Kampany wa Pakampwil pa Mwinkind 16–Kalang 12!

¹ “Kusheshik kwa Relijon wa Makasu Kudi Piswimp!” Wawiy mutu wa mulong wa Rusangu ra Want No. 37, tukwangana mu mangand mawonsu ngond ukwezap ou. Mu chikunku cha kusambish cha Mwinkind, tukez kupan Chinong cha Kalam ni Réveillez-vous ! Kusambish Diamond, Mwinkind 16, kushik Diarubing, Kalang 12, tukwangan kamu nakash Rusangu ra Want No. 37. Machuku ma kwisudiel kwa rubing pa chisu cha kampany, tukez kupan trakt winou pamwing ni magazet ma kupan pa chisu chinicha.

² Nany Ukusala Kampany?: Antu awonsu akata kulejan rusangu ruwamp awapidil kusal kamu nakash mudimu winou wa kwangan trakt. Amwing akutwish kwikal ayibol ankwash. Ov, ukwet an ap antu ukata kwilej nau Bibil ayila kurutu mu spiritu? Yikwasha isamba nau amakurump chakwel kuman anch awanyishin yitinau mulong wa kwikal atutwambil akad kubatishiu. Amakurump afanyidin kukwat mupak wa kwisamb nau atutwambil akad kulejanang kand chakwel kuyikasikesh kwinungin mu mujikit winou, pamwing akutwish ap asal pamwing nau atutwambil adia ayifuvu.

³ Atumidin yikumangen yawonsu matrakt Rusangu ra Want No. 37 chakwel anch atutwambil atambula muntu ni muntu makopi 50. Ayibol a rawonsu akuyinkish makopi 250. Antu akata kusanger rusangu ruwamp akad kal kwikal atutwambil akutwish kutambul makopi matan chakwel akayangena yidi ya dijuku diau ni arund nau. Atutwambil nau ayibol afanyidin kufund uvud wa matrakt makwanganau kwinyim kwa dipaper diau dia rapor wa mudimu wa chingand kwisudiel kwa Mwinkind ni Kalang. Kalam wa ujindj ukubomb uvud wawonsu wa matrakt mangenau mu chikumangen ni kufund rapor ukutumay ku biro wa mutiy kwisudiel kwa ngond ni ngond. Makopi makwishalap ma Rusangu ra Want kupwa kwa kampany akutwish kumasadil mu milad yikwau ya mudimu wa chingand.

⁴ Ya Kulond: Kangal walond kwey yivud, mulong chinech chikez kukukwash kushikij uruu ndond jivud. Ukutwish walond anch: “Nisadil mudimu usadikina ndond yawonsu pa mangand, mudimu wa kwangan uruu winou wa usey mulong wa kuyikwash antu. Winou ndiy kopi wey, kadiap wa kufut. Mutanga amboku.” Chikutwish kwikal cha ukwash kulik kusend sakosh pituyila ku yikumbu ya antu. Tal nawamp anch ufundin antu awonsu ukutana akusangera uruu.

⁵ Mutapu wa Kulejan mu Teritwar Wey: Pa ndond pa kwangan Rusangu ra Want mu mujikit wa mu mukombil, kungin usu wey wawonsu mu mudimu wa ku chikumbu ni chikumbu ni mu teritwar mudia in kwisak avud pichitwishikina. Fund majin ma ndond wakad kutan antu, ni sal usu wa kuchirik chisu chindjing ap dichuku dikwau mu rubing. Kusambish Diamond, Kalang 6, ukutwish wasambishany kusha trakt winou ku yikumbu kwakad kwikal antu. Pakwez, anch chikumangen chikwet teritwar mujim ukutwishau kupwish mu chisu chinech cha kampany, amakurump akutwish kutal anch asambisha kusha Rusangu ra Want ku yikumbu kwakad kutan antu mu chisu chawonsu chikusadika kampany.

⁶ Kusheshik kwa Babilon Mujim kwashej kal kamu piswimp nakash. Antu afanyidin kudiokalamu kurutu eza ni kumushesh kamu chikupu. (Kubur. 14:8; 18:⁠8) Irijeka katat chakwel kusal kampany winou ukusadika pa mangand mawonsu chakwel kuyijikish antu awonsu anch kusheshik kwa relijon wa makasu kudi piswimp!