Yivurikany Antu Ashinshamena Ananapina Kal
1 Ap anch wadinga mwadiamufu ni wikalap nchik upal wend, Ana, mband wadinga nich mivu 84 “kaburenangap mu tempel.” Kushinshaman kwend kwamubachika Yehova kumwinkish chiyukish chimwing cha pakampwil. (Luka 2:36-38, NW) Nlel, akadivar nau anambaz avud amekeshin spiritu wa chilik chimwing mud wadingay nich Ana yikalap nchik mikadil yikash yirishinau nich. Antu ashinshamena mud inay pakatau kurish nich milong ya ukash wa mujimbu ap kukangany kusal yom kanang mulong wa upal, akutwish yisu yimwing kuziy. Tushinshikinany mitapu yimwing yifanyidina mutukutwisha kuyikasikeshin ni kuyikwash chakwel alama chaku chiwamp cha muspiritu.
2 Yikumangan ni Mudimu: Chisu chikatau antu akwau kwitenchik kwa rukat mulong wa kuyendish, amapal avud ashinshamena akutwish kamu mutapu uswapela kukumangan pakad kujing ku yikumangan ya Ukristu. Chinech chikat kuyikasikesh atushalapol inay ashinshamena, asala kal mivu yivud kwikal akash muspiritu ni kukwash kand chikumangen. Ov wasadilap kal nau mu mudimu winou upandakena kuwap?—Heb. 13:16.
3 Kusadil chisu chin chawonsu mu mudimu kukat kuyiletin in Kristu akin musangar ni kuyizangamish nakash. Pakwez kusal mwamu kuyikasikedin amapal ni antu ayibid. Ov kudi mutapu wa kwel anch umwing wa akadivar inay akatish akubachikijaku mud ‘mwin mudimu ney’ mu milad yimwing ya mudimu wa kupan uman? (Rom 16:3, 9, 21) Ukutwish pamwing ap kumutazuk chakwel asadila ney pamwing mu kupan uman wa ku telefon ap kuya ney mu kuchirikinamu kusu ap ku dilejan dia Baibel. Anch ipal winou katwishiningap kutumbuk kudiokal kwol kwend, ov ukutwish kumutazuk mwin kwilej Baibel chakwel uya nend kwol kwend mulong wa kwilejinaku?
4 Dilejan ni Urund: Chisu ni chisu, amwing akat kumutazukang ipal ap chibid umwing kwez kukumangan ku dilejan diau dia dijuku, ap kand kusadil dilejan ku chikumbu chend. Maku umwing wadinga ni kuyisend anend aad anikanch ni kuya nau ku chikumbu cha nambaz umwing ipal mulong wa dilejan diau dia Recueil d’histoires bibliques, ni kukumangen pamwing kwinoku kwayikasikesha awonsu. Antu mud inay akat kusanger kand kuyitazuk mulong wa yakudia ap mulong kand wa yinship yimwing ya mu chisak. Anch ayibid aziyil nakash mulong wa kusal kuchirikinamu kusu kuvud, pamwing ap ukutwish kuyendil ap kwiman mulong wa kuyitangin mu wiswimp, kulembil nau pamwing, ap kwisamb nau uman umwing ukasikeshina.—Rom 1:11, 12.
5 Yehova uyilamidin amapal ashinshamena yom yiwamp. (Heb. 6:10, 11) Tukutwish kumwimburij ni kumekesh kusanger kwetu mulong wa awiy ni kuyikwash chakwel alama chaku chau chiwamp cha muspiritu.