Chidi Cha Ushon Kwijik Anch Ukufa

TONG bil anch utadin filim ulejena piur pa muntu kanang wa katumb ap mwin kuwang wijikena nakash ni ukatining. Filim wasambish kulejan padingay muntu winou mwanikanch, chisu chilejay kubul mizik ni mutapu wiyijidishay tupamp tuvud nakash chakwel ijik kubul mizik nawamp. Kupwa umen mutapu wendanganay mu jingand kushalijan mulong wa kubul mizik ni mutapu washikenay ku kwijikan nakash. Kupwa filim winou ulejen chisu chayay ntumb nakash, chananapay ni kwinsudien kwa filim winou amumekesh anch wafa kal.

Filim winou kadiap ringany, pakwez ulejen mu wiswimp rusangu ra muntu wafila kal. Ap anch filim winou wadi ulejen piur pa mwin kubul mizik, mwin siyans, mwin kubambil ap muntu mukwau wijikena nakash, pakwez rusangu rau rifanyidin kwikal mutapu umwing. Muntu winou wasala yom yiwamp yivud, pakwez tong bil piur pa yom yivud nakash yafanyinay kusal anch kananapap ni kafap.

Cha ushon nakash, etu awonsu twij anch tukufa. (Mulej 9:5) Chikalap nchik usu wawonsu tukutwisha kusal, tukutwishap ap pakemp kwipuk upal ni rufu. Tukutwish kufa rufu rakad kutongin mulong wa mayej ap akisidan. Bibil utufanikeshin ni mbundu ja pamanch jikata “kumekan mu chisu chikemp, chad [kijikumekanap] kand.”​—Jakobu 4:14.

Mulong tukutwish kufa pa chisu chakad kutongin, antu akwet mashakamin mimedina pa kulond anch “tudiany, tunany, mulong diamashik tukufany kwetu.” (1 Korint 15:32) Pakwez antu akwet mashakamin ma mutapu winou mulong ij anch akutwish kufa mu chisu chakad kutongin ni kakwetap ruchingej ra machuku ma kurutu. Katat ap kurutu kwa machuku​—ni pakampwil anch urishin ni yakamish yikash​—ukutwish pamwing ap kwiyipul anch, ‘ov, mwom win wawiy kwau winou?’ Kwisu ukutwisha kutan chakul?

Antu avud nlel achingejidin mu siyans. In siyans nau amingang ajingunin kal yom yikutwisha kumukwash muntu kulepishaku mwom wend. Ni in siyans amwing asadin usu wa kulepish mwom nakash. Pakwez yikalap nchik yibudikin ya usu usadinau, tukutwish kudandamen kwiyipul anch: Mulong wak tukat kunanap ni kufa? Ov, tukutwish kuchingej anch dichuku dimwing mukankuny netu, rufu akumujiyish? Mitu ya milong yidia kurutu oku yikwisambin mitu ya milong yiney, ni yikwakul ku chipul chilondina anch, ov, mwom win wawiy kwau winou?