Mufumba Mwaney Wapamina Kal Chakwel Amusadina Yehova

1, 2. (a) Chom ik chikatau anvaj amwing kusal piur pa yakamish ya an apamina kal? (b) Mutapu ik ukutwishau an kutaninamu mu mivu yau ya usand?

ANVAJ akweting musangar nakash anch anau atambul dibatish. An anying a Berenice awonsu atambula dibatish kurutu kwa kuwanyish mivu 14. Berenice ulondin anch: “Wading musangar ujim nakash washikena mu mwom wetu. Chakin, twasangara nakash mulong anetu asambisha kumusadil Yehova. Pakwez twading twij kand anch, mulong apam kal, anetu afanyina kurish nich milong yivud.” Niyey ukutwish kwiyakamish pa mulong winou anch mwaney ikundj ap mband wabarik usand.

² Mwin kwilej mikadil yau an ulondin anch mivu ya usand yikutwish kwikal yikash nakash kudi anvaj ni kudi an, pakwez anvaj kafanyidinap kutong anch anau apamina kal azarikin ap anch adi atubas. Pakwez, ulondin anch ansand ij yom, akwet yovil nakash ni akwet kuswir kwa kusutish chisu pamwing nau arund nau. Chawiy ap anch adi ansand, aney akutwish kukudish urund wa piswimp ni Yehova, mudi mwasalay Yesu padingay nsand. (Tang Luka 2:52.) Akutwish kand kukasikesh ukaliweny wau mu mudimu wa kulejan ni kukasikesh maswir mau ma kusal yivud mu mudimu wa Nzamb. Akutwish kand kukwat mipak yau, mudi kupan mwom wau kudi Yehova ni kumuziyil. Pakwez, chom ik chifanyidinay nvaj kusal mulong wa kumufumb mwanend wapamina kal chakwel amusadila Yehova? Ukutwish kwilejin ku mutapu wayifumbay Yesu in kwilejend nich rukat, kwikepish ni nkeu.

MUKATA MWANEY WAPAMINA KAL

3. Mutapu ik wijikau atwimbuy anch Yesu wading murund nau?

³ Yesu kadingap ching Mwant wa atwimbuy end. Pakwez wading kand murund nau. (Tang Yohan 15:15.) Pasak, mwant kadingap ufanyidin kwambamb chisu chawonsu ni aswik end piur pa yitongijok ni yovil yau. Pakwez, Yesu kayimanangap atwimbuy end mudi aswik. Wading uyikatin ni wasutishang nau chisu. Yesu wasangerang kuyilej yitongijok ni yovil yend, ni wayiteshang nawamp chisu chamulejangau yitongijok ni yovil yau. (Marko 6:30-32) Kwambamb kwading pakach pa Yesu nau in kwilejend kwakasikesha urund wau ni kwayitenchika atwimbuy mulong wa mudimu wafanyinau kusal machuku ma kurutu.

4. En anvaj, mutapu ik ukutwishanya kwikal arund a anen? (Tal chipich cha kwinsambishil.)

⁴ Ap anch udi mwant padi aney, ukutwish kand kwikal murund nau. Arund akat kusutishang chisu pamwing. Pamwing ap ukutwish kukepish chisu cha mudimu wey ap cha kusal yom yikwau, mwamu ukwikal ni chisu cha kusutish nau aney. Ufanyidin kulembil ni kutongin nakash pa yom yiney. Arund akat kusangerang kand yom yimwing. Chawiy lel, sal usu wa kwijik yom yikatinay mwaney wapamina kal mudi mizik, ma filim ni masengan makatiningay. Kupwa sal usu wa kukata yom yikatinay mwaney. Nambaz Ilaria, udia mu Italie ulondin anch: “Anvajam akat kubanginang mizik yinikata kutesh. Chawiy, tatukwam wikala murund nam wa piswimp, ni chading chinziyidin kumulej milong yam yawonsu.” Anch wikal murund wa piswimp wa aney ni anch wayikwash kwikal arund a Yehova, ukushadishap kwey want wey mudi nvaj. (Kuseng 25:14) Aney akuman anch uyikatin ni uyilimishin, ni chikuyiswapel kwambamb ney milong yin yawonsu.

5. Mutapu ik wafanyinau in kwilej a Yesu kwikal ni musangar mu kusal mudimu wa Yehova?

⁵ Yesu wading wij anch, ang in kwilejend asanger kumusadil Yehova ni ipan nakash mu mudimu wa kulejan rusangu, akwikal chakin kamu ni musangar. Chawiy, wayikasikesha kusal nakash mudimu wa kulejan ni wayikana anch ukuyikwash.​—Mateu 28:19, 20.

6, 7. Mutapu ik ukutwisha kumekesh rukat kudi aney chisu uyifundishina chakwel ikala ni chaku cha kumusadin Yehova?

⁶ Ukatin chakin anch aney ikala piswimp nend Yehova. Yehova niyend ukatin anch uyifumba ni uyipupa aney. Yehova wakwinka kal want wa kusal mwamu. (Efes 6:4) Chawiy, ufanyidin kwikal nich kashinsh anch uyifumbin aney chisu chawonsu. Tong bil pa mulong winou: Ikal ni kashinsh anch aney ayil ku shikol mulong ij anch kwilej kudi kwa usey ni ukatin anch asangera yom yisu yilejinau. Chilik chimwing, ikal ni kashinsh anch akat kukumanganang ku yikumangan, kuyang ku yitentam, ni kusalang difukwil dia mu dijuku. Kupwa, malejan matambwilau kudiay Yehova makutwish kupandish mwom wau. Chawiy, yikwasha chakwel asangera kwilej piur pa Yehova ni ijika anch Yehova ukutwish kuyifundish chakwel ikala nich manangu. (Jinswir 24:14) Chikwau kand, yifumba chakwel asala mudimu wa kulejan nich mushiku. Imburij chilakej cha Yesu pa kuyikwash aney chakwel asangera kuyifundish antu akwau Dizu dia Nzamb.

⁷ Yom tukata kusal chisu chawonsu mu mudimu wa Yehova mudi kwilej, yikumangan, ni mudimu wa kulejan, yikuyikwash an apamina kal mutapu ik? Erin, udia mu Afrique du Sud ulondin anch: “Twading kwinanang chisu chawonsu piur pa kwilej Bibil, kukumangan, ni mudimu wa kulejan. Yisu yimwing twading kwimikang dilejan dietu dia mu dijuku kwa kwisotin mulong wa kusal yom tukatina. Pakwez anvaj kadingap kwitiy.” Erin uyijikitishin anvajend mulong amukwasha kwijik usey ukweta yom yiney. Katat, ap anch wakangany kukumangan ap anch kayilap mu mudimu wa kulejan, ulamin ching chaku chend chiwamp.

IKAL MWIN KWIKEPISH

8. (a) Mutapu ik wamekeshay Yesu anch wading mwin kwikepish? (b) Kwikepish kwa Yesu kwayikwasha in kwilejend mutapu ik?

⁸ Ap anch Yesu wading uwanyidina, wading mwin kwikepish ni wayilejang in kwilejend anch wading ni kuswir kwa ukwash wa Yehova. (Tang Yohan 5:19.) In kwilejend alika kumulimish Yesu mulong wa chom chinech? Bwat. Pamanau anch umuchingejidin Yehova, amuchingejina niyau nakash. Kupwa, imburij chilakej chend cha kwikepish.​—Midimu 3:12, 13, 16.

9. Anch nvaj witiyin kurumbuk kwend ni wit dilikishin, mutapu ik ukutwisha yom yiney kumukwash mwaney?

⁹ Chinyim ni Yesu, etu tudi akad kuwanyin ni tukat kurumbuk. Chawiy, ikal mwin kwikepish. Ijika anch kudi yom yivud yiukukanganya kusal, ni itiyin kurumbuk kwey. (1 Yohan 1:8) Mwamu, mwaney wapamina kal ukwilej niyend kwitiyin kurumbuk kwend, ni ukukulimish nakash. Mu win yakin, nany ufanyidinau kulimish nakash? Mwant ukata kwitiyinang kurumbuk kwend anch muntu wakad kwitang dilikishin? Rosemary, ukweta an asatu ulondin anch ndiy ni nfumwend itiyinang kurumbuk kwau. Urumburil anch: “Chinech chayibachikang anetu kulond patok padingau nich milong.” Uwejidinaku anch: “Twayifundisha anetu kwijik kwisu kufanyidinau kutan ukwash uwanyidina ku milong yau. Padingau nich kuswir kwa ukwash, twayilejang yom yidia mu mikand yetu yimedina pa Bibil, ni twalembilang nau pamwing.”

10. Mutapu ik wadingay Yesu mwin kwikepish ap chisu chayilejangay in kwilejend yom yifanyidinau kusal?

¹⁰ Yesu wading ni usu wa kuyilej yifanyidinau kusal. Pakwez mulong wading mwin kwikepish, wayirumburilang mulong wak ading afanyidin kusal mwamu. Chilakej, kayilejap ching kusu kutek Want wa Nzamb ni kutentam pa ndond ya kusambish. Wayileja kand anch: “Ndiy ukukuwejinanyaku yom yiney yawonsu.” Payilejay Yesu anch likany kurumburish antu akwau, wayirumburila anch: “Chad Nzamb kakukurumburishanyap niyen. Mulong Nzamb ukez kukurumburishany mutapu umwing mudi [muukata kurumburishany] akwen.”​—Mateu 6:31–7:2.

11. Mutapu ik ukutwisha kumukwash mwaney wapamina kal pa kumurumburil mulong wak wakwatang mupak ap kumutekin mbil?

¹¹ Itekina chisu chiwamp mulong wa kumurumburil mwaney wapamina kal mulong wak umukwatidin mupak ap umutekidin mbil. Anch wijik mulong wak umwitin kusal mwamu, ukukuziyin pakad kulab. Barry, walila an anying ulondin anch: “Kuyirumburil an apamina kal mulong wak, kukuyikwash chakwel akuchingejina.” An apamina kal akuman anch ukwatinap mupak mulong ukwet usu wa kusal mwamu pakwez mulong ukwet mayingishin mawamp. Vurik kand anch ansand kadiap kand an akemp. Akat kwilej mutapu wa kutong, ni akatin kwikwatin mipak ayinau. (Rom 12:1) Barry urumburil anch: “An apamina kal akwet kuswir kwa kwilej kukwat mipak yikash ya manangu kulik yimedina pa yovil.” (Kuseng 119:34) Chawiy lel, ufanyidin kwikal mwin kwikepish ni kumurumburil mwaney wapamina kal mulong wak wakwatang mupak winou. Mwamu, mwan ukwilej kwikwatin mipak amwinend, ni ukwijik anch umulimishin ni ukwijik anch mwaney katat wapamin kal.

IKAL NI NKEU

12. Mulong Yesu wading ni nkeu, mutapu ik wamukwashay Pita?

¹² Yesu wading ni nkeu ni wijikang ukwash ik uswirikedinau in kwilejend. Chilakej, payilejay in kwilejend anch afanyidin kumujip, Pita wamuleja anch kangal witongin yom ya mutapu winou. Yesu wading wij anch Pita wading umukatin, pakwez wijika kand anch mutapu wend wa kutong wading uyimp. Mutapu ik wamukwashau Pita ni in kwilej akwau kudi Yesu? Chakusambish, wamuyula. Kupwa, Yesu wayileja chom chafanyina kuyishiken awonsu alikina kusal rusot ra Yehova anch chakasikan kusal mwamu. Yesu walonda kand anch, Yehova wafanyina kuyiyukish antu akad choy. (Mateu 16:21-27) Pita wilejina ku chom chinech.​—1 Pita 2:20, 21.

13, 14. (a) Yom ik yikutwisha kumekesh anch mwaney ukwet kuswir kwa ukwash wa kukasikesh ritiy rend? (b) Mutapu ik ukutwisha kwijik ukwash uswirikedinay kamu mwaney nsand ap changadim?

¹³ Mulembila Yehova akwinkisha nkeu chakwel wijika ukwash uswirikedinau mwaney wapamina kal. (Kuseng 32:8) Pamwingap umen anch kakwetap musangar uwanyidina ap akat kulond nayimp piur pa akadivar. Pamwingap utongin anch kudi chom kanang chakadiau aney kukulej. Kangal watong kapamp kamwing anch mwaney wapamina kal usadin yom yiyimp mu ujindj.a (Tal mazu ma kwinshin.) Pakwez, kangal wadiul milong ap kuchingej anch yikusut kwau. Ufanyidin kumukwash chakwel akasikesha ritiy rend.

¹⁴ Mulong wa kwijik mutapu ukutwisha kumukwash mwaney nsand, mwipula mu mutapu uwamp nich kalimish. Chidi mudi muntu ukimbina kwisay. Anch widjibul kapamp kamwing, ukutwishap kwisay mu mutapu uwamp. Mu mutapu umwing, anch ushimpishinap muchim piumwipwila ap anch wamubachik mwaney wapamina kal kulond, ukutwishap kwijik kamu yitongijok ni yovil yend. (Tang Jinswir 20:5.) Ilaria uvurikin anch padingay changadim, wading ukatin kusutish chisu nakash nau arund nend a ku shikol pakwez wading wij anch chiyipin. Anvajend ijika anch wading wiyakamishin piur pa chom kanang. Ilaria ulondin anch: “Dichuku dimwing, anvaj amana anch nading ninenganen, ni angipula anch kwading mulong. Nasambisha kudil ni nayirumburil mulong, kupwa nita ukwash. Ambwikata ni antesha ni akana anch akwinkwash.” Anvaj a Ilaria amukwasha kapamp kamwing chakwel ikala ni arund awamp mu chikumangen.

15. Mutapu ik ukwau wamekeshay Yesu anch wading ni nkeu.

¹⁵ Yesu wading ukwet kand nkeu chisu chajinguninangay mikadil yiwamp ya in kwilejend. Chilakej, pateshay Natanyel anch Yesu udiokil ku Nazaret, walonda anch: “Ov, ku Nazaret kukutwish kudiokal chom chiwamp?” (Yohan 1:46) Anch wadingaku, wela kutong anch Natanyel wading ni yitongijok yiyimp ap kasolikany ap wading uburedin ritiy? Yesu katongap mwamu. Pakwez, nich nkeu wijika anch Natanyel wading muntu muwamp, chawiy walonda anch: “Winou udi mwin Isarel wakin, wakad makasu!” (Yohan 1:47) Yesu wading ni usu wa kwijik yom yading mu muchim, ni wasadila ukaliweny mulong wa kuman mikadil yiwamp ya antu.

16. Mutapu ik ukutwisha kumukasikesh mwaney wapamina kal chakwel aswimpa?

¹⁶ Ap anch ukutwishap kwijik yom yidia mu michim ya antu mudi Yesu, ukutwish kwikal nich nkeu. Yehova ukutwish kukukwash kujingunin mikadil yiwamp ya mwaney wapamina kal. Ap anch mwaney wapamina kal wakunenganesh, kangal walond anch udi mwan muyimp ap anch urumbangen. Kangal wamutongin yom ya mutapu winou. Pakwez, mulej anch ukat kuman mikadil yend yiwamp ni anch ukwet kashinsh ang usotin kusal yom yiwamp. Muleja yom yifanyidinay kuswimp ni muleja mutapu wa kusal. Mukwasha chakwel akudisha mikadil yend yiwamp pa kumwinkish yisend yivud anch chitwishikin. Mwawiy mwasalay Yesu kudi in kwilejend. Muvu umwing ni chikunku kupwa kwa kwambamb ni Natanyel (utazukinau kand anch Bartelemi), Yesu wamwinkisha chisend cha usey. Wamwikadisha kambuy, ni Natanyel wasala mudimu wamwinkishau kudi Yesu nich kushinshaman. (Luka 6:13, 14; Midimu 1:13, 14) Pa ndond pa kusal anch mwaney amana anch yisadinay yiwapinap nakash, muleja mutapu wa kusal ni mukasikesha. Sal chakwel amana anch ukutwish kumusangaresh Yehova ni yeyey ni ukutwish kusadin ukaliweny wend mulong wa kumusadin Yehova.

KUMUFUMB MWANEY KUKULETIN MUSANGAR UJIM

17, 18. Yibudikin ik yikwikalaku anch wadandamen kumufumb mwaney wapamina kal chakwel amusadina Yehova?

¹⁷ Ukutwish kwiyov mudi mwiyovay kambuy Paul. Wiyakamisha nakash piur pa antu adinga mudi anikanch. Antu inay awiy akwashau chakwel ileja piur pa Yehova, ni wayikata nakash. Chawiy lel wova nayimp pateshay anch amwing pakach pau kadandamedinap kand kumusadil Yehova. (1 Korint 4:15; 2 Korint 2:4) Victor walila an asatu ulondin anch: “Mivu ya usand yadingap yiswapela. Pakwez, yisu yiwamp twasutisha yading yisutinamu milong twarisha nich. Nich ukwash wa Yehova, twikala arund a piswimp ni anetu.”

¹⁸ Anvaj, usadinany usu nakash wa kuyifumb anen mulong uyikatinany nakash. Kangal waziyany. Tongin pa musangar ukwikala nich anch aney akwat mupak wa kumusadil Yehova ni anch adandamen kumusadil nich kushinshaman.​—3 Yohan 4.