“Dizu dia Uprofet dia Nzamb” Chikunguril cha Atuman’a Yehova cha 1999
1 In Isarel padingau mwi mpay, Yehova wamuleja Moses kusal mpuny jaad ja utad ujal. Anch abul kusu mpuny yimwing, amakurump a yisak afanyidina kukumangan mu mandam ma mwinkand wa chikumangan. Anch abul mpuny jaad, chikumangan chawonsu cha in Isarel chafanyidina kukumangan. (Kuch. 10: 1-4, NW) Ov, nlel tukwetingap musangar pitukata kutesh chijikish, mud kamu kudjim kwa mpuny, anch tukwikal ni chikunguril cha distrik? Ku yikunguril yetu, Yehova utwinkishining yany ni yiyul kusutin Dizu diend ni kusutin aruu end atondinau. Chinech chitukwashin kulamatin ku mudimu wa Nzamb. Ov tukwetap musangar pa kuman tunan ni tunan, twa in kwifukwil ashishamena chikumangenau mu rukat ni chisambu? Chisangarishin chakin!—Kus. 122:1, 7, 8.
2 Pakach pa Kafumpul-Mashind ni Mwinses 1998, arijekin yikunguril ya distrik “Njil ya Nzamb ya Mwom” 58 mu misumb 56 ya teritwar wetu. Mu République démocratique du Congo, kasadilap yikunguril sambwad mu machuku ma ngond matenchikinau mulong wa mwikadil udia mwi ngand. Nich ukwash wa Yehova, tuchingejin kuyisal katat kamu ak mu machuku ma kurutu. Twakujikitishany nakash mulong wa usu wen ujijamena wa kukumangan yikalap nchik yisu yikash ni milong yakad kuchingejin ya katat. Marapor malejen anch avud, kuchindinimu ni majuku ma kabuj ni ayilim, asadil weny ulemp ra pansh mulong wa kukumangan ku chikunguril chinech. Amwing endil weny wa machuku mavud, ap ambing. Mukadivar umwing mputames wasadil akilometre 260 ra pansh mulong wa kukumangan ku chikunguril cha distrik ku Mbuji Mayi. Mwamu musadilingay muvu ni muvu. Ov usu winou ufanyidin? Chakin! In kukumangan awonsu awonsu amen musangar wa ‘kukasikeshijan umwing ni mukwau chipandikenamu mud chijau anch dichuku dikat kusej piswimp.’ (Hebreu 10:24, 25) Mukadivar umwing walondil anch: “Muntu mwawonsu amukasikeshin ku yikunguril yiney ya muspiritu.” Mu 1999, pa chisu cha chikunguril cha distrik, tukwikal ni ndond yikwau yisu ya kusanger ukadivar wetu wa usey ni kumujikitish Yehova mulong wa uumwing utwinkishinay.
3 Irijekany nawamp kurutu kwa muten mulong wa kwikal ku machuku masatu minam ma musambu wa muspiritu upandikena kuwap, kudiosh ku muminy wa kusambish kushik ni ku dilembil dia nsudel. Chisu chivud, chikunguril kukutazukinanyau chidi piswimp ni ndond yiuchishanya. Sosait usadil usu wend wawonsu chakwel kukukwashany mwi njil yiney. Kwiwejidin ndond jikwau jisu jinying ja chikunguril kwi ndond ja muvu wadap ou mulong wa kutwishish muntu ni muntu pakach petu kwidishil muspiritu pamwing ni akwau awonsu. (Kusut. 31:12, NW) Ndond jinej jawiy ej: Nyabihanga mu Burundi, Luiza ku Kasai Occidental, Basankusu ni Bosondjo ku Équateur. Katat chawiy chisu cha kutongin yiukutwishanya kusal mulong wa kuman nfalang jifanyidina mulong wa weny wen en awonsu. Chakwel kumekesh kujikitish mulong wa usu wasadinay Sosait, tuchingejin anch muntu ni muntu ikala ku chikunguril kutazukinau sirkwit wau. Pakwez, anch mulong wa diyingish kanang diwamp muntu ufanyidin kukumangan ku chikunguril chikwau, ukwet wanipau wa kuchisal.
4 Piukukwatanya yitenchik mulong wa kukumangan ku chikunguril cha distrik, mekeshany rukat ren mu kutongin antu aswiridina ukwash, nakash antu asangeridina uyakin kudiosh kamu mu chisu kanang, chakwel ikala niyawiy ku yikunku yawonsu. Chikwikal cha ukwash kushinshikin jinsangu jidia mu mutu wa mulong winou ni antu wilejinanya nau Baibel ni asotina kukumangan ku chikunguril. (Gal. 6:6, 10) Diakatan ni Diampos, chikunguril chikusambish nich muzik pa 9h:30, ni chikunguril chikupwa piswimp pa 17h:00. Chikunku cha Diarubing pamanch chikusambish pa 9h:30, ni chikunguril chikupwa piswimp pa 16h:00. Jinsangu jinej jikukukwashany mu kwirijek kwen.
5 Ndond ya kulal yiding chisu chivud yikumbu ya antu a chijikan. Tufanyidin kumekesh kujikitish pantaliken ni akadivar ni anambaz itiyidina kutuladik kwol kwau. Chikwau kand, chiwapilap anch antu akinau mutapu winou asadila rak riner mutapu uyimp ni kwit anch ayiladika machuku mavud kwinyim kwa chikunguril. Ndond ya kulal ayipanining ching kamu pa muten wa chikunguril. Awiy isakidina ndond ya kulal mud yiney afanyidin kulimish yom ya mwin kuyak, pikil kuyipish chom ap chimwing, pikil kuya ndond kwakadau kuyitazuk, ni kutal nawamp anch aanau asal chilik chimwing. Anch in kwakan akwet matat kanang ku mutambu winou, afanyidin kapamp kamwing kwijikish Department wa ndond ya kulal, ukusangara kupan ukwash wend. Kusadil kuwamp ni kuwap kwa Department wa ndond ya kulal kushindamedin kusadil pamwing kwa muntu ni muntu. (Heb. 13:17) Twatambwil jinsangu ja kwel anch amwing akat kushang ndond ya kulal yiyinkishinau mulong wa kuya ndond yindjing, ndond kukutwisha kwikal murund nau ap muntu wa chijikan nau. Chinech chikat kukadangesh mudimu wa akadivar a Department wa ndond ya kulal. Tukwitinany amboku en awonsu kusadil pamwing ni department winou.
6 Amapal ap ayilim, atushalapol a chisu chawonsu ap akwau, chitwishikin aswiridin ukwash mulong wa kukumangan ku chikunguril. Anamakwau, amakurump ap yidi ya chikumangen ija mwikadil wau wa pakampwil akutwish nich rukat kusal yiswiridikina, ni kwipuk kusha chisend chau pa mutu wa akadivar arijekina chikunguril.—Tal 1 Timoteu 5:4.
7 Chakin anch Yehova upanining ukwash wend ku yisadilau mulong wa yikunguril ya muvu. Akadivar avud akata kukas weny wa kuya ku chikunguril cha distrik chiswiridinau ndond ya kulal, tukutwish kwitiy chakin anch Yehova ukudimukin nswir jau mutapu ufanyidina. Milong yiney chiyitadila difukwil diakin, tufanyidin kulondul nich musangar yany yipaninau. Tumekeshany anch tukwet kashinsh mu tuyom tukemp; tukutwish chad lel kutambul yisakin yivud yichingedina antu amukatina Yehova.—Luka 16:10.
8 Tukukasikeshinany kwirijek kudiosh kamu katat mulong wa kukumangan ku machuku masatu ma chikunguril cha distrik cha 1999 “Dizu dia Uprofet dia Nzamb.” Mud en, tuchingedin nich impu yijim kutesh ‘dipumb dia musangar ni kushiman’ yibudishinau kud in kumwifukwil Yehova adia mu uumwing. (Kus. 42:4) Yehova ayukisha yirijek yawonsu yisadinau mulong wa kutupitish muspiritu!
1. Anch ufanyidin kukas weny umwing ulemp mulong wa kukumangan ku chikunguril, sambish kulam nfalang mulong wa kufut ditike diey ni dia dijuku diey, ni ja kuland nich yakudia.
2. Tongin kand kukwatikesh dirijek dia chikunguril nich milambu yey. ‘Kangal wakamekan kurutu kwa Yehova wakad chom ku makas,’ pakwez ‘mulimisha Chinawej nich yom yey yawonsu ya usey.’—Kusut. 16:16, NW; Nsw. 3:9.
3. Tukutumbish kand dijin dia Yehova anch twikal ni ngikadil muwamp pa chisu cha yikunguril ni kwikal ni yidjal yinangina ni yifanyidina.—1 Kor. 10:31.
4. Jijamen kusadil pamwing ni akadivar akweta mudimu wa kwandjik ni kushichik antu. Kangal wakwatin ndond chamwamu, ching kusu mulong wa yidi ya dijuku diey ap antu wezina nau pamwing.
5. Pa yisu ya kupim, ukutal nawamp anch udia yakudia yipipela mulong wa kutwish kwisakin sens yikunku ya urel. Yakudia yilimina yikat kuzelishang tul.—Luka 8:18.
6. Kwinang kumulimishining Yehova. Kwisudiel kwa chikunku ni chikunku, muntu ni muntu uwapidil kusal yawonsu yikutwishay chakwel kusha ndond ya chikunguril yitok kusutin kunonol mapapel ni yom yikwau yifanikena nich mulong wa kuyidjibul mu mashitil matekilau mulong wa yishoshot.—1 Pita 1:15, 16.
[Caption on page 3]
[Caption on page 3]
Program
Diakatan ni Diampos: 9h:30 – 17h:00
Diarubing: 9h:30 – 16h:00
[Caption on page 5]
[Box on page 5]
Yitenchik Yimwing Yifanyidina Kusal Mulong wa Kukumangan ku Yikunguril “Dizu dia Uprofet dia Nzamb”