Ov ukat kujijaman?
1 “Kwikil musangar ujim unikweta mudi winou, kutesh anch anam akat kwendil mu yakin.” (3 Yohan 4, TMK) Kujijaman kwa an a muspiritu a Yohan kwamuletina ndiy musangar ujim. Chifanyidin kamu kumusangaresh mud ik Tatukwetu wa mwiur pa kuman mamiliyon ma an end a mu machuku ma kurutu “akat kwendil mu yakin”!—Nsw. 23:15, 16; 27:11.
2 Anch antu a Nzamb adandamedin kusal sens mujikit wa mushiku wa Ukristu, amwing asambishin kal kuziy pakemp pakemp. Anch antu inay adinga ni usu pa chisu chilejau kapamp ka kusambish uyakin, mu kusut kwa mivu, awidil kal mu mulad umwing wa kubudikin kusu pakemp ap nich kujingol mu mudimu wa kwikadish in kwilej.
3 Choviken anch, amwing akutwish kuziy kamu mulong wa mimbu ya ku mujimbu ni mulong wa kunanap. Pakwez, adi antu amwing a kubazin mulong wa kujijaman kwau. Akat kusal yikutwishau kusal. Pakwez muntu mwawonsu wapana kal mwom wend kud Nzamb ufanyidin kwiyipul anch: ‘Ov nikat kutonginang nakash yisakin yam amwinam, chakwel yisakin ya Want yikala kusu ni ndond yikemp mu mwom wam? Ov nikadil kal pakach pa “kutalal ni kuswan,” ap nichisadin usu wa “kurish”?’ (Kuj. 3:15, 16, TMK; Luka 13:24, TMK) Malembil metu mawonsu mamekena mu yitusadila ni kukarumun kufanyidina, ni kuvurik anch Yehova ukat kushilamu kulet “uyaj ni katumb ni chisambu kudi antu awonsu akata kusal yom yiwamp.”—Rom 2:10.
4 Mutapu wa kujijaman: Chom ik chamukwasha Yesu kujijaman? Paul warumburila anch: ‘Mulong wa musangar watekau kurutu kwend, ndiy wajijamana mutond wa mar, wapipeja usany, ni washakama ku chikas cha katatuku cha nkwas ya Nzamb.’ (Heb. 12:1-3, TMK) Musangar watekau kurutu kwa Yesu wading upandaken kulemp yoziu ya chisu chikemp yafanyidinay kurish nich. Kuvurik musangar utekinau kurutu kwetu kukutwish ni kwawiy kutukwash kujijaman. (Kuj. 21:4, 7; 22:12) Anch twakarumukin kud Yehova chakwel atwinkisha usu kusutin dilejan dia muntu ipend, kwikal ku yikumangan pakad kujing, ni kulembil kwa chisu ni chisu, tukutwish kukankaman mu mudimu utwinkishinay etu kusal.
5 Yehova ukat kusanger kujijaman kwa atushalapol end ashinshamena. Chawiy lel tuwejinany ku musangar wend nich kudandamen “kwendil mu yakin.”