Program musu wa chikumangan cha munyimuku

Twij anch Yehova Nzamb ndiy ufanyidina rukat retu ni kwipan kwetu kwawonsu. Pakwez, mangand makat kukimb kuturumbul ku kulam urund wetu wa piswimp nend ndiy. (Yohan 17:14) Chakwel kukasikesh rukat retu mulong wa Yehova ni kutukasikesh kurish nich yom ya mangand yitekina mwom wetu wa muspiritu mu chak, program musu wa chikumangan cha munyimuku cha 2001 ukwikal ni mutu wa mulong “Mukatany Nzamb​—⁠Kangal Wakatany Yom ya Mangand.”​—⁠1 Yohan 2:​15-17.

Rukat retu rijim mulong wa Yehova ritubachikin kupan uman piur pend. Pakwez, kud atushalapol avud a Nzamb mudimu wa chingand kiuswapelap bwat. Anch watesh mutu wa mulong “Rukat Mulong wa Nzamb Ritubachikin Kulejan,” ileja mutapu wapandakanau amwing kuburen kwau kuzangurok ni yikangesh yikwau chakwel kusal mudimu winou sens.

Ov kuyipish kwa yijidik ya manangu ya mangand kukwet usu wa mutapu ik padi etu? Yisalijok yadinga ni kumekan yiyimp pasak katat yawiy ngikadil yitazukinau anch yifanyidin. Diskur dikweta mutu wa mulong “In Kumukat Nzamb Akisining Yom Yiyimp” ni diskur dia yikunku yisatu dikweta mutu wa mulong “Yom Yidia mu Mangand​—⁠Ov Mutapu ik Tukata Kuyiman?” yikukasikesh chiyul chetu cha kulik maku mayimp.

Kukwikal kand sampul wa program wa Shikol ya Mudimu ya Uteokrasia,Chikumangan cha Mudimu, ni diswipish dia Tour de Garde wa kwilej rubing rinira. Diskur dia pibur dikweta mutu wa mulong, “Apandakena Mangand Nich Ukwash wa Rukat ni Ritiy,” ukutukasikesh kumwilakej Yesu mu kurish nich yipwichik ya mangand. (Yohan 16:33) Kangal twavuramen kuyitazuk antu tukata kwilej nau Baibel kwez ni kukumangan. Muntu mwawonsu usotina kutambul dibatish ufanyidin kumwijikishamu kalam-ntakel kurutu kwa chisu chakwel akwata yitenchik yifanyidina.

Chikumangan chinech cha munyimuku chikupwitin yitongijok yetu yawonsu ku yitufanyidina kamu kukat chakwel kutambul yiyukish yipitishina ya Yehova. Kangal waburen chom ap chimwing!