangar wa kutanijan ni wa kwikal pamwing ni arund nend a mukajam mulong awonsu adi in kumwifukwil Yehova. Mu uruw wetu, tusadidining yany ya Bibil.”

PIUKATA KUMUCHINGEL YEHOVA

Ov, chom ik ufanyidina kusal pa utekina mulong wey mu makas ma Yehova? Chakusambish ufanyidin kutongin piur pa mulong wak udiap mu uruw. Anch utonginany anch diyingish dien dimedin pa yany ya mu Bibil yilondina piur pa kwatijan “ching mu Mwant,” ikalany nich kashinsh anch ulimishinany chijil cha mu Bibil. Ijikany anch Yehova woviling musangar piukatanya kuziyil ku Dizu diend. (1 Sam. 15:22; Jinsw. 27:11) Dandamenany kand ‘kwazuril muchim yen’ kudi Nzamb mu malembil. (Kus. 62:8) Malembil men makutwish kwikal makin anch ukat kulembil chisu chawonsu ni anch madiokil mu muchim. Urund wey ni Nzamb ukukasikan pichuku pichuku anch ujijamen ku yikokujol urishina nich. Ikal nich kashinsh anch Mwant Mujim wa mangand mawonsu ukat kuyibangin atushalapol end awonsu, ni ukwet usey nakash ku mes mend. Ukat kubangin nakash piur pa maswir mey ni piur pa yom utongina. Kashilamwap kumwinkish muntu ni muntu mbay wa uruw. Chawiy lel, anch ukwet chakin kamu kuswir kwa mbay wa uruw, Nzamb wij nawamp mutapu wa kukuwanyishin maswir minam ma usey.​—Kus. 145:16; Mat. 6:32.

Chisu chinech ukutwish kutong mudi mwatongay David, palonday anch: “[Yehova, NWT], ngakula swa nashadishin kal ruchingej ram. Kangal wanjingam.” (Kus. 143:5-7, 10) Mu yisu yiney, mushila Tatukwey wa mwiur chisu chakwel akuleja yiufanyidina kusal. Ukutwish kusal mwamu pa kwitekin chisu cha kutang Dizu diend ni kutongijokin pa yom utangina. Mwamu ukwijik yikwitinay Yehova ni ukuman mutapu wayikwashay atushalapol end a pasak. Anch wamutesh, ukez kudandamen kumuchingejin ni ukwikal ni manangu ma kumuziyil ndiy.

Ov, chom chikwau chikutwisha kusal anch mivu yey ya ujich yikala ya musangar ni yibudishina mabuj mawamp? Ukutwish kusadil mivu yey ya ujich mulong wa kukudish ronganyin ra muspiritu, muchim wa kupan, mwikadil wa kusal mudimu, musangar, kwikal ushinshamena kudi Nzamb, kwikal ni yaku yiwamp​—mikadil yitinau mulong wa kwikal ni musangar mu mwom wa dijuku. (Dis. 24:16-21; Rut 1:16, 17; 2:6, 7, 11; Jinsw. 31:10-27) Tek Want pa ndond ya kusambish pa kwipan ni muchim umwing mu mudimu wa kulejan ni mu mijikit yikwau ya win Kristu; kusal mwamu kukez kwikal diking. Bill, walondangau kwinsambishil, ulondin piur pa mivu yadingay kuchingel uruw anch: “Yasuta swaa! Nasadila chisu chinech mu mudimu wa Yehova, mudi uchibol.”

Mwaning, chitwishikin kwatan ap kwachik “ching mu Mwant.” Kuziyil ku chijil chinech kukukukwash chakwel umutumbisha Yehova ni ukwikal nich musangar uvud. Bibil ulondin anch: “Wayuk muntu ukata kumulimish [Yehova, NWT], ndiy kamu ukweta musangar wa kuziyil malejan mend. Dipit dikuvulijan mu chikumbu chend, kutentam kwend kukushakam chikupu.” (Kus. 112:1, 3) Chawiy lel, dandamen kulimish chijil cha kwatan ap kwachik “ching mu Mwant.”