“Ikalany Irijekina Kal”
1 Mu uprofet wend ujim piur pa nsudiel ya ditenchik dined dia yom, Yesu wababeshana pantaliken nich kwikal akwatikena nich yakamish ya mwom wa mangand. (Mat. 24:36-39; Luka 21:35, 36) Mulong kushiken kwa kukashimuk kwa riyind rijim kukutwish kwez pa chisu chin chawonsu, chidi cha manangu anch tuta matu ku kubabesh kwa Yesu: “Chawiy kand en ikalany irijekina kal, mulong pa chisu chiukulikanya kutong en, chawiy chikwezay Mwan a muntu.” (Mat. 24:44, TMK) Ov chom ik chikutwisha kutukwash pa mulong winou?
2 Kurish Nich Yakamish ni Yizuwol: Umwing wa mipit ya muspiritu utufanyidina kudimukin nakash yidi “yakamish ya mwom wa ngand yiney.” (Luka 21:34) Mu jingand jimwing, uzweny, kuburen mudimu, ni yikokujol ya mwom yikat kukasikesh mutapu wa kutan yom tuswirikedina mu mwom. Oku mu jingand jikwau, kupit mapit ma ku mujimbu kuswapel nakash. Anch kwiyakamish nakash mulong wa yom ya ku mujimbu kwasambish kal kuyikel yitongijok yetu, tudi mu chak cha kushadish kutal pa yom yakin ya Want. (Mat. 6:19-24, 31-33) Yikumangan ya Ukristu yikat kutukwash kuta muchim pa yom yakin ya Want. Ov ridi rutong rey ra kukumangan ku yikumangan yin yawonsu?—Heb. 10:24, 25.
3 Nlel mangand mizwil too nich masengan makutwisha kutwiy swa chisu chetu cha usey. Kusadil ordinater kukutwish kwikal mupit anch muntu ukat kusutishaku chisu chilemp nakash mulong wa kutal pa Internet, kutang ni kufund mikand, ap kusengan masengan pa ordinater. Chisu chakad kutwish kuchind chikutwish kushadikin ku kutal televizion, mafil, kwipuwangesh, kutang yom ya ku mujimbu, ni masengan, yikat kutushil kachisu kakemp ni usu ukemp mulong wa yisakin ya muspiritu. Ap anch kwiswedish ni kwipuwangesh kukutwish kulet usu mu kachisu kanang, dilejan dia muntu ipend ni dia dijuku yikat kulet ukwash wa chikupu. (1 Tim. 4:7, 8) Ov ukat kwitekinaku chisu cha kutongijokin pa Dizu dia Nzamb dichuku ni dichuku?—Ef. 5:15-17.
4 Tukwet musangar mud ik anch dirijek dia Yehova diatenchikin kal program wa malejan ma muspiritu chakwel kutukwash ‘tutwisha kurezik ap kwipuk ku yom yiney yawonsu piyikushikena, chad wez wimanany kurutu kwa Mwan a muntu’! (Luka 21:36) Tukutwish niyetu kwisakin sens ukwash wa yitenchik yiney ni ‘kwikal irijekina kal’ chakwel anch ritiy retu ritwisha kwikal musul wa “kushiman, ni uyaj, ni katumb pa dichuku dikumekanay Yesu Kristu.”—1 Pi. 1:7.