Lam Kushinshaman Kwey ku Want wa Nzamb

1, 2. (a) Kovijan ik kudiaku pakach pa kwikal ashinshamena kudi Yehova ni kulik kwiyandjik mu matend ma mangand minam? (Tal chipich cha kwinsambishil.) (b) Antu avud amekeshining kushinshaman ku yom ik, chad nich yibudikin ik?

ATUSHALAPOL a Yehova kakwiyandjikangap mu milong yikata kwauril antu, mudi wanangand, katond ka chikit ap yaku. Ov, mulong wak? Mulong tumukatin Yehova, tukat kumekesh kushishaman kudi ndiy ni tukat kumuziyil. (1 Yohan 5:3) Yikalap ndond tushicha ap yitudiokila, tulondwil yany ya Nzamb. Kumekesh kushinshaman kudi Yehova ni ku want wend kukwet usey nakash kusutamu chom chikwau chawonsu. (Mateu 6:33) Wawiy mutapu tukutwisha kumekesh anch: ‘tudiap mu umwing ni mangand.’​—Tang Yohan 17:11, 15, 16; Isay 2:4.

² Antu avud nlel mu mangand amekeshin kushinshaman nakash kwi ngand yau, muchid wau, yaku yau ap kand ku chisak chau cha masengan. Cha ushon, yom yiney yikat kulet kubechijan pakach pa antu, kukisijan ni yisu yimwing kujipijan. Ap anch tukatap kwiyandjik mu matend minam, pakwez makat kutushiken etu ni majuku metu ni makat kutumesh mar nakash. Chikutwish kwikal chiswapela kubwambwil anch guvernema wakwat mipak yiyimp, mulong Nzamb watwinkisha kal ukaliweny wa kwijik yom yidia yiwamp ap yiyimp. (Disambishil 1:27; Kuvurik Yijil 32:4) Mutapu ik ukata kwiyov anch kwasadik yom yiyimp? Ov, ukat kwiyandjikamu anch bwat?

3, 4. (a) Mulong wak tufanyidinap kwandam mu matend? (b) Yom ik tukwileja mu mutu wa mulong winou?

³ Antu amwing akat kwiyandjikamu mu matend mulong guvernema ukat kuyilej anch wawiy mutapu uwamp ufanyidinau kusal an a ngand. Pakwez etu tumulondwil Yesu. Komb, tufanyidinap kwiyandjik mu politik ni tufanyidinap kurish njit. (Mateu 26:52) In Kristu akin kafanyidinap kutong anch chikunku chimwing cha mangand ma Satan chidi chiwamp kusutamu chikwau. (2 Korint 2:11) Tufanyidinap kwiyandjik mu milong yawonsu ya mangand minam.​—Tang Yohan 15:18, 19.

⁴ Mulong tudi akad kuwanyin, antu amwing pakach petu achikwet yitongijok yiyimp piur pa antu tushalijadina nau. (Jeremiy 17:9; Efes 4:22-24) Mu mutu wa mulong winou, tukwilej yany yikutwisha kutukwash chakwel turisha ni tuwina yitongijok yiney yikata kwauril antu. Tukwisambin kand mutapu tukutwisha kwikal ashinshamena ku Want kusutin ku kwilej mutapu wa kutongijokin piur pa mutapu ukatay kusal Yehova ni Yesu.

TUFANYIDINAP KUKWASH CHIKUNKU AP CHIMWING CHA MANGAND

5, 6. Chisu chadingay Yesu pansh, ov, mutapu ik wamanangay yisak ya antu kushalijan, ni mulong wak?

⁵ Anch chikukasikedin kulik kwiyandjik ni kusut ku mutambu kanang, ufanyidin kwiyipul anch: ‘ang wading Yesu, wafanyina kusal ik?’ Padingay Yesu panap pansh, kwading milong ni matend pakach pa antu a ku Yudea, Galalia ni a ku Samaria. Tal yilakej yimwing. In Yuda ni in Samaria kadingap ni kwovijan ap pakemp. (Yohan 4:9) Afaris nau Asadus kadingap kwovijan mu milong yivud. (Midimu 23:6-9) In Yuda ileja Yijil atongang anch awiy adi apandaken kuwap kuyisutamu antu akwau. (Yohan 7:49) Ni antu avud ading ayikisin in kulambwish yitad ni in Rom. (Mateu 9:11) Pakwez Yesu kiyandjikap mu milong yiney. Yisu yawonsu wipanang ching mu kulond uyakin piur pa Yehova ni wading wij anch Isarel udi muchid wa pakampwil wa Nzamb, pakwez kayifundishap in kwilej end anch apandaken kuwap kuyisutamu antu akwau. (Yohan 4:22) Pakwez, wayifundisha kukat antu awonsu.​—Luka 10:27.

⁶ Mulong wak Yesu kamanap anch chisak kampand cha antu chisutil chikwau? Mulong ndiy ni Tatukwend ayitongidining antu. Yehova wayitanga antu chakwel atwisha kwizwish ngand nich ulombu wa yikit kushalijan. (Disambishil 1:27, 28) Chawiy lel, Yehova ni Yesu kakatap kutong anch ulombu wa chikit, muchid ap dizu kanang dikwet usey nakash kusutamu dia antu akwau. (Midimu 10:34, 35; Kujingunik 7:9, 13, 14) Tufanyidin kamu kulondul chilakej chau chiwamp​—Mateu 5:43-48.

7, 8. (a) Ov, tufanyidin kwikal ku mutambu wa nany, ni mulong wak? (b) Chom ik tufanyidina kuvurik piur pa kupwish milong ya antu?

⁷ Mulong wak tufanyidinap kupan ukwash ku umutakel wa muntu ap ku guvernema? Mulong tuding ku mutambu wa Yehova. Ndiy Mwant wetu. Mu Eden, Satan walonda anch, Yehova ukat kuyitakel antu mu mutapu uyimp. Satan wasota kuyijikish antu anch umutakel wend wading uwamp kusutamu wa Nzamb. Yehova ukat kutulik tukwata mupak ayinetu anch tukimbin kusut ku mutambu kanang. Pakwez, chidi mutapu ik kudi ey? Ov, ukat kumuziyil Yehova mulong witiyijining anch mutapu wend wa kusal yom upandaken kuwamp kusutamu weyey? Ukwet kashinsh anch Want wend wawiy ukutwisha kupwish milong yetu? Ap ukat kutong anch antu akutwish kwitakel ayinau nawamp pakad ukwash wa Nzamb?​—Disambishil 3:4, 5.

⁸ Chilakej, anch muntu wakwipul anch utonginap nchik piur pa chisak kampand cha chipolitik ap piur pa antu adiamu ap kand yitenchik yikwau mudi yiney, ov, ukumwakul nchik? Antu amwing adia mu yisak mudi yiney akutwish kwikal in kashinsh ni akutwish kamu kuyikwash antu. Pakwez, twij anch ching Want wa Yehova wawiy ukupwisha milong yawonsu ya antu ni kudiosh kuburen kutentam. Chikwau kand, tulondwiling umutakel wa Yehova mu chikumangen, pa ndond pa muntu ni muntu kusal yimusangareshina. Chawiy chisadina anch chikumangen chikala mu uumwing.

9. Ov, mulong ik wadingaku pakach pa in Kristu amwing mu mivu chitot ya kusambish, ni chom ik chafanyinau kusal?

⁹ Mu mivu chitot ya kusambish, in Kristu amwing a ku Korint akakalijananga amwing ni akwau mu kulond anch: “‘Am nidi wa Paul,’ ‘Am nidi wa Apolos,’ ‘Am nidi wa Kefas,’ ‘Ni mukwau anch nidi wa Kristu.’” Patanay Paul yom yiney wanenganana. Winou wading kamu mulong ukash, mulong chisambu cha chikumangen chading mu ubaj. Chawiy chayipulay akadivar nend nau anambaz anch: ov, komb “Kristu waurokin?” Paul wayiyula anch: “Anamakwam in Kristu, nakwilembilany mu dijin dia Nsalejetu Yesu Kristu anch, ovijanany, kangal kwikal kwaurok pakach pen, Ikalany nich chitongijok chimwing ni rusot rumwing.” Chawiy tufanyidina kusal niyetu mwamu. Chifanyidinap kwikala kwaurok ap kumwing mu chikumangen.​—1 Korint 1:10-13; tang Rom 16:17, 18.

10. Ov, chom ik chayilejay Paul in Kristu, ni chom ik tukwilejinaku?

¹⁰ Paul wayivurisha in Kristu azizidilau many anch kwol kwau kudi mwiur ni kangal atongina ku “yom ya mangand minam.” (Filip 3:17-20)a (Tal mazu madia kwishin kwa paj.) Azizidilau many adi antimesh amumekeshina Nzamb ni Kristu. Anch ntimesh udi mwi ngand yindj, kakutwishap kwiyandjik mu milong ya ngand yiniya ap ya chipolitik. Chilik chimwing, chiwapinap kudi azizidilau many kwiyandjik mu milong ya mangand ni ya chipolitik. (2 Korint 5:20) Antu akweta ruchingej ra kushakam pa divu chikupu ashinshamen ku Want ni kakutwishap kwiyandjik mu milong ya mangand minam.

IFUMBA AMWINEY KUSHINSHAMAN KU WANT WA YEHOVA

11, 12. (a) Mwikadil ik tufanyidina kulik anch tukimbin kushal ashinshamena ku Want wa Nzamb? (b) Ov, mutapu ik watongay nambaz umwing piur pa antu kanang, ni chom ik chamukwasha kuswimp?

¹¹ Jindond jivud mu mangand, antu akweting kovijan kwa pakampwil nau antu akwetau nau jinsangu jimwing, yaku ap rudim rumwing rikatau kulond. Akat kwibaz nakash mulong wa kwol kwau. Pakwez, etu tufanyidinap kwikal nich mwikadil winou. Tufanyidin kuswimp mutapu wetu wa kutong ni tufanyidin kufumb kom ketu chakwel tulika kwiyandjik mu milong yin yawonsu yikushikena. Ov, mutapu ik tukutwisha kusal mwamu?

¹² Chilakej, Mirjetab (Tal mazu madia kwishin kwa paj) wavadikina mwingand yatazukangau pakur anch Yougoslavie. Mu teritwar wapaminay antu ading ayikisin in Serbie. Pilejay piur pa Yehova, wajingunina anch uyikatining antu a ulombu wawonsu, pakwez Satan ndiy usotininga anch antu akisijana. Chawiy wasala usu wa kuswimp mutapu wiyovangay. Chad, chisu chasambisha njit pakach pa michid kushalijan mu teritwar wadingay, Mirjeta wasambisha kand kwikal nich yitongijok yiyimp padiau in Serbie. Kakatap kand kuyilej uman. Wijika anch chading chiyimp kusal mwamu, wamulembila Yehova chakwel amukwasha alika yitongijok yend yiyimp. Wamwita kand anch amukwashaku chakwel asambisha mudimu wa uchibol. Mirjeta ulondin anch: “Nimen anch kwipan nakash mu mudimu winou kukwet usey nakash. Mu mudimu wa kulejan, nasala usu wa kwimburij rukat ra Yehova ni Namana mutapu wapwa yitongijok yam yiyimp.”

13. (a) Ov, chom ik chamushikena Zoila, ni chom ik chasalay? (b) Chom ik tukutwisha kwilejin ku yom yamushikena Zoila?

¹³ Zoila udi nambaz wa mu Mexique waya mwingand ya Europe. Mu chikumangen chau, mwading kand akadivar ni anambaz adiokala mu yikunku yikwau ya Amérique Latine. Zoila walonda anch amwing pakach pau ading kutumbish nakash ngand yadiokalau, yishankur ni mizik yau. Kovap musangar, pakwez wamulembila Yehova chakwel amukwasha alika kwiyov nayimp. Ov, chom ik twafanyina kusal anch twading mu mashakamin mudi minam? Akadivar netu nau anambaz amwing akat kurish nich yovil yiyimp anch muntu kanang walond yom yiyimp piur pa kwol kwau. Chawiy lel, tufanyidinap kulond ap kusal chom chimekeshina anch chisak cha antu kampand chisutinamu chikwau. Tufanyidinap kuletish kwaurok mu chikumangen ap ndond yawonsu yitudia.​—Rom 14:19; 2 Korint 6:3.

14. Ov, chom ik chikutwisha kukukwash chakwel wiyova mwiyovilingay Yehova piur pa antu?

¹⁴ Etu awonsu twijing anch, atushalapol a Yehova ading mu uumwing, tufanyidinap kutong anch ndond kampand ap ngand kanang yisutinamu ya antu akwau. Pakwez, anamakwey ni antu wapama nau akutwish kukubachik chakwel ukata nakash kol kwen. Pamwingap uchikwet yitongijok yiyimp piur pa antu a michid yikwau, yaku yindj, alondina ndim jindj ap kand akweta ulombu wa yikit kushalijan. Ov, chom ik chikutwisha kukukwash kuswimp? Tongijokin mutapu wiyovilingay Yehova piur pa antu akata kwibaz mulong wa ngand jau ap kand atongininga anch awapin kuyisutamu akwau. Kimbijol piur pa mulong winou chisu usadina dilejan dia muntu panrend ap difukwil dia mu dijuku. Mwita Yehova chakwel akukwasha wiyova mudi mukatay ndiy kwiyov piur pa antu.​—Tang Rom 12:2.

15, 16. (a) Chom ik chikutwishau kusal antu amwing mulong tushalijadin nau? (b) Ov, mutapu ik ukutwishau anvaj kuyikwash anau ikala ashinshamena kudi Yehova?

¹⁵ Tusotin kumusadin Yehova nich kom kawamp, chawiy lel, yisu mudi yiney tufanyidin kwikala ashalijadina ni ambay netu a mudimu, arund netu a shikol, amutej netu ap anamakwetu. (1 Pita 2:19) Yesu watubabesha anch, antu akwau akez kutukis mulong tushalijadin nau. Vurik anch antu avud akata kutupompat kakwetap ronganyin piur pa Want wa Nzamb. Chawiy lel, kijap mulong wak chidi cha usey kudi etu kwikal ashinshamena ku Want pa ndond pa ma guvernema ma antu.

¹⁶ Mulong wa kwikal ashinshamena kudiay Yehova, tufanyidin kumuziyil yikalap nchik yom yikusalau ap yikulondau antu piur petwetu. (Daniel 3:16-18) Nakash kamu ansand, akutwish kuman anch chikasiken kamu kwikal ashalijadina nau akwau. Anvaj, yikwashany anen chakwel atakamana ap ikala ni mushiku ku shikol. Anen akutwish kov wom wa kulik kwifukwil drapo ap kusal misambu ya wan a ngand. Piusadilanya difukwil dia mu dijuku, ukutwish kwilejany mutapu wiyovilingay Yehova piur pa yom yiney. Yifundisha mutapu wa kurumburil nawamp yitiyij yau nich kalimish. (Rom 1:16) Chikwau kand, anch chitwishikin, yikwashany anen kwambamb ni alej au ni kuyirumburil piur pa yitiyij yetu.

SANGER YITANG YAWONSU YA YEHOVA

17. Tufanyidin kulik yitongijok ya mutapu ik, ni mulong wak?

¹⁷ Tusangaredining yakudia, rudim, kabeng muwamp ni yishankur ya kwol kwetu. Ov, utongining anch yom tukatininga nakash yipandakenamu ya antu akwau? Yehova usotin anch tusangera yom kushalijan yatangay. (Kuseng 104:24; Kujingunik 4:11) Ov, mulong wak kudandamen kulond anch mutapu umwing wa kusal yom upandaken kuwamp kusutamu ukwau?

18. Mulong wak chidi chiwamp kudi etu kuyitongin akwetu mudi mukatay Yehova kuyitongin?

¹⁸ Yehova usotin anch antu a mitapu yawonsu amwijika, mulong wa kumwifukwil ni kushakam chikupu. (Yohan 3:16; 1 Tim 2:3, 4) Chawiy lel, anch akadivar netu atongin anch tushalijadin nau tufanyidin kuyitesh mudi anch yitongijok ayitiyijin kudi Yehova. Anch twasal mwamu tukwikal nich mwom wa musangar ni tukushal mu uumwing ni akadivar netu nau anambaz. Mudi mutwalonda kal, mulong tushinshamen kudi Yehova ni ku Want wend, tufanyidinap kwiyandjik mu matend ma mangand minam. Tulikany kwibaz ni kubambil mu mangand ma Satan. Musangar mud ik tukweta patwija anch Yehova watufundisha kukat chisambu ni kwikepish! Tukat kwiyov mudi nfund a kuseng walonda anch: “Talany kuwap ni musangar anch an a kamuntu ibomba ashakamang pamwing!”​—Kuseng 133:1.