Yehova Udi Nzamb wa Rukat

1. Wisu mwikadil wa pakampwil wa Nzamb, ni kwijik mwamu kukwovishin nchik piur pa Yehova?

BIBIL utulejin anch “Nzamb udi rukat.” (1 Yohan 4:8) Pakwez, chom chinech chirumburikin ik chakin kamu? Rukat udiap kwau ching mwikadil uwamp wa Yehova pakach pa mikadil yend yikwau. Pakwez wawiy mwikadil wend wa pakampwil. Kakwetap ching rukat. Pakwez udi rukat. Rukat rawiy ritakedila yawonsu yisadinay. Musangar mud ik tukweta pa kwijik anch rukat rawiy ramubachika Yehova kutang mangand mawonsu ni yom yawonsu yikweta mwom!

2. Kashinsh ik tukweta piur pa rukat ra Nzamb kudi etu? (Tal chipich cha kwinsambishil.)

² Yehova wading ukatin nakash yitang yend. Rukat rend kudi etu ritwinkishin kashinsh anch rutong rend piur pa antu rikez kuwanyin chakin kamu. Kukez kwikal yibudikin yiwamp kudi antu amuziyidina. Chilakej, mulong wa rukat, Yehova “watenchika kal dichuku dia kuyirumburish antu awonsu a pa mangand nich dirumburish ditentamina ku chikas cha muntu watonday kal,” Yesu Kristu. (Midimu 17:31) Tukwet kashinsh anch dirumburish dined dikusadik. Kudi antu amuziyidina, dikurumburik machuku ma musangar wa chikupu.

CHIMEKESHINA RUSANGU RA ANTU

3. Mwom wela kwikal nchik anch Nzamb kadingap uyikatin antu?

³ Mutapu ik wafanyina kwikal machuku ma kurutu ma antu anch rukat wadingap mwikadil wa pakampwil wa Nzamb? Antu afanyina kudandamen kuyiyikel akwau ni kwikal abachikinau kudi Satan nzamb muyimp wakad rukat. (2 Korint 4:4; 1 Yohan 5:19; tang Kujingunik 12:9, 12.) Machuku ma kurutu mafanyina kwikal mayimp nakash anch Yehova kadingap utukatin!

4. Mulong wak Yehova walika anch abwambwila ku winyikel wend?

⁴ Chisu chabwambwilay Satan ku winyikel wa Nzamb, wayibachika kand anvajetu a kusambish kusal mwamu. Watadika ukaleng wa Nzamb wa kwikal Mwant wa Mangand Mawonsu. Satan wibaza anch mutapu wend wa kuyikel ukwikal uwamp kusutamu wa Nzamb. (Disambishil 3:1-5) Nich manangu, Yehova wamushila Satan chisu chikemp chakwel amekesha yom yalonday. Pakwez yibudikin yimekeshin patok anch ap antu ap Satan kakutwishap kwikal anyikel awamp.

5. Chom ik chimekeshin patok rusangu ra antu?

⁵ Lel unou mangand mayipin kal. Mu mivu 100 yasutina ey antu mamiliyon 100 ni kusut afa mulong wa njit. Bibil ulondin piur pa “machuku ma kwisudiel” anch: “Antu ayimp nau in akwau in kufa mu kan akez kuya kurutu nakash mu kuyip.” (2 Timote 3:1, 13) Bibil ulondin kand anch: “[Yehova], nij anch kwikil muntu [ap] umwing ukutwisha kurijek yom yikumanay kurutu. Kwikil muntu ukutwisha kutakel mwom wend amwinend.” (Jeremiy 10:23) Rusangu ra antu rimekeshin patok anch mazu minam madi makin. Yehova katangap antu ni ukaliweny ap usu wa kwiyikel ayinau pakad umutakel wend.

6. Mulong wak Nzamb ulikidinay uyimp?

⁶ Palikinay Nzamb uyimp udandamena chisu kanang, Yehova umekeshin kand anch wintakel wend wawiy kusu ukutwisha kwikal uwamp. Piswimp ap, Nzamb ukez kujiyish antu awonsu ayimp. Kupwa, anch muntu kanang watadik piur pa winyikel wend wa rukat, Nzamb ukwakul kapamp kamwing. Ukutwish kusadil rusangu ra antu mulong wa kumekesh anch ukuyijiyish swaa antombwij. Uyimp ukwikalapaku kand.

MUTAPU IK WAMEKESHAY NZAMB RUKAT REND?

7, 8. Mutapu ik wamekeshay Yehova rukat rend?

⁷ Yehova wamekesha rukat rend rijim mu mitapu yivud. Tongin pa kujimb ni kuwap kwa mangand metu. Mangand makwet mamiliyon ni mamiliyon ma ma galaxie, ni galaxie mwawonsu ukwet mamiliyon ni mamiliyon ma atutumbu ni ma planet. Galaxie wetu utazukinau anch Voie lactée, pakach pa atutumbu end padi muten. Pakad muten, ukutwishap kwikalaku pa divu. Yitang yawonsu yiney yimumekeshin Yehova mudi sakatang wetu, ni yimekeshin mikadil yend mudi dikand, manangu, ni rukat. Mwaning, ‘mikadil’ ya Nzamb “yakad kumekan ku mes, charumburik anch, ukash wend wa chikupu ni wiNzamb wend, yamekana patok mu yom yatangay Nzamb.”​—Rom 1:20.

⁸ Yehova watanga divu mulong wa kushakamap. Antu ni annam akat kutaninamu mu yom yawonsu yidia pa divu. Nzamb watenchika ndond yiwamp chakwel antu ashakamap ni wayinkisha manangu ni mijimbu yiwanyidina chakwel ashakama chikupu. (Tang Kujingunik 4:11.) Chikwau kand, “Ndiy ukat kupan yakudia kudi yitang yawonsu yikweta mwom. Rukat rend rudimukina rushiching chikupu.”​—Kuseng 136:25.

9. Ap anch Yehova udi Nzamb wa rukat, chom ik chikisiningay?

⁹ Yehova udi Nzamb wa rukat, ni ukisining yom yiyimp. Chilakej, Kuseng 5:4-6 ulondin piur pa Yehova anch: “Mulong Ey Nzamb kiukat kukatap kuyip . . . Ey ukisin in kuyip awonsu.” Ukisin kand “in kumwang mash ni in kudimban.”

NSUDIEL YA UYIMP YIDI PISWIMP

10, 11. (a) Chom ik chikeza kuyishiken antu ayimp? (b) Mutapu ik ukezay Yehova kuyifut antu amuziyidina?

¹⁰ Pa chisu chiwanyidina, Yehova ukez kudiosh uyimp udia pa mangand mawonsu mulong udi Nzamb wa rukat ni ukisin yom yiyimp. Bibil ulondin anch: “In kusal nayimp akez kayijiyish, pakwez akata kumuchingejin [Yehova] akez kaswan ngand. Mulong kwashal kal ka chisu kakemp, chad antu ayimp kakwikalakup kand.” Akankuny a Yehova “akez kapwepwok mudi mish.”​—Kuseng 37:9, 10, 20.

¹¹ Bibil ulondin kand anch: “Mwin kutentam mwawonsu ukez kaswan ngand, ukez kashakamamu chikupu.” (Kuseng 37:29) Antu ashinshamena “akez kusangar mu kuvul kwa chisambu.” (Kuseng 37:11, TMK) Mulong wak? Mulong Nzamb wetu wa rukat wij yom yidia yiwamp mulong wa atushalapol end ashinshamena. Bibil utulejin anch: “Ndiy ukez kayikusol mansoj mawonsu ku mes mau. Kukez kikalap kand rufu, ap madil, ap kwishikokin, ap kusansan, mulong yom yikur kiyamekanap kand.” (Kujingunik 21:4) Machuku ma kurutu mawamp mud ik mulong wa antu amuziyidina ni asangaredina rukat ra Nzamb!

12. Nany udia “muntu utentamina”?

¹² Bibil utulejin anch: “Mushinshika muntu utentamina, tal kand kudi muntu muwamp, mulong kudi kuzangijal kudi muntu ukweta chisambu. Pakwez in yitil akez kayijiyish, ni in majuku mau akez kamajirumun.” (Kuseng 37:37, 38) “Muntu utentamina” ukushiken ku kumwijik Yehova ni Mwanend ni ukuziyil rusot ra Nzamb. (Tang Yohan 17:3.) Muntu winou ukwikal ni kashinsh anch “Mangand mayil ni kujiy pamwing ni yom yawonsu yikwetau nich antu ris, pakwez muntu mwawonsu ukata kusal rusot ra Nzamb ukez kapand chikupu.” (1 Yohan 2:17) Mulong disudiel dia mangand didi piswimp ap, chidi cha usey ‘kumuchingejin Yehova ni kulondul njil yend.’​—Kuseng 37:34.

CHISAL CHIJIM CHA RUKAT RA NZAMB

13. Chom ik chading chisal chijim cha rukat ra Nzamb?

¹³ Ap anch tudi antu akad kuwanyin, tukutwish kumuziyil Nzamb. Tukutwish kand kwikal ni urund wa piswimp ni Yehova mulong wa chakupesh cha Yesu, chisal chijim cha rukat ra Nzamb. Yehova wapana difut chakwel antu amuziyidina amana mutapu wa kukwolik ku chitil ni rufu. (Tang Rom 5:12; 6:23.) Yesu wading ushinshamen kudi Nzamb mu mivu yivud padingay mwiur, chawiy Yehova wading ni kashinsh anch Mwanend ukushal ushinshamena kand pa divu. Mudi Tatuku wa rukat, Yehova wova nayimp nakash pamanay mutapu wamumeshau Mwanend mar kudi antu ayimp. Mwaning, Yesu wakwasha nich kushinshaman ukaleng wa Nzamb wa kuyikel ni wamekesha anch muntu uwanyidina ukutwish kushal ushinshamena kudi Nzamb ap anch udi mu yakamish yikash.

14, 15. Mutapu ik wataniumu antu kusutil rufu ra Yesu?

¹⁴ Ap mu yisu ya mar nakash, Yesu washala ushinshimena ni walamata ku winyikel wa Yehova utentamina. Kujikitish mud ik tufanyidina kwikal nich mulong kusutil rufu rend, Yesu wafuta difut chakwel ayikwasha antu kutambul mwom wa chikupu mwi ngand yisu ya Nzamb! Kambuy Paul warumburila piur pa rukat ramekeshay Yehova ni Yesu kusutil ku difut. Walonda anch: “Pitwading etu tuziyin, Kristu watufila pa chisu chiwanyidina chatenchikay Nzamb. Ching kamu pa chipatu chad waman lel muntu wamufil muntu mukwau utentamina. Chakin, ap muntu umwing ukutwish kwitiy kumufil muntu muwamp. Pakwez Nzamb wamekesha mutapu utukatilay etu, pitwading etu akayitil Kristu watufila!” (Rom 5:6-8) Kambuy Yohan wafunda anch: “Talany mutapu watulejay Nzamb rukat rend, ndiy wamutuma Mwanend kapwokal mu mangand chakwel etu tutambul mwom wa chikupu kudi ndiy. Kurumburik kwa rukat rakin kwawiy oku, [kiyetwap] twamukata Nzamb, pakwez ndiy watukata etu, chad wamutuma Mwanend kwikal yakupesh ya kulikishin yitil yetu yawonsu.”​—1 Yohan 4:9, 10.

¹⁵ Yesu walonda anch: “Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.” (Yohan 3:16) Ap anch chading chiletin kusansan nakash, Yehova wamupana Mwanend mudi difut. Chinech chimekeshin mutapu wayikatay antu, ni anch rukat rikudandamen chikupu. Paul wafunda anch: “Am nij nawamp, kwikil chom chikutwisha kutwauril etu ku rukat rend, ap rufu, ap mwom, ap aruu a mwiur, ap ayilembil, ap ukash wa Sakudimban, ap yom yimekena, ap yom yikeza kumekan kurutu, ap chom chidia piur pa ngand, ap chom chidia pansh pa mangand. Kwikil chom [ap] chimwing chatangay Nzamb chikutwisha kutwauril etu ku rukat ra Nzamb rutukweta mulong wa Kristu Yesu Nsalejetu.”​—Rom 8:38, 39.

KATAT WANT WA NZAMB UYIKEDIN

16. Want wa Mesia chom ik, ni anany atonday Yehova kwikal Anyikel?

¹⁶ Guvernema wa Nzamb, Want wa Mesia, umekeshin ni wawiy rukat rikwetay Yehova kudi antu. Mutapu ik? Yesu Kristu ndiy watondau kal kudi Yehova mudi Nyikel uyikatina antu ni muntu uwanyidina kuyikel. (Jinswir 8:31) Nzamb watondin kal kand antu 144 000 akuyikel nend Kristu mwiur. Kupwa kwa kuvumbuk kwau, ij nawamp chirumburikina kwikal muntu. (Kujingunik 14:1) Padingay Yesu pa divu, Want wawiy wading mutu wa mulong wa pa dishin wa malejan mend, ni wayifundisha in kwilejend kulembil anch: “Tatukwetu udia mwiur, dijin diey aditumbish. Want wey weza. Rusot rey arusala pansh mudi mwiur.” (Mateu 6:9, 10) Tukuman kuwanyin kwa malembil minam, chisu chikuleta Want wa Nzamb chiyukish kudi antu!

17. Fanikesh mutapu wa kuyikel wa Yesu ni wa antu.

¹⁷ Kudi kushalijan kujim nakash pakach pa kuyikel kwa rukat kwa Yesu ni kuyikel kwa antu. Kuyikel kwa antu kwatwala kwi njit jajipesha ma miliyon ma antu. Pakwez, Yesu Mwant wetu, utukatin nakash ni wimburijin mikadil yiwamp ya Nzamb, pakampwil rukat ra Nzamb. (Kujingunik 7:10, 16, 17) Yesu walonda anch: “Ezany kudi am, en awonsu uziyinanya mulong wa yisend yikasikena ya mitapu ni mitapu, chad am nikez kukwambulany. Itwikany mpand yam, wingiyiyany am, chad mwamu mipim yen yikwiswedish, mulong am nishimpishin muchim ni kwitudish. Mulong mpand yam yiswakel kwitwik, ni chisend cham chipipel.” (Mateu 11:28-30) Rukat mud ik ratukanay!

18. (a) Chom ik chisadikina kudiosh mu muvu wa 1914? (b) Chom ik tukushinshikina mu mutu wa mulong ulondwilaku ou?

¹⁸ Bibil umekeshin anch Want wa Nzamb wasambisha kuyikel mwiur mu muvu wa 1914. Kudiosh chisu chinicha, asambisha kukumangej antu akuyikela ni Kristu mwiur, mudi kukumangej “chisak chipandiken kujimb” cha antu akupanda ku disudiel dia ditenchik dined ni kwandam mwi ngand yisu. (Kujingunik 7:9, 13, 14, TMK) Lel, antu a chisak chipandiken kujimb adi inch? Chom ik chiyitinay Nzamb kusal? Mutu wa mulong ulondwilaku ou ukwakul ku yipul yiney.