Ov uding muntu wakad kuzangurok?
1 Tukatap kushimok anch twaman mwan mukemp ukat kututadil kwinyim kwa makwend ap tatukwend. Kuburen kuzangurok kuding kwa chivadik pa wanikanch. Ap ku ukurump (wau), antu avud ading akad kuzangurok mud kamu chaku. Ov chom ik ukutwisha kusal, anch kuburen kuzangurok kukat kutek mimbu ku mudimu wey wa kulejan?
2 Kurish nich kuburen kuzangurok: Chidi cha usey kushinshikin “untu ujingamina mu muchim.” (1 Pita 3:4, Testament Musu ni Kuseng) Kasikesh rukat rey mulong wa Yehova ni mulong wa mukwen muntu. Chingejin nakash anch kusal sens mudimu wa kulejan udi umwing wa mitapu yipandakena kuwap ya kumekeshin kwipan kwey kwa rukat. Dandamen kulondul program umwing muwamp wa dilejan dia muntu ipend ni kukumangan. Lembil chisu ni chisu ni nakash kamu mulong wa kutambul ukwash wa Yehova. Ritiy rikash ni ruchingej mwi ndiy yikez kukudish ruchingej ni kupan “kujijaman kwa kurumburil dizu dia Nzamb patok wakad wom.”—Filp. 1:14.
3 Rishish yitongijok ya kuburen kufanyin. Chimeken kamu anch mwamu mwafanyidinay kusal Timote. Paul wamukasikesha Timote anch “kangal muntu kukudiul mulong chiudia nsand,” ni kumuvurish anch “Nzamb katwinkap muchim wa wom pakwez wa usu.” (1 Tim. 4:12; 2 Tim. 1:7, TMK) Timote amusadina sens kud Yehova, ukez kand kukusadin niyey anch wikasikesh kuya kurutu nich kumuchingejin Ndiy.—Kus. 56:11
4 Kutongin mufund wa Baibel, mud Mateu 10:37, kwamukwasha nambaz umwing wadinga ni kuburen kuzangurok kwadinga ni kumwovish wom wa nfumwend wadinga ni kulik yitiyij yend. Chajijamanay, mudimu wa kulejan wamuswapela nakash, ni kupwa nfumwend, makwend, ni anamakwend awonsu itiya uyakin!
5 Kwirijek kudi kwa usey: Ruchingej rey rikez kujimb mu mutapu umwing ujim anch ukakwirijek nakash mulong wa mudimu wa kulejan. Tond mutu wa mulong uswapela mu buku Comment raisonner ap mu Mudimu Wetu wa Want wa angond a kwinyim piukwambambina, ileja nawamp mutu wa mulong winou ni kuchirikinamu. Pa ndond pa kukudish wom, ikal ni chitongijok chiwamp. Tambul kukasikesh kudiokila ku kusadinang pamwing nau akwen. Vurik anch antu avud ukusankana kwol kwau ni yawiy adi akad kuzangurok mud chiudia ey. Muntu mwawonsu ukwet kuswir kwa rusangu ra Want.
6 Anch uding muntu wakad kuzangurok, kangal washadish ruchingej. Anch wasal usu wa kusadil yiyul yiney, ni Yehova ukez kukukwash chakwel wikala mwin kulejan umwing wa rusangu ruwamp chifuvu. Chad lel ukez kwikal ni musangar mu mudimu wey wa kulejan.—Jnsw. 10:22.