Mitu ya Majuku—Lamany Chaku Chiwamp cha Muspiritu
Ap anch washakamanga mukach mwa in kwifukwil akish ni antu ayimp a mu Babilon, Daniel wadinga wijiken mulong wa kumusadil kwend Yehova nich ‘kudandamen.’ (Dan. 6:16, 20) Mutapu ik walamay ngikadil yend ya muspiritu? Rusangu ra Baibel rilejen anch wadinga nich chaku chiwamp cha kusal mijikit yambatena nich difukwil diakin. Chilikej, wadinga ni chaku cha kulembil tupamp tusatu pa dichuku piur pa kapalikany ka chikumbu chend. (Dan. 6:10, NW) Chakin kamu, ndiy washa kand chilikej chiwamp mulong wa mijikit yikwau ya muspiritu, mud kutang Chijil. Chawiy lel, chisu charishay nich choziu chikash mu mwom wend, Daniel wajijamana mu kwipan kwend kud Yehova, ni amupandisha mu chilay.—Dan. 6:4-22.
2 Chilik chimwing ni nlel unou, tufanyidin kwiyijidish ayinetu “kulam kudandamen.” (Ef. 6:18) Mangand mutushicha ‘madi mu chikas cha Satan.’ (1 Yohan 5:19) Rupompat ap yoziu yikutwish kulank kapamp kamwing ni kutek ritiy retu mu kupakiu. Pa chirung cha mar majim, atushalapol a Nzamb akez kwikal diloz dia kusambish dia kurishish kud Gog wa Magog, kurish kumwing kukeza kumekan mud kwakad kutwish kwiyep. Chinech chikez kwit kutekin ruchingej rawonsu mudiay Yehova.—Ezek. 38:14-16.
3 “Chom chimwing chidia cha usey chidi kwikal ni chaku cha kutang Baibel mu dijuku, kumwilej, ni kwisambinap.” Mwamu mwadinga mazu ma kusambish ma dram wa chikunguril cha distrik cha muvu wa 1998 wadinga ni mutu wa mulong “Majuku—Ikalany ni Chaku cha Kutang Baibel Pichuku-Pichuku!” Mazu minam madandamena kulond anch: “Anch majuku makat kulondul program winou pakad kujing ni mu mulad umwing wikadishina Baibel mwom, chaku chinech cha kwikal atakedinau nich Baibel chikutwish kwikal nich yibudikin yiwamp mu dijuku. Chikat kuwejinaku ronganyin retu. Chikat kukasikesh ritiy retu. Ni chikat kutwinkish yilikej ya—amakundj ni amband a pasak ashinshamena—akutwisha kutukwash ni kutubachik kujijaman mulong wa uyakin.” Chitushinshikidina yom kushalijan ya chaku chiwamp cha muspiritu, mitu ya majuku yifanyidin kukimb njil yimwing ap jaad ja kurijek program wa muspiritu wa majuku mau.
4 Shinshikinany Dizu dia Nzamb Pichuku-Pichuku: “Chisu chikuyikela Want wa Nzamb pakad rupompat ni rusot rend pirikusadika pansh mud muridia mwiur, kukez kwikalap antu ayimp—bwat, ap annam—kakezap kand ‘kushesh ap kusal uyimp wawonsu.’ (Isa. 11:9, NW; Mat. 6:9, 10)” Mazu minam mabudika mu Examinons les Écritures chaque jour—2001 mu yirumburil piur pa mufund wa Mwinses 11. Chivurish chinech chadinga cha rongoj mud ik! Chiudia mutu wa dijuku, ov ukwet chaku cha kushinshikin pamwing ni dijuku diey mufund wa Baibel wa dichuku ni dichuku ni kuurumburil? Chinech chiding cha ukwash nakash. Anch chitwishikinap kukumangan pamwing pamanch, pamwing ap ukutwishany kusal mwamu urel pa dichuku. Tatuku umwing walonda anch: “Chisu cha yakudia ya urel chikadil kal chisu chifanyidina kud etu mulong wa kwisambin mufund wa Baibel wa dichuku ni dichuku.”
5 Anch ukwetany chaku chiwamp cha kwambambin mufund wa dichuku ni dichuku mu dijuku, tukujikitishinany. Pamwing ap ukutwish kutaninamu ukwash wa kutang chikunku cha Baibel pa chisu chinicha kand. Amwing akweting chaku cha kutang shapitre wa kabuj mudiokila mufund wa dichuku. Akwau akweting chaku cha kutang buku mukwau, kudandamen kuya kurutu nich buku umwing wa Baibel watondinau. Kutang Baibel pichuku-pichuku kukez kukwash dijuku diey kukudish wom wa kulik kusal yom yikisinay Yehova ni kukez kukudish nakash impu ya kusal rusot rend.—Kuv. 17:18-20.
6 Program wa dijuku diey wa Kutang Baibel ni wa kushinshikin mufund wa dichuku ni dichuku yikez kwikal ya ukwash nakash anch witekin aminit akemp mulong wa kwisambin usey wa kusadil kwa rusangu riner. Buku Tirez profit de l’École du ministère théocratique, pa paj wa 60, uletin chiyul chinech: “Ukutwishany . . . kutond maverse mamwing madia mu program wa kutang Baibel kwa rubing, isambinany kurumburik kwam, kupwa ipul yipul mud yiney: ‘Chiyul ik chitwinkinau pinap? Mutapu ik tukutwisha kusadil maverse minam mu mudimu wa kulejan? Matulejin yom ik piur pa Yehova ni piur pa mutapu wend wa kusal yom, ni mulong wak yom yiney yivuvurishin kumusanger kwetu?’ ” Misamb mud yiney ya muspiritu yikez kuyikwash awonsu adia mu dijuku diey “kushinshikin rusot ra [Yehova, NW].”—Ef. 5:17.
7 Dilejan dia Dijuku: Kutakel dilejan dia dijuku rubing ni rubing yidi njil yimwing yiwamp kud mitu ya majuku mulong wa kuyilej anau anch yom ya muspiritu yawiy yidia pa ndond ya kusambish. Nsangarum umwing uvurikin anch: “Yisu yimwing Tatuku wadinga ni kuziy nakash chisu chidiokilay ku mudimu ni wadinga ni kukangany kushakam wakad kuzel tul, pakwez, chikalap nchik kuziy dilejan diadinga ni kusadik, ni chinech chatukwasha kutesh usey wa dilejan.” An niyawiy akutwish kusal yawonsu yikutwishau chakwel kutwishish ditenchik dined. Dijuku dimwing dikweta an chidivu diadinga ni kulank pa ndemb wa kasatu mulong wa dilejan dia dijuku diau mulong kwadingap kand chisu chikwau chitwishikina cha awonsu kwikal pamwing.
8 Chakwel anch dilejan dia dijuku disonga mabuj, mutu wa dijuku ufanyidin ‘kubabel nakash ku malejan mend.’ (1 Tim. 4:16) Buku École du ministère, pa paj wa 32 ulondil anch: “Chitwishikin kulond anch dilejan dia dijuku dikata kusong mabuj ditining bil anch wileja amwiney kwijik maswir ma dijuku diey. Mutapu ik yid ya dijuku yiyila kurutu muspiritu? . . . Piudianya mu mudimu wa chingand ni anen, ov ovil usany wa kwiyijikish ayinau mud Atuman’a Yehova kud arund nau a shikol? Ov akat kusanger program wen wa dilejan ni wa kutang Baibel? Ov ikadishin njil ya Yehova mulad wa mwom wau? Kushinshikin kwa manangu kukez kukukwash, chiudia mutu wa dijuku, kujingunin yiuswiridina kusal mulong wa kukasikesh ap kutung ngikadil ya muspiritu mu chid ni chid cha dijuku.”
9 Yikumangan ya Chikumangen: Kurijek yikumangan ni kuyang ku yikumangan ya chikumangen kufanyidin kwikal chikunku chimwing cha usey nakash cha chaku chey cha rubing ni rubing. (Heb. 10:24, 25) Pa kusut kwa chisu, ukutwishany kurijek yikumangan yimwing mu dijuku. Pa ndond pa kuchingel djat ni pa minit wa nsudiel, ov ukutwishap kwitenchik mulong wa kurijek nawamp kurutu kwa chisu? Chaku chiwamp pa mulong winou chikez kuwapish ngikadil yawonsu yaad kwirijek kwetu ni ukwash tukata kutambul ku yikumangan.—Jinsw. 21:5.
10 Ngikadil ni kudandamen yawonsu yidi yijingidij ya kwiyijidish chaku chiwamp cha muspiritu. Ov chikwikal mutapu ik anch yisu yimwing chatukasiken kurijek yikumangan yawonsu ya chikumangen? Buku École du ministère, uletin chiyul chinech, pa paj wa 31 anch: “Kangal wawil mu mupit wa kutang kwa mau-mau yom yilejenau mulong kwau kusu wa kuyitang ap, chipandakena kand kuyip, kuburen kwilej chom ap chimwing anch mulong ukwetap chisu cha kwilej. Pa ndond pa chinech, pakish kukwat mupak wa yom ufanyidina kwilej, ni kuyishinshikin nawamp. Sal mwamu rubing ni rubing. Pa kusut kwa chisu, ikasikesha kurijek yikumangan yikwau kand kuwejin ku yiukata kurijek.”
11 Anch majuku mashik ku yikumangan kurutu kwa chisu, chinech chikat kuyikwash kwikal itudishina mu manangu chakwel kumutumbish Yehova ni kuman ukwash udiokila ku yany yiyinkishinau. Ov dijuku diey dikweting chaku chinech? Chitin kwirijek kuwamp ni kusadil pamwing kwa muntu ni muntu udia mu dijuku. Anch chisu ni chisu umen anch dijuku diey dikat kusalang yom ya mau-mau ni dikat kukakalijan pa urel wa chikumangan, ov kudi kuswir kwa kurijek yom kanang mu chaku chen? Ov kudi yom yifanyidinau kusal kurutu kwa chisu? Anch chid chimwing cha dijuku chikwet midimu yivud ya kusal, ov antu akwau akutwish kwikal tayad kumukwash? Ov chikez kukepish kwiyakamish anch umwing ni umwing wikal tayad kutumbuk kurutu kwa aminit afanyidina? Kwitenchik kuwamp kukat kukwash kuwejin ku chisambu cha muspiritu mu dijuku ni mu chikumangen.—1 Kor. 14:33, 40.
12 Midimu ya Chingand: Kwitekin chisu chifanyidina mulong wa kusadil pamwing mu mudimu wa kulejan chidi chikunku chikwau cha chaku chiwamp cha muspiritu. Nsand umwing upidilau anch Jayson uvurikin anch: “Mu dijuku diam, Diampos pamanch diadinga mulong wa mudimu wa chingand. Chinech chadinga chiwamp kud am mulong chisu chivud nadinga ni kuya mu mudimu wa kulejan, namana yom yivud yiwanyishina mudimu winou ni naukata nakash.” An avud apamidina mu majuku ma Atuman amana niyawiy anch kwikal nich chisu chijikena mulong wa mudimu wa kulejan rubing ni rubing kwayikwasha kuya kurutu mud atushalapol in Kristu.
13 Chaku chiwamp chikutwish kand kukwash kwitekin chisu chikusutisha dijuku diey mu mudimu wa chingand kwikal chisangareshina ni chisongishina mabuj. Ov mutapu ik chikutwisha kusadik? Tour de Garde wa Kafunfut 1, 1999, pa paj wa 21, uletin chiyul chinech: “Ov chikat kushikenang pa yisu yimwing anch usadila chisu cha dilejan dia dijuku chakwel kuyikwash yid ya dijuku kwirijek mulong wa mudimu wa chingand wa rubing? Kusal mwamu kuding kwa ukwash nakash. (2 Timote 2:15) Kukutwish kuyikwash kusal mudimu wau nich mushiku mu mutapu umwing usongishina mabuj. Yisu yimwing, ukutwishany kwitekin chisu chawonsu cha dilejan mulong wa kwirijek kwinoku. Chisu chivud, ukutwishany kwisambin milad kushalijan ya mudimu wa chingand mu misamb yiswimp kwisudiel kwa dilejan dia dijuku ap pa chisu chindjing mu rubing.” Ov dijuku diey diapakishap kal kusal mwamu?
14 Yangany Kamu Kurutu: Kupwa kushinshikin kwinoku, ov wajingunin kal mitambu yisadila nawamp dijuku diey? Yijikitisha ni kuyikasikesh kuwapish kamu mu mitambu yiney musadilau nawamp. Anch waman mitambu yivud yitina kurijek, tond chom chimwing ap yaad chakwel kuyirijek bil cha kusambish. Anch yikal niyawiy chikunku cha chaku chey cha muspiritu, rijek kand chom chikwau chimwing ap yaad. Ikal nich kuman kuwamp ni mwin chovu. (Flp. 4:4, 5) Kwitenchikin chaku chiwamp cha muspiritu mulong wa yid ya dijuku diey kwitining chakin kamu usu wa kashinsh, pakwez chidi kamu chifanyidina, mulong Yehova utwinkin kashinsh anch: “Ndiy ukata kutenchik njil yend chitentamina salal, ndiy ukuman dipandish dia Nzamb.”—Kus. 50:23.