“Rish kurish kuwamp kwa ritiy”

¹ Mupostol Paul wamukasikesha Timote anch “rish kurish kuwamp kwa ritiy.” (1 Tim. 6:12) Paul amwinend wadinga ni kushakam kwambatan nich mazu minam. Kwisudiel kwa mwom wend, walonda nich kashinsh anch warisha kurish kumwing kuwamp. (2 Tim. 4:​6-8) Mwi njil yin yawonsu, wadandamena mu mudimu wend nich mushiku, kutakaman, ni kujijaman. Anch twalondul chilikej chend, tukutwish kwikal ni kashinsh ka mukach ka chilik chimwing anch tukakusal yipandakena kuwap tukutwisha kusal mu kurishin kwetu ritiy ra Ukristu.

² Tusalany usu ufanyidina: Paul wasala mudimu nakash mu mudimu wa kulejan. (1 Kor. 15:10) Mwamu kamu tukata kusal pitukata kukimb kuman antu awonsu afanyidina mu teritwar wetu. (Mat. 10:11) Chakwel kuyishiken amwing pakach pau, chikutwish kurumburik kulank kurutu kwa muten mulong wa kupan uman kud antu tukusankana mwi njil. Ap chikutwish kurumburik kulejan pa chisu chikata kuzwek muten ap urel nakash chakwel kuyisankan antu pachirikangau kal ku yikumbu yau.

³ Kukumangan pamwing ni chirund chetu cha dilejan dia buku mulong wa mudimu wa chingand kwitining kwiyijidish ni program umwing muwamp chakwel kulimish chisu. Chilikej, yidi yimwing ya dijuku dia Betel yikat kusalang piswimp aminit 60 mwi njil yin yawonsu mulong wa kuya ni kubudikin mu mudimu wa kulejan pamwing ni yikumangen yau kwisudiel kwa rubing. Chikwau kand, tukutwish kubazin in kulejan amwing ni majuku mamwing mu chikumangen chetu akata kudiokal kulemp kamu pakwez akat kushik kurutu kwa chisu. Yilikej mud yiney ya mushiku ni kwirijek kwa muntu ipend yifanyidin kamu kulondul.

⁴ Tuwapidil kwikal abachikinau kulondul kusanger kwawonsu tumena. Ap chisu tupanina mikand mu balibal ap mu mutapu wa kukashimun, tufanyidin kusal usu wa kutambul adres wa muntu ap nimero wend wa telefon. Kupwa tukutwish kumwendil chakwel kukudish kusanger ni kusal usu wa kusambish dilejan dia Baibel.

⁵ Twikalany mu mudimu chisu ni chisu: Paul wadinga ni kulejan chisu ni chisu ni mutapu umwing wa kashinsh. (Rom 15:19) Ov chidi nchik kud ey? Ov ukat kubudikin chisu ni chisu mu mudimu wa kulejan? Ov wabudikin kal mu mudimu wa kulejan ngond unou? In kutakel Dilejan dia Buku dia Chikumangen akwet chisend cha kutal anch muntu ni muntu wa mu chirund chau ukat kubudikin mu mudimu wa kulejan mu Kafumpul-Mashind. Akukukwash kusal mwamu.

⁶ Anch twalondul chilikej cha Paul nich kukwatikesh sens rusangu ruwamp, tukez kudandamen ‘kurish, kurish kuwamp kwa ritiy.’