Anch Wiyov Nayimp Nakash ni Wakat Anch Ufa Kwey

Adriana wa mwi ngand ya Brezil ulondin anch: “Yovil mudi yiney yambindisha nakash. Chawiy natonga anch chidi kwau chiwamp nijipa kwam.”

OV, NIYEY wiyovilap kal nayimp mwamu mu chilik cha kukat anch ufa kwey? Ukutwish kwiyov mudi mwiyovay Adriana. Wading ni yakamish yivud nakash ni yamuletinang ushon ni washadishang ruchingej. Adriana amukwata mayej makata kumusal muntu anch ova ushon chisu chawonsu.

Shinshikin kand chilakej cha Kaoru wa mwi ngand ya Japon, wading uyilamina anvajend ananapina kal ading ayedina. Ulondin anch: “Chisu chimwing nading ni yakamish yivud yidiokila ku mudimu nasalang. Chawiy novangap jakudia chom ni nasambisha kukerol tul. Nasambisha kutong anch milong yam yikupwa anch nafa kwam.”

Ojebode ikundj wa mwi ngand ya Nigeria ulondin anch: “Nading kwov ushon chisu chawonsu ni nadilang, chawiy nakimba mutapu chakwel nijipa kwam.” Cha musangar, Ojebode, Kaoru, ni Adriana kijipap. Pakwez muvu ni muvu yitot ya tunan twa antu akat kwijip.

KWISU UKUTWISHA KUTAN UKWASH

Pakach pa antu awonsu akata kwijip, amakundj awiy adia avud nakash ni pakach pa amakundj inay, avud akat kwijip mulong akat kwov usany wa kwit ukwash. Yesu walonda anch antu ayedina akweting kuswir kwa mwingang. (Luka 5:31) Chawiy anch utongin kwijip, kangal amboku wov usany wa kwit ukwash kudi antu akwau. Antu avud akata kuyel mayej makata kumusal muntu anch ova ushon chisu chawonsu (dépression) amen kal anch kwok kwa chimwingang kukutwish kuyikwash kwiyov nawamp ni kudandamen kujijaman. Ojebode, Kaoru ni Adriana atambula ukwash wa chimwingang ni katat atwishin kujijamen mayej mau.

Adokter akutwish kusadin mwon ap yiyul mulong wa kumukwash muntu uyedina mayej makata kumusal muntu anch ova ushon chisu chawonsu. Antu ayedina kand mayej minam akwet kuswir kwa kuyitesh, kuyishimpishin muchim, kuyibangin ni kuyikwash kudi antu a mu dijuku diau ni arund nau. Chawiy murund mujim nakash ukutwisha kwikal nend udi Yehova Nzamb, ukata kupan ukwash ujim nakash kusutil Dizu diend, Bibil.

OV, KUDI UKWASH WA RAWONSU?

Antu ayedina mayej makata kumusal muntu anch ova ushon chisu chawonsu akwet kuswir kwa kuyok chisu chilemp ni afanyidin kwilej mutapu wa kurish ni milong yau kusutil kuwapish yaku yau. Chawiy anch urishin ni mayej minam, ufanyidin kuchingej machuku ma kurutu mapandiken kuwap mudi musadinay Ojebode. Ulondin anch: “Nichingedin kuwanyin kwa Isay 33:24, wasambela kulejan anch pa divu kwikil muntu ukeza kalond anch ‘niyedil.’” Mudi Ojebode, tan rongoj mu kushilamu kwa Nzamb kwa “mangand masu,” mukulika kwikal “kusansan.” (Kujingunik 21:1, 4) Pakuwanyina kushilamu kwinoku, kusansan kwawonsu kwa mu manangu ni mu yovil kukupwa. Kusansan wovila kukupwa kamu chikupu. Ukezap kavurik kand kusansan wovila, mulong ‘yom ya pasak kakez kuyivurikap kand, ni yikez kachirikap kand ku muchim [wey].’—Isay 65:17.

Maverse ma Bibil Makutwisha Kukukwash

Nzamb umen mutapu wiyovila.

‘Yam Yehova Nzamb wey, nikulamin ku chikas cha katatuku, . . . nikulejin anch, “kangal wov wom. Nikukukwash.”’—Isay 41:13.

Yehova umen nawamp mutapu twiyovila kusutamu muntu win mwawonsu ni ukatin kutukwash.

Tongijokin pa Dizu dia Nzamb.

“[Elija] wita rufu, walond anch: ‘ . . . A [Yehova], tambul mupim wam.’”—1 Ant 19:4.

Ojebode ulondin anch: “Kutongijokin pa Dizu dia Nzamb kwankwasha nakash. Najingunina anch chisu chimwing muprofet Elija wiyova kamu mudi mutapu nading niyovila.”

Ilejina ku yilakej ya mu Bibil.

“Am [Yesu] nakulembidilang ey Simon, chakwel kangal ritiy rey rafa.”—Luka 22:32.

Kupwa kwa kambuy Pita kumutun Yesu tupamp tusatu, wiyova nayimp nakash ni wadila chipandikena. Kaoru ulondin anch: “Yom yamushikena Pita yankwasha kwijik anch Yehova ni Yesu ading abangidin yovil ya Pita. Rusangu riner rankasikesha nakash.”

Ukezap kavurik kand kusansan wovila, mulong ‘yom ya pasak kakez kuyivurikap kand, ni yikez kachirikap kand ku muchim [wey].’—Isay 65:17