“Disudiel”​—Ov, Dirumburikin Chom Ik?

Piukata kutesh mazu malondiningau anch “disudiel didi piswimp!” ov, chom ik utongininga? Utongining piur pa muntu utoyina kurutu kwa chimet ni asadina majest, ni Bibil ku makas? Anch, utongin piur pa muntu ipal ukweta wedj ulemp wiminya kuns kwa njil, udjita nkandj mulemp ni wiswikin moj mwi mbund, ulejena piur pa yijingidij ya rusangu ra disudiel dia mangand? Kutongijokin pa yom yiney kukutwish kuyishikij antu amwing ku kwipan, pakwez akwau akutwish kwau kuman anch maswimbwa.

Bibil ulondin anch: ‘Disudiel dikwez.’ (Mateu 24:14) Chom chinech achitazukin kand anch “Dichuku dijim dia Nzamb, [TMK]” ap anch “Harmagedon.” (Kujingunik 16:14, 16) Mu win yakin, ma relijon mavud makweting kanrumbangesh pa mulong winou wakad kwijikan nawamp, ukweta jinsangu jivud jakad kwovakan. Pakwez, Bibil amwinend ulondin patok piur pa disudiel​—umekeshin chirumburikina disudiel ni chidiakad kurumburik. Bibil utukwashin kand kwijik patok anch disudiel didi piswimp. Cha usey nakash, utufundishin chitufanyidina kusal mulong wa kupand! Chakusambish, tushinshikinany bil piur pa yitongijok yimwing ya makasu ni tuyirumburilany kand. Kukwatijan ni Bibil, ov, “disudiel” dirumburikin chom ik mu win yakin?

CHIDIAKAD DISUDIEL KURUMBURIK

1. DISUDIEL JIDIAP JINGANY, JA KUJIYISH DIVU NI KASU.

   Bibil ulondin anch: “[Nzamb] warijeka ngand kudiok mutambu djat ni mutambu ukwau, chakwel kiyikushemunikap chikupu.” (Kuseng 104:5) Verse winou ni makwau kand matwinkin kashinsh anch Nzamb kakezap kwend kujiyish mangand ap kulikidil anch antu amashesha bwat!​—Mulej 1:4; Isay 45:18.

2. DISUDIEL YIDIAP YOM AP YINSHIP YIKATA KUSADIK PAKAD KUYICHINGEJIN.

   Bibil ulejen anch disudiel didi chom chatenchikau​—Nzamb watenchika kal chisu chiwanyidina mulong wa disudiel dined. Bibil ulondin anch: “Kwikil muntu wija kushik kwa dichuku dinidia ap kwa chisu chinicha. Aruu a mwiur kijap, ap Mwan, ching kusu Tatuku ndiy wija amwinend. Babalany, chishany ku mes, mulong kiwijanyap chisu chikushika yom yiney.” (Marko 13:32, 33) Chakin kamu, Nzamb (“Tatuku”) warijekin kal “chisu” chiwanyidina chikeza kwez disudiel.

3. DISUDIEL KAKUDILETISHAP KUDI ANTU AP KUDI YOM YIYIMP YIDIA MUDI NSIS JA KASU JIDIOKILA MWIUR.

   Kujingunik 19:11 ulondin anch: ‘Am namana diur dianzurik, kutal kabar mutok, ni wading ukandaminap amupidil anch, Ushishamen ni Wakin.’ Verse 19 uwejidinaku kand anch: “Chad namana nnam wa chidiany, ni ant a pa mangand pamwing ni yisak yau ya amasalay, akumangana pamwing mulong wa kurish njit nend ushicha pa kabar ni yisak yend ya amasalay.” (Kujingunik 19:11-21) Ap anch mazu minam madi ma mu chifanikesh, tukutwish kutesh kurumburik kwa mazu minam mwamu: Nzamb ukez katum chisak cha angel mulong wa kushesh akankuny end.

CHIRUMBURIKINA DISUDIEL

1. DISUDIEL DIA MA GUVERNEMA MAYIMP MA ANTU.

   Bibil ulondin anch: “Pa chisu cha in kutakel inay [ma guvernema], Nzamb wa mwiur ukez kukasikesh [kutek] want ukwau wakad kwez kwikal nich disudiel chikupu. Kakez kuukwatap want winou, pakwez ukez kushesh mant makwau mawonsu, chad wawiy ukez kushakam chikupu.” (Daniel 2:44) Mudi mwalondangau mu dinans dia 3, kukez kwikal disheshik dia “ant a pa mangand pamwing ni yisak yau ya amasalay,” akeza ‘kukumangan pamwing mulong wa kurish njit nend ushicha pa kabar ni yisak yend ya amasalay.’​—Kujingunik 19:19.

2. DISUDIEL DIA NJIT, CHISUM, NI KUBUREN KUTENTAM.

   “[Nzamb] ukat kukatwish njit ni kwisudiel ya mangand.” (Kuseng 46:9) “Antu atentamina akez kaswan ngand, ni antu akashinsh akez kashakamamu, pakwez antu ayimp akez kayidiosh mwingand, ni in rubabek akez kayidioshamu.” (Jinswir 2:21, 22) ‘Talany! Nikat kusal yom yawonsu yisu.’—Kujingunik 21:4, 5.

3. DISUDIEL DIA MA RELIJON MAKANGENYA KUMUSANGARESH NZAMB NI ANTU.

   “Aruu akat kulond uruu wa makasu, ni in kupesh akat kuyikel mudi mulondilau aruu. . . . [Ov, ukez kusalany ik chisu chikeza kushik disudiel, nwt]?” (Jeremiy 5:31) “Antu avud akez kwingel anch: ‘Nsalejetu, Nsalejetu! Twalejana dizu dia Nzamb mu dijin diey, twadiosha ayilembil avud mu dijin diey, twasala kand yilay yivud mu dijin diey!’ Chad nikez kuyakul anch; ‘Kwij kwen, kinakwijikanyap. Ndiokalany, udiany antu ayimp!’”​—Mateu 7:21-23.

4. DISUDIEL DIA ANTU ADANDAMEDINA KUPAN UKWASH KU MILONG YA MANGAND.

   Yesu walonda anch: “Nzamb ukat kuyirumburish antu mwamu: chimunyik cheza kal mu mangand, pakwez antu akatil mididim nakash kupandakanamu kutok, mulong yisalijok yau yidi yiyimp.” (Yohan 3:19) Bibil urumburil kusheshik kwa mangand kwa kusambish kwasadika pa chirungu cha Nowa mwin kushinshaman. “Mabeb majim, mawiy majiyisha mangand ma pakur. Chawiy maur ni divu, mangand ma katat, ayilamidin kand ku dizu dia Nzamb chakwel yez yisheshik nich kasu. Ayilamin mulong wa kuchingel Dichuku dikurumburishay Nzamb ni kuyishesh antu amubwambwidila ndiy.”​—2 Pita 3:5-7.

Ijik anch kushik kwa “Dichuku dikurumburishay Nzamb ni kuyishesh antu” adifanikeshin nich disheshik dia “mangand” pa chirungu cha Nowa. Ov, mangand ma mutapu ik masheshau? Ngand yasheshikap; pakwez ngand ‘yasheshika’ yading “antu amubwambwila Nzamb”​—akankuny a Nzamb. Chisu chikezay Nzamb, “Dichuku dikurumburishay,” antu atonda kwikal akankuny a Nzamb akez niyawiy kujiy. Pakwez arund a Nzamb akez kwikal mu diking, mudi mwadingay Nowa ni dijuku diend.​—Mateu 24:37-42.

Tong bil mutapu ukwikala divu dined kupwa kwa Nzamb kujiyish antu ayimp ni yibachikin yau yawonsu! Chimeken patok anch, rusangu ra mu Bibil piur pa disudiel ridi rusangu ruwamp, ridiap rusangu riyimp. Pakwez, ukutwish kwiyipul anch: ‘Ov, Bibil utulejin chisu chikweza disudiel? Dikutwish kwikal piswimp ap? Mutapu ik nikutwisha kupand?’