Tudandamenany Kukasikeshijan Umwing ni Mukwau
1 Kambuy Paul wasala yawonsu yatwishay mulong wa kuyikasikesh ambay nend mu ritiy. (Midimu 14:19-22) Chilik chimwing, tukwatikening anch akadivar netu adi mu mikadil yikash, ni tusotining kuyikwash. Bibil ulejen anch awonsu, kadiap kusu amakurump, afanyidin kuyitongin antu akwau. (Rom 15:1, 2) Tal mitapu yaad mutukutwisha kuteshin kukasikesh kwinoku kwa rukat: “Chawiy ongojijanany pamwing umwing ni mukwau, ni kukudishan [kukwashijan, MM] mudi chiukat kusalany kand.”—1 Tes. 5:11.
2 Jingunin Maswir ma Antu Akwau: Dizu dia Nzamb dilejen anch Dorkas “wading wizwil sens ni midimu yiwamp ni riy.” (Midimu 9:36, 39) Ndiy washinshikina antu adinga mu maswir ni wasala yawonsu yatwishay chakwel kuyikwash. Chidi chilakej chiwamp mud ik chatushilay! Chitwishikin anch wij ipal umwing uswiridina ukwash chakwel kwez ku chikumangan. Ap kukutwish kwikal chibol uburedina muntu wa kusal nend mudimu wa kulejan dichuku kanang mu rubing kupwa kwa midi. Anch wajingunin maswir mud minam ni kupan ukwash ufanyidina, tongin mutapu chikumukasikesha muntu mud winou!
3 Mambamb ma Muspiritu: Tukutwish kand kukasikeshijan umwing ni mukwau kusutil ku mambamb metu. (Efe. 4:29) Mukurump umwing chifuvu walonda anch: “Anch usotil kwikal mwin kukasikeshan, isambina yom ya muspiritu. Chakwel kusambish mambamb matungina muspiritu, ukutwish kusadil chipul mud, ‘Mutapu ik wileja uyakin?’ ” Mekesh nich muchim utok anch ukat kuyibangin ansand adia mu chikumangan. Yibangina antu aziyina ni antu akutwisha kwikal akad kuzangurok. (Jinsw. 12:25) Kangal washil minsamb ya kwipuwangesh ya mangand yipwisha chisu cha mambamb mawamp ma muspiritu nau ambay in ritiy.—Rom 1:11, 12.
4 Yom ik lel ukutwisha kulond chakwel kuyikasikesh antu akwau? Mu dilejan diey ni kutang kwey kwa Bibil, ov, wamenamu chijidik chakasikeshina nakash rukat ni kujikitish kwey mulong wa Yehova? Mu kutesh kwey diskur dia pibur ap ku Dilejan dia Chinong cha Kalam, ov, kudi chom kanang chakukasikeshina? Ap kand, ov, kudi rusangu rikasikeshina ritiy rakwatina kamu nakash muchim wey? Anch waman nich usey yom yiwamp ya muspiritu, ukez kwikal chisu chawonsu ni chom kanang chikasikeshina cha kwisamb ni antu akwau.—Jinsw. 2:1; Luka 6:45.
5 Kusutil ku kupan ukwash wa kashinsh ni kusadil rudim retu nich manangu, tudandamenany kukasikeshijan umwing ni mukwau.—Jinsw. 12:18.