Yiney Yawiy Ndond Yetu ya Difukwil

1, 2. (a) Pasak, antu a Yehova a mwifukwilang mwindond ik? (b) Ov, mutapu ik Yesu mwamanangay tempel wa Yehova mu Yerusalem? (c) Yom ik tukwileja mu mutu wa mulong winou?

ATUSHALAPOL a Nzamb, a pakur ni akatat, akweting ndond yikatau kumwifukwil Nzamb. Chilakej, chisu chalambulay Abel mulambu kudi Yehova, watunga chintamb. (Disambishil 4:3, 4) Nowa, Aburaham, Isak, Jakob nend Moses niyawiy atunga yintamb. (Disambishil 8:20; 12:7; 26:25; 35:1; Kubudik 17:15) Yehova wayileja in Isarel kutung dizang. (Kubudik 25:8) Kupwa, wayileja kand kutung tempel. (1 Ant 8:27, 29) Kupwa kwa antu a Nzamb kudiokal mu usuk mu Babilon, akumangenang mu ma sinagog. (Marko 6:2; Yohan 18:20; Midimu 15:21) Ni in Kristu akusambish akumangenang mu yikumbu. (Midimu 12:12; 1 Korint 16:19) Nlel, antu a Yehova pa mangand mawonsu, akat ku kumangenang mu makum ma tunan ma Yot ya Want, mwawiy mukatau kwilej piur pa Yehova ni kumwifukwil.

² Yesu walimishanga nakash tempel wa Yehova wa mu Yerusalem. Rukat ra Yesu mulong wa tempel rayivurisha in kwilejend mazu ma nfund a kuseng anch: “Kutakaman kwam [mulong wa, NWT] chikumbu chey, kukez kwinshesh.” (Kuseng 69:9; Yohan 2:17) Chot cha Want chidiap mudi “chikumbu cha [Yehova, NWT]” chadinga tempel wa mu Yerusalem. (2 Jinsangu 5:13; 33:4) Pakwez, tufanyidin kumekesh kalimish kakurikina mulong wa ndond ya difukwil. Mu mutu wa mulong winou, tukwilej yany ya Bibil yitufundishina yom tufanyidina kusal chisu tudia ku Yot yetu ya Want, mutapu tukutwisha kuyilam nawamp, mutapu tukutwisha kupan ukwash nich yom yetu ya kumujimbu mulong wa kuyilam.a​—Tal mazu madia kwishin kwa paj.

TULIMISHANY YIKUMANGAN YETU

3-5. Ov, Chot cha Want chom ik, ni mutapu ik tufanyidina kuman yikumangan yetu?

³ Chot cha Want yidi ndond yiwanyidina yikatau antu kukumangen mulong wa kumwifukwil Yehova. Yikumangan yidi chipan cha Nzamb, ni yitukwashining kukasikesh urund wetu nindiy. Ku yikumangan yetu, dirijek diend dikat kutwinkish dikasikesh ni umutakel tuswirikedina. Chidi cha musangar kwikal atazukinau kudi Yehova ni Mwanend kudia ku “tebur wa Yehova,” rubing ni rubing. (1 Korint 10:21, NWT.) Tufanyidinap kuvuramen kutazuk kwinoku kwa pakampwil.

⁴ Yehova utulejin patok anch usotil twikala ku yikumangen chakwel tumwifukwila ni tukasikesijan. (Tang Hebereu 10:24, 25.) Mulong tumulimishin Yehova, tufanyidinap kuburen kwez ku yikumangen, pakad mulong wa usey. Tumekeshin musangar mulong wa yikumangan yetu anch twirijek nawamp ni twakwil ku yipul mu yikumangan.​—Kuseng 22:22.

⁵ Yom tusadina ku yikumangan, ni mutapu tulamina Yot yetu ya Want umekeshin kalimish tukweta kudiay Yehova. Tusotin anch mwikadil wetu ushimana dijin dia Yehova, difundiningau mudi chijingidij pa Chot cha Want.​—Ilikej nich 1 Ant 8:17.

6. Yom ik yalondau antu amwing piur pa Yot yetu ya Want ni piur pa antu akat kukumanganamu? (Tal chipich cha kwinsambishil.)

⁶ Anch twamekesh kalimish mulong wa Yot yetu ya Want, antu akat kuman. Chilakej, muntu umwing mwingand ya Turquie walonda anch: “Kwinang ni kwishitul kunamana mu Chot cha Want kwanshimokisha nakash. Antu adingamu ading adjadin nawamp, ading akwet musangar ni anlangwisha nich musangar. Chinech chansangaresha nakash.” Muntu winou wadandamena kwez ku yikumangan yawonsu ni kupwa watambula dibatish. Mu musumb umwing wa mu Indonésie, akadivar ayitazuka amutej nau, ayilol ni amakurump amwing chakwel aya atala Chot cha Want chisu. Ntakel wa musumb winou washimoka mulong wa mutapu watungau nawamp Chot cha Want, ni mutapu wakunau ni walamau yisalamb nawamp. Walonda anch: “Kwinang kwa chot chinech kumekeshin ritiy ren rakin.”

7, 8. Ov, mutapu ik tukutwisha kumekesh kalimish kudi Yehova chisu tudia mu Chot cha Want?

⁷ Yehova ndiy ututazukininga ku yikumangan, ni ubangidining piur pa mutapu tuyimeninga ni piur pa yom tusadilinga mu yikumangan. Tufanyidinap kusal yom yakad kuwanyin. Pakwez, yom yitiyinau ndond yimwing kakutwishap kuyitiy kudi antu a ndond yikwau. Chidi cha kashinsh kwijik anch, Yehova usotil anch etu ni antu tutazukina ku Chot cha Want twiyova anch tukwet usey. Pakwez, tufanyidinap kuburen kalimish mulong wa yikumangan yetu mu mutapu ap umwing. Chawiy lel, tufanyidinap kudjal maswin makad kufanyin ap mayimp ma wimbwambwol ni tufanyidinap kufundijadin ma mesaj, kulondol, ap kudia ni kunang chisu chisadikina yikumangan. Anvaj niyau afanyidin kuyifumb anau chakwel alikang kwendangan ap kusengan mu Chot cha Want.​—Mulej 3:1.

⁸ Payimanay Yesu antu akat kulandish yom mu tempel wa Nzamb, wova ujim nakash ni wayopata pol. (Yohan 2:13-17) Mu Yot yetu ya Want, tukat kumwifukwil Yehova ni kwilej piur pend. Chawiy lel, chisu tudia mu yikumangan tufanyidinap kwisakinamu bwat.​—Ilikej nich Nehemiy 13:7, 8.

TUKWASHIN KUTUNG YOT YA WANT

9, 10. (a) Ov, mutapu ik usadiningau antu a Yehova mulong wa kutung Yot ya Want, ni yibudikin yidi nchik? (b) Mutapu ik ukata dirijek dia Yehova kukwash yikumangen yiburedina mutapu wa kutung Chot cha Want?

⁹ Antu a Yehova mu mangand mawonsu asadin mudimu ujim nakash wa kutung Yot ya Want. In kwipan a kwisotil akad difut atondiningau, atungining ni kuyitenchik kand. Mudi chibudikin, mu mivu 15 yasutina ey, twatungin Yot ya Want 28 000 yiwamp nakash pa mangand mawonsu, ap Yot ya Want 5 dichuku ni dichuku.

¹⁰ Dirijek dia Yehova dikat kuyitum in kwipan a kwisotil ni kusadil yipan mulong wa kukwash kutung Yot ya Want ndond yikwetau nich kuswir. Tulondwil chiyul cha Bibil chilondina anch antu akweta yom yivud ayikwasha aburedina. (Tang 2 Korint 8:13-15.) Ov, nich chibudikin ik? Yot ya Want yivud ayitunga mulong wa kukwash yikumangen yiburedina mutapu.

11. Ov, chom ik chalondau akadivar amwing piur pa Chot chau cha Want chisu, ni wiyovil nchik piur pa mulong winou?

¹¹ Akadivar a mu chikumangen chimwing cha mu Costa Rica afunda anch: “Pitwimena kurutu kwa Chot cha Want, tumen mudi chilat! Twatonginap anch chikusadik mwamu. Chot chetu chiwamp achipwisha kwau mu machuku chinan! Chasadika mulong wa chiyukish cha Yehova, umutakel wa dirijek diend ni ukwash wa akadivar netu akatish. Ndong yiney ya difukwil yidi kamu chipan chiwamp, ukwash upandakena kuwap utwinkinay Yehova. Tukwet kamu musangar nakash mulong wa chom chinech.” Chitusangareshening nakash kutesh anch akadivar nau anambaz akat kumujikitish Yehova mulong wa yom yiyisadidinay. Ni tukwet musangar anch akadivar awonsu mwingand yakabuj ikalap niyawiy nich Chot chau cha Want. Chimeken patok anch Yehova uyukishin mudimu wa kutung Yot ya Want, mulong chisu chiyitunginau, antu avud asambishining kukumangenamu mulong wa kwilej piur pend.​—Kuseng 127:1.

12. Mutapu ik ukutwisha kukwash kutung Yot ya Want?

¹² Ov, mutapu ik ukutwisha kupan ukwash ku kutung kwa Yot ya Want? Pamwingap ukutwish kwikal mwin kwipan wa kwisotil mu mudimu winou. Chawiy lel, tufanyidin kupan makut mulong wa kutung Yot ya Want. Anch twasal yawonsu tukutwisha mulong wa kukwash mudimu winou, tukwov musangar wa kupan, ni chipandikena usey, tukat kumushiman Yehova. Tulondwil chilakej cha antu a Nzamb a chisu chafundau Bibil chilejena mutapu wakwashau nich yom yau mulong wa kutung jindond jau ja difukwil.​—Kubudik 25:2; 2 Korint 9:7.

TULAMANY NAWAMP CHOT CHETU CHA WANT

13, 14. Ov, yom ik twilejina mu Bibil yilejena anch tufanyidin kulam nawamp Chot chetu cha Want chinangina ni chakad kanvundangesh?

¹³ Yehova wishitwil ni udi Nzamb utumbil. Udi Nzamb wakad kanvundangesh. Chawiy tufanyidin kulam nawamp Chot chetu cha Want chikala chinangina ni chakad kanvundangesh. (Tang 1 Korint 14:33, 40.) Chakwel twishitula ni kwikal atumbila mudi Yehova, tufanyidinap ching kusu kulam kwishitul kwa difukwil dietu, manangu metu ni yisal yetu, pakwez, tufanyidin kand kwinang ku mijimbu yetu.​—Kujingunik 19:8.

¹⁴ Anch twalam nawamp Chot chetu cha Want ni pakad kanvundangesh, tukwikal ni musangar wa kuyitazuk antu ku yikumangan yetu. Ni antu akuman anch tukat kusadil yom tufundishina piur pa ngand yisu yishitwila. Akuman kamu anch tumwifukwidil Nzamb utumbila ni wishitwila ukeza kukarumun divu ed kwikal paradis muwamp.​—Isay 6:1-3; Kujingunik 11:18.

15, 16. (a) Ov, mulong wak chiswapelingap kudi antu awonsu kulam Chot cha Want chinangina? Mutapu ik tufanyidina kuchilam chinangina? (b) Ov, program ik ukwetany mu Chot chen cha Want wa kutenchik chakwel chikala chinangina, ni chisend ik chikwetay muntu mwawonsu wa pakach petu?

¹⁵ Antu akweting yitongijok kushalijan piur pa kwinang. Mulong wak? Chikutwish kwikal mulong wa yom yisadikina ndond yapaminau. Chikwau kand, Antu amwing ashich mwindond ya rufunfut ap mwindond mudia jinjil jiyimp ni mudia pot-pot. Akwau kakwetingap mem mavud ap yom yiwamp ya kukorop nich. Pakwez, yikalap ndond tushicha ni mutapu umenau antu kwinang, tufanyidin kulam Chot chetu cha Want chinangina ni chakad kanvundangesh. Mulong yawiy ndond tukata kumwifukwil Yehova.​—Kuvurik 23:14.

¹⁶ Anch tusotil Chot chetu chikala chinangina mudi muchifanyidina, tufanyidin kwirijek. Amakurump afanyidin kusal program wa chikumangen ni kushinshikin yisu yawonsu anch mon wa kusadil mulong wa kukorop ni kutenchik mu chot ap yom ya kusal nich mudimu yom yidiaku. Amakurump akutenchik program ni kushinshikin anch akat kumulimish. Yom yimwing yiswirikedin kuyiwapish kupwa kwa yikumangen, pakwez yom yikwau bwat. Etu awonsu tukwet chisend cha kwipan mulong wa kurijek Chot chetu cha Want chakwel chikala chinangina.

TURIJEKANY NAWAMP CHOT CHETU CHA WANT

17, 18. (a) Yik tukutwisha kwilejin mu mutapu walamangau antu a Yehova a pasak tempel? (b) Ov, mulong wak tufanyidin kulam nawamp Chot chetu cha Want?

¹⁷ Tukutwish kand kulam nawamp Chot chetu cha Want mu kusal mudimu wawonsu wa kuchirijek. Wawiy mutapu wasalangau atushalapol a Yehova a pasak. Chilakej, chisu chayikelay Mwant Yehoash wa mu Yuda, antu aleta makut mulong wa kurijek tempel. Mwant wayileja in kupesh anch asadina makut minam mulong wa kurijek nich tempel wading wayipa kal. (2 Ant 12:4, 5) Pasuta mivu piswimp ni 200, Mwant Yosias ni ndiy wasadila makut maletau mulong wa kurijek nich tempel.—Tang 2 Jinsangu 34:9-11.

¹⁸ Ma Biro mamwing ma Mitiy mamen kal anch antu mu jingand jau, kalaminap nawamp yot yayitunginau ap yom yikwau. Chimeken anch ching antu akemp mu mangand minam awiy ija kusal mudimu winou nawamp. Ap kakutwishap kwikal nich makut ma kuland nich yom ya kurijek nich. Pakwez anch turijekinap Chot chetu cha Want, chikwikal nich kanvundangesh ni antu akuman kamu. Chikutwishap kupan uman uwamp kudi antu. Pitusadina usu wawonsu mulong wa kulam Chot chetu cha Want nawamp, tukat kumushiman Yehova ni tukusheshap chamwamu makut makatau kupan akadivar netu.

19. Ov, yom ik ukusala chakwel umekesha kalimish mulong wa ndond yiukata kumwifukwil Yehova?

¹⁹ Chot cha Want chidi chikumbu chitunginau mulong wa kumwifukwil Yehova. Chot cha Want chidiap cha muntu kapand ap cha chikumangen kanang. Mudi mwatwileja kal mu mutu wa mulong winou, yany ya Bibil yikutukwash kwikal nich chitongijok chiwamp mulong wa ndond tumwifukwidila Nzamb. Mulong tumulimishin Yehova, tufanyidin kand kulimish yikumangan yetu ni Yot yetu ya Want. Tukwet musangar wa kupan makut metu mulong wa kutung Yot ya Want, ni kusal usu wa kuyilam nawamp ni yinangina. Mudi Yesu, tumekeshin mushiku ni kalimish mulong wa ndond yitukata kumwifukwil Yehova.​—Yohan 2:17.