Atutanga Mulong wa Kushakam Chikupu

Mulong wak antu akatining kushakam chikupu? Mifund yitulejin anch Nzamb watutanga nich maswir minam. (Mulej 3:11) Yilondin kand anch “Nzamb udi rukat.” (1 Yohan 4:8) Ov, utongin anch Nzamb wa rukat wafanyina kututang nich maswir ma kushakam chikupu anch tufanyidinap kumasanger?

Chakin kamu, rufu ridiap murund netu. Pakwez, Bibil uritazukin anch “mukankuny.” (1 Korint 15:26) Antu amwing akat kufa ku usand, akwau ku upal. Pakwez etu awonsu tukufa. Antu avud akat kwovang wom nakash anch atong piur pa rufu. Ov, mukankuny winou akez kamujiyish? Chom chinech chitwishidikin chakin kamu?

YOM YITWINKISHINA RUCHINGEJ

Ov, yikushimwokishin pa kwijik anch Nzamb kakatap anch antu afangang? Mukand wa Disambishil utwinkishin kashinsh anch rusot ra Nzamb rading anch antu ashakam pa divu chikupu. Yehova Nzamb watanga divu ni watekap yom yin yawonsu yikwetau nich antu kuswir mulong wa kwikal nich mwom wa musangar. Chad wamutanga Adam, ikundj wakusambish, ni wamuteka mu paradis, chir cha Eden. Kupwa, “Nzamb wamana yom yawonsu yatangay, ni kuyital yading yiwamp kamu.”​—Disambishil 1:26, 31.

Adam amutanga uwanyidina. (Kuvurik Yijil 32:4) Ev mband wa Adam, niyend kadingap ni kapad, wading ni manangu ni mujimbu uwanyidina. Yehova wayileja anch: “Valijanany, vulijanany, shakamany, izwishany ngand ni kuyiziyish. Yikelany kand pa ansh a mu karung, ni pa atujil a mwiur, ni pa annam awonsu akata kwendil pansh.”​​—Disambishil 1:28.

Chading chitin chisu chakwel Adam ni Ev izwish divu nich anau. Ev wafanyina kuval an ni an inay afanyina niyau kuval djat ni pafanyina kwizul divu mudi mutapu wakatay Nzamb. (Isay 45:18) Ov, chidi cha manangu kutong anch Yehova wafanyina kumutwishish Adam ni Ev kusal mwamu ching anch ashakama mu mivu yivud nakash mu chilik cha kuman anau ni pamwing ap ijukurau, ni djat mu chilik cha kukangany kwijik divar?

Tongin kand pa chisend chayinkishau cha kuyikel annam. Adam amuleja kuyipil annam majin, ni chinech chading chitin chisu. (Disambishil 2:19) Pakwez kuyiyikel kwafanyina kurumburik anch wading ufanyidin kwilej kuyijik nawamp ni kwijik mutapu wa kuyibangin. Chinech chafanyina kusend chisu chilemp nakash kusutamu chisu cha kuyipil majin.

Chawiy, mbil ja Nzamb ja kwizwish divu ni kuyikel annam jimekeshin anch ambay a uruw akusambish ayitanga mulong wa kushakam chikupu. Ap mwamu, Adam wasala mivu yivud nakash.

ASALA MIVU YIVUD NAKASH

Bibil umekeshin anch antu a pasak asala mivu yivud kusutamu yitusadina nlel. Ulondin anch: “Mivu ya mwom wa Adam yawonsu yading yitot chidivu ni makum masatu [930].” Kupwa ujimbwil amakundj akwau musamban asala mivu 900 ni kusut! Ading Set, Enosh, Kenan, Jered, Metushela, ni Nowa. Awonsu inay ashakama kurutu kwa Mabeb ma pa chirung cha Nowa​—Nowa wasala mivu 600 kurutu kwa Mabeb kusambish. (Disambishil 5:5-27; 7:6; 9:29) Mutapu ik watwishau kusal mivu yivud mwamu?

Amakundj inay awonsu avadika mivu yikemp kupwa kwa chisu chadingay Adam ni Ev awanyidina. Chimeken anch dined diawiy diyingishin diasala anch asal mivu yivud. Pakwez kwikal uwanyidina kukwatijadin mutapu ik ni kusal mivu yivud? Ni mutapu ik ukez kajiyishau rufu? Mulong wa kutan yakul, tukwet chakusambish kuswir kwa kwijik mulong wak tukat kunanap ni kufa.