Shikol Yituwanyishina Mulong wa Mijikit ya Usey Nakash mu Mwom

Antu akat kuyang ku shikol mulong wa kwilej yany yikeza kuyikwash kuwanyish jintong ja mu mwom wau. Ov, rutong ik, ridia ra usey nakash kupandakanamu kumutumbish mwin Kupan mwom ni kuyikwash antu akwau kwilej kwijik ya kushilamu yend ni jinjil jend? Kwikil ap rimwing. Rutong ra Shikol ya Mudimu wa Uteokras ridi ra kutuwanyish chakwel kuyifundish antu akwau ritiy retu. Chawiy lel, pitukumangena rubing ni rubing ku shikol, tukat kutambul ukaliweny ukutwisha kutwikadish tayad mulong wa kusal mijikit ya usey nakash mu mwom.

² “Program wa Shikol ya Mudimu wa Uteokras wa 2003” wabudikin mu nimero wa Mudimu Wetu wa Want wa ngond wasutina ou. Program ukwet jinsangu jivud jilejena mutapu uwamp wa kutakel shikol. Ukutwish kuchiman anch chidi cha ukwash nakash kulamin program mu buku wey Tirez profit de l’École du ministère théocratique, buku winou ufanyidin kumusend chisu uyila ku Shikol ya Mudimu wa Uteokras rubing ni rubing. Tushinshikinany jinsangu jimwing ja Shikol ya Mudimu wa Uteokras wa 2003.

³ Ukaliweny wa Kulond: Kusambish kamu pa Chiwong, chikumangan ni chikumangan chikez kusambish nich misamb ya aminit atan piur pa ukaliweny wa kulond ap piur pa mulad kanang wa kutang, wa kwilej, ap wa kufundish. Kalam wa shikol ukez kupan misamb yiney ya kusambish, ap ukutwish kuyipan kud mukurump mukwau uwanyishinau nawamp kupan misamb yiney. Mwin kulond ukwisambin kurumburik ni usey wa ukaliweny wa kulond. Ufanyidin kand kukasikesh misamb ni kwisambin yilikej ya Mifund ni kumekesh mutapu wa kusadil ukaliweny winou wa kulond, ni kupwitin kamu nakash manangu pa kumekesh mutapu chikutwisha kuwapish mudimu wetu wa chingand.

⁴ Misamb No. 1: Akadivar akwinkishau kupan diskur dia mafundish ayinkishin kand chiyul cha “kwasin pa usey wa kusadil kwa yom yidia mu rusangu risambidinau.” Chinech chirumburikin kumekesh ku chikumangen mutapu wa kusadil rusangu riner. Anch akwinkish misamb yiney, shinshikin yifundinau mu buku École du ministère paj wa 48-49 mulong wa kutan yiyul piur pa mutapu wa kurijek chikunku chinech, ni kwilej mareferans malejenau mu index udia mu buku mu kamutu kakemp “Kusadil kufanyidina.”

⁵ Program wa Kutang kwa Baibel: Anch pasak, wadingap ni kutwish kudandamen nich kutang kwa Baibel kwa rubing ni rubing, mulong wak kulik kukwat mupak wa kulondul piswimp nakash program wa muvu unou? Antu akata kusal mwamu akez kupwish kutang Mifund ya Ugrek ya Ukristu kwisudiel kwa muvu. Ukwash udiokila ku kusambish program wa kutang kwa Baibel nich Mifund ya Ugrek ya Ukristu aurumburil pa paj wa 10, paragraf wa 4, mu buku École du ministère.

⁶ Milong Yijim ya Chikunku cha Kutang kwa Baibel: Chikunku chinech achilepishin kushik ku aminit dikum chakwel anch in kukumangan niyau apana yirumburil pa chikunku cha kutang kwa Baibel kwa rubing. Antu akwinkishau kusal chikunku chinech afanyidin kulimish nakash chisu chiyinkinau. Akez kuchipan rubing ni rubing, ni pa rubing ra dichirikin diakad kufund. Piutangina mashapitre malejenau, kimb manans makutwisha kukukwash mu dilejan dia dijuku diey, mu mudimu wey wa kulejan, ap mu mwom wey. Ngikadil ik ya Yehova yamekana mu kusadil kwend pamwing ni antwend ni akamichid? Chom ik wilejina chakasikeshina ritiy rey ni kukudish kusanger kwey mulong wa Yehova? Ikal nich want ipey wa kupan yirumburil pa dinans din diawonsu didia mu mashapitre malejenau, ap anch didi mu mifund yikutangau mu Misamb No. 2, mulong mukadivar ukutanga kakupanap yirumburil piur pa mifund yiney.

⁷ Misamb No. 2: Misamb ya mwan a shikol wa kusambish rubing ni rubing yikwikal kwiyijidish kutang kurutu kwa chisak cha antu. Kutang kwin kwawonsu kwa ngond ni ngond kukez kudiokal mu chikunku cha kutang kwa Baibel kwa rubing. Kutang kwa nsudiel kwa ngond kukez kudiokal mu Tour de Garde. Mwan a shikol ufanyidin kutang yom yilejenau pakad kupan misamb ya kusambish nich ap ya kupwish nich. Mwi njil yiney, ukutwish kwasin pa rutong rend ra kusambish ra ukaliweny wend wa kutang.​—⁠1 Tim. 4:⁠13.

⁸ Misamb No. 3 ni No. 4: Yivud ya misamb yiney yidiokil mu buku Comment raisonner kupandakanamu mabuku makwau; yimwing yikwet kwau kusu mutu wa mulong. Antu akutambula misamb yikweta mareferans makemp ma kusadil ap yikweta kusu mitu ya milong akez kwikal nich chisend cha kusal misamb yau kupwa kwa kukimbijol kwau mu mikand yetu ya Ukristu. Chinech chikutwish kuyiswapel anambaz kupan yirumburil yau ayinau kud in kusutish nau misamb.

⁹ Mikadil: Mud muchilejenau pa paj wa 45 mu buku École du ministère, kalam wa shikol ukutwish wapan mwikadil (ndond). Pakwez anch kasadilap mwamu, anambaz akutwish kutond mwikadil umwing udia pa paj wa 82. Anch nambaz ukat kupan misamb yimwing mu angond aad, mikadil 30 yikez kumukwash nakash mu mutapu kushalijan mu chirung cha mivu yitan. Anambaz akutonda mwikadil No. 30, “Mwikadil ukwau wa misamb wambatena ni pol pen,” afanyidin kufund mwikadil kwishin ap panyim pa dipaper dia kupanin misamb (S-89). Kalam wa shikol ukez kufund dichuku dia ngond dia misamb ya mwan a shikol pa paj wa 82 wa buku wend piswimp ni mwikadil ukusadilay. Ukutwish kusal mwamu pa chisu chifundinay pa dipaper dia yiyul ya mwan a shikol.

¹⁰ Dipaper dia Yiyul: Dipaper diey dia yiyul didi mu buku wey. Disambishidin pa paj wa 79-81. Chawiy lel, ukwikal nich kuswir kwa kupan buku wey kud kalam wa shikol kupwa kwa misamb ni misamb ukupana. Kalam wa shikol ukez kwikal nich kuswir kwa kwijik manans ma yiyul pasadidilau an a shikol.

¹¹ Dichirikin Diakad Kufund: Dichirikin dia Shikol ya Mudimu wa Uteokras akez kuditakel pakad kufund. Dikez kusambish kusadik kapamp kamwing kupwa kwa angond aad ni dikez kusadik mu aminit 30. Yipul ya kushinshikin pa chisu cha dichirikin yikez kusambish kubudikin mu Mudimu Wetu wa Want. Anch rubing ritenchikinau ku program mulong wa dichirikin diakad kufund rambatan ni rubing ra chikumangan cha munyimuku ap ni rubing rikwezay kalam wa munyimuku mu chikumangen chen, chawiy lel misamb ya rubing ra kurutu yikusadik pa rubing riner ni dichirikin diakad kufund rikez kusadik pa rubing rilondwilaku kurutu.

¹² Tulas Tukwau: Yikumangen yikweta an a shikol avud kupandakanamu 50, amakurump akushinshikin piur pa kusadil kwa tulas tukwau. “Ditenchik dined difanyidin kudisadil mulong wa misamb yawonsu ya an a shikol ap kwau kusu mulong wa misamb No. 3 ni No. 4.” (École du ministère, paj wa 285) Chiyul chinech chidi mulong wa yikumangen mudia anambaz avud pakwez akadivar akemp mulong wa kusal misamb ya kutang. Amakurump afanyidin kutond akadivar awanyishinau nawamp mulong wa kutakel tulas twinetu.

¹³ Mwin Kupan Yiyul Nkwash: Mud muchilejenau mu Program wa Shikol ya Mudimu wa Uteokras, chisak cha amakurump chifanyidin kutond mwin kupan yiyul nkwash chakwel apanang yiyul ya muntu ipend kud amakurump ni ankwash’a mudimu apanina milong yijim ya chikunku cha kutang kwa Baibel ni asadila madiskur ma mafundish. Mukadivar utondinau mulong wa kusal mwamu ufanyidin kwikal muntu wija yivud, muntu ukutwisha kupan yiyul yikulimishau kud amakurump akwau. Chiyul chend chifanyidin kwikal chitungina, chikasikeshina kulond kuwamp ni ukaliweny wa kufundish ni chipanina dinans dimwing ap maad mulong wa kuya kurutu. Chiswiridikinap kwau chisu chawonsu kupan yiyul kud mukadivar ukata kusutishang yikunku chisu ni chisu kupwa kwa diskur din diawonsu. Pakwez, mukadivar utondinau kwikal mwin kupan yiyul nkwash ufanyidin kujingunin ni kwijik anch ata akadivar ija kupan madiskur kurutu kwa antu avud akutwish kuyikwash chakwel kudandamen kuya kurutu.​—⁠1 Tim. 4:⁠15.

¹⁴ Yifanyidinau in Kupan Yiyul Kuta Muchim: Chom ik chikutwisha kumukwash mwin kupan yiyul kushinshikin misamb? Mushet wa kasatu udia mu mashapitre mavud pa mashapitre 53 ma buku École du ministère ukwet mu wiswimp yitufanyidina kuta muchim. Kalam wa shikol ufanyidin niyend kand kufund yivurish yikwau ap yiyul yidia mu buku yikeza kumukwash kujingunin mutapu utenchikinau yom swa ni mutapu uwamp wa kupan misamb. Chilikej, shinshikin yipul yidia kwiur kwa paj wa 55 ni chitongijok chidia mu paragraf wa nsudiel pa paj wa 163.

¹⁵ Izwish Ndond Yidia Wash: Kuwejin kwi ndond yijim yidia wash kuns-kuns kwa mapaper, buku École du ministère ukwet ndond jivud jidia wash mulong weyey kuwejinaku yom ufundina piusadila dilejan diey amwiney ni piukumangena ku Shikol ya Mudimu wa Uteokras. (Tal paj wa 77, 92, 243, 246, ni 250.) Shinshikin anch ukwet buku wey rubing ni rubing. Londul mu buku wey chisu cha misamb ya kusambish. Lam buku wey wa kuburil mulong wa misamb yishadilaku ya shikol. Fund yiyul yipaninay kalam wa shikol. Tang matu ku ukaliweny wa kufundish nich, ku yipul, ku yilikej, ku ukaliweny wa kulond, ku yishimu, ku yom yikwashina kutesh, ni kushalijan kusadidinau in kulond. Anch ukat kufund yom yifanyidina, ukez kutwish kuvurik ni kusadil manans mavud ma ukwash wafundina pa chisu cha shikol.

¹⁶ Yesu Kristu wijika anch kulejan rusangu ruwamp ra Want wa Nzamb chidi chisend chimwing cha usey chikutwishau kumwink muntu. Wawiy wadinga mudimu wend wa kusambish. (Marko 1:38) Ndiy walonda anch: “Am niwapidil kulejan [rusangu ruwamp] ra want wa Nzamb ku mal makwau kand, mulong chawiy chantuminau.” (Luka 4:​43, TMK) Mud antu itiyina diladikij diend dia kumulondul, niyetu tukwet yivud ya kusal mu kulejan rusangu ruwamp, ni chisu ni chisu tukat kwikasikesh kuwapish ngikadil ya “yakupesh ya kushiman.” (Heb. 13:15) Chakwel kuwanyish rutong riner, tufanyidin kukwat mipak ya kusadil chisu chin chawonsu ku Shikol ya Mudimu wa Uteokras, shikol yikeza kutukwash kwirijek mulong wa mijikit ya usey mu mwom.