Mufumba Mwaney Chakwel Amusadina Yehova
“Chifanyidin muntu wa Nzamb watumanga eza kand kakwau kudi etu, aturumburila chom cha kusal kudi mwan winou anch wez wavadik.”—ANKALANSAMBU 13:8.
MIMINY: 41, 6
1. Chom ik chasalay Manowa pateshay anch ukuval mwan?
MANOWA ni mukajend kadingap kand akwet kashinsh anch akuval. Pakwez dichuku dimwing, mwangel wa Yehova wamuleja mukajend a Manowa anch ukuval mwan. Chom cha kushimwok mud ik! Pamulejau Manowa rusangu kudi mukajend, wasangara nakash. Pakwez, watonga nakash piur pa yom yikumwitay Yehova kusal mudi nvaj. Mutapu ik wafanyinau kumufumb mwanau kumukat ni kumusadil Yehova mulong in Isarel avud ading kusal yom yiyimp? Manowa wamwita Yehova chakwel amutuma kand mwangel wend ni walonda anch: “Chifanyidin muntu wa Nzamb watumanga eza kand kakwau kudi etu, aturumburila chom cha kusal kudi mwan winou anch wez wavadik.”—Ankalansambu 13:1-8.
2. Chom ik ukweta nich kuswir mulong wa kuyifundish aney, ni mutapu ik ukutwisha kusal mwamu? (Tal kand mushet “In Kwilejey a Bibil a Usey Nakash.”)
2 Anch udi nvaj, uteshin nawamp mutapu wovay Manowa. Niyey ukwet chisend cha kuyikwash aney kumwijik ni kumukat Yehova. (Jinswir 1:8) Chisu cha difukwil dia mu dijuku, ukutwish kuyikwash kwilej piur pa Yehova ni Bibil. Chakin kamu, ukwet kuswir kwa kusal yom yivud kulik ching kwilej Bibil ni aney rubing rawonsu. (Tang Kuvurik Yijil 6:6-9.) Yom ik yikwau yikukukwasha kuyifumb aney kumukat ni kumusadil Yehova? Mu mutu wa mulong winou, tukwisambin piur pa chilakej cha Yesu. Ap anch Yesu kadingap nvaj, ukutwish kwilejin ku mutapu wayifundishay ni kuyifumb in kwilejend. Yesu wading uyikatin ni wading mwin kwikepish. Wading kand ni nkeu, chawiy wijika mutapu wiyovangau ni wamana mutapu wa kuyikwash. Tumanany chad mutapu tukutwisha kulondul chilakej cha Yesu.
YIKATA ANEY
3. Mutapu ik wading wijau in kwilej a Yesu anch Yesu wading uyikatin?
3 Yesu wayilejang in kwilejend anch uyikatin. (Tang Yohan 15:9.) Wasutishang nau kand yisu yivud. (Marko 6:31, 32; Yohan 2:2; 21:12, 13) Yesu kadingap kwend ching mulej wau; wading kand murund nau. Chawiy, ading akwet kashinsh anch Yesu wading uyikatin. Chom ik ukutwisha kwilejin kudi Yesu?
4. Mutapu ik ukutwisha kumekesh anch uyikatin aney? (Tal chipich cha kwinsambishil.)
4 Yileja aney anch uyikatin, ni mekesh anch akwet usey kudi ey. (Jinswir 4:3; Titus 2:4) Samuel, udia mu Australie, ulondin anch: “Pinading mwan mukemp nakash, Tatuku wading kwintangin buku Recueil d’histoires bibliques urel wawonsu. Wakulang ku yipul yam, wambwikatang, ni waladikang. Nashimwoka nakash pinajingunina anch mu dijuku mwapaminay Tatuku mwadingap yom mudi kubwikatijan ni kuladikan! Chakin kamu, wasala usu nakash mulong wa kwimekeshin rukat. Mudi chibudikin, nakasikesha urund wam nend, ni nading nikwet musangar ni nading mu diking.” Sal anch aney iyova niyawiy mwamu pa kuyilejang anch: “Nikukatinany.” Yibwikatang ni yiladikang. Itekina chisu cha kwambamb nau, kudia nau pamwing, ni kusengan nau.
5, 6. (a) Mulong wak Yesu wading uyikatin in kwilejend, chom ik chasalay? (b) Mutapu ik ufanyidina kuyipup aney?
5 Yesu walonda anch: “Am nikat kuyipup ni kuyikand antu awonsu inikatila.”a (Tang mazu ma kwinshin.) (Kujingunik 3:19) Chilakej, in kwilejend apwitijana yisu yivud mulong wa kwijik nany wading mujim pakach pau. Yesu wading wij mulong winou. Chawiy, wayiyulang nich kushimpish muchim chisu ni chisu. Pakwez wading ching muntu muwamp, ni wachingelang chisu ni ndond yiwanyidina mulong wa kuyiyul.—Marko 9:33-37.
6 Mulong uyikatin aney, wij anch ufanyidin kuyipup. Yisu yimwing chiwapining kuyirumburil mulong wak chom kanang chidi chiwamp ap chidi chiyimp. Pakwez, chikwikal nchik anch alik kwau kuziyil? (Jinswir 22:15) Ilejina kudi Yesu. Nich kushimpish muchim, dandamen kuyitakel, kuyifumb ni kuyiyul. Kimb chisu ni ndond yiwamp mulong wa kuyipup, ni sal mwamu mu mutapu uwamp. Elaine, nambaz udia mu Afrique du sud uvurikin mutapu wadingau kumupup kudi anvajend. Amulejang yom yading yimwitinau kusal. Chisu chamulejangau anch afanyidin kumupup ang walik kuziyil, asalang mwamu. Pakwez walonda anch: “Kampupap dichuku ap dimwing nich ujim ap pakad kwinlej mulong wak ampupang.” Mulong wa chinech, Elaine wijika anch anvajend ading amukatin.
IKAL MWIN KWIKEPISH
7, 8. (a) Chom ik chilejau in kwilej kusutil ku malembil ma Yesu? (b) Mutapu ik ukutwisha malembil mey kuyifundish aney kumuchingejin Nzamb?
7 Padingau piswimp ni kumukwat Yesu ni kumujip, wamwita Tatukwend anch: “Aba Tatuku, yom yawonsu yikuziyidil ey; rishemunina rupas riner ridioka kudi am; pakwez kangal chinisotila am, ching chiusotila ey.”b (Tang mazu ma kwinshin.) (Marko 14:36) Tong bil mutapu wiyovau in kwilej a Yesu pateshau, ap pilejau piur pa malembil mend. Ajingunina anch, ap anch wading muntu uwanyidina, wadandamena kwit ukwash kudi Tatukwend. Chawiy lel, niyawiy ileja anch chifanyidin ikala antu ikepishina ni amuchingejidina Yehova.
8 Aney akutwish kwilej yom yivud nakash kusutil ku malembil mey. Chakin kamu, ufanyidinap kulembil ching mulong wa kuyifundish aney. Pakwez, pateshinau malembil mey, akutwish kwilej kumuchingejin Yehova. Mu malembil mey, ufanyidinap kumwit Yehova ching kusu mulong wa kuyikwash aney, pakwez mwita chakwel akukwasha niyey. Ana, ushicha mu Brezil, ulondin anch: “Chisu chadingau ni milong, mudi payelangau angakam, anvajam amwitang Yehova chakwel ayinka usu wa kurish nich milong ni manangu mulong wa kukwat mipak yiwamp. Ap padingau ni milong yikash, atekang milong yau mu makas ma Yehova. Mudi chibudikin, nileja kumuchingejin Yehova.” Anch aney atesh ukat kumwit Yehova chakwel akwinka mushiku wa kupan uman kudi antu ap kumwit mwant wey wa mudimu mulong wa kuya ku chitentam, akujingunin anch uchingejidin ukwash wa Yehova, ni akwilej niyawiy kusal mwamu.
9. (a) Mutapu ik wayifundishay Yesu in kwilejend kwikal in kwikepish ni akad choy? (b) Anch udi mwin kwikepish ni wakad choy, chom ik chikwilejau aney?
9 Yesu wayileja in kwilejend kwikal in kwikepish ni akad choy, washa kand chilakej. (Tang Luka 22:27.) Atwimbuy a Yesu amana anch wipana nakash mulong wa kumusadin Yehova ni kuyikwash antu akwau, ni ileja niyawiy kusal mwamu. Niyey ukutwish kuyifundish aney kusutil chilakej chey. Debbie, ukweta an aad ulondin anch: “Nikatap kwov mukau mulong wa chisu chikatay nfumwam kusutish ni amakurump akwau. Nijika anch ap anch dijuku dietu diading ni kuswir kwa kwikalaku kwa nfumwam, watuwanyishilang maswir metu.” (1 Timote 3:4, 5) Chilakej cha Debbie ni nfumwend Pranas, chikala ni yibudikin ik pa dijuku diau? Pranas ulondin anch anend ipanang kwa kwisotil mulong wa kukwash ku yitentam. Ikala ni musangar, ni arund awamp ni ashakamang pamwing ni akadivar nau anambaz. Awonsu mu dijuku amusadidin katat Yehova mu mudimu wa chisu chawonsu. Anch udi mwin kwikepish ni wakad choy, uyifundishin aney kwipan nakash mulong wa kuyikwash antu akwau.
IKAL NI NKEU
10. Mutapu ik wasadilay Yesu nkeu pezau antu amwing a mu Galaliya kumukimb?
10 Yesu wading ni nkeu jiwanyidina. Kashinshikinangap ching pa yom yasalangau antu, pakwez washinshikinang pa chayibachikang kusal mwamu. Wajinguninang yading mu michim yau. Chilakej, chisu chimwing antu a mu Galaliya eza kumukimb. (Yohan 6:22-24) Wajingunina chamukimbinangau, kamukimbap mulong wa kutesh mafundish, pakwez mulong wa kukimb yakudia. (Yohan 2:25) Yesu wijika chading mu michim yau. Chawiy lel wayipupa nich kushimpish muchim ni wayirumburila chafanyinau kusal.—Tang Yohan 6:25-27.
11. (a) Mutapu ik ukutwisha kusal usu wa kwijik mutapu ukatau aney kwiyov piur pa mudimu wa kulejan? (b) Mutapu ik ukutwisha kuyikwash aney kusanger mudimu wa kulejan?
11 Ap anch ukutwishap kuman yidia mu michim, niyey ukutwish kusadin nkeu. Chilakej, ukutwish kusal usu wa kwijik mutapu ukatau aney kwiyov piur pa mudimu wa kulejan. Ukutwish kwiyipul anch: ‘Anam akatining mudimu wa kulejan ching anch twapwish kupim, kudia ni kuna?’ Anch wajingunin anch aney kasangaredinap nakash mudimu wa kulejan, sal usu chakwel asangera nakash mudimu winou. Yinkisha midimu yikutwishau kusal chakwel iyova anch akwet usey.
12. (a) Yesu wayibabesha in kwilejend piur pa chom ik? (b) Mulong wak in kwilej a Yesu ading akwet kuswir kwa dibabesh?
12 Mutapu ik ukwau wasadinay nkeu? Wading wij anch kurumbuk kukutwish kwamutwal muntu ku kurumbuk kukwau ap ku chitil chijim, ni wayibabesha in kwilejend pa mulong winou. Chilakej, in kwilej ading ij anch kusal masandj kuyipin. Pakwez Yesu wayibabesha piur pa chom chikata kutwal ku kusal masandj. Walonda anch: “Muntu mwawonsu [ukudandamena kumutal] mband wamwovil ris ra kulal nend, muntu mwinou wasal kal chitil cha kulal nend mu muchim wend. Anch dis diey dia katatuku diakutwal ku chitil, dibwita.” (Mateu 5:27-29) In kwilej a Yesu ading ashich pamwing nau in Rom adinga akatina masandj ni kutal yom ya masandj ni kulond mazu mijondila. Chawiy chayibabeshay Yesu nich rukat in kwilejend kwipuk yawonsu yikutwisha kuyikangesh kusal yom yitentamina.
13, 14. Mutapu ik ukutwisha kuyikwash aney kwipuk kwipuwangej kuyimp?
13 Mudi nvaj, ukutwish niyey kusadin nkeu mulong wa kuyichidij aney kulik kusal yom yawonsu yikutwisha kumunenganesh Yehova. Cha ushon, nlel unou, ap an akemp adi mu ubaj wa kutal pornografi ni yom yikwau ya masandj. Chakin, ufanyidin kuyilej aney anch kutal yom ya masandj kuyipin. Pakwez, kudi kand yom yikwau ufanyidina kusal mulong wa kuyichidij. Iyipula anch: ‘Aney ijing kamu mulong wak pornografi udi wa ubaj? Chom ik chikutwisha kuyibachik kutal yom yiney? Nikat kusal anch chiyiswapela kwambamb nam piur pa mulong wawonsu, chakwel angita ukwash anch adi mu ubaj wa kutal pornografi?’ Ap anch achidi anikanch nakash, ukutwish kuyilej anch: “Ang waman yom kanang pa Internet yilondina piur pa winzikis ni uswiridin kuyital, ez amboku winleja. Kangal wov wom ap usany mulong wa kwingit ukwash. Nikwet kuswir kwa kukukwash.”
14 Piukata kutond mitapu ya kwipuwangej, tong kand nawamp piur pa mutapu ukutwisha kwikal chilakej chiwamp. Pranas, wajimbulangau kwiur oku, ulondin anch: “Ukutwish kulondol yom yivud, pakwez aney amen yom usadina ni akukwimburij.” Anch ukat kutond nawamp mizik, ma buku, ma filim ma kwipuwangej nich, ukutwish kuyikwash aney niyawiy kusal mwamu.—Rom 2:21-24.
YEHOVA UKUKUKWASH
15, 16. (a) Mulong wak ukutwisha kwikal nich kashinsh anch Yehova ukukukwash kuyifumb aney? (b) Yom ik tukwisambina mu mutu wa mulong ulondwilaku ou?
15 Chom ik chashikena chisu chamwitau Yehova ukwash kudi Manowa mulong wa kwikal nvaj muwamp? “[Yehova] wamutesha Manowa.” (Ankalansambu 13:9) Nvaj, Yehova ukutesh malembil mey niyey. Ukukukwash kuyifumb aney. Ni ukukukwash chakwel umekesha rukat rey, kwikepish ni kwikal ni nkeu.
16 Mudi mutapu ukukukwashay Yehova kuyifumb aney pachidiau anikanch, ukukukwash kand kuyifumb pakwikalau ansand. Mu mutu wa mulong ulondwilaku ou, tukwisambin mutapu ukutwisha chilakej cha Yesu cha rukat, kwikepish, ni kwikal ni nkeu kukukwash kuyifumb aney apamina kal kumusadin Yehova.
a Bibil ufundishin anch kupup kurumburikin kulet umutakel, kufumb, kuyul ni yisu yimwing kukand. Anvaj afanyidin kuyipup anau mu mutapu uwamp ni pakad ujim.
b Pa chirungu cha Yesu, an ayitanzukang atatukwau anch Aba. Dizu dined diamekeshang rukat ni kalimish nakash.—The International Standard Bible Encyclopedia.