Ov umen usey wa kushimpish muchim kwa Yehova?

¹ Anch Yehova kashimpishap muchim mu mivu 10, ap 20, ya kwinyim ey, ni mivu yikwau yivud, chakwel kutwishish kutanduril kwa kupan uman, ov wela kwilej uyakin? Tujikitishin mud ik anch wayitwishishin antu avud “kukarumuk kudiokal ku yitil yau.” Ap mwamu, dichuku dijim dia dirumburish dia Yehova “dikwez mudi mwij.” (2 Pita 3:​9, 10) Pakwez, kushimpish muchim kwa Nzamb chifanyidinap kukutongin mud kulab mu kushikij kwa nsudel ya ditenchik dia yom dined.​—⁠Hab. 2:​3, NW.

² Yovila antu riy: Kushimpish muchim kwa Nzamb kupandaken palemp kutesh kwetu. Tufanyidinap kuvuramen rutong ra kushimpish muchim kwinoku. (Yohan 4:​1-4, 11) Yehova ukat kuman mwikadil wa mar wa antu ni ukat kuyovil riy. Yesu niyend wovil mutapu umwing. Chayovilay yisak ya antu afundishay riy, wasota kutanduril mudimu wa kulejan chakwel avud amana mutapu wa kutambul mwom wa chikupu.​—⁠Mat. 9:​35-38.

³ Pa chisu kukata kubudikin mar ni yinzwizu, ov tukatap kuyovil antu akad kwijik uyakin riy? Nlel Antu adi mud “amikoku akad kafung” akat kupakij kushakam ni kutesh dirumburik dia kanvundangesh kadia mu mangand. (Mar. 6:34) Anch tukakulejan rusangu ruwamp nich mushiku, tukakuyikasikesh antu a muchim utentamina ni kumekesh usey tumena nich kushimpish muchim kwa Yehova.​—⁠Midimu 13:⁠48.

⁴ Mudimu wetu udi wa kuswakej: Muvu wadap ou abatishin antu 323439 ni antu akwau 14000000 ni kusut akumangana ku Chivurish cha rufu ra Yesu. Chitwishikin anch antu avud akwasinika ku kujiy kwa ditenchik diyimp dined! Kitwijap mutapu ukwikala, kuvul kwa antu a mu “chisak chipandakena kujimb.” (Kuj. 7:⁠9) Kitwijap, chisu chikeza kupwa mudimu wetu wa kulejan. Pakwez Yehova, ndiy wij. Rusangu ruwamp akez kurilejan kulondwish nich kuswir kwa Nzamb, “chad lel disudiel dieza.”​—⁠Mat. 24:⁠14.

⁵ Chisu chishadilaku chakep kal, ni dichuku dia kadimu dia Nzamb didi piswimp ni kushik. (1 Kor. 7:29a; Heb. 10:37) Chakin kamu, ‘dipandish dietu diez kal piswimp chipandikena pasak pitwasambisha kwitiy.’ (Rom 13:11) Kangal twaburen kutesh dirumburik dia rutong ra kushimpish muchim kwa Nzamb. Pakwez, tuswakejany kulejan chakwel antu akweta impu ya kutentam atwisha kuman ranaken rijim ra Nzamb.