Tulejanany Uruu wa Want
“Chifanyidin am kurumburil Rusangu Ruwamp ra Want wa Nzamb mu mal makwau kand, wawiy mulong wantuminay Nzamb.” (Luka 4:43) Ku mazu minam, kwawiy kwalejenay Yesu mutu wa mulong wa mudimu wend—Want wa Nzamb. Uruu tukata kulejan nlel ushindamedin ni wawiy pa Want, mud muchilejenau mu Mateu 24:14: “Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.” Uyakin ik ufanyidinau antu kutesh piur pa Want wa Nzamb?
2 Want wa Nzamb uyikedil katat mwiur ni piswimp ap kamu ukuswinkan winyikel wawonsu wa muntu. Djabul amwopata kal mwiur, ni ditenchik dined dia yom yiyimp diandamin kal mu chirung cha machuku mad ma nsudiel. (Kuj. 12:10, 12) Ditenchik dikur dia yom dia Satan akez kudishesh kamu shitit, pakwez Want wa Nzamb kiukezap kunyikek. Ukez kushal chikupu.—Dan. 2:44; Heb. 12:28.
3 Want ukez kuwanyish maswir mawamp ma antu in kuziyil awonsu. Ukez kudiosh mar ma njit, chisum, kwakamishan, ni uzwendj. (Kus. 46:8, 9; 72:12-14) Antu awonsu akez kwikal ni yakudia yivud. (Kus. 72:16; Isa. 25:6, NW) Mayej ni ubid yikez kwikal kwau yom ya pakur. (Isa. 33:24, NW; 35:5, 6, NW) Muchid wa muntu chiuyila kushiken ku kuwanyidin, divu akez kudikarumun kwikal paradis, ni antu akez kushakam pamwing mu kwovijan.—Isa. 11:6-9, NW.
4 Tumekeshin anch tusotin kwikal antu akezau kuyikel kud Want wa Nzamb kusutin ku mashakamin metu ma katat. Uruu wa Want ufanyidin kwikal nich usu mu mwom wetu wawonsu, mu jintong jetu ni maswir metu ma kusambish. Chilikej, ap anch tukwet chisend cha kuwanyish maswir ma chikumbu chetu, kitufanyidinap kushil ndond kulondul kwa yom ya mapit ma ku mujimbu kukangesh yisakin ya Want. (Mat. 13:22; 1 Tim. 5:8) Pakwez, tufanyidin kutesh chiyul chibabeshina cha Yesu: “Pa ndond pa yom yiney, en kimbany bil Want wa Nzamb ni yom yisotilay, chad ndiy ukukuwejinanyaku yom yiney yawonsu.”—Mat. 6:33.
5 Chidi cha kuswakal anch antu atesha ni asala kwambatan nich uruu wa Want pikuchidia chisu ap. Tuyikwashany amboku antu kusal mwamu nich ‘kupakish kukarumun yitongijok yau chakwel itiya yom yakin ya Want wa Nzamb.’—Midimu 19:8.