Program Musu wa Chikumangan cha Pakampwil cha Dichuku Dimwing

Anch twaman ap twatesh chijingidij cha dibabesh chad twalik kuchisadil, yibudikin yikwikal yiyimp. Chidi cha usey nakash kusadil umutakel wa muspiritu upaninay Yehova. Chom chinech akez kuchikasikeshin mu program wa chikumangan cha pakampwil cha muvu wa mudimu wezina. Mutu wa mulong udi anch “Babalany Mudi Uteshilanya.”​—⁠Lu. 8:​18, MM.

Mu diskur diend dia kusambish, mwin kulond ngez ukushinshikin mutapu ututadila niyetu nlel unou chiyul chidia mu mimbu ya kusambish ya mukand upepidilau spiritu wa Nzamb wayifundinau in Hebereu kud Paul. Mu diskur dia nsudiel dilondila anch, “Tutany Matu ku Malejan ma Nzamb Chisu Chawonsu,” ukutukwash etu awonsu kwishinshikin anch chakin kamu tukat kumutesh Yehova, Mwanend, ni “Kashalapol ushinshamena ni kubabal.”​—⁠Mat. 24:45.

Yikunku yivud ya program yikwikal ya ukwash mulong wa majuku. “Majuku Makata Kutesh Dizu dia Nzamb Pakad Kampuw” dikutukwash kwilam ku yom ya mangand yikutwisha kuziyish mwom wetu wa muspiritu. Mukwikal ma interview ma antu aswimpina mulong wa kutek yom ya muspiritu pa ndond ya kusambish. “Kuta Matu ku Dizu dia Nzamb Kuyikasikeshin Ansand Etu” dikwikal nich ma interview ma ansand amekeshina kushinshaman kwau mu uyakin ku shikol, kud arund nau, ap mu mudimu. “An Akemp Akat Kumutesh Nzamb ni Kwilej” dikutukwash kulik kudiburil ukaliweny wa an akemp wa kwilej. Ma interview ma an akemp ni anvajau makutukwash kuman chiyukish chikata kudiokal ku kuyifumbin an mu jinjil ja Yehova kudiosh kamu ku wanikanch.

Ap anch Satan ukat “kuyipumbol antu a mangand mawonsu,” Yehova ukat kuyilej atushalapol end ashinshamena njil ya kuya. (Kuj. 12:​9, MM; Is. 30:21) Kuta matu ku chiyul chend ni kuchisadil mu kuziyil mu mwom wetu kutwikadishin in manangu, kutuletidin musangar, ni kututwal ku mwom wa chikupu.​—⁠Jinsw. 8:​32-35.