Tutakelany Malejan ma Bibil Mayila Kurutu Chikunku 7: Kulembil pa Chisu cha Dilejan
1. (a) Mulong wak chifanyidina kusambish ni kupwish dilejan dia Bibil nich malembil? (b) Mutapu ik tukutwisha kusambish malembil ku dilejan dia Bibil?
1 Pakwel anch in kwilej Bibil aya kurutu muspiritu, chidi cha usey kwit chiyukish cha Yehova. (1 Kor. 3:6) Chawiy lel, chidi chifanyidina kamu kusambish ni kupwish dilejan nich malembil. Chisu ni chisu tukutwish kulembil kamu kapamp ka kusambish ka dilejan nau antu ipanina nakash kud Nzamb. Pakwez nau in kwilej akwau, tuswiridin kujingunin chisu chifanyidina cha kusambish nich malembil. Ukutwish kusadil Kuseng 25:4, 5 ni 1 Yohan 5:14 chakwel kumukwash mwin kwilej kwov kurumburik kwa mulong utufanyidina kulembil ni kusadil kand Yohan 15:16 chakwel kurumburil usey ujim wa kulembil kud Yehova kusutil kud Yesu Kristu.
2. Anch mukadivar wabatishau kal ap mwin kulejan ikundj wakad kubatishau umutwadilaku nambaz ku dilejan dia Bibil, nany ufanyidina kulembil?
2 Nany ufanyidina kulembil ku dilejan dia Bibil? Anch mukadivar wabatishau kal umutwadilaku nambaz ku dilejan dia Bibil, ndiy ufanyidina kulembil, ap anch nambaz ukutwish kutakel dilejan ni kudjal chitambal ku mutu. (1 Kor. 11:5, 10) Pakwez, anch mwin kulejan wa Want ikundj wakad kubatishau umutwadilaku nambaz ku dilejan, nambaz ukulembil. Pa chinech, nambaz ufanyidin kudjal chitambal ku mutu chisu chilembilay ni chitakedilay dilejan.
3. Yom ik yifanyidina kwit mu malembil tusadila pa chisu cha dilejan dia Bibil?
3 Yifanyidina Kwikal mu Malembil: Malembil ku dilejan dia Bibil mafanyidinap kwikal malemp, pakwez mafanyidin kwikal marumburikina. Kuwejin ku kwit chiyukish cha Nzamb pa dilejan ni kujikitish mulong wa uyakin twilejina, chidi chifanyidin kumushiman Yehova mud Musul wa mafundish. (Is. 54:13) Tukutwish kand kuwejinaku mazu mamekeshina kusanger kwetu kwa kashinsh mudiay mwin kwilej ni kujikitish kwetu mulong wa dirijek disadidilay Yehova. (1 Tes. 1:2, 3; 2:7, 8) Kwit kwetu chiyukish cha Yehova mulong wa usu wa mwin kwilej chakwel kusadil yom yilejinay kukutwish kumukwash kuman usey wa kwikal ‘mwin kusadil dizu.’—Jak. 1:22.
4. Kusambish ni kupwish dilejan dia Bibil nich malembil kuletining yiyukish ik?
4 Kuding yiyukish yivud yidiokiling ku malembil pa chisu cha dilejan dia Bibil. Makat kulet chiyukish cha Nzamb. (Luka 11:13) Makat kukasikeshin usey wa kwilej Dizu dia Nzamb. Pateshinay mwin kwilej ku malembil metu, ukat kwilej mutapu wa kulembil. (Luka 6:40) Chikwau kand, malembil madiokila ku muchim wizwila nich rukat ra Nzamb ni kujikitish mulong wa mikadil ya untu wend yipandakena kuwap yikutwish kumukwash mwin kwilej kukudish urund wend amwinend ni Yehova.
[Caption on page 1]
[Study Questions]