Tukutwish Kusal Yitinay Yehova
1. Ov, yovil ya mutapu ik tukutwisha kurish nich pa yisu kanang, ni mulong wak?
1 Kusadil yijil ni mbil ya Yehova yidi njil ya mwom yipandikena kuwap nlel unou, ni yikat kutukwash kutek dinguj diwamp dia dikez ya (machuku ma kurutu) dia chikupu. (Kus.19:7-11; 1 Tim. 6:19) Pakwez, mangand ma Satan makat kututek mu yakamish yivud. Mujimbu wetu wakad kuwanyin ukat kusal mwikadil wikal uyimp nakash. Pitukata kupakish kuwanyish yisend yetu ya Mifund, tukutwish kwiyov mud yitulimidin nakash. (Kus. 40:12; 55:1-8) Tukutwish kand kwiyipul anch tukutwish kusal yawonsu yitwitinay Yehova. Chom ik chikutukwasha kulam kwiman kwetu kwa muspiritu, pa yisu mud yiney?
2. Ov, mutapu ik mukatay Yehova kututongin mu yitwitinay?
2 Yijidik ya Yehova Yikasikenap: Yehova kakutwishap kututwik yom yitwakad etu kutwish. Yijidik yend yikasikenap pakwez yidi mulong wa kuwap kwetu. (Kuv. 10:12, 13; 1 Yoh. 5:3) Ndiy wij kuziy kwa untu wetu, ‘ukat kuvurik anch tudi kwetu rufunfut.’ (Kus. 103:13, 14) Nzamb witiyijin nich ranaken usu wetu wa kumusadin, wikalap nchik ukemp mulong wa mikadil yetu. (Lev. 5:7, 11; Marko 14:8) Ndiy utwitin kutek yisend yetu padiay ndiy, ni utwinkin kashinsh anch ukusal chakwel tushala ashinshamena.—Kus. 55:22; 1 Kor. 10:13.
3. Mutapu ik ukatay Yehova kutukasikesh chakwel tujijaman?
3 Kuswir kwa Kujijaman: Jinsangu ja Baibel ja antu ajijamana mud Eliya, Jeremiy, ni Paul jilejen usey wa kujijaman. (Heb. 10:36) Yehova wayikwasha mu yisu ya mar ni ya kuziy. (1 Ant 19:14-18, NW; Jer. 20:7-11; 2 Kor. 1:8-11) Kushinshaman kwa akadivar netu a mu chirung cha katat kutukasikeshin. (1 Pi. 5:9) Kutongijokin pa yilikej mud yiney kukutukwash chakwel kangal twaziy.
4. Mulong wak chidi cha usey kuvurik chisu chawonsu kushilamu kwa Nzamb?
4 Ruchingej mu kushilamu kwa Nzamb ridi mud ‘nkwat ya mupim.’ (Heb. 6:19) Ramubachika Aburaham ni Sara kwitiy kudiokal mwi ngand yau kuya ‘kushakam mud angez mwi ngand ya kushilamu’ yayilejay Yehova. Ramukasikesha kand Moses kulam ba pakad wom difukwil diakin. Ramukasikesha Yesu kujijaman mu mar makash pa mutond. (Heb. 11:8-10, 13, 24-26; 12:2, 3) Kulam kushilamu kwa Nzamb kwa ngand yisu ya kutentam mu michim yetu ni kwawiy kukutukwash chakwel kwiman dang.—2 Pi. 3:11-13.
5. Mulong wak kuvurik yisal yetu ya pasak ya kushinshaman kukutwish kutukasikesh?
5 Kuvurik yisal yetu ya pasak ya kushinshaman, ya kwipan, ni ya mushiku wetu kukutwish kutwinkish kand usu mu mudimu wetu. (Heb. 10:32-34) Kutuvurishin musangar tukwetinga pitukata kusal yitinay Yehova—kwipan nich mupim wetu wawonsu.—Mat. 22:37.
[Caption on page 1]
[Study Questions]